SAN LUCAS 24

1Yet domingo, b'ab'el tz'ayic yin̈ semana, yet sab'sahc'alil, xto heb'ix yilnoj b'ay xmuji Comam. Xinitoj heb'ix an̈ xuk' sam swatx'e tu'. 2Ha' x'apni heb'ix, elnajxa ch'en ch'en aycoj smajiloj sti' ch'en b'ay mujb'il Comam. 3X'octoj heb'ix yila' yul holan, yaja' matxactoj snimanil Comam. 4C'aynaj sc'ul heb'ix yu hune' tu', yet xilni heb'ix cawan̈ heb'naj toxan̈e ẍjepla xil sk'ap heb'naj. 5Caw xiwcan̈ heb'ix, yuxin x'aycan xulnuj heb'ix sat tx'otx', xalni heb'naj tet heb'ix: —¿Tzet yuxin b'ay ẍmujlax camom hat che say mac itzitzxa? 6Matxac'oj Comam b'eti'. To xax pitzc'acan̈. Tijab' yin̈ he c'ul tzet xalcan teyet yet aytoc'oj Galilea. 7Xalni Comam: Hayin Ab'ilintij yu Comam Dios xol jet-anmail ti'an, yilal walaxojicoj yul sk'ab' heb'naj tx'oj yanmaan, cat walaxojcan̈ yin̈ culusan. Yaja' yin̈ sca'fial cat hin pitzc'aojcan̈an. 8Xtitcan̈ yin̈ sc'ul heb'ix tzet halb'ilcan yu Comam. 9Yin̈n̈ena tu' xmeltzo heb'ix yalnoj tet heb'ya' hunlan̈wan̈ b'oj tet yak'b'il heb'ya' ẍcuywi yin̈ Comam. 10Ya' María ah Magdala, ya' Juana, b'oj ya' María smi' ya' Jacobo, b'oj hunk'aanxa heb'ix xb'ey halnoj hune' ti' tet heb'ya' apóstol. 11Yaja' mach xa' heb'ya' yuluj sc'ul, ton̈em xichecan̈ heb'ix hune' tu' yalni heb'ya'. 12Yaja' xto ya' Pedro yin̈ an̈e yila' b'ay mujb'il Comam. Ha' x'ayc'on̈noj ya' yilnoj, han̈c'a k'ap k'ape b'ak'b'ilcoj yin̈ snimanil Comam ahayoj. Caw xc'ay sc'ul ya', xmeltzo ya' yatut. 13Hatic'a hune' tz'ayic tu', ay cawan̈ heb'ya' ẍcuywi yin̈ Comam aycoj yin̈ b'eh ch'apni yul ni'an con̈ob' Emaús. Ay mi oxeb'oj legua yeloj yin̈ con̈ob' Jerusalén. 14Yet aycoj heb'ya' yin̈ b'eh chalni heb'ya' sunil tzetet xu'i. 15Lan̈an b'in stzoten heb'ya' hune' tu' yet xhitzicoj Comam sc'atan̈ heb'ya', xto b'oj heb'ya'. 16Yaja' ay tzet mach xchani xtxumu' heb'ya' ta ha' Comam. 17Sk'amb'en Comam tet heb'ya': —¿Tzet b'in che tzote yul b'eh ti'? B'isc'ulaltajn̈e yilni heb'ya', x'oc lin̈noj heb'ya'. 18Xta'wi hune' ya' chij Cleofas: —Sunil anma ohtajn̈e tzet xu yul con̈ob' Jerusalén yulb'al hayeb' tz'ayic ti', ¿tom hachxan̈e xol ilom k'in̈ mat hawohtajoj tzet xu tu'?. 19—¿Tzet xu b'etu'? . Xta'wi heb'ya': —Ay hune' ya' ah Nazaret, Jesús sb'ih, schejab'lom Comam Dios. Caw ay hej c'ayb'alc'ule xu ya' b'oj caw aysmay xu stzotel ya' yin̈ sat Comam Dios b'oj yin̈ sat anma. 20Yaja' heb'naj swi'al yin̈ heb'naj sacerdote b'oj heb'naj swi'con̈ob' x'anicoj ya' yul sk'ab' heb'naj yahaw yu spotx'laxi, yuxin x'alaxcan̈ ya' yin̈ culus. 21C'ajam yin̈ ya' ẍcawxi co c'ulan ta ha' ya' ẍcolnoj co con̈ob' israel yul sk'ab' heb'naj romanoan. Tinan̈ yoxixa xcam ya'. 22Yaja' ay hunk'aan heb'ix jetb'i x'a'ni c'ayoj co c'ulan, xb'ey heb'ix sab'sahc'alil sti' b'ay x'alaxictoj snimanil ya'. 23Ha' xilni heb'ix ta matxactoj snimanil ya', xhul heb'ix yalnoj jetan ta xwayican̈ hunk'aan ángel xalni ta itzitz ya'. 24Xb'ey hunk'aan heb'ya' jetb'i yila' b'ay mujb'il ya' tu'an. Hatic'a xute heb'ix yalni, hatic'a xb'ey yila' pax heb'ya', yaja' wal ya', mach x'ilot ya' yu heb'ya'. 25Xalni Comam tet heb'ya': —Tzet sya'tajil he txumni, b'oj caw cawcanoj heya'ni yuluj he c'ul yin̈ tzet halb'ilcan yu heb'ya' schejab'lom Comam Dios. 26Haxca yilal ch'ec'oj ya' yanma naj Cristo tu', cat to yocoj naj Yahawoj. 27Lawitu' x'oc Comam stihnojiloj tet heb'ya' tzet tz'ib'n̈eb'ilcan yin̈ yul Yum Comam Dios. X'ichitij yin̈ tzet stz'ib'n̈e ya' Moisés, b'oj yin̈ tzet stz'ib'n̈e heb'ya' schejab'lom Comam. 