SAN LUCAS 9

1Yet hunel, yawte Comam Jesús ebnaj cablahon̈wan̈ iscuywom isc'atan̈. Yak'nicano Comam ishelanil yeb yip ebnaj yinilo sunil ischejab naj matzwalil yin̈ anma, yebpaxo xin yak'ni cawxo ebnaj anma yin̈ tzettaj yabil ayco yin̈. 2Ischejlaxto ebnaj yu Comam yu ispujbanic'o ebnaj yin̈ tzet chu yoc anma yul isk'ab Comam Dios, cat yak'nipaxcano cawxo ebnaj anma ya'ay. 3Yalni Comam tet ebnaj: —Matzet cheyito yin̈ hebel; mach cheyik' hek'ojoch, mach cheyik' hetz'ispa, mach cheyik'paxo heyoch yeb hemelyu, mach cheyipaxto hehelbal. 4Ha' te' n̈a bay chexapni wayoj, han̈e bey tu' xin chexcancanoj, mach chehel bay chexwayi masanto yet chexto hunuxa con̈ob. 5Yaj ta ay hunu con̈ob bay mach chexchahlaxi, chexel yul hune' con̈ob tu' cat hetzicnicanilo pojoj yin̈ heyoj, hac tu' xin chu heyeniloj ta matxa heyoc yin̈ anma tu', ta tx'oj ch'elico yul sat Comam Dios, ẍi Comam Jesús tet ebnaj ischejab tu'. 6Lahwi tu' xin isto ebnaj sunil yulajla con̈ob yeb yulajla aldea. Yec' ebnaj ispujbanic'o Tzoti' yet colbanile tet anma. Yak'nipaxo cawxo ebnaj macta ya'ay. 7Naj Herodes, naj yahaw yeco yin̈ ismajul Galilea, yabe naj isk'umal sunil tzettaj ye tu' iswatx'e Comam Jesús, issomchacan̈ yul iswi' naj yuto ay anma chalni haca' ti': —Ha' hune' naj chiwatx'en huntek'an tzet yetu tu', ha' ton naj Juan anican̈ ha' iswi' anma, hulcan̈ isc'ul xol camom, ẍi anma. 8Aypaxo anma chihalni: —Ha' naj Elías chihul isyeb isba hunelxa, ẍi anma. Ay xin anma chalnipaxoj: —Etza ha' huno ebnaj ischejab Comam Dios ec'lena yet payat, ha' hulcan̈ isc'ul xol camom, ẍi ebnaj. 9Yalni naj Herodes tu': —Yaj haninti'an, walan yuxin tzoc'laxilto iswi' naj Juan tu'. ¿Mac xin anmahil hune' naj chal ebnaj isk'umal tu'? ẍi naj. Wal xin caw yoche naj Herodes tu' yila' Comam Jesús. 10Lahwi ismeltzo ebnaj ischejab Comam Jesús, yoc ebnaj yalno tet Comam yin̈ej tzet ye tu' iswatx'e ebnaj. Lahwi tu' isto Comam iscawilal con̈ob Betsaida, han̈c'an̈e xin ebnaj iscuywom Comam tu' yito yintaj. 11Hayet yaben anma ta to Comam bey tu', istopaxo anma isc'atan̈ Comam. Caw c'ul yu ischahlax anma yu Comam, yoc Comam iscuyno anma yin̈ tzet chu yoc anma yul isk'ab Comam Dios. Yak'nipaxo cawxo Comam macta ya'ay. 12Hayet lan̈anxa isto tz'ayic xin, ishitzico ebnaj cablahon̈wan̈ isc'atan̈ Comam, yalni ebnaj xin: —Chejto anma ti' issaya' tzet chislo yeb xin bay chiwayi, tojab yulaj aldea yeb xin xolaj wayan̈bal yuto machi te' n̈a iscawilal bay ayon̈ ti', ẍi ebnaj. 13Yalni Comam tet ebnaj: —Ak'we wa'o anma hex ti', ẍi Comam. Yalnipaxo ebnaj xin: —Yaj han̈ech'an howeb pan yeb cac'on̈ no' cay coxol ti'. ¿Tom xin chon̈tohan̈ colok'o'an̈ tzet chislo sunil anma ti'? ẍi ebnaj tet Comam. 14Wal xin aymi howebo mil isbisil ebnaj winaj ayic'o bey tu', yalni xin Comam Jesús tet ebnaj ischejab: —Halwe tet anma ayojab tz'on̈no yin̈ hunta bulan, cincuenta isbisil yin̈ hunun bulan, ẍi Comam tet ebnaj. 