SAN LUCAS 7

1Yet xtan̈co stzotel Comam Jesús tet anma, xto yul con̈ob' Capernaum. 2Hat ay hune' naj capitán romano. Ay hune' schejab' naj caw xahan ay yu, tx'oj ye sc'ul, lan̈anxa scami. 3Yet xab'en naj capitán tu' sk'umal scan̈il ye Comam, xanitoj naj hunk'aan heb'naj swi'con̈ob' Israel yala' ta ẍto Comam yan̈te naj schejab' naj tu'. 4Xalnipax heb'naj tet Comam: —Naj capitán tu', yettic'a aya chach colwa yin̈ naj, 5haxca xahan ay anma yul co con̈ob' yu naj, xa' ahoj naj co capiyaan. 6Yuxin xto Comam yin̈ heb'naj. Yaja' yet lan̈anxa yapnoj Comam yatut naj capitán tu' xanipaxtoj naj hunk'aan yamigo yala' tet Comam: —Mamin, machawacoj ha b'a yin̈ sya'tajil wuan. Mat yetoj ay hawoctoj yul watutan, haxca caw ay ha may. 7Yuxin xquin tx'ixwi ni'an caw hin to hach wila'an. Ton̈e chawala ta ch'an̈cha hin yawub' ti'an, cat yan̈chaoj. 8Wohtaj hune' ti'an, haxca ay wahaw chin chejnian, ay pax heb'naj soldado chin chejan. Ta ẍwal tet hunuj najan: Asi', ta quin chian, cat sto naj. Cat b'eti, ta quin chian, cat stit naj. Ẍwal tet naj hin chejab'an: Ocan̈ watx'e hune' ti', ta quin chian, ch'oc naj swatx'e. ẍitoj naj capitán tu' tet Comam. 9Ha' xab'en Comam hune' tu', xc'ayiloj sc'ul. Xalni tet anma tzujan yin̈: —Yin̈ caw yeli ẍwal teyetan, co xol hayon̈ israel on̈ ti', maẍto b'ay schalo hunuj anma wu caw cha' yuluj sc'ul win̈ haca' hune' naj ti'an. 10Ha' xmeltzo heb'naj schejab' naj capitán tu', xilni heb'naj to c'ulxa ye naj chejab'. 11Lawitu' xto Comam Jesús yul hune' ni'an con̈ob' Naín sb'ih. Tzujan heb'ya' ẍcuywi yin̈ b'oj tx'ihal anma. 12Yet lan̈anxa yapnoj Comam sti' spultail con̈ob' xilni to lan̈an yilaxtoj hune' naj camom mujlaxoj. Yiptzil yunin hune' ya' comi' camnajxa yichamil, caw tx'ihal anma tzujan yin̈. 13Ha' x'ilottoj ya' yu Comam, stz'a'can̈ sc'ul Comam yin̈ ya', xalni tet ya': —Machach ok'i miyay, 14Lawitu' xhitzicoj Comam sc'atan̈ naj camom tu', xanicoj sk'ab' yin̈ b'atxb'al b'ay ahatoj naj. Slin̈b'an sb'a heb'naj i'n̈e naj. Xalni Comam tet naj camom tu': —Nian tzeh, hayin ẍwal tawetan, ahan̈wanoj,. 15Yin̈n̈ena tu' x'ah tz'on̈noj naj tzeh tu', x'ichi stzotel naj. Xalni Comam tet smi' naj: —Xpitzc'acan̈ hawunin, la miyay, 16Sunil anma xc'ayiloj sc'ul chanicoj smay Comam Dios, chalni anma tu': —Xhul hune' schejab'lom Comam Dios caw ay smay co xol. Xalni pax heb'jeb'i: —Xatij Comam Dios Schejab' scolo' scon̈ob'. 17X'el sk'umal hune' tzet xu Comam tu' sunil yul scuenta Judea tu', b'oj shoyanil tu' xpujnayi. 