SAN LUCAS 24

1Yet babel tz'ayic yin̈ semana caw sahab to ebix bay alaxicto isnimanil Comam, ik'bil huntek'an an̈ caw xuk' sam watx'ebil yu ebix. 2Hayet yapni ebix bey tu', yilni ebix ta elnaxa ch'en ch'en ayco ismajilo bay alaxicto isnimanil Comam. 3Yocto ebix yul ch'en, yilni ebix ta matxa isnimanil Comam ayictoj. 4Caw c'ayilo isc'ul ebix yu hune' tu'. Haxa yet yilniti ebix xin lin̈anxacan̈ cawan̈ ebnaj yángel Comam Dios, toxan̈e chitzejtzon xil isk'ap ebnaj ayco yin̈. 5Caw xiwcan̈ ebix, yay xulno ebix sat tx'otx', yalni ebnaj tet ebix: —¿Tzet yin̈ yuxin ha' bay chimujlax camom chesayic'o hune' mac itzitzxa? 6Matxa Comam ayicti bey ti', to xaitzitzbican̈. Naweti tzet yal teyet yet ayc'o bey Galilea, 7yet yalni haca' ti': “Hanin Ak'bilintijan texol yu Comam Dios, caw yilal walaxicojan yul isk'ab ebnaj tx'oj, cat walaxcan̈an yin̈ culus, yaja' yin̈ yox tz'ayic cat witzitzbican̈an,” ẍi Comam, ẍi ebnaj. 8Hac tu' xin yu isnaniti ebix tzet yal Comam. 9Isto ebix yalno tzet yabe tu' tet ebnaj hunlahon̈wan̈ ischejab Comam, yeb tet huntek'anxa ebnaj. 10Ha' huntek'an ebix bey halno tu', ha' ton ix María ah Magdala, ix Juana, yeb ix María, ismi' naj Jacobo, yeb huntek'anxa ebix. 11Wal ebnaj ischejab Comam tu', ton̈em chal ebix, yalni ebnaj; yuxin maẍtic'a yayto ebnaj yul yanma yin̈ tzet chal ebix. 12Wal naj Pedro xin, to naj yin̈ an̈e yila' bay alaxicto isnimanil Comam tu'. Hayet yayc'on̈no naj yilnicto naj, ha'xan̈e k'ap sábana aycanayoj. Caw c'aycan̈ isc'ul naj, ispaxto naj bay aya. 13Ha'tic'a yin̈ hune' tz'ayical tu', ay cawan̈ ebnaj iscuywom Comam Jesús, to bey hune' aldea Emaús. Aymi oxebo legua yelo yin̈ con̈ob Jerusalén. 14Yet ayco ebnaj yin̈ isbel tu', chitzotel ebnaj yin̈ tzet yak'le Comam Jesús. 15Hayet lan̈an istzotel ebnaj yin̈ hune' tu', yapni Comam isc'atan̈ ebnaj, hunxa xin yu isto Comam yeb ebnaj. 16Waxan̈ca yil ebnaj yin̈ Comam, yaj ay hune' tzet machi chahni yohtan̈elo ebnaj Comam. 17Isk'amben Comam tet ebnaj: —¿Tzet tzoti'al ayco heyu yul beh ti'? ẍi Comam. Caw xin bisc'ulal jilni sat ebnaj, 18istak'wi hune' naj chiyij Cleofas: —Sunil anma ohtan̈e tzet yu yul con̈ob Jerusalén yin̈ huntek'an tz'ayic ti'. ¿Tom hach xan̈e yul con̈ob ti' mach hawohtajoj? ẍi naj. 19Isk'amben Comam tet ebnaj: —¿Tzet hune' yu tu'? ẍi Comam. Yalni ebnaj: —Ay hune' ya' Jesús, ah Nazaret, ischejab Comam Dios, ha' tzet iswatx'e yeb tzet yala caw niman yelapno yul sat Comam Dios yeb yul sat anma. 20Yaj ha' ebnaj yahaw yin̈ ebnaj sacerdote, yeb ebnaj iswi'ehal con̈ob, ha' ebnaj anico ya' yul isk'ab camical, yalaxcan̈ yin̈ culus. 21Ha' ya' ayco yipo janmahan̈ yoc colnolo con̈ob Israel ti' yul isk'ab ebnaj romano. Yaj tinan̈ oxebxa tz'ayic yuni hune' tu'. 22Ay xin huntek'an ebix jetbi cobahan̈ yebi caw sahab mabeyc'o bay alaxicto isnimanil ya'. Caw mac'ayilo coc'ulan̈ yu tzet mayal ebix. 23Yuto hayet maapni ebix, matxa isnimanil ya' ayictoj. Yuxin hayet mameltzo ebix, mayalni ebix jetan̈ ta mayil ebix huntek'an ebnaj ángel, mayalni ebnaj ta itzitz ya'. 