SAN MARCOS 10

1X'el Comam Jesús b'et Capernaum, xto yul xtx'otx'al Judea, b'oj sk'axepal ha' niman Jordán. Xyamicoj anma hunecxa sc'atan̈ Comam, x'oc scuynuj haca'tic'a chu ẍcuywayi. 2X'apni hunk'aan heb'naj fariseo yilwe' Comam yun̈e yay yul sk'ab' heb'naj yalni. Sk'amb'en heb'naj: —¿Tom chu stzumb'eniloj naj winaj yixal?. 3Xta'wi Comam: —¿Tzet xalcan ya' Moisés yin̈ hune' tu'?. 4—Xalcan ya' ta chu ya'ni naj winaj hunuj yumal pohob'ail tet ix ixale cat yalaxcan ix. 5Xta'wi Comam: —Ho' yeli, stz'ib'n̈ecan ya' Moisés hune' tu' yu he wi'eal. 6Yaja' yet x'ichitij, yet swatx'en Comam Dios sunil tzetet, swatx'en pax Comam naj winaj b'oj ix ix. 7Yuxin chacan naj winaj smam smi' yu shunican b'oj yixal. 8Hune'xan̈e anmail chucan scawan̈il, yuxin matxa cawan̈oj anmail yeyi, to hune'xan̈e. 9Yuxin mactaj shunb'acan Comam Dios mach sje spohnitoj anma. 10Yet ayxactoj Comam b'oj heb'ya' ẍcuywi yin̈ yul n̈ah, sk'amb'en pax heb'ya' yin̈ hune' tzet xal tu'. 11Xta'wi Comam: —Naj spoh sb'a b'oj yixal cat yi'ni naj hunujxa ix, chacoj naj smul tet yixal. 12Taca ha' ix ch'anican yichamil cat sto ix yin̈ hunujxa naj, chapaxcoj ix smul. 13Lawitu' x'iottoj hunk'aan niẍtej unin tet Comam Jesús, yun̈e yanicoj Comam sk'ab' yin̈ swi', yaja' xcachwa heb'ya' ẍcuywi yin̈ Comam. 14Ha' xilni Comam hune' tu' ẍchiwacan̈ sc'ul, smayni heb'ya', xalni tet heb'ya': —Mache cach stit niẍtej unin ti' tin c'atan̈an, haxca anma haca' to ye niẍtej unin ti', hactu' anma ch'oc yul sk'ab' Comam Dios. 15Yin̈ caw yeli ẍwal teyetan, mac mach ẍchani Comam Dios Yahawoj haca' schani hune' ni'an unin hunuj tzetet, mach ch'oc yul sk'ab' Comam Dios. 16Lawitu', x'oc Comam schelnojcan̈ niẍtej unin tu', chanicoj Comam sk'ab' yin̈ swi', sk'anni Comam scawil tet Comam Dios. 17Yet ayxacoj Comam Jesús yin̈ b'eh, x'apni hune' naj yin̈ an̈e, x'ay jahnoj naj yin̈ sat Comam, xalni naj: —Mam Cuywaom caw c'ul, ¿tzet wal wunian yun̈e hin chanoj k'inal mach stan̈b'alan?. 18Xta'wi Comam: —¿Tzet yuxin chin hawal c'ulalan? Hune'n̈e mac c'ul, han̈c'a Comam Dios. 19Hawohtaj mi smandamiento Comam: Machex potx'wayi, machex ixli, machex elk'ani, mache hob'can̈ lek'ti'al yin̈ he yet-anmail, mache sub' hunuj anma, ayojab' yelapnoj ye he mam he mi' yul he sat. 20—Mamin, sunil ti' xin yijyetij yettax hin ni'antoalan. 