28Yet lan̈an yapni heb'ya' yul con̈ob' tu', b'ehn̈e yec'ojtoj Comam chil heb'ya'. 29Yaja' mach xchaottoj Comam yu heb'ya', xalni heb'ya': —Canan̈ co c'atan̈an haxca xax k'ejb'i, lan̈anxa yocoj ak'b'al. Hactu' xu scan Comam sc'atan̈ heb'ya'. 30Yet ayxacoj heb'ya' b'oj Comam yin̈ meẍa, xinican̈ Comam ixim pan. Lawi ya'ni yuch'antioẍ tet Comam Dios yu ixim, sk'axponay ixim, xanic'oj tet heb'ya'. 31Yin̈n̈ena tu' haca' xhajlo sb'ak' sat heb'ya', xtxumniloj heb'ya' ta ha' Comam, yaja' xc'aycan̈ yin̈ sat heb'ya'. 32Xalni heb'ya' tet hunun: —Yin̈ caw yeli caw xjab'e stzalacan̈ janma, yet stihniloj jet yul b'eh tzet tz'ib'n̈eb'ilcan yul Yum Comam Dios. 33Yin̈n̈e tu' xmeltzona heb'ya' Jerusalén xilniayoj heb'ya' heb'ya' hunlan̈wan̈ yamanc'oj b'oj hunk'aanxa heb'ya' ẍcuywi yin̈ Comam. 34Xalni heb'ya' tet heb'ya' cawan̈ tu': —Caw yeltic'a xax pitzc'acan̈ Comam, sye sb'a tet ya' Simón. 35Xalni pax heb'ya' cawan̈ tzet xu yilni sb'a heb'ya' b'oj Comam yul b'eh, b'oj tzet xu xtxumni heb'ya' to ha' Comam, yet sk'axpon Comam ixim pan. 36Lan̈anto yalniloj heb'ya' hunk'aan tu', yet xilni heb'ya' lin̈anxacan̈ Comam xol heb'ya', xalni tet heb'ya': —Ehojab' ak'anc'ulal teyin̈. 37Caw xiw heb'ya' b'oj sc'ayiloj sc'ul, tom spixan camom lan̈an yilni heb'ya' yalni. 38Yaja' xal Comam tet heb'ya': —¿Tzet yuxin chex xiwi? ¿Tzet yuxin ẍb'isb'on he c'ul? 39Ilwej hin k'ab' b'oj woj ti'an to hayinan. Awejcoj he k'ab' yin̈ hin nimanilan cat he txumni to hayinan, haxca hune' spixan camom mach ẍchib'eal, machca sb'ajil. Walinan aya. 40Ha' xalni Comam hune' tu', syeni sk'ab' b'oj yoj tet heb'ya'. 41Yaja' yuxa tzalalal b'oj yu sc'ay sc'ul, mach xc'oji heb'ya' ya'ni yuluj sc'ul, yuxin xal pax Comam tet heb'ya': —¿Ay mi ninoj tzet ẍco lo ayc'oj heyu? . 42Xa'ni heb'ya' k'axep no' txob'il cay tet. 43Schanic'oj Comam no', x'oc sc'uxnujtoj no' yin̈ sat heb'ya'. 44Lawitu' xalni Comam: —Tinan̈ xij sb'a tzet halb'ilcan teyet wuan yet hun xquin ec' b'oj hexan, ta yilal yijnoj sb'a tzet tz'ib'n̈eb'ilcan win̈ yul sley ya' Moisésan b'oj tzet tz'ib'n̈eb'ilcan yu heb'ya' schejab'lom Comam Dios, b'oj tzet chalayoj yul Te Hum yet Salmo. 45Hactu' xu shajlotoj yul swi' heb'ya' yun̈e xtxumniloj heb'ya' tzet tz'ib'n̈eb'ilcan yul Yum Comam Dios. 46Xalni tet heb'ya': —Tz'ib'n̈eb'ilcanoj ta chin ec'oj ya'an, cat hin potx'laxoj hayin Cristo hin ti'an. Lawitu' yin̈ sca'fial chin pitzc'aojcan̈an. 47Hacpaxtu' yalni, to yu scan̈il wean yilal yal-laxc'oj tet anma yul hunun con̈ob' ta sb'ejcan xtx'ojal yun̈e stan̈canoj smul. Yul con̈ob' Jerusalén ti' ch'ichi yal-lax hune' chejb'anile ti', yun̈e spujnatoj yul sunil hej con̈ob'. 48Hexti' caw cheya' he b'a yin̈ hunk'aan tzetet xijsb'a win̈ ti'an. 49Tinan̈ walto heye Jerusalén ti' masanto che chab' heyip yu hune' mac ẍwa'a'tij teyin̈an, hune' halteb'il yu hin Maman., ẍi Comam tet heb'ya' 50Lawitu' xijb'antoj Comam heb'ya' yin̈, xto scawilal con̈ob' Betania. Xinican̈ Comam sk'ab', sk'anni sc'ulal Comam Dios yib'an̈ heb'ya'. 51Lan̈anto tu' spohniloj sb'a sc'atan̈ heb'ya', x'iottoj yul satcan̈. 52Lawi shak'eniloj heb'ya' Comam, caw tzalalal ye heb'ya' xmeltzo heb'ya' Jerusalén. 53Hunun tz'ayic syamb'an sb'a heb'ya' yamak' yatut Comam Dios, chanicoj heb'ya' smay Comam.


Copyright
Learn More

will be added

X\