SAN LUCAS 9

1Syamb'a Comam heb'ya' cab'lan̈wan̈ ẍcuywi yin̈, xa'ni Comam scan̈il ye heb'ya' yiniloj sunil hej matzwalil yin̈ anma cat yan̈ten mac tx'oj ye sc'ul. 2X'alaxtoj heb'ya' spujb'ac'oj tzet chu joc yul sk'ab' Comam Dios, cat yan̈ten heb'ya' anma. 3Xalni Comam tet heb'ya': —Mach yet he b'eh cheyitoj, ni he te', ni he tz'ispa', ni wah, ni melyu. Machca hun k'u'uj xil he k'ap cheyitoj. 4Ha' te' n̈ah b'ay b'ab'el chex apni ehoj hat chex cani, mache hec' b'ay chex ehi masanto chex meltzoyi. 5Ta ay hunuj con̈ob' b'ay machex chaot, meltzoan̈wej, che pan̈niloj spojojal hune' con̈ob' tu' yin̈ heyoj, yun̈e heyeniloj ta matxa heyoc yin̈ heb'jetb'i. 6Xto heb'ya'. Sunil yulaj wayan̈b'al x'ec' heb'ya' spujb'ac'oj tzoti' c'ul tet anma, chan̈ten heb'ya' mactaj tx'oj ye sc'ul. 7Ha' xab'en naj Herodes, yahaw con̈ob' Galilea, tzet lan̈an yuni Comam Jesús, somk'atoj yul swi' naj yab'eni, haxca ay anma ẍhalni ta ya' Juan Bautista xpitzc'acan̈ xol hej camom. 8Ay mac ẍhalni ta ya' Elías, schejab'lom Comam Dios xhul paxoj. Ay mac ẍhalni ta hunuj heb'ya' schejab'lom Comam Dios x'ec'le yet payxa xpitzc'acan̈ xol hej camom. 9Yaja' xal naj Herodes tu': —Hayin caw xin chej ilaxojiltoj swi' naj Juan tu'an. ¿Mac najil hune' tx'ihal tzet ẍhal-lax yin̈ ti'? .Yuxin caw xa' yilal naj yilni yin̈ Comam. 10Lawi smeltzo heb'ya' ẍcuywi yin̈ Comam Jesús, x'oc heb'ya' yalnoj tet Comam tzet xu heb'ya'. Lawitu' shec'niloj sb'a Comam b'oj heb'ya' xol anma, xto scawilal con̈ob' Betsaida. 11Ha' xab'en anma to xto Comam, tx'ihal mac x'apni sc'atan̈. C'ul xu schaot heb'jetb'i yu Comam, x'oc scuynuj anma tu' yin̈ tzet chu joc yul sk'ab' Comam Dios, xan̈ten pax Comam mactaj tx'oj ye sc'ul. 12Haxa yet lan̈an sto tz'ayic xhitzicoj heb'ya' cab'lan̈wan̈, xalni heb'ya' tet Comam: —Chejtoj anma ti' saya' tzet slo, b'oj b'ay ẍway yulaj wayan̈b'al co hoyanil ti', b'oj hunujxa b'ay ay yak'b'il te' n̈ah, haxca mach anma b'ay ayon̈ ti', ẍi heb'ya': 13—Hex cheya' wa'oj anma ti', Xalni heb'ya': —Howeb'n̈e pan b'oj cac'on̈ no' cay jetb'ian. ¿Mato chon̈ to co lok'o tzet slo sunil anma ti' hawalnian?. 14Ay mi howeb'oj mil heb'naj winaj. Xalni Comam tet heb'ya': —Halwej tet anma, stek'b'aab' sb'a yin̈ cincuentataj, cat stz'on̈b'an sb'a,. 15Hactu' xute heb'ya', x'ay tz'on̈noj anma sunil. 16Lawitu' xinican̈ Comam ixim howeb' pan b'oj no' cac'on̈ cay. Xt'an̈xican̈ Comam satcan̈, xa'ni yuch'antioẍ, sk'axponay ixim, xanic'oj tet heb'ya' ẍcuywi yin̈, x'oc heb'ya' yitxk'anojtoj ixim xol anma. 17Sunil anma xwa' yin̈ hantaj chal sc'ul. Lawitu' cab'lan̈eb'to motx ixim xcutxican̈ yin̈ hantajto tzet xcani. 18Yet hune' tz'ayic shec'toj sb'a Comam Jesús ẍto ya'noj yoración, tzujan heb'ya' ẍcuywi yin̈. Lawitu' sk'amb'en Comam tet heb'ya': —¿Mac anmailin yalni anmaan?. 19Xta'wi heb'ya': —Ay mac ẍhalni ta Juan Bautista hach, ay mac ẍhalni ta ya' Elías. Ay pax mac ẍhalni ta hunuj heb'ya' schejab'lom Comam Dios x'ec'le payxa xpitzc'acan̈. 20Lawitu' xalni Comam tet heb'ya': —Haca' hexti', ¿mac anmailin heyalnian? Xta'wi ya' Pedro: —Hachti' Cristo hach, ab'il ha chejb'anil yu Comam Dios. 21Yaja' xal Comam tet heb'ya' ta mach b'ay chalc'oj heb'ya' hune' tu'. 