18Xinitoj heb'ya' ẍcuywi yin̈ ya' Juan Bautista sk'umal hunk'aan tzetet xu ti' tet ya' Juan b'ay ayic'toj yul preso. Yuxin xawte ya' cawan̈ heb'ya', 19xalni ya' ta ẍto heb'ya' sk'amb'e' tet Comam Jesús: —¿Tom hachti' b'ay tz'ib'n̈eb'ilcanoj ta chach huli, mato ayto hunujxa naj ẍjechma yulan? quexchi. 20X'apni heb'ya' sc'atan̈ Comam, xalni heb'ya' tet Comam: —Xcon̈ yatij ya' Juan Bautista co k'amb'e' tawetan, ¿tom hachti' Cristo hach tz'ib'n̈eb'ilcanoj ta chuli, mato ayto hunujxa mac ẍjechma yulan?. 21Yet x'apni heb'ya', c'uxan lan̈an yan̈ten Comam anma ch'ec' ya' yanma yu yab'il aycoj yin̈, b'oj mactaj aycoj yespíritu naj matzwalil yin̈, xhajlo sb'ak' sat mac machu yilni. 22Xta'wi Comam tet heb'ya': —Aswej hal tet ya' Juan tu' tzet chul heyila b'oj tzet cheyab'e. Xhajlo sb'ak' sat mac machu yilni, ẍb'elwican̈ mac maẍtic'a chu yeq'ui, mac ẍk'atoj snimanil yu lepra, ch'an̈chacanoj, mac majan xtxiquin, xa yab'e. Ay camom ẍpitzc'acan̈, xal-lax pax tzoti' yet colb'anil tet anma meb'a'. 23Sak'al yet mac mach ẍcab'con can̈ sc'ul win̈an, quex chi tet ya' Juan tu'. 24Lawi smeltzo heb'ya' schejab' ya' Juan, x'ichi yalni Comam tet anma yin̈ ya' Juan tu': —¿Tzet xb'ey heyila' b'et hune' tx'otx'otx' b'ay mach xc'ay anma? ¿Tom hune' te' ah ẍlexi yu cak'e'? 25Mato ¿hune' naj caw nimej xiquiltaj yecoj xil sk'ap yin̈? Johtaj ta mactaj caw k'aptzeb'il sb'a yu, b'oj caw tz'ajan lahan yeyi, yuln̈e yatut heb'naj yahaw schalo hunk'aan anma tu'. 26Yuxin ¿tzet xb'ey heyila'? ¿Tom hune' schejab'lom Comam Dios? Ho', yin̈ caw yeli ẍwal teyetan, ya' Juan tu' k'a' ec'b'al ya' yib'an̈ hunuj schejab'lom Comam Dios. 27Haxca ha' ya' b'ay tz'ib'n̈eb'ilcanoj chalni tzet ye ya:Ẍwatoj hin chejab' ta satajan, yun̈e swatx'enoj b'eh yalan̈to maẍto chach apni, ẍiayoj. 28Ẍwal teyetan ta xol sunil anma, mach ẍchalo hunuj mac ec'b'al yib'an̈ ya' Juan tu'. Waltu' yeli, xol anma ayxacoj yul sk'ab' Comam Dios, waxan̈ca comonaln̈e yeyi, ec'b'alto sc'ulal chil sataj ya'. 29Yet xab'en anma comonaln̈e yeyi b'oj heb'naj iomiloj melyu yet tohlab'al yin̈ anma tzet xal ya' Juan, xtxumniloj ta st'in̈anil chal ya' yin̈ tzet choche Comam Dios, xi'nican ha' tet ya'. 30Yaja' heb'naj fariseo b'oj heb'naj cuywaom yin̈ sley ya' Moisés max xi' heb'naj ha' tet ya'. Hactu' xu syeni heb'naj ta syah heb'naj tzet choche Comam Dios yin̈ heb'naj. 31Xalni pax Comam: —¿Tzet taxca hunuj b'ay chex hin lahb'ac'ojan? 32Lahan hex b'oj hunk'aan niẍtej unin sajchiayoj yul txon̈b'al, chawten yetb'i chalni: Nab'an̈e chon̈ sonli heyuan, machex can̈alwi. Xco b'itn̈etoj b'it yet camoman, machex ok'paxoj, ẍi niẍtej unin tu'. ¡Haquex tu'! 