SAN MARCOS 11

1Hayet lan̈an yapni Comam Jesús yeb ebnaj iscuywom bey con̈ob Jerusalén, yet ayco Comam yin̈ istzalanil won̈an Olivo, xolbal con̈ob Betfagé yeb Betania, ischejni Comam cawan̈ ebnaj iscuywom, 2yalni Comam tet ebnaj: —Asi'we bey aldea cosatac'to ti'. Hayet chexapno bey tu', cheyila' hune' no' burro xecan, maẍto hunu mac chiahto yiban̈ no'. Chepuhilo no' cat heyiniti no' wetan. 3Ta ay mac chik'amben teyet: “¿Tzet yin̈ xin chepuhilo no'?” ta ẍi, cheyala: “To ay chiocnico no' yu Comam, yaja' pet chon̈hulan̈ jak'a'canojan̈ no',” quexchi, ẍi Comam. 4Isto ebnaj cawan̈ tu', yilni ebnaj no' nich'an burro tu', xecan no' iscawilal hune' pulta, ispuhnilo ebnaj no'. 5Ay xin huntek'an ebnaj lin̈anayo iscawilal tu' k'amben tet ebnaj: —¿Tzet yin̈ xin chepuhilo no'? ẍi ebnaj. 6Haca'tic'a xin yu yalni Comam, hac tu' yu yalni ebnaj, matxa tzet yal huntek'an ebnaj tu'. 7Lahwi tu' yinito ebnaj no' nich'an burro tet Comam. Yanahto ebnaj xil isk'ap yiban̈ no', lahwi tu' yahto Comam yiban̈ no'. 8Caw hantan̈e anma islitx'bayo xil isk'ap yul beh sata Comam. Aypaxo mac inilo isk'ab te te' yanayo yul beh bay chiec'to Comam. 9Yah yaw anma babelico sata Comam yeb anma tzujanico yinta Comam, yalni anma haca' ti': —¡Jala'we tzoti' c'ul yin̈ mac chul coxol ti', yuto chejbilti naj yu Comam Dios! 10¡Jak'awe tzalaho coc'ul yin̈ Jahawil chioc reyal coxol selelo jichmam David! ¡Yuch'andios tet Comam Dios! ẍixan̈e anma tu'. 11Yapni Comam Jesús bey Jerusalén, yocto Comam yul yatut Comam, yilni Comam tzet ye yul yatut Comam Dios. Lahwi tu' ismeltzo Comam yeb ebnaj iscuywom bey Betania hunelxa yuto k'ejbixa. 12Haxa yet hune'xa tz'ayic xin yel Comam Jesús yeb ebnaj iscuywom yul con̈ob Betania, ismeltzo Comam yul con̈ob Jerusalén. Yet ayco Comam yin̈ isbel tu' isn̈ohchacan̈. 13Nahatto ay Comam xin yilnito hune' te' higuera xaelilo xaj, isto Comam yilnoj tato ay sat te' aycoj, yaja' machi hunu sat te' ilcha yu Comam, wal xin xajn̈e te' aycoj yuto maẍto istiempohalo issatni te'. 14Yuxin yal Comam yin̈ te': —Matxa bak'inal chilolax hunu hasat, ẍi Comam. Wal ebnaj iscuywom Comam xin yabe ebnaj yalni Comam hune' tu'. 15Lahwi tu', yapni Comam Jesús yeb ebnaj iscuywom yul con̈ob Jerusalén; yocto Comam yul yatut Comam Dios, istzumbenilti Comam sunil mac chitxon̈wi yeb mac chilok'wi bey tu'. Ispac'chancanocan̈ Comam ismeẍa ebnaj helom melyu yeb isẍila ebnaj txon̈om palamuch. 16Machi xin isje Comam ta chiec'to anma yeb yijatz yul yamak'il yatut Comam Dios. 17Yoc Comam yalno tet anma tu' haca' ti': —Tz'ibn̈ebilcano yul Yum Comam Dios haca' ti': “Ha' watutan yet txah yehi, bay chul anma ay yul hunun tx'otx' nimeta con̈ob txahloj,” ẍiayoj. Walex ti' xin haca' isn̈ach'en elk'om ye yatut Inmaman heyu, ẍi Comam. 