SAN LUCAS 4

1Lahwi yah ha' iswi' Comam Jesús, yel Comam isti' ha' niman Jordán. Ayco Comam yalan̈ yip Comam Espíritu Santo yet isto Comam bey hune' tx'otx' desierto. 2Ha' tu' ehayo Comam cawina tz'ayic, maẍtic'a xin wa'i. Lahwi tu' xin yoc naj matzwalil yilweno Comam yun̈e yanico ismul yuto caw xan̈ohcha Comam. 3Yalni naj matzwalil tet Comam: —Tato Isc'ahol Comam Dios hawehi, hal tet hune' ch'en ch'en ti' meltzojabico ch'en wahil, ẍi naj. 4Istak'wican̈ Comam tet naj matzwalil tu' xin: —Yul Yum Comam Dios tz'ibn̈ebilcanoj: “Maẍn̈etaj yu tzet chicolo yuxin ay cok'inal, to yupaxo Istzoti' Comam,” ẍiayoj, ẍi Comam tet naj. 5Lahwi tu' xin, yilaxto Comam yu naj matzwalil bay caw nahat yecanocan̈, lembiln̈e xin isyeni naj sunilej tx'otx' nimeta con̈ob ay yul sat yiban̈k'inal ti' yeb isk'alomal tx'otx' tet Comam. 6Lahwi tu' xin yalni naj matzwalil tet Comam: —Chachwak'acojan yahawo sunil huntek'an tx'otx' con̈ob ti' yeb yin̈ isk'alomal. Ha' huntek'an ti' ak'bilico yul ink'aban, yuxin chisje wak'nihan tet mac bay choche inc'ulan. 7Ta chachay jahno insatajan, cat hawinayo haba wetan, chiwak'a'an sunil huntek'an ti' tawet, cat yoccano hawu, ẍi naj matzwalil tet Comam. 8Istak'wican̈ Comam Jesús tet naj matzwalil tu': —Chal Comam Dios yul Yum haca' ti': “Han̈ech'an wetan chu heyinayo heba, yuto heyahawil yeb heDiosalpaxo wehan, yeb han̈ech'an wetan cheyije,” ẍiayoj, ẍi Comam tet naj. 9Lahwi tu' xin, yilaxto Comam yul con̈ob Jerusalén yu naj matzwalil. Yinahto naj Comam yin̈ iswi' yatut Comam Dios, yalni naj: Ta caw yeli Isc'ahol Comam Dios hawehi, k'ojayto haba bey ti', 10yuto chal Comam Dios yul Yum: Chiwak'a'tojan ebnaj ángel cachistan̈e', 11yun̈e mach chachischayo ebnaj sat tx'otx' yun̈e mach chilahwi hawoj yin̈ ch'en ch'en, ẍiayoj, ẍi naj tet Comam. 12Istak'wican̈ Comam tet naj: —Yaj halbilpaxo yul Yum Comam Dios: Mach chinheyacojan yin̈ ilwebal yuto heyahawil wehan, yeb xin heDiosal wepaxojan, ẍiayoj, ẍi Comam. 13Yet yilni naj matzwalil ta matxa hunuxa tzet bay chu issubcha Comam Jesús yu naj, isbejnicano naj Comam hanic' tiempohal. 14Lahwi tu' xin ismeltzopaxto Comam Jesús bey Galilea, ayco Comam yalan̈ yip Comam Espíritu Santo. Sunil yul ismajul Galilea tu' pujnacan̈ yabelaxilo Comam. 15Iscuyni Comam anma yul hunun con̈ob yul iscapilla ebnaj Israel, caw sunil anma halni c'ulla tzoti' yin̈ Comam. 