15Hac tu' xin yute ebnaj ischejab Comam tu', yal ebnaj tet sunil anma ta chiay tz'on̈noj. 16Lahwi tu' xin, yinican̈ Comam ixim howeb pan yeb no' cac'on̈ cay, ist'an̈xican̈ Comam satcan̈, yak'ni Comam yuch'andiosal tet Comam Dios. Isk'axponayo Comam ixim, yak'ni Comam ixim yeb no' cay tet ebnaj ischejab tu'. Yoc ebnaj yitxk'anto ixim yeb no' cay tu' yin̈ anma. 17Sunil anma wa'i hantatic'a yoche isc'ul. Lahwi tu' xin yoc ebnaj ischejab Comam tu' isc'utxbanocan̈ ixim matxa lahwi yu anma, caw xin cablahon̈ebto motx ixim matxa lahwi yu anma tu'. 18Yet hunel xin isheq'uilo isba Comam Jesús yu istxahli, yet ischuquil Comam yeb ebnaj iscuywom tu' xin, isk'amben Comam tet ebnaj: —¿Mac anmahilinan yalni anma? ẍi Comam tet ebnaj. 19Istak'wi ebnaj tet Comam: —Ay mac chalni ta hach ti' ha' ton naj Juan anican̈ ha' iswi' anma, aypaxo mac chalni tato Elías hach. Aypaxo mac xin chalni tato c'uxan ta hach ti' ischejab Comam Dios ec'lena yet payat tiempo xahulcan̈ isc'ul xol camom, ẍi ebnaj tet Comam. 20Lahwi tu' xin, isk'amben Comam tet ebnaj: —Haxaca hex ti', ¿mac anmahilinan heyalni? ẍi Comam. Istak'wi naj Pedro: —Hach ti', Cristo hach, ak'bil hamunil yu Comam Dios, ẍi naj. 21Yaj caw cam yalcano Comam Jesús tet ebnaj ta machi hunu mac bay challax hune' tzet yal naj Pedro tu'. 22Yalnipaxo Comam Jesús tet ebnaj iscuywom: —Hanin Ak'bilintijan texol yu Comam Dios, caw yilal chiwila'an isya'tajil, cat quinyintan̈encaniltojan ebnaj ichamta winaj ijbalom yul con̈ob, yeb xin yu ebnaj yahawil yin̈ ebnaj sacerdote, yebpaxo xin ebnaj cuywawom yin̈ isley naj Moisés. Ha' ebnaj tu' xin, chinak'ni camojan, yaja' yin̈ yet yoxeb tz'ayic, cat witzitzbican̈an, ẍi Comam tet ebnaj. 23Lahwi tu' xin, yalni Comam tet sunil anma: —Ta ay hunu mac chiyoche chioc tzujno wintajan, caw yilal ta matxa yeto isba ischuquil. Hinanojab yaben isya'tajil yin̈ sunilbal tiempo, waxan̈ca chi'alaxico yin̈ camical. Ta hinan yetan yanma haca' tu', ec'ojab tzujtzun cuywo wintajan. 24Yuto ha' mac mach hinano iscam wintajan yul sat yiban̈k'inal ti', chisc'ayto isk'inal mach istan̈bal. Wal mac hinan iscam wintajan xin chischah isk'inal mach istan̈bal. 25K'inalo ta ay mac chik'oji ismajnic'o sunil tzet ay yul sat yiban̈k'inal ti', yaja' ta chitocano yanma hune' mac tu' yin̈ isya'tajil yin̈ huneln̈e, ¿aymi isc'ulal chischab hune' mac tu'? ¡Machoj! 26Ta ay mac chitx'ixwi quinischahnihan yul yanma yeb yin̈ tzet chiwalan, Hanin Ak'bilintijan texol yu Comam Dios, chintx'ixwipaxojan yin̈ anma tu' yet chinhulan Yahawoj yeb isk'ak'al wipan, yeb isk'ak'al yip Inmaman, yeb xin yip ebnaj yángel Comam Dios. 27Caw chiwalcanojan yin̈ isyelal teyet, ay haywan̈ mac texol hex ti' maẍto chicami, ha' chi'ilni yoccano Comam Dios Yahawiloj, ẍi Comam Jesús. 28Waxajebxa tz'ayic yalni Comam Jesús huntek'an tu' xin, yijbanahto Comam naj Pedro yeb naj Jacobo yeb naj Juan iswi' hune' witz yu istxahli tet Comam Dios. 29Hayet lan̈an istxahli Comam tu', ishelni isba yillax sat Comam, wal xil isk'ap Comam xin, caw sajhopon̈e elicoj, toxan̈e chitzejtzoni. 