SAN MARCOS 12

1Lawitu' xalni Comam Jesús hune' cuywab'al: —X'oc hune' naj stz'unu' te' uva sat xtx'otx', speni naj shoyanil. Swatx'en naj b'ay ẍpitz'laxoj yal te', xanican̈ naj hune' n̈ah nahat aycan̈ b'ay stan̈elax te'. Lawitu' xanitoj naj te' smunlan̈e' tet hunk'aan heb'naj, xto naj yin̈ sb'el. 2Ha' x'apni stz'ayical yuxlax te', xanitoj naj hune' schejab' schanoj yet, 3yaja' x'oc heb'naj munlawom tu' stzab'aayoj naj. Lawi smak'ot naj, stzumb'elaxtoj naj paxoj, matzet x'a'ot tet naj. 4Lawitu' xanipaxtoj naj yahaw tu' hune'xa schejab', yaja' smak'pooj heb'naj swi' naj, x'oc heb'naj pohloj yin̈ naj. 5Lawitu' xanitoj naj yahaw tu' hune'xa naj syox. Yaja', mak'b'il xu spotx'ot naj. Xto yatoj naj hunk'aanxa heb'naj. Ay heb'naj ton̈e xmak'ot, ay heb'naj mak'b'il xu spotx'ot yu heb'naj. 6Yaja' ayto hune'xa mac maẍto chatoj naj, sc'ahol naj caw xahan ay yu. Xalni naj: Ta ẍwatoj hin c'ahol ti'an, syijye' heb'naj tzet chala', ẍi sc'ul naj. 7Yaja' ha' x'apni naj c'ahole, xalni heb'naj munlawom tu' tet hunun: Ha' naj ti' ẍcanoj yin̈ tzet ay smam ti'. Co potx'o' naj haxin̈wal chon̈ can yahawoj, ẍi heb'naj. 8Hactu' xu stzab'otay naj c'ahole, spotx'ni heb'naj naj, xiniltoj heb'naj snimanil naj yin̈taj peyab'. 9—¿Tzet taxca chute naj yahaw tx'otx' tu'? ha' caw naj ch'apnoj spotx'noj heb'naj munlawom tu', cat ya'noj naj stz'unub' tet hunmajanxa heb'naj. 10¿Maẍto b'ay cheyil yul Yum Comam Dios b'ay chalayoj:Ha' ch'en ch'en sb'ejiloj heb'naj aomcan̈ n̈ah, ha ch'en x'oc scawxeb'aniloj te' n̈ah. 11Hune' ti' swatx'eb'al Comam Dios yeyi, caw c'ayb'alc'ule ye yul co sat, ẍiayoj?. 12Ha' xtxumniloj heb'naj to yet heb'naj ye tzet chal Comam, xalni heb'naj ya'a'coj Comam presu, yaja' xiw heb'naj tet anma, yuxin mat xacoj heb'naj sk'ab' yin̈ Comam, x'elcan̈ heb'naj. 13Lawitu' x'aottoj hunk'aan heb'naj fariseo b'oj hunk'aan heb'naj spartido naj Herodes yilwe' Comam Jesús yun̈e yilni heb'naj ta ay b'ay semc'o Comam yin̈ hunuj stzoti' cat ya'wic'ule heb'naj yin̈. 14Yuxin sk'amb'e heb'naj: —Mam Cuywaom, johtajan to st'in̈anil chawala. Machach nanon hawalni st'in̈anil tzet choche Comam Dios yin̈ sat anma, mach yoc yin̈ maca. ¿Tzet chawute hawalni yin̈ ch'en tohlab'al aycoj jib'an̈ yu naj yahaw Roma? ¿Tox ẍja' ch'en mato machoj?. 