SAN LUCAS 3

1- 2Sholan̈eb'xa hab'il yoc naj Tiberio yahawoj hunk'aan con̈ob' aycoj yalan̈ schejb'anil Roma, c'uxan ha' tu' xa' Comam Dios schejb'anil ya' Juan sc'ahol ya' Zacarías yet ay ya' b'et yul tajin̈ witz ac'al. Aycoj naj Poncio Pilato yahawoj con̈ob' Judea, aycoj naj Herodes yahawoj con̈ob' Galilea, aycoj naj Felipe yuẍtaj naj Herodes tu' yahawoj con̈ob' Iturea b'oj Traconite, aypaxcoj naj Lisanias yahawoj con̈ob' Abilinia b'oj aycoj naj Anás b'oj naj Caifás swi'aloj yin̈ heb'naj sacerdote. 3Hatu' xto ya' Juan sti'laj ha' niman Jordán, yalnoj tet anma ta sb'ejcan yuni hej xtx'ojal yun̈e ya'laxcan tan̈oj smul cat yi'ni ha'. 4Hactu' xu yijni sb'a tzet tz'ib'n̈eb'ilcan yu ya' Isaías, schejab'lom Comam Dios, chalni ya': Ay hune' naj ch'awi yin̈ ip b'et yul tajin̈ witz ac'al, chalni naj:Haca' chu he watx'en b'eh yet chul hunuj naj yahawil, hactu' he watx'en he b'eyb'al haxca yulxa Comam Jahaw. 5Nohtzelaxojab' sunil hej niẍtej xuch. Sunil hej witz b'oj won̈an ẍc'ajlaxayoj, toholb'an̈elaxojab' sunil b'eh cotxquiẍtaj yeyi, hej b'eh c'ob'quiẍtajn̈e yeyi ẍb'aln̈elaxi. 6Hactu' chu yilnoj sunil anma Scolomal yet cha'a'tij Comam Dios, ẍinaoj naj. 7Tx'ihal anma x'apni sc'atan̈ ya' Juan sk'anni yi'a' ha' tet ya'. Chalni ya' tet: —Caw sub'wahomex. Lahanex b'oj no' howla lab'ah. ¿Mac xhalni teyet ta yun̈e heyi'ni ha' chex colchaoj tet sya'tajil ẍtit tet Comam Dios toxa chuluj? 8Ta sje he c'ul he cololoj he b'a tet sya'tajil tu', yilal heyeniloj yu hej tzetet c'ul cheyu to xax he ya'can he tx'ojal. Mache yala ta haxca yic'al ya' Abraham heyeyi, xax quex colcha tet sya'tajil cha' Comam. Ẍwal teyetan ta ay scan̈il ye Comam Dios spaq'ui hunk'aan ch'en ch'en ti' yic'aloj ya' Abraham te heleloj. 9Cawilxa yetij sya'tajil cha' Comam, lahan b'oj yet ayxacoj ch'en eche yich te' te' yu stzoc'laxc'oj te'. Stzoc'laxc'oj te' mat c'uluj satni cat sn̈uslaxtoj te'. 10Sk'amb'en anma tet ya': —¿Tzet wal juten co b'aan?. 11—Mac ay caitanoj xil sk'ap, ya'ab' hunuj tet mac mach hunuj yet. Mac ay tzet slo, scab'n̈eab'ayoj yin̈ b'oj mac mach yet. 12X'apni pax hunk'aan heb'naj iomiloj melyu yet tohlab'al tet ya' Juan yu yi'ni ha', xalni heb'naj: —Mamin, ¿tzet wal junian? ẍi heb'naj. 13—Ha' wal heyuni, yet cheyinojiloj ch'en melyu yin̈ anma, machex palc'on yib'an̈ hantaj haca' chal ley. 14X'apni pax hunk'aan heb'naj soldado, sk'amb'en heb'naj: —Haca' hayon̈ ti'an, ¿tzet wal junian? ẍi heb'naj. —Ha' wal heyuni, matxa che xib'te anma, machca tzet che hob'can̈ yin̈ yun̈e heyiniloj tzet aya. To ak'an he c'ul