16Lahwi tu' xin, isto Comam Jesús bey con̈ob Nazaret bay ch'ibcan̈. Hayet istz'ayical xewilal yocto Comam yul iscapilla ebnaj Israel haca'tic'a chu isbey Comam yin̈ hunun tz'ayic xewilal. Yah lin̈no Comam bay ch'oc lin̈no ebnaj ijbalon̈ ch'ilni Yum Comam Dios. 17Yak'lax te' hum tet Comam, te' hum tz'ibn̈ebilcano yu naj Isaías, hune' ischejab Comam Dios yet payat. Isholnito Comam te' xin, yilchalo yu Comam bay chal haca' ti': 18Ayco Yespíritu Comam Dios Jahawil win̈an, sic'bil incan̈an yu walnihan tzoti' c'ul tet anma matzet ayco yipo yanma. Ak'bilintijan yu Comam yu walnihan colbanile tet macta ayicto yul preso, yeb yu wak'nipaxojan issajilk'inal yila' macta mach chu yilni, yeb yu inbejtzonan mac ayco yalan̈ isya'tajil. 19Quinyatijan wala'an ta ch'ayilo istiempohal iscolnilo Comam Dios iscon̈ob, ẍiayoj, ẍi Comam. 20Lahwi tu' xin, ischulnipaxcanayo Comam Jesús te' hum tu', yak'ni Comam te' tet naj ay ismunil yul iscapilla ebnaj Israel tu', yay tz'on̈no Comam. Sunil anma ayicto bey tu', occano t'an̈no yin̈ Comam. 21Yichico Comam yalnilo tet anma haca' ti': —Ha' yin̈ hune' tz'ayic ti', yin̈ hesat mayijcano isba tzet tz'ibn̈ebilcano yin̈ te' hum ti', ẍi Comam. 22Wal xin sunil anma caw c'ul istzotel yin̈ Comam Jesús. Caw c'ayilo isc'ul yuto c'ulch'an istzoteli. Yichico anma yalni tet hunun: —¡Yaj isc'ahol naj José ye naj ti'! ¿Tzet xin chu yalni naj haca' ti? ẍi ebnaj yin̈ Comam. 23Yuxin yal Comam tet anma: —Hex ti', ¿chimheyala' wetan yin̈ hune' tzoti' chal anma?: “Hach an̈tem anma, an̈tecano haba,” ẍi. Chimheyalpaxoj: “Jabehan̈ tzettaj ye tu' hawatx'e bey Capernaum, yuxin watx'e hune' tu' yul hacon̈ob ti',” quexchimi wetan, ẍi Comam. 24Yalnipaxo Comam: —Yin̈ caw isyelal chiwalan teyet, machi huno ischejab Comam Dios xahan chi'illax yu yet con̈ob. 25Naweti yin̈ istiempohal naj Elías, ischejab Comam Dios payat. Caw yicta yox habil machi yak' n̈ab, yuxin hul hune' niman wahil yiban̈ anma sunil. Yet hune' tiempohal tu', tzetc'a ebix hunix jet Israelal, 26yaj maẍtaj yin̈ ebix tu' alaxti naj Elías colwal yu Comam wal xin han̈ech'an yin̈ hune' ix mach Israeloj, hune' ix ay bey con̈ob Sarepta yul ismajul Sidón. 27Nawepaxti yin̈ hune'xa ischejab Comam Dios chiyij Eliseo. Yin̈ istiempohal naj, tzetc'a jet con̈ob Israel tzabchati yu hune' yabil chiyij lepra; yaj machi hunu ebnaj tu' yak' cawxo naj Eliseo. Han̈ech'an hune' naj mach Israeloj chiyij Naamán ay yul ismajul Siria, han̈ech'an naj tu' yak' cawxo naj, ẍi Comam tet ebnaj. 28Hayet yaben ebnaj ayicto yul capilla tu' yin̈ tzet yal Comam, caw tit ishowal ebnaj. 29Yah lin̈no ebnaj, yoc tzabno ebnaj yin̈ Comam, yinito ebnaj Comam yin̈ istxam con̈ob yin̈ iswi' hune' witz bay ayco con̈ob tu' yu istennicanto ebnaj Comam sat hune' pahaw yalni. 30Yaj wal Comam Jesús palan̈ yec'to Comam xolbal ebnaj, isto Comam. 