30Yin̈ hamataj isyecan̈ isba naj Moisés yeb naj Elías, yoc ebnaj tzotelo yeb Comam. 31Hoyanico isk'ak'al yip Comam Dios yin̈ ebnaj yet chitzotel ebnaj yeb Comam yin̈ tzet chiyu yijni isba iscamical Comam bey Jerusalén. 32Wal naj Pedro yeb ebnaj cawan̈xa yetbi, caw tit iswayan̈ ebnaj, yaj yilo ebnaj iswayan̈, yilni ebnaj isk'ak'al yip Comam yeb cawan̈ ebnaj ayico isc'atan̈ Comam tu'. 33Hayet lan̈anxa ishec'nilo isba cawan̈ ebnaj isc'atan̈ Comam tu', yalni naj Pedro tet Comam: —Mam cuywawom, caw sak'al ta wal je bey ti'. Etza c'ul ta chicowatx'ecan̈an̈ oxebo pat. Hunu hawet, hunu yet naj Moisés, yeb xin hunu yet naj Elías, ẍi naj tet Comam. Yal naj hune' tu' yuto mach chitxumcha yu naj tzet chala. 34Lan̈antotic'a yalni naj Pedro hune' ti', yul hune' moyan yen̈elo ebnaj. Caw xiwcan̈ ebnaj iscuywom Comam tu' yet yoc hoyno hune' moyan yin̈ ebnaj. 35Ha' xol hune' moyan tu' yabe ebnaj huntek'an tzoti' haca' ti': —Ha' naj ti' Inc'aholan sic'bililo wuhan, abewe tzet chal naj, ẍi. 36Lahwi yallax hune' tzoti' tu', yilni ebnaj ta ischuquilxan̈e Comam Jesús ayc'oj. Yin̈ hune' tiempohal tu', machi mac tet yalilo ebnaj yin̈ hune' tzet yil tu'. 37Hayet hune'xa tz'ayical yet ispaxayti ebnaj bey yin̈ iswi' hune' witz tu', caw tzetc'a anma apni chahno Comam Jesús. 38Ha' xol anma tu' xin, elcan̈ yaw hune' naj yin̈ caw ip, yalni naj tet Comam: —Mamin, chink'anan tawet, chawil nino tzet ye hune' nich'an inc'aholti'an, caw hunpilanch'an naj. 39Yuto ay hune' naj ischejab naj matzwalil ch'etan naj. Caw chi'el yaw naj yet ch'oc naj matzwalil yetano naj. Caw chitzicobtan̈elax naj, cat istit hujuy yul isti' naj. Caw chichac'obtan̈elax isnimanil naj, cat ispaxlona naj xin, caw lan̈oxan̈e chisbejtzocano naj matzwalil tu' naj. 40Mawak'le walnihan tet ebnaj hacuywom ti' ta chiyilo ebnaj ischejab naj matzwalil yin̈ naj, yaja' machi yu yu ebnaj, ẍi naj tet Comam. 41Yalni Comam Jesús tet anma: —Ha' ta hex ti' chijala, caw mach cheyaco heyanma yin̈ Comam Dios. Caw hipexcano sic'lebil. ¡Caw nimanxa tiempo yichi wec'an yeb hex! ¿Bak'inc'anab chexcuychahi? Caw chiwabehan isya'il yul wanmahan, ẍi Comam. Yalni Comam tet naj ay isc'ahol tu': —Iti naj hac'ahol tu', ẍi Comam tet naj. 42Yaj hayet ishitzico naj nich'an tu' isc'atan̈ Comam, isk'ojlaxayo naj sat tx'otx' yu naj matzwalil ayco yin̈ naj. Yichico islow hune' yaxcamic yin̈ naj, yaja' haxa Comam Jesús, cachwa yin̈ naj matzwalil tu', iscawxican̈ naj nich'an tu' yu Comam. Yalaxcanico naj yul isk'ab ismam yu Comam. 43Sunil anma tu' c'ayilo isc'ul yilni tato caw niman yelapno yip Comam Dios. Hayet c'ayna isc'ul anma yilni yin̈ tzet iswatx'e Comam Jesús, yalni Comam tet ebnaj iscuywom: 44—Caw cheyabecano yin̈ tzet chiwalcanojan teyet, tajca chic'ayto heyu, yuto Hanin Ak'bilintijan texol yu Comam Dios, chinalaxicojan yul isk'ab anma, ẍi Comam tet ebnaj. 