SAN LUCAS 8

1Lahwi tu' xin yec' Comam Jesús yulaj con̈ob yeb yulaj aldea yalnic'o tzoti' c'ul yin̈ tzet chu yoc anma yul isk'ab Comam Dios. Ha' hun ebnaj ischejab Comam tu' tzujan yintaj. 2Tzujanpaxo huntek'an ebix ix bay yilo Comam ischejab naj matzwalil, yeb huntek'anxa ebix nan yabilal aytic'aco yin̈, cawxican̈ yu Comam. Xol ebix tu' ayco ix María ah Magdala, ix bay yilo Comam hujwan̈ ischejab naj matzwalil. 3Yeb ix Juana, yixal naj Chuza, naj yahaw yeco yin̈ ismunil naj Herodes, yebpaxo ix Susana, yeb huntek'anxa ebix, colwa ebix yin̈ Comam Jesús yeb yin̈ ebnaj ischejab Comam, yin̈ tzet ay yul isk'ab. 4Tzetc'a anma yul hunun con̈ob hul ilno Comam Jesús. Lahwi iscutxban isba anma xin, yalni Comam hune' yechel tet anma: 5—Ay hune' naj to txiho trigo. Hayet lan̈an istxihni naj ixim trigo tu', ay ixim apni c'atna yul beh. Ha' ixim tu' ton̈e xan̈laxto ixim yu anma. Haxa xin no' ch'ic hul sic'nocan̈ ixim. 6Aypaxo ixim apni c'atna xolaj ch'en ch'en. Hayet yahilo ixim yin̈ an̈e tajilo ixim yuto mach ischac'anil sat tx'otx'. 7Aypaxo xin ixim ayc'ay xol yin̈atil te' tx'ix. Hayet isch'ibcan̈ ixim, isch'ibpaxocan̈ te'. Hac tu' xin yu istz'onbayo ixim. 8Haxa hunmajanxa ixim ay xol tx'o tx'otx' caw c'ul. Hayet isch'ibcan̈ ixim, caw c'ul yul ixim yak'a, ay ixim hune' ciento yuteco sat yin̈ hunun iswi', ẍi Comam. Lahwi tu', yalni Comam yin̈ caw ip: —Maquex cheyabe hune' ti', ak'we heyanma hetxumniloj, ẍi Comam tet anma. 9Isk'amben ebnaj chicuywi yinta Comam tu' yin̈ tzet chal yelapno hune' yechel yak' Comam tet anma. 10Yalni Comam tet ebnaj: —Teyetn̈e chak' Comam Dios heyohtan̈elo tzet ewan yehi yu heyoc yul isk'ab Comam, yaj tet anma comon yecheln̈e bay tzotel Comam tet. Waxan̈ca hajan isbak'sat, mach chu yilni, waxan̈ca chabe, yaj mach chitxumcha yu, ẍi Comam. 11Yalnipaxo Comam Jesús: —Wal xin, chiwalan teyet yin̈ tzet chalilo hune' yechel mawalti'an. Ha' ixim hin̈at trigo, yechel Istzoti' Comam Dios ye ixim. 12Ha' ixim hin̈at apni c'atna yul beh chitzotel yin̈ huntek'an anma, hayet chilahwi yaben Istzoti' Comam Dios, cat yul naj matzwalil yin̈, cat yinilo naj Istzoti' Comam Dios yul yanma yun̈e mach chaco yanma anma yin̈, hac tu' xin mach chicolcha anma yu. 13Ha' ixim apni c'atna xolaj ch'en ch'en, chitzotel hune' ti' yin̈ anma caw chitzala yaben Istzoti' Comam Dios, yaj mach huneln̈eho chucanico Istzoti' Comam yul yanma. Hanic'n̈e tiempohal chistz'un yul yanma, yuxin hayet chul ilwebal yin̈, cat yinilo isba yin̈ tzet chal Comam. 