1 Hac ti' chu yichico Tzoti' c'ul yet colbanile yin̈ Comam Jesucristo, Isc'ahol Comam Dios. 2 Ay hune' ischejab Comam Dios chiyij Isaías tz'ibn̈encano yin̈ tzet yal Comam Dios tet Isc'ahol, bay chala: Chiwatojan inchejaban tasataj yun̈e iswatx'en naj habeh yet yalan̈to maẍto chachapni. 3 Ch'awi naj yin̈ caw ip bey tx'otx' desierto, chalni naj: “Watx'eweco heyanma yuto chihul Comam Dios Jahawil. Haca' chu istoholban̈elax hunu beh yet chihul hunu naj jahaw, hac tu' cheyute heyanma,” ẍi naj, ẍiayoj. 4 Hune' ti' yij isba yet yapni naj Juan ch'anican̈ ha' iswi' anma bey tx'otx' desierto. Yichico naj yalni ta yilal yahcano ha' iswi' anma, yun̈e isyenilo isba tato chisbej anma iswatx'en istx'ojal, cat yak'laxcano tan̈o ismul yu Comam Dios. 5 Sunil anma ay yul ismajul Judea yeb anma ay yul con̈ob Jerusalén apni abeno tzet chal naj Juan. Hayet chalnati anma ismul, cat yahcano ha' iswi' yu naj yul ha' niman Jordán. 6 Wal naj Juan tu', xil no' camello watx'ebilayo xilo isk'ap naj, tz'um no' xin ayico istx'ambalo naj. Ha' xin tzet chislo naj, ha' ton no' lit' yeb iscabil no' tx'ilab. 7 Chalni naj Juan tu' tet anma: —Ay hune' naj tzujan yul wintajan, caw ec'bal yelapno ye naj insatajan, walinan xin machi welapnojan chiwabehan nitam way c'on̈nojan inpuhnilojan istx'an̈al isxan̈ab naj. 8 Haninti'an yin̈ caw yeli, han̈e ha ha' chiwak'an yahbalo ha' hewi', wal naj chiwaltu'an xin chiyacan̈ naj ha' hewi' yaj yu isk'ak'al yip Comam Espíritu Santo, ẍi naj Juan. 9 Yet hune' tiempohal tu', el Comam Jesús yul con̈ob Nazaret ayco yul ismajul Galilea, yapni bey ha' niman Jordán, yah ha' iswi' Comam yu naj Juan yul ha' Jordán tu'. 10 Hayet lan̈an yahti Comam xol ha' tu', yilni Comam ishajni isba satcan̈, yayilo Comam Espíritu Santo yiban̈, isyeni isba haca' yayti hunu no' palamuch. 11 Yabelax hune' yul nuk'e yul satcan̈, halni haca' ti': —Hach ti', hach Inc'aholan caw xahan ay wuhan, caw chintzalahan tawin̈, ẍiaytij. 12 Lahwin̈e tu' yilaxto Comam Jesús yu Comam Espíritu Santo bey hune' tx'otx' desierto. 13 Cawina tz'ayic ehayo Comam bey tu' xolej no' xoltelajil nok'. Yoc naj matzwalil yilweno Comam, yaja' ayco ebnaj ángel yilno Comam. 14 Yet majanxa naj Juan yul preso, isto Comam Jesús bey Galilea, yoc Comam yalnoc'o Tzoti' c'ul yin̈ tzet chu yoc anma yul isk'ab Comam Dios. 15 Chalni Comam tet anma: —Wal tinan̈ mayij isba hune' tiempo halbilcanoj yocxa Comam Dios Heyahawoj. Bejwecano hetx'ojal, chahwe Tzoti' c'ul yet colbanile yul heyanma, ẍi Comam. 16 Hayet lan̈an isbelwi Comam Jesús isti' ha' lago Galilea, yilnito Comam cawan̈ ebnaj ik'omati cay yet lan̈an yanayto ebnaj ishac' chiinahti no' xol ha'; ebnaj cawan̈ ti' yuẍta isba ebnaj, ha' ton naj Simón yeb naj Andrés. 17 Yalni Comam tet ebnaj: —Ocan̈we tzujno wintajan, wal tinan̈ haxa anma chexoc heyik'ahti yul ink'aban, ẍi Comam tet ebnaj. 18 Yaben̈e ebnaj yalni Comam haca' tu', isbejnicano ebnaj ishac' yoc tzujno ebnaj yinta Comam. 19 Haniq'uixto chito Comam Jesús xin, yilnipaxo Comam cawan̈xa ebnaj yuẍta isba, ha' ton naj Jacobo yeb naj Juan, ebnaj isc'ahol icham Zebedeo. Ayahto ebnaj yul isbarco, lan̈an isbujni ebnaj ishac'. 20 Yalni Comam tet ebnaj tato chioc tzujno ebnaj yinta Comam. Hayet yaben ebnaj yalni Comam haca' tu', yanicano ebnaj ismam yeb ebnaj c'amte' yul te' barco, yoccano tzujno ebnaj yinta Comam. 21 Lahwi tu' xin, yapni Comam Jesús yeb ebnaj iscuywom yul con̈ob Capernaum. Haxa yin̈ hune' tz'ayic xewilal yocto Comam yul iscapilla ebnaj Israel, yichico Comam iscuyni anma ayicto bey tu'. 