45Yaja' machi nachalo yu ebnaj yin̈ tzet yal Comam tet ebnaj yuto machi ak'lax istxumu' ebnaj, xiwpaxo ebnaj isk'ambenilo tet Comam yin̈ tzet chal yelapnoj. 46Lahwi tu' xin, yoc ebnaj iscuywom Comam tzotelo yin̈ mac caw niman yelapno ye xol ebnaj. 47Yaja' xin yohta Comam Jesús tzet chiec' yin̈ isnabal ebnaj, yuxin isxecti' Comam hune' nich'an unin isc'atan̈. 48Yalni Comam tet ebnaj: —Ha' mac chichahni hunu nich'an unin yuto wetan yehi, Haninan chinischahan. Hac tu' xin mac chinchahnihan, chischahpaxo Mac an̈eintijan. Ha' mac chiyo isba texol, ha' ec'bal yelapno ye yul insatan, ẍi Comam. 49Yalni naj Juan tet Comam Jesús: —Mam cuywawom, jilan̈ yinilo hune' naj ischejab naj matzwalil yin̈ anma, habi yawte naj yin̈, yaja' cocachan̈ naj yuto mach jetbiho naj, ẍi naj Juan tu'. 50Istak'wi Comam: —Mach checach naj, yuto ha' mac mach ayoco ishowal jin̈ jetbi coba yebi, ẍi Comam. 51Hayet lan̈anxa yapni istiempohal ispaxto Comam Jesús satcan̈, yanico Comam yin̈ isc'ul isto bey con̈ob Jerusalén. 52Yulxa beh ayco Comam xin, yanito Comam ischejab yul hune' aldea yul ismajul Samaria isk'anno bay chiway Comam. 53Yaja' machi chahlax ebnaj yu anma ay bey Samaria tu', yuto yohta anma tato bey Jerusalén chito Comam. 54Hayet yilni naj Jacobo yeb naj Juan hune' tu', yalni ebnaj tet Comam: —Mam cuywawom, ¿chimisje hac'ul chicok'anayti k'a k'ak' satcan̈, cat istan̈tzelaxilo huntek'an anma ti' haca' iswatx'e naj Elías yet payat? ẍi ebnaj tet Comam. 55Yaja' t'an̈xico Comam yin̈ ebnaj, iscachlax ebnaj yu Comam. 56Lahwi tu' xin, isto Comam yeb ebnaj bey yul hune'xa aldea. 57Hayet lan̈an isbelwito ebnaj yul beh, ay hune' naj halni tet Comam Jesús: —Mamin, bajxan̈etu'wal chaẍtohi, chinoc tzujnojan tawintaj, ẍi naj. 58Yalni Comam tet naj haca' ti': —No' wech, ay isn̈ach'en no' bay chiwayi, yeb xin no' ch'ic, ay yatut no', yaja' wal Hanin Ak'bilintijan texol yu Comam Dios, caw machi watutan bay chinxewninojan, ẍi Comam tet naj. 59Lahwi tu' xin, yalni Comam tet hunxa naj: Ec'an̈ tzujtzun wintajan cat hacuywi, ẍi Comam tet naj. Istak'wi naj tet Comam: —Mamin, estam chawak' inhamanilan, chito inmujcanto Inmaman babelal, ẍi naj tet Comam. 60Yalni Comam tet naj xin: —Ha' mac camom yul sat Comam Dios ha' chimujni yet camomal tu', walach hach ti' as halic'o yin̈ tzet chu yoc anma yalan̈ ischejbanil Comam Dios, ẍi Comam tet naj. 61Lahwi tu' xin, yalni hunxa naj tet Comam: —Mamin, chinoc tzujnojan tawintaj, yaj chiwochehan ta chawak' inhamanilan chintohan tak'locano tet mac ay bey watutan babel, lahwi tu' xin cat woc tzujnojan tawintaj, ẍi naj tet Comam. 62Yalni Comam tet naj: —K'inalo ta ay hunun mac chimunla yeb no' wacax, cat yoc tzabno yin̈ te te' n̈ic'bil yu no' bay ayco ch'en t'ocom tx'otx', tzujan tu' cat istopaxo t'an̈no naj yintaj. Ta ay mac hac tu', mach chu yoc munil yin̈ yet Comam Dios, ẍi Comam tet naj.

will be added

X\