SAN LUCAS 4

1Lawi yi'ni ha' Comam Jesús xpaxtij sti' ha' niman Jordán, aycoj yalan̈ schejb'anil Comam Espíritu Santo, x'iottoj Comam b'et tajin̈ witz ac'al. 2Yulb'al cawinaj tz'ayic x'iotc'oj b'etu' yu Comam Espíritu Santo yun̈e yilweot yu naj matzwalil yu yanicoj smul. Yulb'al scawinaj tz'ayic tu', mach xwa'i. Lawitu' xn̈ohchacan̈. 3Xalni naj matzwalil tu' tet Comam: —Haxca Sc'ahol Comam Dios haweyi, hal tet hune' ch'en ch'en ti' pac'ojab' ch'en itail. 4Xta'wi Comam: —Tz'ib'n̈eb'ilcanoj: Matoj yun̈e ita yuxin ay co k'inal, ẍiayoj. 5Lawitu' x'ilaxtoj Comam yu naj swi' hune' niman witz, yin̈n̈e hunip k'inanil sye naj sunil hej con̈ob' ay sat tx'otx'otx' tet Comam. 6- 7Xalni pax naj: —Ta chach ay jahnoj cat hin ha hak'enan, chach wa'a'coj yahawoj sunil hunk'aan tzetet ti' b'oj sunil sk'alomal. Haxca wet xu ya'laxan, yuxin chu wa'ni tet mac chal hin c'ulan. 8Xta'wi Comam: —Tz'ib'n̈eb'il yul Yum Comam chalni: Hayinn̈e chin he hak'ean, haxca hayinn̈e hin he Yahawan b'oj hayinn̈e hin he Diosalan, hayinn̈e chin heyijyean, ẍi Comam Dios yul Yum, . 9Lawitu' xinitoj naj Comam yul con̈ob' Jerusalén. Xijb'anatoj naj Comam swi' yatut Comam Dios, xalni naj: —Haxca Sc'ahol Comam Dios haweyi, b'ejaytoj ha b'a b'eti', 10haxca tz'ib'n̈eb'il yul Yum Comam chalni:Cha'a'tij Comam Dios hej yángel hach stan̈e', 11machach schab'ayoj sat tx'otx' yun̈e mach ẍlahwi hawoj yin̈ ch'en ch'en, ẍiayoj. 12Xalnipax Comam: —Tz'ib'n̈eb'ilcan yul Yum Comam Dios: Machin heyacoj yin̈ ilweb'alan, haxca he Yahaw wean b'oj he Diosal, ẍiayoj. 13Lawi yel yin̈ sc'ul naj matzwalil tu' yilweni tzet chu sub'cha Comam yu naj, lawitu' x'aotcan Comam hanic'xa yu naj. 14Yet xmeltzo Comam Jesús Galilea, aycoj Comam yalan̈ schejb'anil Comam Espíritu Santo. Sunil hej b'etu' xpujna sk'umal Comam. 15X'ichi scuywa Comam yul hunun capiya. Caw c'ul stzotel sunil anma yin̈ Comam. 16Yin̈tic'a hunk'aan tz'ayic tu', xto Comam Jesús yul con̈ob' Nazaret b'ay xch'ib'can̈. Yin̈ tz'ayic xewb'al, xto Comam yul capiya haca'tic'a chu sb'ey yin̈ hunun tz'ayic xewb'al. X'ah lin̈noj b'ay ẍlin̈i heb'naj ch'ijb'ali. 17X'alaxc'oj te' hum tz'ib'n̈eb'il yu ya' Isaías, schejab'lom Comam Dios tet Comam. Solnitoj te', xchalo b'ay chalayoj: 18Aycoj Yespíritu Comam Jahaw win̈an, xquin sic'le Comam yu walni tzoti' c'ul tet anma matzet yin̈ ẍcawxi sc'ul. Xquin yatij Comam wala' tet mactaj haca' presu yean ta chu scolchayi, b'oj yu wa'ni sajilk'inal yila' mactaj machu yilnian, b'oj yu hin colni mactaj ch'ec' ya' yanma yul sk'ab' hunujxa yet-anmail. 19Xquin yatij wala'an ta xax apni stz'ayical scolni Comam Jahaw scon̈ob', ẍiayoj. 20Lawitu' schulniayoj Comam te', xanic'oj te' tet naj ẍtan̈en yul capiya. X'ay tz'on̈noj, x'oc shiltx'onojiloj tzet chal te'. Hunel st'an̈icoj anma yin̈. 21Xalni Comam: —Tinan̈ xijcan sb'a tzet tz'ib'n̈eb'ilcan ti' yin̈ he sat. 22Sunil anma c'ul stzotel yin̈ Comam, caw xc'ayiloj sc'ul haxca caw c'ulch'an stzoteli. Chalni tet hunun: —¿Tox mataj naj ti' sc'ahol naj José?. 23Xalni Comam: —Chim heyala' wet haca' stzoteb'al anmaan: Ta an̈lomach, an̈te ha b'a, ẍi. Wal hex chim heyala' wetan: Sunil hej c'ayb'alc'ule ẍjab'e hawuni Capernauman, yepax yul ha con̈ob' ti', quexchimi. 24Yin̈ caw yeli ẍwal teyetan, mach hunuj schejab'lom Comam Dios ta xahan ch'ilot yul scon̈ob'. 