15Yaja' yohtajxana Comam tzet nab'il yu heb'naj, yuxin xala: —¿Tzet yuxin che say tzet chu wayc'ay yul sk'ab' heb'naj yahawan? Yewej hunuj ch'en melyu tu' wila'an. 16Syeni heb'naj hune' ch'en. Ha' xilni Comam ch'en, sk'amb'en tet heb'naj: —¿Mac ay yechel aycoj yin̈ ch'en b'oj mac aycoj sb'ih yin̈ ch'en ti'? —Yet naj yahaw ay Roma. 17Yuxin xal Comam: —Ta hactu', yijyewej he ya'ni tet naj yahaw ay Roma b'aytet yet naj, cat heyijyen heya'ni tet Comam Dios b'aytet yet Comam. Ton̈e x'oc heb'naj yin̈ sucal tzet xu spajtzen Comam. 18Lawitu' x'apni hunk'aan heb'naj saduceo sk'amb'e' tet Comam Jesús tzet chu spitzc'aojcan̈ camom, haxca chal scuywab'al heb'naj ta mach ẍpitzc'aojcan̈ camom. Xalni heb'naj: 19—Mam Cuywaom, stz'ib'n̈ecan ya' Moisés, ta ẍcamtoj yichamil hunuj ix ix, mach hunuj yuninal naj chacan tet ix, yilal smohyi pax ix b'oj yuẍtaj naj camom tu', yun̈e yeh yuninal naj b'oj ix cat yoc yuninaloj naj camom tu'. 20Ay hujwan̈ heb'naj yuẍtaj sb'a hactu' xa'le. Xmohyi naj b'ab'el b'oj hune' ix, yaja' xcamtoj naj, mach yuninal naj xacan tet ix. 21Yuxin xmohyi naj scab' b'oj ix, yaja' maẍtic'a yuninal naj xacan tet ix, xcamtoj naj. Xmohyi pax naj syox b'oj ix, maẍtic'a yuninal naj xacan tet ix. 22Hactu' xu yi'ni heb'naj ix shujwan̈il, mach hunuj heb'naj x'eh yuninal b'oj ix, xcamtoj heb'naj. Tzujanxa xcamtoj ix. 23Haxa ẍpitzc'aojcan̈ camom, cat spitzc'aojcan̈ heb'naj b'oj ix, ¿mactaxca najil yin̈ heb'naj hujwan̈ tu' caw yichamil ix chub'canicoj b'etu'? haxca shujwan̈il heb'naj xmohyi b'oj ix. 24Xta'wi Comam: —Hexti' caw c'aynaj hex toj, haxca mache txum tzet tz'ib'n̈eb'ilcan yul Yum Comam Dios, b'oj mat heyohtajoj hantaj scan̈il ye Comam. 25Yet ẍpitzc'aojcan̈ anma yin̈ camical, matxa mac ẍmohyoj, matxa heb'ix ix ẍtoj alib'eal, haxca lahanxa chub'can anma b'oj hej yángel Comam Dios. 26¿Tzet yuxin macheya' yuluj he c'ul ta ẍpitzc'aojcan̈ anma yin̈ camical? ¿Tox maẍto cheyil yul Yum Comam Dios tz'ib'n̈eb'ilcan yu ya' Moisés tzet xu stzoteliltij Comam xol hune' k'uyan telaj ẍlon̈chacoj k'a' yin̈? Chalni Comam tet ya': Hayin ti' chin shak'e ya' Abraham, ya' Isaac b'oj ya' Jacob, ẍiayoj. 27Mataj anma camomxa ẍhak'en Comam Dios, to ha' anma itzitz, ha' ẍhak'en Comam, yuxin caw mataj heyecoj. C'aynaj he c'ul yin̈ hune' ti'. 28Ha' xab'en hune' naj cuywaom yin̈ sley ya' Moisés to hab'an xu stihniloj Comam hune' tu' tet heb'naj, yuxin sk'amb'e' naj tet Comam: —¿B'aytet chejb'anil k'a' yilal ye xacan Comam Dios? . 29Xta'wi Comam: —Ha' chejb'anil k'a' yilal yeyi, ha' hune' ti': Ab'ewej, hex wetcon̈ob' Israel: Ha' Comam Jahaw co Diosal, han̈c'a Yahaw. 30Ochewej Comam Jahaw yin̈ sunil he c'ul, yin̈ sunil heyanma, yin̈ sunil he nab'al b'oj yin̈ sunil heyip, ẍiayoj. 