SAN MARCOS 11

1Yet lan̈anxa yapnoj Comam Jesús b'oj heb'ya' ẍcuywi yin̈ yul con̈ob' Jerusalén, xolb'al Betania b'oj Betfagé yin̈ sc'ul witz Olivo, ẍchejnitoj Comam cawan̈ heb'ya': 2—Aswej yul ni'an wayan̈b'al co sataj ti'. Yet chex apnoj, cheyila' xecan hune' no' ni'an burro maẍto hunuj anma ch'ec' yib'an̈. Che puhu'luj no' cat heyinojtij no' wetan. 3Ta ay mac ẍhalni teyet: ¿Tzet yuxin che puhiloj no'? ta ẍi, Ch'ocnicoj no' yu Comam, yaja' lemb'il chon̈ huluj ja'a' no'an, quex chinaoj. 4Xto heb'ya' cawan̈ tu', xilni heb'ya' no' ni'an burro xecan sti' hune' n̈ah aycoj sti' b'eh. Yet lan̈an spuhniloj heb'ya' no', 5xk'amb'en hunk'aan heb'naj tet heb'ya': —¿Tzet yuxin che puhiloj no'?. 6Xalni heb'ya' tzet xal Comam, yuxin matxa tzet xal heb'naj. 7Lawitu', xinitoj heb'ya' no' ni'an burro tu' tet Comam, xaniatoj heb'ya' xil sk'ap sk'an̈oj stel yin̈ no', x'ahtoj Comam yib'an̈ no'. 8Tx'ihal mac tzujan yin̈ Comam. Mactaj b'ab'el, sleb'a'ayoj xil sk'ap yul b'eh. Ay mac sk'ab' te' te' stzoq'uiloj chaniayoj yul b'eh. 9Ha' ye mac b'ab'el, b'oj mac tzujan yin̈ Comam ch'awi, chalni: —Yuch'antioẍ tet Comam Dios, jala'wej tzoti' c'ul yin̈ ya' ti', haxca Ab'iltij ya' yu Comam Jahaw. 10Jala'wej tzoti' c'ul yin̈ Comam, haxca ch'ocoj Reyal co xol seleloj jichmam David. Yuch'antioẍ tet Comam Dios. 11Ha' x'apni Comam Jesús Jerusalén, x'octoj yamak' yatut Comam Dios. Lawi yilni tzet ye yul tu', xmeltzo b'oj heb'ya' Betania hunecxa, haxca k'ejb'ixa. 12Yet hunxa tz'ayic xhulpax Comam Jesús b'oj heb'ya' ẍcuywi yin̈ yul con̈ob' Jerusalén. Yet aycoj Comam yul b'eh xn̈ohchacan̈. 13Ha' xilnitoj Comam hune' te' higuera xan̈e k'ub'ancoj xaj, xto yilnoj ta ay sat te', yaja' mach hun q'uitanoj sat te', xajn̈e te' aya, haxca maẍto stiempooj satni te'. 14Hactu' xu yalni Comam tet te': —Matxa b'ak'in̈ ay mac ẍlonoj ha sat, C'uxan xab'e heb'ya' ẍcuywi yin̈ Comam. 15Lawitu' x'apni Comam Jesús b'oj heb'ya' yul con̈ob' Jerusalén. Ha' x'octoj yamak' yatut Comam Dios, ichi stenniltij Comam heb'naj xtxon̈i, b'oj heb'naj ẍlok'i. Stennic'oj pac'na Comam smeẍa heb'naj helom melyu, b'oj schem heb'naj txon̈om palamuẍ. 16Scachni Comam anma ta matxa ch'ec'toj b'oj tzetet yamak' yatut Comam Dios. 17Lawitu' x'oc Comam scuynoj anma: —Tz'ib'n̈eb'ilcan yul Yum Comam Dios, chalni Comam: Watut ti'an, ẍhal-laxi ta yatut oraciónal yeyi tet sunil hej con̈ob', yaja' hex, haca' n̈ach'en b'ay cheb'a sb'a elk'om ye heyu. 18Heb'naj swi'al yin̈ heb'naj sacerdote b'oj heb'naj cuywaom yin̈ sley ya' Moisés, ha' xab'en heb'naj tzet xu Comam, sayni heb'naj tzet chu spotx'noj Comam, yaja' xiw heb'naj haxca sunil anma caw stzala yab'en scuywab'al Comam. 19Haxa x'oc ak'b'al x'el Comam yul con̈ob' tu' b'oj heb'ya' ẍcuywi yin̈. 20Yin̈ sab'sahc'alil hunxa tz'ayic xhul pax Comam Jesús b'oj heb'ya' ẍcuywi yin̈ yul con̈ob' Jerusalén. Ha' x'ec' Comam b'oj heb'ya' b'ay ay te' higuera, xilnitoj heb'ya' to mak'b'il xu stajiloj te'. 21Xtit yin̈ sc'ul ya' Pedro, xalni ya' tet Comam: —Mamin, ilc'anab' te' higuera xa tz'actin̈e, xax tajiloj te'. 22Xta'wi Comam: —Cawxojab' he c'ul yin̈ Comam Dios. 23Yin̈ caw yeli ẍwal teyetan: Tzan mac ẍhalni tet hune' witz ti': Elan̈ b'etu', b'ejaytoj ha b'a yul ha' mar, ta ẍi, ta caw cha' yuluj sc'ul, mach ẍcab'coni, ẍtic'a yija' sb'a tzet chal tu'. 24Yuxin ẍwal teyetan, sunil tzet che k'ana yet che ya'ni heyoración, cawxojab' he c'ul to xax ya' Comam Dios teyet, yilal che chab'. 25- 26B'oj yet che ya'ni heyoración ta che natij to ay mac ay he howal b'oj, che nahuln̈entoj smul, hactu' Comam Dios stan̈tzecan Comam he mul, 27Lawitu', x'apni Comam Jesús yul con̈ob' Jerusalén. Yet lan̈an yec' Comam yamak' yatut Comam Dios, x'apni naj swi'al yin̈ heb'naj sacerdote b'oj heb'naj cuywaom yin̈ sley ya' Moisés b'oj heb'naj icham winaj swi'con̈ob'. 28Sk'amb'en heb'naj: —¿Mac ẍchejni hawiniltoj anma ewi? ¿Mac ẍchejni hawub'?. 29- 30Xta'wi Comam: —Haquinan ay hune' tzet chin k'amb'e teyetan, ¿mac x'anitij ya' Juan Bautista ya'noj ha' yi'a' anma? ¿Tom Comam Dios, mato anma? Ta cheyaliloj, ẍwalpaxilojan mac ẍchejni wub'an. 31Ha' xab'en heb'naj tzet xal Comam, x'oc heb'naj sk'umlanoj sb'a: —Ta ẍjala ta Comam Dios x'anitij naj Juan tu', ¿tzet yuxin mach xeya' yuluj he c'ul tzet xal naj? ẍim naj. 32Taca ẍjala ta anma x'anitij naj, xtij b'oc'na anma jin̈, ẍi heb'naj tet hunun. Haxca chal anma tu' to schejab'lom Comam Dios ye naj Juan. 33Yuxin xal heb'naj tet Comam: —Mat johtajojan, —Haquinan, mach ẍwal teyetan mac ẍchejni wuni hunk'aan tzetet tu'an.


Copyright
Learn More

will be added

X\