SAN LUCAS 5

1Yet hunec xto Comam Jesús sti' ha' lago Genesaret. Caw tx'ihal anma xyamicoj sc'atan̈ Comam, toxan̈e stente sb'a haxca choche yab'e stzoti' Comam Dios. 2Xilni Comam to ay cab' te' barco haman ahayoj sti' ha' tu', lan̈an xtx'ahni heb'naj yahaw te' tx'an̈ txim ib'alatij cay. 3Yuxin x'octoj Comam yul sbarco hune' ya' Simón sb'ih. Xalni Comam ta ẍcam hitzlaxictoj te' yul ha'. Lawitu' x'ay tz'on̈noj, x'oc scuynuj anma. 4Lawi stan̈c'o Comam stzoteli, xalni tet ya' Simón: —Hitzictoj te' b'ay k'a' nimejal yich ha', cat heyaniaytoj tx'an̈ txim. 5Xta'wi ya': —Mamin, sunilb'al ak'b'al xcon̈ ec' yul ha'an, mach hunuj no' xji'an. Yaja' haxca hach chawala ja'aytoj tx'an̈an. 6Yet xaniaytoj heb'ya' tx'an̈ txim tu', caw tx'ihal no' cay xi' heb'ya'. Yuxa yalil no', etza xlin̈motoj tx'an̈. 7X'ichi yec' sk'ab' heb'ya' yawten hunmajanxa heb'ya' yetb'i ayictoj yul hunxa te' barco. Ha' xhul heb'ya', snohtzen heb'ya' scab'il te' barco, etzaxan̈e ẍto te' yich ha' yu yalil no'. 8Ha' xilni ya' Simón Pedro hune' tu', x'ay jahnoj ya' yin̈ sat Comam, xalni ya': —Hitzan̈iloj tin c'atan̈an Mamin, haxca ahmulinan. 9Xal ya' hune' tu' haxca ẍc'ayiloj sc'ul ya' b'oj sunil yetb'i yu hantaj no' xi' heb'ya'. 10Hactu' heb'ya' sc'ahol ya' Zebedeo, ya' Jacobo b'oj ya' Juan, yetb'i ya' Simón, xc'ay sc'ul heb'ya', yaja' xal Comam tet ya' Simón tu': —Machach xiwi. Yin̈xa schab'toj ti', haxa anma chawi'a'tij wetan, haca' hawiniatij no' cay yul ha' ha' ti'. 11Lawi yiniloj heb'ya' sbarco sti' ha' ha' b'oj smunlab'al, xcancanoj tin̈noj, x'occan tzujnuj heb'ya' yin̈ Comam. 12Yet hunec, hat ay Comam Jesús yul hune' con̈ob', x'apni hune' naj sc'atan̈ Comam. Caw tx'oj ye naj yu yab'il lepra. Ha' xilni naj Comam x'ay jahnoj naj, x'aycan xulnuj naj sat tx'otx' yin̈ sat Comam. Sk'anni naj tet Comam: —Mamin, ta sje ha c'ul, chu hawan̈teniloj hune' yab'il ti' win̈an. 13Xanicoj Comam sk'ab' yin̈ naj, xalni Comam: —Ho', ẍwochean, chach an̈chacanoj. Hatic'a tu', x'elna yab'il tu' yin̈ naj. 14Lawitu' xalni Comam ta mach b'ay chalic'oj naj. —As ye ha b'a tet ya' sacerdote cat hawa'ni hawofrenda tet Comam Dios haca tz'ib'n̈eb'ilcan yul sley ya' Moisés, yun̈e syeniloj sb'a tet heb'naj to cach watx'icanoj. 15Haxca b'elay xpujna sk'umal Comam xol anma, yuxin caw tx'ihal anma x'apni yab'e tzet chal Comam b'oj yu ya'ni an̈te sb'a yin̈ hej syab'il. 16Yaja' jichan shec'toj sb'a Comam ya'a yoración b'ay mach anma. 17Yet hunec lan̈an scuyni Comam Jesús anma. Tz'on̈anayoj hunk'aan heb'naj fariseo b'oj heb'naj cuywaom yin̈ sley ya' Moisés. Ay heb'naj speto b'et Galilea, ay heb'naj speto Judea, ay heb'naj speto Jerusalén. Caw aycoj scan̈il ye Comam Dios Jahaw yin̈ Comam yet chan̈ten hej yawub'. 18Lan̈anto tu', x'apni hunk'aan heb'naj i'n̈e hune' naj sat b'atxb'al, machu sb'ili snimanil. Xal heb'naj ya'actoj naj tet Comam. 