SAN LUCAS 6

1Yet hune' tz'ayic xewb'al, x'ec'toj Comam Jesús b'oj heb'ya' ẍcuywi yin̈ yul hune' b'eh ch'ec'toj xol ixim trigo, sk'ahniloj heb'ya' b'ay aycoj sat ixim, schilni heb'ya' slob'. 2Xalni hunk'aan heb'naj fariseo: —¿Tzet yuxin chex munla yin̈ tz'ayic xewb'al che chilni sat ixim trigo he lob'?. 3Xta'wi Comam: —¿Maẍto cheyil yul Yum Comam Dios yin̈ tzet ya'lenaj ya' David, yet ẍn̈ohcha ya' b'oj heb'naj tzujan yin̈? 4X'octoj ya' yul yatut Comam Dios, xinican̈ ya' ixim pan halteb'il tet Comam Dios, x'oc ya' swanoj ixim, xa'ni pax ya' tet heb'naj tzujan yin̈. Wal caw yeyi han̈c'a heb'naj sacerdote chu swani ixim. 5B'oj hunxa, Hayin Ab'ilintij yu Comam Dios xol jet-anmail ti'an, hayin yet ay walnian tzet chu juni yin̈ tz'ayic xewb'al. 6Yet hune'xa tz'ayic xewb'al x'ocapnoj Comam Jesús yul hune' capiya scuynuj anma. C'uxan ayictoj hune' naj camnajiloj swatx' k'ab'. 7Ay paxictoj heb'naj cuywaom yin̈ sley ya' Moisés b'oj heb'naj fariseo sc'atni ta chan̈te' Comam naj tx'oj ye tu' yin̈ tz'ayic xewb'al, yun̈e ay b'ay stzab'i heb'naj cat ya'wojc'ule heb'naj yin̈ Comam. 8Wal Comam xax xtxumna Comam tzet nab'il yu heb'naj, xalni tet naj camnajiloj sk'ab' tu': —Ahan̈lin̈noj xol anma ti', X'ahlin̈noj naj xol anma. 9Xalni Comam: —¿Tzet taxca chu juni yin̈ tz'ayic xewb'al cheyab'ecoj? ¿Tom chu juni hej tzetet c'ul mato hej tzetet tx'oj? ¿Tom chu jan̈ten anma, mato co chani camoj?. 10Lawi yec' t'an̈la yin̈ sunil anma, xalni tet naj tx'oj ye sk'ab' tu': —Toholb'an̈eltoj ha k'ab'. Stoholb'an̈eniltoj naj, hatic'a tu' xwatx'ican sk'ab' naj. 11Caw xtit showal heb'naj ayic'toj b'etu' yin̈ Comam, x'ichi sk'umlan sb'a heb'naj tzet chute heb'naj Comam. 12Yet hunec tu' xto Comam Jesús yichlaj witz ya'noj yoración. Sunilb'al ak'b'al xa' Comam yoración tet Comam Dios. 13Ha' sajb'iloj hunxa tz'ayic xawten Comam heb'ya' ẍcuywi yin̈ sc'atan̈. Xol tu' sic'leltoj Comam cab'lan̈wan̈ heb'ya', apóstol xa' yija' heb'ya'. 14Ya' Simón, Pedro x'occan sb'ihoj ya' yu Comam, ya' Andrés yuẍtaj ya' Simón tu', ya' Jacobo b'oj ya' Juan, ya' Felipe, ya' Bartolomé, 15ya' Mateo, ya' Tomás, ya' Jacobo sc'ahol ya' Alfeo, ya' Simón aytic'acoj yin̈ partido cananista, 16ya' Judas sc'ahol ya' Jacobo, b'oj naj Judas ah Queriot, x'anicoj Comam yul sk'ab' camical. 17Yet xpaxtij Comam yichlaj witz tu' b'oj heb'ya' ẍcuywi yin̈, x'ayiloj sat hune' chak'an̈, tx'ihal to anma ẍcuywi yin̈ Comam ay b'etu', b'oj caw tx'ihal anma speto Judea b'oj Jerusalén b'oj anma speto sti'laj ha' mar yul yet Tiro b'oj Sidón. X'apni anma tu' yu yab'e scuywab'al Comam b'oj ya'ni an̈te sb'a mactaj aycoj yab'il yin̈. 18Mactaj ch'ec' ya' yu yespíritu naj matzwalil, ẍwatx'i pax yu Comam. 