22Xal Comam Jesús: —Hayin Ab'ilintij yu Comam Dios xol jet-anmail ti'an, machin schab' heb'naj swi'con̈ob'an b'oj heb'naj swi'al yin̈ heb'naj sacerdote, b'oj heb'naj cuywaom yin̈ sley ya' Moisés. Yilal wec'oj ya'an b'oj chin spotx'o heb'najan, yaja' yin̈ sca'fial hin caman cat hin pitzc'aojcan̈an. 23Lawitu' xalni Comam tet sunil anma: —Ta ay hunuj mac choche ch'occan tzujnuj win̈an ya'ab'can b'aytet choche yub' hunun tz'ayic cat yec' yi'noj tzet ẍwuan, waxan̈ca cha'a' camoj sb'a yin̈ culus. 24Haxca mac ay yala' ẍcolchacan sk'inal, sc'aya'toj sk'inal mach stan̈b'al. Wal mac hinan scam win̈an, schab' sk'inal mach stan̈b'al. 25¿Tzet taxca cha'a hune' satyib'an̈k'inal ti' jet ta ẍjoche ch'occan sunil jetoj ẍco c'aynitoj co k'inal mach stan̈b'al? 26Ta ay mac xtx'ixwoj yoc tzujnuj win̈an b'oj yin̈ tzet ẍwal Hayin Ab'ilintij yu Comam Dios xol jet-anmail ti'an, haquinan, chin tx'ixwoj tet anma tu'an yet chin hulujan, ib'il hin may hin k'ak'al wuan, hune' smay k'ak'al hin Maman, b'oj hej yángel. 27Yin̈ caw yeli ẍwal teyetan, ay mac ay co xol ti' ẍto ilnoj yocoj Comam Dios Yahawoj yalan̈to maẍto ẍcami. 28Semanail xam yalni Comam Jesús hunk'aan tu', xinitoj Comam ya' Pedro, ya' Jacobo b'oj ya' Juan yin̈, xto swi' hune' witz ya'noj yoración. 29Yet lan̈an ya'ni Comam yoración, shelni sb'a yilot sat, sajpok'iloj xil sk'ap b'oj caw ẍjeplayi. 30Ha' tu' syenican̈ sb'a ya' Moisés b'oj ya' Elías sc'atan̈ Comam, x'oc heb'ya' tzoteloj b'oj. 31Aycoj sajilk'inal Comam yin̈ heb'ya', stzoten heb'ya' b'oj Comam tzet chu yijnoj sb'a scamical Comam b'et Jerusalén. 32Ya' Pedro b'oj heb'ya' yetb'i caw ayxatij swayan̈ heb'ya', yaja' xiloj heb'ya' swayan̈ yin̈ sat, xilni heb'ya' sk'ak'al smay Comam b'oj heb'ya' cawan̈ xul tzoteloj b'oj Comam. 33Lan̈anxa shitzojiloj heb'ya' cawan̈ tu' sc'atan̈ Comam, xalnican̈ ya' Pedro: —Mam Cuywaom, caw sak'al ta wal je b'eti'. Co watx'e oxeb'oj pat. Hunuj hawet, hunuj yet ya' Moisés b'oj hunuj yet ya' Elías. Yaja' ton̈c'a xalna ya' hune' tu', mach xtxum ya' tzet ch'elicoj hune' tzet xal tu'. 34Lan̈anto b'in yalni ya' hune' tu' xhul hune' asun yen̈lenoj heb'ya'. Caw xiwcan̈ heb'ya' ẍcuywi yin̈ Comam tu' yet x'octoj heb'ya' xol hune' asun tu'. 35Xol asun tu' x'eliloj hune' tzoti' xalni yin̈ hacti': —Ha naj ti' hin C'ahol Sic'leb'il wuan. Ab'ewejtoj tzet chal naj. 36Yet lawi yal-laxiloj hunk'aan tzoti' tu', xilni heb'ya' to schuquilxan̈e Comam. Mach b'ay xalic'oj heb'ya' tzet xil tu', to yin̈n̈e' heb'ya' xtan̈icoj. 37Yet hunxa tz'ayic, xpaxaytij heb'ya' swi' witz tu', caw tx'ihal anma x'apni chanoj Comam. 38Xol anma yamancoj tu', x'awican̈ hune' naj yin̈ ip, chalni naj tet Comam: —Mamin, chin k'an yuch'antioẍ tawetan ta chawila tzet ye hune' ni'an hin c'aholan, caw yiptzil ch'an naj wuan. 39Haxca ay hune' yespíritu naj matzwalil ch'etan naj, caw ch'awi naj yet ch'oc yin̈ naj. Stzicob'tajn̈elax naj yu, cat stit hujuy yul sti', penaxan̈e chucanoj naj, caw lan̈o xb'ejtzoot naj yu. 40Xwal tet heb'ya' ẍcuywi tawin̈an ta chiloj heb'ya' yespíritu naj matzwalil tu' yin̈ naj, yaja' mach xc'oji heb'ya'. 