19Yaja' mach b'ay ẍca yoctoj heb'naj haxca tenanictoj anma. Hactu' xu yahtoj heb'naj swi' te' n̈ah, xiniloj heb'naj stexail te', snon̈chanaytoj heb'naj b'atxb'al b'ay ahatoj naj, x'ayiloj b'ay ay Comam xol anma. 20Ha' xilni Comam to ẍcawxi sc'ul heb'naj yin̈, xalni tet naj tx'oj ye tu': —Wamigo, ẍtan̈can ha mul. 21Yaja' ẍb'isb'on sc'ul heb'naj cuywaom yin̈ sley ya' Moisés b'oj heb'naj fariseo, chalni heb'naj: ¿Mac najil hun ti' yalni, yuxin lahb'ac'oj sb'a naj yin̈ Comam Dios? Mach hunuj mac chu ya'nican tan̈oj mule, to han̈c'a Comam Dios chu yu. 22Ha' xtxumni Comam tzet nab'il yu heb'naj, xalni Comam: —¿Tzet yuxin tx'oj nab'il heyu win̈an? 23¿B'aytet k'a' sub'utaj jalni cat yijni sb'a yin̈ naj cheyab'e? ¿Tox jalni: Xtan̈can ha mul, mato Ahan̈ lin̈noj, cat ha paxtoj, ta con̈ chi? 24Tinan̈, chin yeb' heyila'an ta Hayin Ab'ilintij yu Comam Dios xol jet-anmail ti'an chu hin tan̈tzencan smul anma ay satyib'an̈k'inal ti'an, Lawitu' xalni Comam tet naj tx'oj ye snimanil tu': —Ahan̈ lin̈noj, ican̈ ha wayb'al cat ha paxtoj tawatut. 25Lan̈anto tu', x'ah lin̈noj naj yin̈ sat anma, x'oc naj yanojcoj smay Comam Dios, xi'ni naj swayb'al, xpaxtoj naj yatut. 26Sunil mac xc'ayiloj sc'ul, chanicoj smay Comam Dios, chalni heb'jetb'i: —Yin̈ hune' tz'ayic ti', tx'ihal c'ayb'alc'ule xjila. 27Lawitu' xto Comam Jesús. Ha' x'ec'toj b'ay tz'on̈anay hune' naj iomiloj melyu yet tohlab'al, Leví sb'ih, x'occan t'an̈noj Comam yin̈ naj, xalni tet naj: —Ocan̈ tzujnuj win̈an. 28X'ah lin̈noj naj, stin̈chancan naj smunil, x'occan tzujnuj naj yin̈ Comam. 29Lawitu' xec'tzen naj hune' k'in̈ yatut smayoj Comam. Tx'ihal heb'naj iomiloj melyu yet tohlab'al b'oj hunk'aanxa anma aycoj yin̈ meẍa b'oj Comam. 30Heb'naj fariseo b'oj hunmajan heb'naj cuywaom yin̈ sley ya' Moisés yetb'i heb'naj tu', tx'oj chal heb'naj tet heb'ya' ẍcuywi yin̈ Comam, chalni heb'naj: —¿Tzet yuxin chex wa' xol heb'naj iomiloj melyu yet tohlab'al ti', b'oj hunk'aanxa heb'naj mat c'uluj yecoj?. 31Xta'wi Comam: —K'inaloj hunuj anma c'ul yeyi, ¿tox ẍtoj saya' hunuj naj an̈lom? To anma tx'oj ye sc'ul, ha' sayni naj an̈lom tu'. 32Mach xquin hul wawte' anma chalan ta c'ul yecoj, to ha' anma ahmul xquin hul wawte'an yun̈e sb'ejnican yuni xtx'ojal. 33Xalni heb'naj tet Comam Jesús: —Heb'naj ẍcuywi yin̈ ya' Juan b'oj heb'naj ẍcuywi yin̈ heb'naj fariseo naun̈e cha'ni heb'naj yoración b'oj ayuno. Yaja' heb'naj ẍcuywi tawin̈ ti', macha' heb'naj ayuno. 34Xta'wi Comam: —K'inaloj ta ay hunuj mohilal, ¿tox chu he chilb'an anma awteb'il yin̈ mohilal tu' ya'ni ayuno yulb'al aytoc'oj naj mohyom xol heb'jetb'i? 35Ẍto apnoj stz'ayical b'ay ch'ilaxojiloj naj mohyom tu', waltu' cha'a' anma tu' ayuno. 36Xalni pax Comam hune'xa ejemplo: —K'inaloj ta ẍco b'uj hunuj camiẍe xilxa, yaja' yin̈ hunuj ac' ẍjiloj sb'ujil, mat c'uluj ch'elicoj, haxca mach scha sb'a k'ap ac' b'oj k'ap xil, b'oj nab'n̈e ẍjetatoj k'ap ac' tu'. 37Ay hunxa ejemplo: Machu janiaytoj vino matto howb'inajoj yul hunuj no' xil tz'um tx'uy yeyi, haxca ta machoj, chim lin̈mooj no' yet ẍhowb'ojiloj vino tu', cat yetaxtoj scamajanil. 38Yuxin yul no' ac' tz'um tx'uy yeyi chu yalaxaytoj vino ac' matto howb'inajoj haxin̈wal lahan ẍcolcha scamajanil. 39K'inaloj ta ay mac ch'uc'ni vino payxa watx'inaj, matxa sje yuc'u' vino toto xwatx'i, ha' chala' ta k'a' c'ul yuc'ut vino payxa watx'inaj.


Copyright
Learn More

will be added

X\