14Ha' ixim apni xol te' hin̈at tx'ix, yechel hune' tu' yin̈ anma chi'aben Istzoti' Comam Dios, yaj hayet chibelwito tiempo yiban̈ xin, cat ismajayto ishak'o anma yin̈ Comam, yu ec'na chaco tzet ye tu' ay yul sat yiban̈k'inal ti' yin̈ yanma, maca yu yochento k'alomal, maca yu yochen tzet ay yul sat yiban̈k'inal ti'. Hac tu' xin chu yinilo Istzoti' Comam Dios yin̈ yanma. Yuxin lahan anma tu' yeb ixim trigo machi satni. 15Walpaxo ixim txihlaxayo sat tx'otx' caw k'ej, yeb yax yalan̈, yechel anma chichahni yabe Istzoti' Comam Dios yin̈ sunil yanma, yeb xin chak' yanma yohtan̈eniloj cat isyijeni, mach chicabcon yanma, hac tu' xin chitecha yu, lahan anma tu' yeb ixim caw tzetc'a sat chak'a, ẍi Comam. 16Hayet chicotzujbanico k'a' yin̈ hunu cantil, mach chicon̈ohbaco hunu tzet ye tu' yiban̈, mach chijapaxicto yalan̈ tx'at, wal xin nahat chijacan̈ yun̈e yilni anma chi'octo yul n̈a tu'. 17Hacpax tu' xin sunil tzet ewan yehi chiixtan̈wiloj, yeb xin sunil tzet ye tu' mach ohtabiloj chiohtan̈elaxiloj. 18Yuxin chi-cam-walan heyabe', ha' mac choche istxumuloj, caw chi'ak'lax yohtan̈eloj. Walpaxo mac mach chiyoche istxumulo huntek'an ti', ha' nich'an tzet etza chinachalo yu, chi'ilaxilo tet, ẍi Comam. 19Apni ismi' Comam Jesús yeb ebnaj yuẍta Comam bay ayc'o Comam tu', yaja' machi yu yocto ebnaj yeb ismi' Comam tu' isc'atan̈, yuto caw witz'an yehico anma yin̈ Comam. 20Yuxin hallax tet Comam yu anma ayco isc'atan̈ tu': —Mamin, ayc'o hami' yeb ebnaj hawuẍta istin̈a, tolab choche cachyila', ẍi anma tet Comam. 21Istak'wi Comam tet anma: —Macn̈etic'a chi'aben Istzoti' Comam Dios cat isyijeni, ha' ton huntek'an tu' haca' inmi'an yehi, ha' haca' wuẍtajan yepaxoj, ẍi Comam tet anma tu'. 22Ay hune' tz'ayic xin octo Comam Jesús yul te' barco yeb ebnaj chicuywi yinta Comam. Yalni Comam tet ebnaj: —Ton̈we bey isk'axepic'to ha' lago ti', ẍi Comam. Isto ebnaj yeb Comam xin. 23Hayet lan̈an yec'to ebnaj yiban̈ ha ha' yul te' barco tu', iswaycan̈ Comam yul te'. Istit hune' niman jak'ek' sic'lebil, ismak'nicto jak'ek' ha ha' yul te'. Etza xin tocano te' yich ha'. 24Yuxin oc ebnaj yik'alo iswayan̈ Comam. Yalni ebnaj tet Comam: —Mam cuywawom, Mam cuywawom, lan̈anxa coto yich ha', ẍi ebnaj tet Comam. Yaben̈e Comam tzet yal ebnaj xin, yahwano Comam, yalni Comam tet jak'ek' yeb tet ha ha' ta chislin̈ba isba, ispaxtz'in̈na xin. 25Yalni Comam tet ebnaj: —¿Tzet yin̈ xin mach cheyaco Comam Dios yipo heyanma? ẍi Comam. Caw xiw ebnaj, isc'ayilo isc'ul ebnaj, yallen ebnaj tet hunun: —¿Tzet yelapno ye hune' naj winaj ti'? Caw chisyije jak'ek' yeb ha ha' tzet chal naj, ẍi ebnaj yin̈ Comam. 26Lahwi tu' xin yec' apno ebnaj isk'axepic'to ha' lago yul ismajul Gadara yetc'ulal Galilea. 