31Lahwi tu' xin, isto Comam Jesús yul con̈ob Capernaum yul ismajul Galilea. Iscuyni Comam anma yin̈ hunun tz'ayic xewilal yul iscapilla ebnaj Israel. 32Caw xin chic'ay isc'ul anma yaben iscuywa Comam, yuto caw haban isyenilo isba ta caw ak'bil yip yu Comam Dios. 33Yul capilla tu' ayicto hune' naj ayco ischejab naj matzwalil yin̈, yah yaw naj yin̈ caw ip, yalni naj tet Comam: 34—¿Tzet hawoc jin̈an̈ ach Jesús ah Nazaret? ¿Tom chaẍhul con̈hatan̈tzelojan̈ hawalni? Wohtajan mac anmahilach hach ti', machi nino istx'ojal ayco tawin̈, ẍi naj tet Comam. 35Iscachwa Comam yin̈ ischejab naj matzwalil tu': —¡Cach hati', elan̈ yin̈ naj! ẍi Comam. Lahwi tu' xin, isk'ojlaxayo naj sat tx'otx' yu ischejab naj matzwalil sata sunil anma. Yel ischejab naj matzwalil yin̈ naj, yaj machi islahwilal naj oqui yet isk'ojlaxayo naj. 36Caw c'ayilo isc'ul sunil anma yilni, yalob tan̈en anma tet hunun: —¿Tzet tzoti'al mayal naj ti'? ¡Caw aycano yip istzoti' naj! ¡Caw chiyijelax tzet chal naj, yet chalni naj ta ch'el ischejab naj matzwalil yin̈ anma, yin̈ an̈e ch'el ebnaj! ẍi anma yin̈ Comam. 37Sunil yul ismajul hune' con̈ob tu' yeb ej ishoyanil, pujnac'o isbi ta ay yip Comam. 38Hayet yelti Comam Jesús yul capilla tu', isto Comam yatut naj Simón. Caw ay k'a' yin̈ ismi' yixal naj, yuxin k'anlax tet Comam ta chak' cawxo Comam ixnam. 39Ishitzico Comam isc'atan̈ ixnam, yinilo Comam hune' k'a' tu' yin̈ ixnam, iscawxican̈ ixnam. Hunepixto xin yahwano ixnam, iswatx'en ixnam tzet chislo Comam yeb iscuywom. 40Hayet lan̈an isto tz'ayic xin, sunil anma beyc'o yak'a'cano isyawub tet Comam, tzitamlah yabilal ayco yin̈. Hayet chanayo Comam isk'ab yiban̈ anma ya'ay tu', cat iscawxicanocan̈. 41Tzetc'a anma ayco ischejab naj matzwalil yin̈ cawxican̈, toxan̈e ch'el yaw ebnaj yet ch'elcano ebnaj yin̈ anma, chalni ebnaj haca' ti': —Hach ti', Isc'ahol Comam Dios hawehi, ẍi ebnaj. Yaj cachlax ebnaj yu Comam. Machi chahlax tzotelo ebnaj yuto yohta ebnaj ta ha' Comam Jesús tu', ha' ton Comam Cristo, echmabil yul yu ebnaj Israel. 42Hayet issajbilo hunxa tz'ayic xin, isto Comam Jesús istxam con̈ob bay machi anma ch'eq'ui. Istopaxo anma saywal yin̈ Comam. Hayet yapni anma bay ay Comam tu' xin, yelico yaw anma yin̈ Comam ta mach chito Comam hunuxa con̈ob. 43Yalni Comam tet anma: —Yilal wec'an walnoc'ojan Tzoti' c'ul yin̈ tzet chu yoc anma yul isk'ab Comam Dios yul huntek'anxa con̈ob, yu hune' tu' yuxin Ak'bilintijan, ẍi Comam. 44Hac tu' yu yec' Comam iscuyno anma yulajla con̈ob yul hunun iscapilla ebnaj Israel.

will be added

X\