21Ha' xt'an̈xicoj Comam yin̈ naj, stz'acan̈ sc'ul yin̈ naj, xalni Comam: —Hune'xan̈e maẍto cha yijyecoj, as txon̈toj tzet ayach, cat hawitxk'antoj stohol yin̈ anma meb'a', haxin̈wal ay ha k'alomal b'ay ay Comam Dios. Lawitu' cat hawoccan tzujnuj win̈an. 22Ha' xab'en naj hune' tu' xtaquiloj sc'ul naj haxca caw k'alom naj. B'isc'ulal ye naj xpaxtoj naj yatut. 23Xt'an̈xi Comam shoyanil, xalni tet heb'ya' ẍcuywi yin̈: —Caw ya'taj yoc anma k'alom yul sk'ab' Comam Dios. 24Caw xc'ayiloj sc'ul heb'ya' yu tzet xal Comam, yuxin xal hunecxa: —Hex xahan ay wu ti'an: ¡Tzet sya'tajil yoc anma yul sk'ab' Comam Dios! 25K'a' mach niman yec'toj hune' no' cameyo yul sholanil syutz ch'en acuẍa sataj yanicoj b'a hune' naj k'alom yul sk'ab' Comam Dios. 26Ha' xab'en heb'ya' hune' ti', k'a' xto c'ayiloj sc'ul heb'ya', chalni tet hunun: —Ta hactu', ¿mac taxca ẍcolchaoj?. 27Xt'an̈xicoj Comam yin̈ heb'ya', xalni Comam: —Hune' ti' mach ẍc'oji anma yuni, yaja' wal Comam Dios, sunil chu yu, matzet ya'taj tet Comam. 28Yuxin xal ya' Pedro tet Comam: —Mamin, sunil tzet xjacanojan xcon̈ occan tzujnuj tawin̈an. 29Xalni Comam: —Yin̈ caw yeli ẍwal teyetan, mac chacanoj yatut, yuẍtaj, yanab', smam smi', yuninal, mato xtx'otx', yu yoccan tzujnuj win̈ b'oj hin cuywab'al yet colb'anilan, schab'na spaj. 30Hune' ciento el ec'b'al spaj schab'na satyib'an̈k'inal ti', yu yatut chacanoj b'oj yuẍtaj, yanab', smi', yuninal b'oj xtx'otx' chacanoj, waxan̈ca ch'ec'oj ya' yanma hin ya'ilojan. Wal yet sb'ak'in̈aloj, ẍchab' k'inal mach stan̈b'al. 31Txihal mac caw ay smay tinan̈, yaja' yet ch'apnoj hune' tz'ayic tu', caw matxa yelapnoj chub'canoj. Tx'ihal mac comonaln̈e ye tinan̈ ẍjila, yet chapnoj hune' tz'ayic tu', caw ay smay chub'canoj. 32B'ab'el Comam Jesús yu heb'ya' ẍcuywi yin̈ yet aycoj yin̈ b'eh ẍto Jerusalén. Caw ẍc'ay sc'ul heb'ya', b'oj anma tzujan yin̈ Comam caw xiwi. Xawten pax Comam heb'ya' cab'lan̈wan̈ schuquil, x'oc yalnoj tzet chuluj yin̈. 33Xalni Comam: —Heyohtaj to lan̈an jahojapnoj Jerusalén: Hayin Ab'ilintij yu Comam Dios xol jet-anmail ti'an, chin alaxojcoj yul sk'ab' heb'naj swi'al yin̈ heb'naj sacerdote b'oj heb'naj cuywaom yin̈ sley ya' Moisés, cat walaxojcoj yul sk'ab' camicalan. Chin alaxojcoj yul sk'ab' anma mat israelojan. 34Chin tzeyelaxojan cat hin tzub'n̈elaxojan, chin mak'laxojan cat hin potx'laxojan, yaja' yin̈ sca'fial chin pitzc'aojcan̈an. 35Lawitu' xhitzicoj ya' Jacobo b'oj ya' Juan sc'atan̈ Comam Jesús, sc'ahol ya' Zebedeo ye heb'ya', xalni heb'ya': —Mamin, ẍjochean ta chawa' tzet ẍco k'an tawet ti'an. 36—¿Tzet che k'an wet tu'an?. 37—Yet chach ocoj Jahawojan, chawa'a' cab' b'ab'el tz'on̈ob'al jetan, chon̈ ayoj tz'on̈noj ta c'atan̈an, hune' hon̈ yin̈ ha watx'an, hune' hon̈xa yin̈ ha mecan. 