27Hayet yel Comam Jesús yul te' barco isti' ha' tu', yapni hune' naj ay yul con̈ob tu' isc'atan̈ Comam, ayco ischejab naj matzwalil yin̈ naj. Tx'i'alxa tiempo istzabchati naj, matxatic'a chaco naj xil isk'ap, matxa xin choche naj chicancano naj yul hunu n̈a, haxan̈e xolaj panteón yul camposanto ch'ec' naj. 28Hayet yilnito naj Comam Jesús, yah yaw naj, isjahbanoyo isba naj sata Comam, yalni naj yin̈ caw ip: —¿Tzet hawoc win̈an Jesús, Isc'ahol Comam Dios caw aycano yip? Chink'anan tawet mach chawak' ec'oya' wanmahan, ẍi naj tet Comam. 29Yal naj hune' tu' yuto ischejilo Comam ebnaj ischejab naj matzwalil yin̈ naj. Tx'i'alxa el chietalax naj yu ebnaj ischejab naj matzwalil tu'. Ch'alaxico ch'en cadena yin̈ isk'ab naj yu anma, cat isc'albalax yoj naj yu ch'en cadena tu' yun̈e machi bay chito naj, yaj chislin̈to naj ch'en, cat yijbalaxto naj yu ischejab naj matzwalil bey tx'otx' desierto. 30Isk'amben Comam tet naj: —¿Tzet habi? ẍi Comam. Istak'wican̈ naj tet Comam: —Legión inbihan, ẍi naj tet Comam. Hac tu' yute yalni naj tet Comam yuto caw tzetc'a ebnaj ischejab naj matzwalil ayco yin̈ naj. 31Yalni ebnaj ischejab naj matzwalil tet Comam ta machi chalaxto ebnaj yu Comam bey yul hune' niman xab. 32C'uxan xin tzetc'a no' txitam lan̈an islo yin̈ isc'ul witz iscawilal isti' ha' lago tu'. Yalni ebnaj ischejab naj matzwalil tet Comam ta chichejlaxto ebnaj yin̈ no' txitam tu'. Ishehla Comam tet ebnaj xin. 33Hac tu' xin yu yel ebnaj ischejab naj matzwalil yin̈ naj, yapnicano ebnaj yin̈ no' txitam. Isk'ojnito isba no' sat pahaw, yay apno no' yul ha' lago tu', ishik'nito no' ha'. 34Hayet yilni ebnaj tan̈em txitam hune' tu', yelcan̈ ebnaj yin̈ an̈e, yalnic'o ebnaj yul con̈ob yeb xin tet macta pujanto yatut xolaj telaj. 35Yuxin sunil anma apni ilno tzet yu tu'. Hayet yapni anma bay ay Comam, yilni anma naj aytic'aco ischejab naj matzwalil yin̈, tz'on̈anayo naj yich yoj Comam. Ayxaco xil isk'ap naj, caw tohol anmaxa naj, yuxin sunil anma tu' caw xiwcan̈. 36Ha' ebnaj ilni huntek'an tzet iswatx'e Comam Jesús tu', ha' ebnaj halni tet huntek'anxa anma apni ilno yin̈ tzet yu iscawxican̈ naj bay ayico ischejab naj matzwalil. 37Yu hune' tzet yu tu' yuxin sunil anma ay bey yul ismajul Gadara tu' oc halno tet Comam ta chi'el Comam yul ismajul Gadara tu', yuto caw xiw ebnaj yin̈ tzet yuhi. Yocto Comam yul te' barco, ispaxto Comam. 38Isk'anto isba naj bay el ischejab naj matzwalil tu' yinta Comam. Yalni Comam tet naj ta chican naj baytic'a ay tu'. 39Yalnicano Comam tet naj: —Meltzan̈to hawatut, cat hawalnic'o isc'ulal mayu Comam Dios tawin̈, ẍi Comam tet naj. Isto naj xin, ispujbanic'o naj yul con̈ob tzet yu iscawxican̈ naj yu Comam. 