SAN LUCAS 8

1Lawitu' x'ec' Comam Jesús yulaj con̈ob' b'oj hej wayan̈b'al yala'c'oj tzoti' c'ul tzet chu joc yul sk'ab' Comam Dios. Tzujan heb'ya' cab'lan̈wan̈ ẍcuywi yin̈ Comam. 2Tzujan pax hunk'aan heb'ya' ix x'iotiloj yespíritu naj matzwalil yin̈ yu Comam b'oj x'an̈telax yab'il aycoj yin̈: Ya' María ah Magdala, xiloj Comam hujwan̈ yespíritu naj matzwalil yin̈, 3ya' Juana yixal naj Chuza stan̈eomal smunil naj Herodes, ya' Susana b'oj hunk'aanxa heb'ya'. Heb'ya' ti' xcolwa yin̈ Comam yin̈ hantaj tzet aya, b'oj yin̈ heb'ya' ẍcuywi yin̈ Comam. 4Yet hunec tx'ihal anma nanann̈e con̈ob'al b'ay speto, x'apni ilnoj Comam Jesús. Xalni Comam hune' cuywab'al tet heb'jetb'i: 5—Yet hunec xto hune' naj stz'unu' strigo. Yet xtxihniay naj ixim, ay ixim x'ay yul b'eh, yuxin xan̈ottoj ixim yu anma b'oj slotoj no' ch'ic ixim. 6Ay ixim x'ay yib'an̈ tx'otx'otx' cawil yehtij samch'en yalan̈. Xul ixim, yaja' lemb'il xtajayoj ixim haxca mat tx'ihaloj schac'anil sat tx'otx'. 7Ay ixim x'ay xol te' txoy, ha' xch'ib' ixim, ẍch'ib' pax te' txoy tu', yuxin xb'ajb'itoj ixim yu yen̈elal te'. 8Wal ixim x'ay b'ay k'ej sat tx'otx', yet xch'ib'can̈ ixim, caw c'ul xucuj yul ixim, yuxin ay ixim hune' ciento xucuj sat yin̈ hunun yoj. Lawi yalni Comam hune' tu', xalni yin̈ ip: —Maquex cheyab'e hune' ti', a'wej heyanma he txumniloj tzet chaliloj,. 9Sk'amb'en heb'ya' ẍcuywi yin̈ Comam tzet chaliloj hune' ejemplo tu'. 10Xalni Comam: —Teyetn̈e cha' Comam Dios he txumni tzet chaliloj hin cuywab'al xalni yin̈ tzet chu yoc Comam Dios Yahawoj, yaja' hunmajanxa anma ejemplon̈e chu ya'lax tet, waxan̈ca hajan sb'ak' sat, machu yilni, waxan̈ca chab'e, machu xtxumni. 11Ha' chaliloj hune' cuywab'al ti': Ixim hin̈at, yechel stzoti' Comam Dios ye ixim. 12Ixim ch'ay yul b'eh, yechel anma ch'ab'en stzoti' Comam ye ixim. Haxa ch'apni naj matzwalil chiniloj naj yin̈ yanma anma yun̈e macha' yuluj sc'ul, matxa ẍcolchayi. 13Ixim ch'ay yib'an̈ samch'en, yechel anma caw stzalayi chab'en stzoti' Comam Dios ye ixim. Yaja' mat huneloj chutecoj yin̈ yanma, hayeb'n̈e tz'ayical cha' yuluj sc'ul, haxa chul ilweb'al yin̈, cat ẍpax yin̈taj. 14Ixim ch'ay xol te' txoy, yechel anma ch'ab'en stzoti' Comam Dios ye ixim, yaja' ha' sk'alomal b'oj tzet chochetoj anma satyib'an̈k'inal ti' ha' k'a choche, hactu' chu yiniloj stzoti' Comam Dios yin̈ sc'ul, yuxin lahan b'oj ixim mach sat cha'a. 15Wal ixim x'ay b'ay k'ej sat tx'otx', yechel anma caw chacoj stzoti' Comam Dios yin̈ sc'ul b'oj cha' yanma syijyeni, mach ẍcab'con can̈ sc'ul, yuxin ẍtechaloj yu, lahan b'oj ixim tx'ihal sat cha'a. 16Mach mac lawi stzujb'an scandil cat sn̈ohb'anayoj hunuj xih yib'an̈, mato chactoj yalan̈ xtx'at. Machoj, to chahtoj yib'an̈ hunuj tzetet nahat aycan̈ yun̈e sak'al smujli yul n̈ah. 17Hactu' ye tinan̈, matzet ewan yeyi ta mach ch'ab'chaojiloj, machca tzet ewantaj yeyi ta mach ch'eloj sk'umal cat yeloj yen̈el. 18Yuxin nann̈e heyu yet cheyab'en hune' ti', haxca mac tx'ihal tzet aya, ch'a'laxoj yak'b'il yet, mac hanic'ch'ann̈e yet, hasta ni'an solic ay tet ch'ilaxojiloj. 