38Xta'wi Comam: —Hexti' mat heyohtajoj tzet yelapnoj ye tzet che k'ana. ¿Tom chex c'ojoj heyuc'nuj hune' c'ahla tzetet ch'a'laxoj wuc'u'an? ¿Tom ẍtechaoj sya'tajil heyu b'ay chin ec'ojan? . 39Xta'wi heb'ya': —Ho', ẍtechaoj juan, Xalni pax Comam: —Ho', yeli cheyuc'u' hune' tzet ẍwuc'u' tu'an, b'oj ẍtechaoj hune' sya'tajil heyu. 40Yaja' yin̈ heyoc tz'on̈noj yin̈ hin watx'an b'oj yin̈ hin mecan, mat hayinoj yet ay walnian. Hune' tu' watx'eb'ilxacan tet mac b'ay chal sc'ul hin Mam ya'a'an. 41Ha' xab'en heb'ya' lahun̈wan̈xa, caw xchiwacan̈ sc'ul heb'ya' yin̈ ya' Jacobo b'oj ya' Juan. 42Yuxin xawte Comam heb'ya' sunil, xalni tet heb'ya': —Hexti' heyohtaj, heb'naj swi'al hej nancon̈ob'al, to yahaw ye heb'naj, yuxin nimej winaj chute sb'a heb'naj, chetan heb'naj anma. 43Yaja' wal co xol ti' mat hacoj tu' yeyi. Ha' jet, ta ay hunujon̈ ẍjoche ch'oc co may, ja'a' ocnojcoj co b'a schejab'oj hej jetb'i. 44Mac ex cheyoche chex oc swi'aloj co xol, awejcoj he b'a schejab'oj heyetb'i. 45Haxca hayin Ab'ilintij yu Comam Dios xol jet-anmail ti'an, mat yuuj yocnicoj anma wuan yuxin xquin hulan, to yu wocnicoj yu anmaan, b'oj yu wa'ni hin k'inalan yun̈e caw tx'ihal mac ẍcolchayi. 46X'apni Comam Jesús yul con̈ob' Jericó b'oj heb'ya' ẍcuywi yin̈. Ha' x'el Comam b'oj heb'ya' b'etu', tx'ihal anma tzujan paxoj. C'uxan ahayoj hune' naj machu yilni, aycoj naj sk'anni tzetet smatanoj sti' b'eh. Bartimeo sb'ih naj, sc'ahol naj Timeo ye naj. 47Ha' xab'en naj to ha' Comam Jesús ah Nazaret lan̈an yec'toj, x'oc naj awoj yin̈ ip, chalni: —Mamin Jesús, yic'al ya' rey David, tz'a'ojab' ha c'ul win̈an. 48Tx'ihal mac xcachwayi ta mach'awi naj, yaja' k'a' xto niman naj yawi: —Mamin, yic'al ya' David, tz'a'ojab' ha c'ul win̈an. 49Hactu' xu yoc lin̈noj Comam xalni tet naj: —Awtewejtij naj, Yuxin x'awtelax naj. —Ahan̈ lin̈noj. Tzalaan̈, to chach yawte ya'. 50Sb'ejniloj naj yet yib'an̈ scamiẍ, x'ah lemna naj x'apni naj sc'atan̈ Comam. 51Sk'amb'en Comam tet naj: —¿Tzet chawoche ẍwu tawin̈an? ẍi Comam. —Mamin, ẍwochean ta chu wilnian. 52—Haxca ẍcawxi ha c'ul win̈an, hajlojab' sb'ak' ha sat ti', chu ha paxtoj, . Yin̈n̈e tu', xa hu yilni naj, x'occan tzujnuj naj yin̈ Comam.


Copyright
Learn More

will be added

X\