19Sunil mac tx'oj ye sc'ul tu' cha' yilal yanicoj sk'ab' yin̈ Comam, haxca yun̈e scan̈il ye Comam ch'an̈cha anma. 20Xt'an̈xicoj Comam Jesús yin̈ heb'ya' ẍcuywi yin̈, xalni tet heb'ya': —Hex meb'a' hexti', sak'al heyet haxca heyetwanoj heyoc yul sk'ab' Comam Dios. 21Hex chex n̈ohcha tinan̈, sak'al heyet haxca ch'a'laxoj yec'b'al heyu.Hex ok'ilal heye tinan̈, sak'al heyet haxca cheyila' tzalalal. 22Sak'al heyet yet sunil anma chex yahnojcan̈ wuan, cat hex scajnoj, cat ya'noj ec'oj ya' heyanma yul sk'ab' tzoti'. Hasta chex hal-laxoj matzwalilal, haxca tzujanex win̈an Hayin Ab'ilintij yu Comam Dios xol jet-anmail ti'an, sak'al heyet chaltu'. 23Yet ch'apnoj stz'ayical tu' awejcoj nimej tzalalal yin̈ heyanma haxca tx'ihal spaj ch'a'laxoj teyet yul satcan̈. Haca' chex utelaxoj tu', hactu' x'utelax heb'ya' schejab'lom Comam Dios yu jichmam yet payxa. 24Yaja' hex k'alom hexti', c'antajex haxca xax he cha yak'lob'al he c'ul. 25C'antajex hex nohnaj he c'ul tinan̈, ẍto heyila' wahil yet b'ak'in̈. C'antajex hex chex tzeb'i tinan̈, haxca cheyila' stacb'al he c'ul cat heyok'oj. 26C'antaj hex ta sunil mac ch'anicoj he may b'oj c'ul ẍhal-lax teyin̈ tinan̈, haxca hactu' xhal-lax yin̈ heb'naj lek'ti' xal sb'a schejab'lomoj Comam Dios yet payxa. 27Yaja' ẍwal teyet hex lan̈an heyab'en tzet ẍwal ti'an: Xahan cheyil mactaj aycoj showal teyin̈. C'ul cheyute he c'ul yin̈ mactaj ch'ec'najlicoj teyin̈. 28Tzoti' c'ul cheyal yin̈ mactaj chex tz'acti'n̈eni. K'anwej snimanil sc'ul Comam Dios yin̈ mactaj ch'a'ni ec'oj ya' heyanma. 29Ta ay mac ẍpak'nicoj he k'otx, awejtoj k'axepxa. Ta ay mac ch'iniloj yet yib'an̈ he camiẍ, awejpaxtoj he camiẍ tet. 30Mactic'a ẍk'anni hunuj tzetet teyet, a'wej tet. Ta ay mac ch'iniloj hunuj he tzetet, mache k'an paxoj. 31Ta cheyoche c'ul chu anma teyin̈, hex b'ab'el c'ul cheyu yin̈ anma tu'. 32Ta han̈c'a anma xahan chex ilni ha'n̈e xahan cheyilpaxoj, ¿b'ay ay sc'ulal he c'ul yin̈ hactu'? Hasta anma mat t'in̈anoj yecoj, xahan chil sb'a b'oj mac xahan ch'ilni. 33Ta han̈c'a anma c'ul sc'ul teyin̈, ha' b'ay c'ul cheyute pax e c'ul, ¿b'ay ay sc'ulal he c'ul yin̈ hactu'? Haxca hactu' chute pax anma mat t'in̈anoj yecoj. 34Maca han̈c'a mac ch'a'ni paxoj selel teyet, han̈c'a b'ay cheya' c'amil, ¿b'ay ay sc'ulal he c'ul chaltu'? Hactu' ya'ni pax anma mat t'in̈anoj yecoj c'amil tet yetb'i mat t'in̈anoj yecoj, yun̈e ec'b'al chu ya'ni paxoj selel. 35Yaja' ẍwal teyetan, xahan cheyil anma mat xahanoj chex ilni. C'ul cheyute he c'ul, b'oj a'wej he tzetet c'amil tet anma, yaja' mache yechma ya'lax sc'amb'anil teyet. Ta hactu' cheyute, caw tx'ihal spaj cha' Comam teyet, b'oj cheyeloj ta lahan sc'ulal he c'ul b'oj Comam Dios Ec'b'al Yib'an̈ Sunil Tzetet, haxca c'ul sc'ul Comam yin̈ anma ahmul, b'oj mac mach ch'a'ni yuch'antioẍ tet. 36Tz'aojab' he c'ul yin̈ heyet-anmail haca' stz'a' sc'ul Comam Dios jin̈. 