19X'apni smi' Comam Jesús b'oj hej yuẍtaj, yaja' mach xu yoctoj heb'ya' b'ay ay Comam haxca caw tx'ihal anma. 20Yuxin xhalot tet Comam: —Xhul ha mi' b'oj heb'ya' hawuẍtaj sti' pulta, chul heb'ya' hach yila' 21Xta'wi Comam: —Mactaj ch'ab'en stzoti' Comam Dios cat syijyeni, hacatic'a hin mi'an, b'oj hacojtam wuẍtajan. 22Yet hune' tz'ayic xal Comam Jesús tet heb'ya' ẍcuywi yin̈: —Ton̈wej sk'axepal ha' lago, . Yuxin x'octoj Comam b'oj heb'ya' yul hune' te' barco. 23Yet ayxacoj b'oj heb'ya' yib'an̈ ha', xwayic'oj Comam yul te' barco tu'. Lan̈anto tu' x'ichinacan̈ hune' niman cak'e' smak'nican̈ ha' ha', x'ichi snohaytoj ha' yul te' barco, etza ẍto te' yich ha'. 24Yuxin x'oc heb'ya' spitzc'acan̈ Comam, xalni heb'ya': —Mam Cuywaom, lan̈anxa co toj yich ha'. Yin̈n̈ena tu' x'ahlin̈noj Comam scachni cak'e' b'oj showal ha' mar, xpaxna tz'innayi. 25Xalni Comam tet heb'ya': —¿Tzet yuxin mach ẍcawxi he c'ul yin̈ Comam Dios?. Caw xc'ayiloj sc'ul heb'ya', xalni heb'ya' tet hunun: —¿Mac anmail hune' ya' ti', yuxin somanta cak'e' b'oj ha' mar ẍyijyen tzet chal ya'? ẍi heb'ya'. 26Lawi tu' x'apni Comam Jesús b'oj heb'ya' yul scuenta Gerasa sk'axepal ha' lago Galilea. 27Yet x'el heb'ya' yul te' barco, x'apni hune' naj ah con̈ob' tu' sc'atan̈ Comam. Payxa aycoj hunk'aan yespíritu naj matzwalil yin̈ naj, matxacoj xil sk'ap naj yin̈, matxataj yul yatut naj aya, to b'ay ẍmuji hej camom hat ay naj. 28Ha' xilni naj Comam Jesús x'ah yaw naj, xhul naj sjahb'anoj sb'a yin̈ sat Comam, chalni naj yin̈ caw ip: —¿Tzet hawoc jin̈an Jesús Sc'ahol Comam Dios Ec'b'al Yib'an̈ Sunil Tzetet? Chin k'an tawetan ta machawa' ec'oj ya' janmaan. 29Xal naj hune' tu' haxca schejiloj Comam hunk'aan yespíritu naj matzwalil tu' yin̈ naj. Tx'ihal el ch'etaot naj yu hej espíritu tu', ch'alaxcoj sch'enal sk'ab' naj yu anma cat sc'al-lax yoj naj yu ch'en cadena yun̈e matxa b'ay ẍto naj, yaja' slin̈toj naj ch'en, cat yijb'aottoj naj yu hej espíritu tu' b'ay mach anma. 30Sk'amb'en Comam tet naj: —¿Tzet ha b'ih?. Xta'wi naj: —Legión hin b'ihan. ẍi naj.Hactu' yalni naj haxca caw tx'ihal yespíritu naj matzwalil aycoj yin̈ naj. 31Sk'anni hunk'aan yespíritu naj matzwalil tu' ta mach ẍchejottoj yu Comam b'ay majan hunk'aanxa espíritu tu'. 32Caw tx'ihal no' txitam lan̈an slow sat witz scawilal spahawil sti' ha' lago tu'. Xalni hunk'aan espíritu tu' tet Comam ta chalaxcoj yin̈ no'. C'ultic'a, ẍi Comam. 33Yuxin x'el hunk'aan yespíritu naj matzwalil tu' yin̈ naj tu', x'occan yin̈ no' txitam. Yin̈n̈ena tu' sb'ejniaytoj sb'a no' sat pahaw, x'ayapnoj no' yul ha' lago, xhik'wican no'. 34Ha' xilni heb'naj ẍtan̈eom txitam hune' tu', caw xiw heb'naj, xto heb'naj yin̈ an̈e yalnoj tet anma yul con̈ob', b'oj tet mactaj pujantoj yatut xolaj telaj. 