40Lahwi tu' xin ispaxto Comam Jesús bey isk'axepic'to ha' lago. Hayet yapni Comam, caw chitzala anma sunil yuto caw echmabil Comam yu anma. 41Ay hune' naj iswi'ehal yeco yijbali yin̈ iscapilla ebnaj Israel, Jairo isbi naj. Apni naj isc'atan̈ Comam Jesús, yay jahno naj yich yoj Comam. Isk'anni naj tet Comam tato chito Comam bey yatut naj, 42yuto ay hunpilan iscutz'in naj caw lan̈anxa iscami, cablahon̈ebxa habil ix. Hayet isto Comam Jesús yinta naj, caw chiswitz isba anma isto bulbon yinta Comam. 43Xol anma tu' xin, ayco hune' ix ya'ay, cablahon̈ebxa habil mach chilin̈i yay istx'ahwobal ix. Wal xin xa'isc'aytzelo ix sunil tzet aya yu yan̈chahi, yaj maẍtic'a huno mac k'oji yan̈ten ix. 44Tzujanico ix xol anma ayco yinta Comam, ishitzico ix isc'atan̈ Comam, ispitni ix isti' xil isk'ap Comam. Lan̈antotic'a xin islin̈ina yay istx'ahwobal ix. 45Isk'ambenilo Comam tet anma: —¿Mac anmahil hune' manpitnihan? ẍi Comam. Yaj yal anma sunil ta machi mac pitni Comam. Yalni naj Pedro tet Comam: —Mamin, ¿tom mach chawila ta witz'an yehico anma tawin̈? Tzetc'a mac chistenico isba tawin̈, cat xin hak'ambenpaxoj, ¿mac maquinpitnihan? cachi, ẍi naj tet Comam. 46Yalni Comam xin: —Tzic'anab yin̈ machi mac heyalni, wal xin ay mac maquinpitnihan yuto mawabehan ta ay hune' anma macawxinacan̈ yu wipan, ẍi Comam. 47Hayet yilni ix ta mach chu yebanayo ix hune' tu', toxan̈e chic'arla yah ix, yay jahno ix sata Comam. Yalnilo ix yin̈ sat sunil anma tu' tzet yin̈ yuxin ispit ix Comam, yeb tzet yu yan̈cha ix yin̈ an̈e. 48Yalni Comam tet ix: —Miyay, macachcawxican̈ yuto maxawayto yul hawanma win̈an. ¡Paxan̈toj! Ma'oc hawanma yul yehobal, ẍi Comam tet ix. 49Lan̈antotic'a istzotel Comam tet ix xin, yapni hune' naj ispeto bey yatut naj Jairo, yalni tet naj: —Wal ix hacutz'in, macamna ix. Nabxan̈e chito Comam cuywawom ti', ẍi naj tet naj Jairo. 50Hayet yaben Comam hune' tu', yalni Comam tet naj Jairo: —Mach cachxiwi. Ha' hune' wal hawuteni, ayto Comam Dios yul hawanma haxinwal chicawxocan̈ hacutz'in, ẍi Comam tet naj. 51Hayet yapni Comam bey yatut naj Jairo tu', machi huno mac ischacto Comam yul n̈a, han̈c'an̈e naj Pedro, yeb naj Juan, yeb naj Jacobo yebpaxo ismam yeb ismi' ix nich'an tu'. 52Toxan̈e chihan̈cha anma yok' yin̈ ix nich'an tu', caw chitzay isc'ul anma yin̈ ix. Yalni Comam xin: —Mach chexok'i. Mach camnajo ix nich'an ti', wal xin ton̈e chiway ix, ẍi Comam. 53Toxan̈e chitzebi anma yin̈ Comam yuto yohtaxa anma tacamnaxa ix. 54Yoc tzabno Comam yin̈ isk'ab ix. Yalni Comam yin̈ caw ip: —Ahan̈wano tz'ul, ẍi Comam. 55Lan̈antotic'a xin yulcan̈ isc'ul ix yu Comam, yahwano ix. Yalni Comam ta chi'ak'lax wa'o ix. 56Caw c'ayilo isc'ul ismam yeb ismi' ix yin̈ tzet iswatx'e Comam Jesús. Yalnicano Comam xin ta machi bay chihallaxic'o tzet yu yulcan̈ isc'ul ix.

will be added

X\