37Macheyitij he cuenta yin̈ tzet ye heyet-anmail, haxin̈wal mach chi'a'tij Comam Dios scuenta teyin̈. Mache cawxecoj smul anma yib'an̈, haxin̈wal mach ẍcawxelaxojcoj heyet teyib'an̈ yu Comam Dios. Nahuln̈ewejtoj smul heyet-anmail haxin̈wal snahuln̈etoj Comam Dios he mul. 38A'wej pax tzetet ayex tet heyet-anmail soman cheyute he wi', haxin̈wal cha' pax Comam Dios spaj selel teyet. Haxca ta haca' hune' mal caw nohnaj, caw tenb'il, hasta caw ch'el malmoni, ta hactu' chu heya'ni, hac pax tu' ya'noj Comam selel teyet. 39Xalnipax Comam hune' ejemplo: —K'inaloj ay hunuj naj machu yilni, ¿taxca chu yijb'anc'oj naj hunujxa naj machu yilni? ¿Taxca mach tohc'ayoj heb'naj scawan̈il yul tz'unew? 40Mach hunuj naj ẍcuywi chu spalc'on yib'an̈ scuywaom. Yet xax lahwi scuywi naj, waltu' lahanxam ch'elojcoj naj b'oj scuywaom tu'. 41K'inaloj ay hunuj heyetb'i ẍto hunuj ni'an k'alem yul sb'ak'sat. Ay hunuj hex ayictoj hunuj patzab' yul sb'ak' he sat. Ta macheyab'e yec'toj hune' patzab' yul sb'ak' he sat, hatoc'anab' ni'an k'alem chu heyilnictoj yul sb'ak' sat heyetb'i. 42Tzic'anab' chu heyalni tet heyetb'i: B'ela, wi'a'caniltij ni'an k'alem ayictoj yul sb'ak' ha satan, ta quexchi. Ta hactu' cheyute, lek'ti'ex. Iwejcaniltij te' patzab' yul sb'ak' he sat, haxin̈wal chu heyiniltij ni'an k'alem ayictoj yul sb'ak' sat heyetb'i. 43Hunuj te' satnom te' c'ul, ¿tox k'a'il sat te' cha'a? Pax te' satnom te' aycoj syab'il, ¿tox c'ul sat te' cha'a? 44Yin̈ te' sat ẍco txumu tzet te'al te': ¿Tox ch'uxlax te' uva yin̈ te' k'antx'ix? ¿Toxca ch'uxlax te' higo yin̈ te' tx'ix? 45Hunuj anma c'ul, c'uln̈etic'a tzet stzote, haxca c'ul yanma, yaja' anma tx'oj, tx'ojn̈etic'a tzet stzote, haxca tx'oj yanma, haxca sunil tzetet ẍjala, yin̈ janma ẍtita. 46¿Tzet yuxin cheyal wetan: Mam Wahaw, quex chi, yaja' mache yijye tzet ẍwalan? 47Ẍwal teyetan: Mac ch'ab'en tzet ẍwalan cat ẍyijyeni, 48lahan b'oj hune' naj xacan̈ yatut sti' hune' ha' niman ha', sc'ajatij naj tx'otx'otx', xto chalo ch'en ch'en xaniayoj naj xe' te' n̈ah tu'. Lawi yah te' xtit hune' niman n̈ab', ha' xch'ib'can̈ ha', x'el ha' yul scahonal. Mach sk'ahul xu yec' ha' yich te', yaja' matzet xu te' haxca caw c'ul yeyoj xe' te'. 49Yaja' mac ch'ab'en tzet ẍwalan, mach syijye, lahan b'oj hune' naj yib'an̈n̈e tx'otx' xayoj sloc'al yatut. Ha' xa'ni hune' niman n̈ab', ẍch'ib'can̈ ha', x'el ha' yul scahonal. Mach sk'ahul xu yec' ha' yich te', yuxin x'ec' wejna te'., ẍi Comam tet heb'ya'


Copyright
Learn More

will be added

X\