41Xta'wi Comam: —Hexti' caw macheya' yuluj he c'ul yin̈ Comam Dios, caw tx'ojex. Ayxana wul te xolan, yaja' ¿hantajto chex techaoj wuan? As itij ha c'ahol tu'. 42Ha' xhul naj ni'an tu', xb'ejotay naj yin̈ tx'otx' yu yespíritu naj matzwalil tu', xlowcan̈ yaxcamic yin̈ naj yu, yaja' xchejotiloj espíritu tu' yin̈ naj yu Comam. Lawi xwatx'ican̈ naj xanic'oj Comam naj tet smam. 43Sunil anma xc'ayiloj sc'ul yu scan̈il ye Comam Dios.Aytocoj anma yin̈ c'ayc'ulal yu tzet chu Comam Jesús, xalni Comam tet heb'ya' ẍcuywi yin̈: 44—Ab'ewej hune' ti', nann̈e ẍcan heyu. Hayin Ab'ilintij yu Comam Dios xol jet-anmail ti'an, chin alaxojcoj yul sk'ab' heb'naj aycoj showal win̈an, . 45Yaja' mach xtxum heb'ya' tzet xal Comam, haxca ay tzet mach'a'ni xtxumu' heb'ya', ẍnanon heb'ya' sk'amb'eni tzet chaliloj. 46Lawitu' x'oc heb'ya' stzotenoj mac k'a' ay smay xol heb'ya'. 47Yaja' xtxum Comam tzet chal heb'ya', yuxin slin̈b'acan̈ Comam hune' ni'an unin sc'atan̈. 48Xalni Comam: —Mac ẍchani hune' ni'an unin ti' haxca wetan, hayin chin schaan. Mac chin chanian, scha pax mac xquin anitijan. Mac k'a' ahayoj ni'anb'ail te xol, ha' k'a' ay smay. 49Xalni ya' Juan tet Comam Jesús: —Mam Cuywaom, xjil yiniloj hune' naj yespíritu naj matzwalil yin̈ anmaan, ha b'ih chawte naj yin̈, yaja' xco cach najan, haxca mat jin̈oj ch'ec' naj. 50—Mache cach naj, haxca mac mach paq'uicoj jin̈, jin̈ aycoj chaltu'. 51Yet lan̈anxa yapnoj stz'ayicalil b'ay ẍmeltzo Comam Jesús sc'atan̈ Comam Dios, xitij yanma yin̈ sto Jerusalén. 52Yul b'eh to aycoj Comam, xanitoj schejab' sk'annoj b'ay chehoj yul hune' swayan̈b'al Samaria, 53yaja' mach ẍchaot heb'ya' yu anma ah Samaria tu', haxca xtxumu to Jerusalén ẍto Comam b'oj heb'ya'. 54Ha' xab'en ya' Jacobo b'oj ya' Juan hune' tu', xalni heb'ya': —Mam Cuywaom, ¿chim sje ha c'ul ẍco chej ayojiloj k'a' k'a' satcan̈an cat stan̈tzelaxiloj heb'jetb'i ti'? . 55Xt'an̈xicoj Comam yin̈ heb'ya', x'oc smaynoj heb'ya'. 56Lawitu' xto Comam b'oj heb'ya' yul hune'xa wayan̈b'al. 57Yet aycoj Comam Jesús b'oj heb'ya' yin̈ b'eh, xalni hune' naj tet Comam: —Mamin, tzan b'ay chach toyi, tzujanin tawin̈an. 58Xta'wi Comam: —No' wech, ay sch'en no' b'ay aya, no' ch'ic ay sk'u' no' b'ay aya, yaja' Hayin Ab'ilintij yu Comam Dios xol jet-anmail ti'an mach watut b'ay ayinan, yuxin ¿tzimi ta ẍtecha hawu?. 59Xalni Comam tet hune'xa naj: —Ocan̈ tzujnuj win̈an, . Xalni naj: —C'ultic'a Mamin, yaja' ẍto hin mujcan hin mam b'ab'elan. 60Xalni Comam: —Acan hune' tu' yul sk'ab' mac camb'eal yeyi, ha' ẍmujni hej camom. Yaja' wal hach, as pujb'ac'oj tzet chu yoc anma yul sk'ab' Comam Dios. 61Xal hune'xa naj tet Comam: —Mamin, ẍwoche chin occan tzujnuj tawin̈an, yaja' ẍto hin to tak'loj tet heb'ya' ay watutan. . 62Xalni Comam: —K'inaloj ay hunuj naj tzab'b'ilxa spatxb'al tx'otx' yu, lawitu' ẍmeltzo t'an̈na naj yin̈taj. Ta hactu' ye yul co wi' haca' chute hune' naj tu', mat c'uluj hon̈ joctoj yul sk'ab' Comam Dios.


Copyright
Learn More

will be added

X\