22 Caw xin chic'ay isc'ul anma yaben iscuywa Comam yuto caw haban isyenilo isba ta caw ak'bil yip yu Comam Dios, mach haca'o chu iscuywa ebnaj cuywawom yin̈ isley naj Moisés. 23 Yul capilla tu' ayicto hune' naj ayco ischejab naj matzwalil yin̈, yah yaw naj yin̈ caw ip, yalni naj: 24 —¿Tzet hawoc jin̈an̈ ach Jesús ah Nazaret? ¿Tom chachhul con̈hatan̈tzelojan̈ hawalni? Wohtajan mac anmahilach. Hach ti' mach nino istx'ojal ayco tawin̈, yet Dios hawehi, ẍi naj. 25 Iscachwa Comam yin̈ ischejab naj matzwalil tu', yalni Comam: —¡Cach hati', elan̈ yin̈ naj! ẍi Comam. 26 Istit hune' yaxcamic yin̈ naj yu ischejab naj matzwalil. Yichico ischejab naj matzwalil tu' yel yaw, yelcano naj yin̈ naj. 27 Hayet yilni anma ayicto yul capilla hune' tu' caw xiwcan̈, isk'amben anma tet hunun: —¿Tzettaxca chalilo hune' ti'? Huntek'an cuybanile chal hune' naj ti' caw ac'to, maẍto bay chijabe, yeb caw ay yip naj iscuywahi. Hayet chalni naj tato chiel ischejab naj matzwalil yin̈ anma, cat isyijen ebnaj tzet chal naj, ẍi anma yin̈ Comam. 28 Caw xin yin̈ an̈e pujnato isk'umal Comam yul sunil ismajul Galilea. 29 Lahwi yelti Comam Jesús yul capilla, isto Comam yeb naj Jacobo, yeb naj Juan bey yatut naj Simón yeb naj Andrés. 30 Yaja' xin hilanto ismi' yixal naj Simón sat tx'at yu k'a'. Yallax tet Comam tato hilanto ixnam. 31 Ishitzico Comam isti' istx'at ixnam, yoc tzabno Comam yin̈ isk'ab ixnam tu', isxecnican̈ Comam ixnam. Yin̈n̈ena tu' xin yel hune' k'a' yin̈ ixnam, yoc ixnam iswatx'eno tzet chislo Comam Jesús yeb ebnaj iscuywom. 32 Haxa yin̈ k'ejbiyalil yin̈ hune' tz'ayic tu', yilaxto sunilej anma ya'ay tet Comam yeb anma ayco ischejab naj matzwalil yin̈. 33 Etza sunil anma ay yul con̈ob tu' apni isti' ispultahil te' n̈a bay ayicto Comam. 34 Caw tx'i'al anma nananta yabil ayco yin̈ cawxicanocan̈ yu Comam, tx'i'alpaxo xin anma el ischejab naj matzwalil yin̈. Machi xin ischah Comam tzotelo ebnaj ischejab naj matzwalil tu', yun̈e mach chalilo ebnaj mac anmahil Comam. 35 Haxa yin̈ hunxa tz'ayic caw sahab ahwano Comam Jesús, isto Comam bay machi anma chieq'ui, ha' bey tu' xin txahli Comam. 36 Tzujan tu' isto naj Simón yeb ebnaj yetbi saywal yin̈ Comam. 37 Hayet yilcha Comam yu ebnaj, yalni ebnaj tet Comam: —Mamin, sunil anma lan̈an cachissaynic'oj, ẍi ebnaj. 38 Istak'wi Comam tet ebnaj: —Ton̈we yulaj con̈ob ayco yin̈ ishoyanil con̈ob ti', yuto yilal walnipaxojan Istzoti' Comam Dios tet anma, yu ton hune' tu' yuxin quinhulan, ẍi Comam. 39 Caw xin sunil yul ismajul Galilea ec' Comam yala' Istzoti' Comam Dios yulaj hunun iscapilla ebnaj Israel. Yinipaxilo Comam ischejab naj matzwalil yin̈ anma. 40 Ay hune' naj ayco lepra yin̈ apni isc'atan̈ Comam Jesús, yay jahno naj sata Comam, yoc naj isk'anno tet Comam: —Mamin, ta chawoche chu hawinilo hune' yabil ti' win̈an, ẍi naj. 41 Istz'aycan̈ isc'ul Comam yin̈ naj, yanayo Comam isk'ab yiban̈ naj, yalni Comam tet naj: —Ho', chiwochehan ta chiel hune' yabil ti' tawin̈, ẍi Comam. 42 Yin̈n̈ena tu' xin yel hune' yabil yin̈ naj, iscawxican̈ naj. 43 Yalni Comam tet naj ta chipaxto naj, istak'encano Comam tet naj haca' ti': 44 —Machi bay chawalic'o hune' ti', beh hato hayeno haba tet naj sacerdote cat hawak'ni haxahanbal tet Comam Dios haca' yalni isley naj Moisés yin̈ anma chielcano lepra yin̈. Hac tu' chu yohtan̈encanilo anma tato maelcano hune' yabil ti' tawin̈, ẍi Comam. 45 Yaja' yet ispaxto naj, yichico naj yalni tet anma yin̈ tzet yu iscawxilo naj, yuxin matxa chu isyeni isba Comam yin̈ caw haban yulaj con̈ob. Wal xin istxamlaxan̈e con̈ob chiec' Comam bay machi anma chieq'ui. Yaja' sunil anma ay yulaj con̈ob apni isc'atan̈ Comam.