yin̈ he tohol ch'a'laxi. 15Hantaj anma x'apni b'etu', chechma tzet ch'elojcoj. Ẍb'isb'oncoj sc'ul yin̈ ya' Juan ta ha' ya' Cristo echmab'il yuli. 16Xalni ya' tet anma: —Yin̈ caw yeli hayin ti'an ha'n̈e ha' ẍwa' heyi'a'an. Yaja' toxa chul hune' mac ch'a'noj Comam Espíritu Santo teyet heyib'aloj ha' mato k'a' k'a'. Hune' ya' tu' k'a' ayto smay ya' tin satajan, hasta hin puhniloj ẍtx'an̈al xan̈ab' ya'an, matzet ẍwaliloj ẍwab'ean. 17Naj tu' lahan naj b'oj naj ch'iniloj sk'al ixim trigo. C'ul chute naj stz'isnican̈ b'ay ch'ayoj ixim sat. Lawitu' cat yocoj naj sc'ub'anojcan̈ ixim sat tu' yul sc'un̈a, haxa sk'alemal ixim, sn̈usu'toj naj yul k'a' k'a' maẍtic'a ẍtan̈i. 18Tx'ihalto tzet chal ya' tet anma scuyb'aniloj. Chalni ya' tzoti' c'ul yab'e' anma. 19Hactu' xu smayni ya' Juan naj Herodes yahaw con̈ob', haxca xelk'aloj naj ix Herodías yixal naj Felipe yuẍtaj naj Herodes tu'. Mat han̈c'aoj hune' tu' xu naj, to caw tx'ihalto tzet tx'oj xu naj, yuxin caw ẍmayot naj yu ya' Juan tu'. 20Yaja' mach xab'etoj naj, xto cam to niman naj xanictoj naj ya' yul presu. 21Yet maẍto ch'octoj ya' Juan yul presu, yet cha'ni ya' ha' yi'a' anma, xi' pax ha' Comam Jesús. Yet lan̈an ya'ni Comam yoración, shajni sb'a yul satcan̈, 22x'ayiloj Comam Espíritu Santo yib'an̈ Comam, syeni sb'a haca' hune' no' palamuẍ. Lan̈anto tu' x'ab'elax hunk'aan tzoti' x'ayiloj satcan̈ chalni: —Hachti' hach hin C'ahol caw xahan ay wuan, caw chin tzala tawin̈an. 23- 38Lahun̈ scawinaj hab'il xam Comam Jesús yet xichencoj smunla yin̈ stzoti' Comam Dios. Sc'ahol ya' José ye Comam chute anma yalni. Ha ti' xtxolal yichmam Comam: Ya' Elí, ya' Matat, ya' Leví, ya' Melqui, ya' Jana, ya' José, ya' Matatías, ya' Amós, ya' Nahum, ya' Esli, ya' Nagai, ya' Maat, ya' Matatías, ya' Seméi, ya José, ya Judá, ya' Joana, ya' Resa, ya' Zorobabel, ya' Salatiel, ya' Neri, ya' Melqui, ya' Adi, ya' Cosam, ya' Elmadam, ya' Er, ya' Josué, ya' Eliezer, ya' Jorim, ya' Matat, ya' Leví, ya' Simeón, ya' Judá, ya' José, ya' Jonam, ya' Eliaquim, ya' Melea, ya' Mainán, ya' Matata, ya' Natán, ya' David, ya' Isaí, ya' Obed, ya' Booz, ya' Salmón, ya' Naasón, ya' Aminadab, ya' Admin, ya' Aram, ya' Esrom, ya' Fares, ya' Judá, ya' Jacob, ya' Isaac, ya' Abraham, ya' Taré, ya' Nacor, ya' Serug, ya' Ragau, ya' Peleg, ya' Heber, ya' Sala, ya' Cainán, ya' Arfaxad, ya' Sem, ya' Noé, ya' Lamec, ya' Matusalén, ya' Enoc, ya' Jared, ya' Mahalaleel, ya' Cainán, ya' Enos, ya' Set, ya' Adán. Ya' Adán tu' xchani sk'inal tet Comam Dios.


Copyright
Learn More

will be added

X\