35Yuxin sunil anma x'apni ilnoj tzet xu tu'. Ha' x'apni anma b'ay ay Comam, xilni naj aytic'acoj yespíritu naj matzwalil yin̈, tz'on̈anay naj yich yoj Comam. Ayxacoj xil sk'ap naj yin̈, nanxa yu naj, yuxin sunil anma xiwcan̈. 36Heb'naj caw x'ilni tu', ha' heb'naj xhalni tet anma x'apni tzet xu yan̈cha naj aytic'acoj yespíritu naj matzwalil tu' yin̈. 37Yuxin, sunil anma ah Gerasa tu' x'oc yala' tet Comam ta ch'el b'etu', haxca caw xiw yilni hune' tzet xu tu'. Yuxin x'octoj Comam yul te' barco, xmeltzoyi. 38Sk'antoj sb'a naj x'ilaxiloj hej espíritu tu' yin̈, yaja' xal Comam tet naj: 39—Meltzoan̈ tawatut, cat hawalnic'oj sc'ulal xu Comam Dios tawin̈, Xto naj, spujb'ac'oj yul con̈ob' tzet sc'ulal xu Comam Jesús yin̈ naj. 40Lawi yeq'uiloj Comam Jesús sk'axepic'tij ha' lago, caw tx'ihal anma echman̈e, caw stzalayi schani Comam. 41Ha' tu' x'apni hune' ya' Jairo sb'ih, swi'al yin̈ capiya. X'ay jahnoj ya' yin̈ sat Comam, sk'anni ya' ta ẍto Comam yatut ya', 42haxca lan̈an yel sc'ul ni'an scutz'in ya' scab'lan̈eb'xa hab'il ix, yiptzilch'an ix yu ya'. Yet xto Comam caw tx'ihal anma switz'coj sb'a sc'atan̈ Comam. 43Xol anma tu' aycoj hune' ya' comi' tx'oj yeyi, scab'lan̈eb'xa hab'il mach ẍtuqui xtx'ahwi snimanil ya'. Xax xtxon̈iloj ya' sunil tzet ay yu ya'ni an̈te sb'a, yaja' maẍtic'a hunuj mac xc'oji yan̈ten ya'. 44Xhitzicoj ya' sc'atan̈ Comam, stzab'ni ya' xil sk'ap. Lan̈anto tu' xtuqui yel chic' yin̈ ya'. 45Sk'amb'en Comam: —¿Mac xacoj sk'ab' win̈an?. Sunil mac xalni to mach maca. Xalni ya' Pedro: —Mam Cuywaom, ¿tox machawila to anma ha' chach tenni? . 46Xalni Comam: —Hajxa, ay mac xacoj sk'ab' win̈an, haxca xwab'e yan̈cha hune' anma wuan. 47Ha' xab'en ya' comi' tu' ta x'ab'chaloj ya', xan̈e ẍc'uyc'un ya', xhul ya' sjahb'anoj sb'a yin̈ sat Comam, xalniloj ya' yin̈ sat sunil anma tzet yuxin xacoj ya' sk'ab' yin̈ Comam b'oj tzet xu yan̈cha ya' yin̈ ha' mataj. 48Xalni Comam tet ya': —Miyay, cach an̈chayi haxca xawa' yuluj ha c'ul win̈an. Paxan̈toj, matxa tzet chawacoj yin̈ ha c'ul. 49Lan̈anto b'in stzotel Comam tet ya' comi', x'apni hune' naj schejab' ya' yahaw capiya yala' tet Comam: —Nab'a'xan̈e chawal tet ya' cuywaom ti', xax cam ha cutz'in. 50Ha' xab'en Comam, xalni tet ya' Jairo tu': —Mach ẍtac ha c'ul, a' yuluj ha c'ul yin̈ Comam Dios cat yan̈chaoj ha cutz'in tu'. 51Ha' x'apni heb'ya' yatut ya' Jairo, mach hunuj mac schactoj Comam yul n̈ah, to han̈c'a ya' Pedro, ya' Juan, ya' Jacobo, b'oj smam smi' ix ni'an tu'. 52Xayanxan̈e anma yok' yin̈ ix ni'an, xalni Comam: —Machex ok'i, mat camnajoj ix ni'an ti', to ton̈e ẍway ix. 53Ton̈e stzeyeot Comam yu anma haxca yohtaj heb'jetb'i ta camnajxa ix. 54Stzab'niay Comam sk'ab' ix, xalni yin̈ caw ip: —Ahan̈wanoj tz'ula. 55Lan̈anto tu' xhul sc'ul ix, x'ahnawanoj ix. Schejni Comam a'laxoj wa'oj ix. 56Caw xc'ayiloj sc'ul smam smi' ix, yaja' xal Comam ta mach b'ay ẍhalaxc'oj hune' tzet xu tu'.


Copyright
Learn More

will be added

X\