18Hayet yaben ebnaj iswi'ehal yin̈ ebnaj sacerdote yeb ebnaj cuywawom yin̈ isley naj Moisés tzet iswatx'e Comam tu', yoc ebnaj issayni yin̈ tzet chu ispotx'ni ebnaj Comam, yaja' xiw ebnaj tet Comam yuto caw chitzala anma yaben cuybanile chal Comam. 19Haxa yet lan̈anxa yay numna xin yel Comam yul con̈ob yeb ebnaj iscuywom. 20Haxa yin̈ hunxa tz'ayic yin̈ sahab sac'ayal ismeltzopaxo Comam Jesús yeb ebnaj iscuywom yul con̈ob Jerusalén, yilni ebnaj iscuywom Comam ta xatajilo te' higuera. 21Isnaniti naj Pedro ta ha' te' istz'acti'n̈e Comam, yalni naj tet Comam: —Mam cuywawom, ilc'anabi, matajnalo te' higuera hatz'acti'n̈e, ẍi naj. 22Istak'wi Comam: —Aweco heyanma yin̈ Comam Dios. 23Yin̈ caw isyelal chiwalan teyet; macn̈etic'a chihalni tet hune' witz ti': “Elan̈ bey ti', bejayto haba xol ha' mar,” ta ẍi. Ta xin chayto yul yanma yin̈ tzet chal tu', mach chi-xin-chicabcon yanma, chij isba tzet chisk'ana. 24Yuxin chiwalan teyet, sunil tzet chek'an yin̈ hetxah tet Comam Dios yilal heyanayto yul heyanma ta chak' Comam teyet; ta hac tu' chechah tzet chek'ana. 25Yeb yet lan̈an hetxahli, yilal heyak'ni nimanc'ulal yin̈ mac ayco ishowal teyin̈, haxinwal chak'paxo nimanc'ulal Comam Dios yin̈ hemul. 26Yuto ta mach cheyak' nimanc'ulal, mach chak'paxo Hemam ay yul satcan̈ nimanc'ulal teyin̈, ẍi Comam. 27Lahwi tu', yapni Comam yul con̈ob Jerusalén hunelxa. Haxa yet lan̈an yec' Comam yul yatut Comam Dios xin yapni ebnaj iswi'ehal yin̈ ebnaj sacerdote yeb ebnaj cuywawom yin̈ isley naj Moisés yeb ebnaj ichamta winaj iswi'ehal con̈ob, isc'atan̈ Comam. 28Isk'amben ebnaj tet Comam: —¿Mac chachchejni hawatx'en huntek'an hawatx'e yet ewi? ¿Mac ak'n̈e hawip hawatx'en huntek'an tu'? ẍi ebnaj. 29- 30Istak'wi Comam: —Haquintu'an ay hune' ink'ambebalan teyet: ¿Mac an̈eti naj Juan anican̈ ha' iswi' anma, Comam Dios mato ha' anma? Ta chepajtze wetan chiwalpaxojan mac chejn̈eintijan inwatx'enan huntek'an tu', ẍi Comam tet ebnaj. 31Yet yaben ebnaj yalni Comam haca' tu', yichico ebnaj yallen tet hunun: —Ta chijala ta Comam Dios an̈eti naj Juan tu', chimisk'ambe naj jet: “¿Tzet yin̈ xin mach heyayto yul heyanma yin̈ naj?” ẍim naj jet. 32¿Tom xin chijala'paxoj tato ha' anma chejn̈e naj Juan tu'? ẍi ebnaj. Yal ebnaj haca' tu' yu chixiw ebnaj tet anma yuto chal anma tato naj Juan tu' ischejab Comam Dios ye naj. 33Yuxin tak'wi ebnaj tet Comam: —Mach johtajojan̈, ẍi ebnaj. Yalni Comam: —Haquinpaxtu'an mach chiwalan teyet mac ak'n̈e wipan inwatx'enan huntek'an tu', ẍi Comam tet ebnaj.

will be added

X\