31Scab' chejb'anile, chala: Haca' he yan̈en he b'a, hactu' he xahann̈en mactaj aycoj he cawilal, ẍiayoj. Matxa hunujxa chejb'anil k'a' ayto yelapnoj ye sataj cab' ti'. 32Xta'wi naj cuywaom yin̈ sley ya' Moisés: —Caw yel chawala Mamin. Yeli, han̈c'a Comam Jahaw, matxa hunujxa Dios. 33Yuxin ta sunil co c'ul, sunil co nab'al b'oj sunil jip ẍjochen Comam, cat jochen mactaj ay co cawilal haca' co yan̈en co b'a, k'a' ec'b'al to sataj spotx'lax hunuj no' nok' cat sn̈uslax tet Comam Dios, b'oj sn̈uslax hunujxa tzet xahanb'alil. 34Ha' xab'en Comam to c'ul xu yalni naj, xalni Comam: —Hachti' sutan hachcoj hawoc yul sk'ab' Comam Dios, ẍi Comam.—Hatax tu' xa nanon heb'naj sk'amb'en hunuj tzetet tet Comam. 35Hunec, lan̈an scuywa Comam Jesús yul yamak'il yatut Comam Dios, sk'amb'eni: —¿Tzet yuxin chal heb'naj cuywaom yin̈ sley ya' Moisés to yic'aln̈e ya' rey David ye naj Cristo echmab'il? 36Haxca ha' caw ya' David, iptzeb'il yala' ya' yu Comam Espíritu Santo, xalni ya':Xal Comam Jahaw tet Wahawan:Tz'on̈yan̈ yin̈ hin watx' ti'an, masanto ẍwa'a'coj mac ẍchiwa sc'ul tawin̈ yalan̈ hawojan, ẍi Comam Dios, ẍi ya' David tu'. 37Tato yic'aln̈e ya' David ye naj Cristo, ¿tzet yuxin chal ya' Yahawoj? ẍi Comam.Caw tx'ihal anma yamanc'oj b'etu' x'ochen yab'e' tzet chal Comam. 38Yet xcuywa Comam Jesús, xalnipaxoj: —Nann̈e heyu tet heb'naj cuywaom yin̈ sley ya' Moisés, haxca heb'naj tu' caw choche heb'naj ya'acoj xil k'ape nimej shojo yoj yin̈, b'oj yocheb'al heb'naj caw xiquiltaj stiyoẍli anma tet heb'naj yulaj calle. 39Hej b'ab'el tz'on̈ob'al smajiloj heb'naj b'ay ch'ay tz'on̈noj yulaj capiya b'oj b'ay ch'awtelax heb'naj wa'oj. 40Chinipaxiloj heb'naj tzet ay heb'ix camnajxa yichamil. Yun̈e mach syeloj, caw nimej chute heb'naj yoj yoración. Yuxin k'a' tx'ihal to ch'ec'oj ya' yanma heb'naj. 41Hunec, tz'on̈an Comam Jesús scawilal b'ay chaytoj anma smelyu yet cha'ni yofrenda. T'an̈an Comam yin̈ anma tu'. Ay heb'naj k'alom ch'aniaytoj caw tx'ihal. 42Lan̈antic'a tu', x'apni hune' ix caw meb'a' camnajxa yichamil. Cab'n̈e niẍtej melyu niẍch'an sat xaytoj ix. 43Xawten Comam heb'ya' ẍcuywi yin̈, xalni tet heb'ya': —Yin̈ caw yeli ẍwal teyetan, hune' ix camnajxa yichamil ti', k'a' ec'b'alto cha' ix sataj sunil anma ch'a'ni yofrenda. 44Haxca heb'naj k'alom, ha' tzet mach ch'ocnicoj yu heb'naj, ha' cha' heb'naj yofrendaoj. Wal ix ti', caw han̈c'a ni'an c'uxan slob' ix, ha' cha' ix.


Copyright
Learn More

will be added

X\