33Haxca yet xhul ya' Juan Bautista mach'ec' ya' yin̈ hej k'in̈, yuxin cheyala ta aycoj hune' yespíritu naj matzwalil yin̈ ya'. 34Hayin Ab'ilintij yu Comam Dios xol jet-anmail ti'an, haxca chin ec' yin̈ hej k'in̈an, cheyala: Naj Jesús ti' caw tzet swa' naj b'oj caw ch'uc' naj, yamigo sb'a naj b'oj heb'naj iomiloj melyu yet tohlab'al yin̈ anma b'oj hunk'aanxa anma mat t'in̈anoj yecoj, quexchi. 35Yaja' wal anma aycoj stz'ajanil sc'ul Comam Dios yin̈, hab'an syeniloj sb'a yu hej tzetet c'ul chu. 36Yet hunec ay hune' naj fariseo Simón sb'ih xawte naj Comam Jesús wa'oj yatut. Ha' x'apni Comam, x'oc yin̈ meẍa wa'oj. 37Hatic'a yul hune' con̈ob' tu' ay hune' ix ahmul. Ha' xab'en ix ta lan̈an swa' Comam yatut naj fariseo tu', x'apni ix b'oj hune' ch'enal an̈ xuk' sam, alabastro sch'enal. 38Caw ch'ok' ix, x'ay jahnoj ix, ichi xtx'ahni ix yoj Comam yu yal sat, stajtzen ix yu xil swi'. Lawitu' stz'ohni ix yoj Comam, shamnicoj ix an̈ xuk' sam tu' yin̈. 39Ha' xilni naj fariseo tu', ẍb'isb'on sc'ul naj: Ta yeli schejab'lom Comam Dios naj ti', xam xtxum naj ta ahmul ix tzab'tzoncoj yin̈ naj, 40Xalni Comam tet naj: —Simón, ay hune' tzet ẍwal tawetan, . Xta'wi naj: —Hal wetan Mam Cuywaom. 41Xalni Comam: —Hune' naj k'alom, ay cawan̈ heb'naj ay sc'as tet naj. Hune' naj howeb' ciento denario sc'as, hune'xa naj cincuenta. 42Yaja' mach b'ay ẍto heb'naj yi'a' ch'en, yuxin sb'ut'tan̈oj naj sc'as heb'naj. ¿Tzet chawute hawalni? Yin̈ heb'naj cawan̈ tu', ¿mac najil k'a' ch'ochenoj naj k'alom tu'? . 43Xta'wi naj Simón: —Ha' walnian, ham naj k'a' tx'ihal sc'as xtan̈toj yib'an̈, ẍi naj. —Ho' yeli, hactu' haca' hawalni ti', ẍi Comam tet naj. 44Lawitu' xt'an̈xi Comam yin̈ ix, xalni tet naj Simón tu': —¿Xawila tzet xu hune' ix ti'? Yet xquin oquiloj yul hawatut ti'an, mach xawa' xtx'ahil wojan. Wal ix, xtx'ah ix woj yu yal satan, stajtzen ix yu xil swi'. 45Mach xquin ha tz'ohan, wal ix yettax xquin oquilojan, mach xew ix tz'ohni wojan. 46Mach xawahtoj yan̈al xil hin wi'an, wal ix, shamcoj ix an̈ xuk' sam yin̈ wojan. 47Yuxin ẍwalan, haxca caw tx'ihal smul ix ẍb'ut'laxtan̈oj, yuxin caw chin yoche ixan, yaja' mac hanic'n̈e smul ẍb'ut'laxtan̈oj, hanic'ch'ann̈e choche Comam Dios. 48Xalni Comam tet ix: —Iẍ, ẍb'ut'laxcantan̈oj ha mul. 49Heb'naj awteb'il ayictoj b'etu', ẍb'isb'on sc'ul heb'naj: —¿Mac anmail hune' naj ti', yuxin chu sb'ut'nitan̈oj naj smul anma?. ẍi yanma heb'naj 50Xalni pax Comam tet ix: —Paxan̈toj yin̈ tzalalal, cach colchayi, haxca xawa' yuluj ha c'ul win̈an.


Copyright
Learn More

will be added

X\