25¿Chim tit yin̈ he c'ul tzet xu yet xec'le ya' Elías schejab'lom Comam Dios? Yictaj scan̈ hab'il mach xa' ha' n̈ab' yul con̈ob' israel b'oj shoyanil tu', xhul hune' niman wahil. Tx'ihal heb'ix camnajxa yichamil ay b'et israel yet tu', yaja' mach hunuj heb'ix b'ay xatoj Comam Dios ya' Elías scololoj tet hune' wahil tu', 26to tet hune' ix mat israeloj ay yul con̈ob' Sarepta b'et Sidón, hat xchejottoj ya' yu Comam. 27Tijab' pax yin̈ he c'ul tzet xu yet x'ehcoj ya' Eliseo schejab'lom Comam Dios. Tx'ihal anma israel aycoj yab'il lepra yin̈, yaja' mach hunuj xan̈te ya' Eliseo tu', to han̈c'a hune' naj mat israeloj Naamán sb'ih, ah Siria, xan̈te ya'. 28Ha' xab'en anma ayic'toj yul capiya hune' tu', sunil mac xtit showal. 29X'ah lin̈noj heb'naj, xinitoj heb'naj Comam xtxam con̈ob' sti' hune' pahaw aycoj swi' witz b'ay aycoj con̈ob' tu', sb'ejniaytoj heb'naj Comam b'etu' yalni. 30Yaja' x'ec'toj Comam xol heb'naj, xpaxtoj. 31Yet hunec' tu', xto Comam Jesús yul con̈ob' Capernaum b'et Galilea. X'ichi scuyni Comam anma yin̈ hunun tz'ayic xewb'al. 32Caw ẍc'ay sc'ul anma, haxca yet lan̈an scuywa Comam, hab'an syeniltoj ta Comam Dios x'a'ni scan̈il yeyi. 33Ayictoj hune' naj aycoj hune' yespíritu naj matzwalil yin̈ yul capiya tu'. X'awican̈ naj yin̈ ip, xalni naj: 34—Jesús ah Nazaret, aon̈canojan, ¿tzet hawoc jin̈an? ¿Mato chach hul hon̈ ha c'ayalojan? Wohtajan mac hach hachil, hachti' Sic'leb'il hach yu Comam Dios echmab'il yuli. 35Xcachot hune' yespíritu naj matzwalil tu' yu Comam xalni yin̈ hacti': —Cach ha ti'. Elan̈ yin̈ naj ti', Lawitu' xb'ejotay naj yin̈ tx'otx' yu hune' yespíritu naj matzwalil x'el yin̈ naj. Yaja' matzet xuteot naj yu. 36Hantaj anma x'ilni hune' tu', caw xc'ayiloj sc'ul, xalni heb'jetb'i: —¿Tzet yelapnoj ye tzet chal naj ti'? Caw ay smay b'oj scan̈il ye stzotel naj. Ẍchejniloj naj hej yespíritu naj matzwalil yin̈ anma, lemb'il ch'eli. 37Sunil hej b'etu' b'oj hej con̈ob' aycoj shoyanil, xpujna scan̈il ye Comam. 38X'eltij Comam Jesús yul capiya, xto yatut ya' Simón. Caw aycoj k'a' yin̈ smi' yixal ya' Simón tu' yet x'apni Comam. Xk'anot tet Comam ta chan̈te Comam ya' comi' tu'. 39Xhitzicoj Comam sc'atan̈ ya', ẍchejni Comam eloj k'a' yin̈ ya'. Hunip tu' c'ulxa ye ya'. Ha' x'ahwanoj ya' x'oc ya' swatx'enoj tzet slo heb'ya'. 40Yet lan̈an sto tz'ayic, sunil mac ay syawub' nanann̈e yab'ilal aycoj yin̈, ẍb'ey ya'noj an̈te tet Comam. Ha' chanicoj Comam sk'ab' yin̈ yawub' tu' cat yan̈chayi. 41Tx'ihal anma aycoj yespíritu naj matzwalil yin̈, ha' yet ch'el heb'naj, toxan̈e ch'el yaw heb'naj, chalni espíritu tu': —Hachti', Sc'ahol Comam Dios haweyi,. Yaja' ẍcachot yespíritu naj matzwalil tu' yu Comam, mach ẍchaot stzoteloj, haxca yohtaj ta Comam Jesús ha' Cristo echmab'il yuli. 42Yet sajb'iloj hunxa tz'ayic, xto Comam xtxamlaj con̈ob' b'ay mach anma. Ch'ec' anma saya' Comam. Ha' x'apni b'ay ay Comam, sk'anni ta matxa ch'el Comam yul scon̈ob' heb'jetb'i tu'. 43Xalni Comam tet heb'jetb'i: —Yilal wec' walnojc'oj tzoti' c'ul yin̈ tzet chu yoc anma yul sk'ab' Comam Dios tet hunmajanojxa con̈ob'an, haxca yu hune' ti' yuxin xquin alaxtijan. 44Hactu' xu yec' Comam scuynuj anma yulaj capiya b'et Judea.


Copyright
Learn More

will be added

X\