24Ay xin huntek'an ebnaj jetbihan̈ mabey ilno bay alaxicto isnimanil ya'. Caw xin matxa isnimanil ya' ayicto haca'tic'a mayu yalni ebix jetan̈, ẍi ebnaj. 25Yalni Comam Jesús tet ebnaj: —Caw ya'ta istxumchalo heyu yeb caw lan̈o cheyayto yul heyanma yin̈ tzet halbilcano yu ebnaj ischejab Comam Dios yet payat. 26¿Tom mach heyohtajo ta naj Cristo yilal yec'ya' yanma haca' mayu tu', lahwi tu' cat yoc naj Yahawil? ẍi Comam. 27Yoc Comam yalno yin̈ caw haban yin̈ sunil tzet tz'ibn̈ebilcanayo yin̈ Comam Cristo yul Yum Comam Dios. Ichico bay tz'ibn̈ebilcano yu naj Moisés, masanta apni yin̈ sunil tzet tz'ibn̈ebilcano yu ebnaj ischejab Comam Dios yet payat. 28Hayet lan̈an yapni ebnaj yul aldea tu', isyenilo Comam ta palan̈ istohi. 29Yaja' mach ischato ebnaj Comam. Yalni ebnaj: —Canan̈cano coc'atan̈an̈, yuto caw k'ejbixa lah, ẍi ebnaj. Hac tu' xin yu iscan Comam isc'atan̈ ebnaj. 30Hayet ayxaco Comam sat meẍa yeb ebnaj, yinican̈ Comam ixim pan. Lahwi yak'ni Comam yuch'andios tet Comam Dios, isk'axponayo ixim, yak'ni Comam ixim tet ebnaj. 31Yin̈ ha'mataj tu' xin, haca'tan̈e hajcha sat ebnaj, isnachalo Comam Jesús yu ebnaj. Wal Comam xin, c'aycan̈ Comam yin̈ sat ebnaj. 32Yalni ebnaj tet hunun: —¡To'an yuxin caw matzalacan̈ janma yet macon̈iscuyni Comam yin̈ Istzoti' Comam Dios yul beh! ẍi ebnaj. 33Lahwin̈ena tu' xin, ismeltzoto ebnaj bey Jerusalén, isto ebnaj bay cutxanico ebnaj hunlahon̈wan̈ yeb huntek'anxa iscuywom Comam. 34Yalni ebnaj tet ebnaj cawan̈ tu': —Yin̈ caw yeli, maitzitzbican̈ Comam, masye isba tet naj Simón Pedro, ẍi ebnaj. 35Yalnipaxo ebnaj cawan̈ tu' yin̈ tzet yu isyenican̈ isba Comam yul beh tet ebnaj, yeb tzet yu yohtan̈enilo ebnaj Comam yet isk'axpon ixim pan. 36Hayet lan̈an istzotel ebnaj yin̈ hune' tu', yilniti ebnaj xin lin̈anxayo Comam Jesús yictabal ebnaj, yalni Comam tet ebnaj: —Ayojab ak'anc'ulal texol, ẍi Comam. 37Caw xiw ebnaj, isc'aycan̈ isc'ul ebnaj yuto ispixan camommi chil ebnaj yalni. 38Yaja' yal Comam tet ebnaj: —¿Tzet yin̈ yuxin chexxiwi yeb chicabcon heyanma? 39Ilwec'anab ink'aban yeb wojan bay to ch'en lawuẍ. ¡Caw hanintonan! Tzabinwec'anaban cat heyohtan̈eniloj ta haninan. Wal haca' hunu ispixan camom, machi ischibehal, machipaxo isbajil haca' chu quinheyilniti'an. 40Hayet yalni Comam hune' tu' isyeni Comam isk'ab yeb yoj tet ebnaj. 41Yaja' yu xatzalahilal yeb yu chic'ay isc'ul ebnaj yilni, yuxin machi caw yayto ebnaj yul yanma ta ha' Comam. Yuxin isk'ambe Comam tet ebnaj: —¿Aymi nich'ano tzet chicolo ayc'o heyu? ẍi Comam. 42Yak'ni ebnaj k'axep no' txobil cay tet Comam, yeb nich'an no' cab. 43Ischahnilo Comam no', iswa' Comam yin̈ sat ebnaj. 44Yalni Comam tet ebnaj: —Ha' huntek'an isya'tajil mawak'leti'an, ha' ton walan teyet yet ayintoc'ojan texol, ta yilal yijni isba haca' tzet tz'ibn̈ebilcano win̈an yu naj Moisés, yebpaxo yu ebnaj ischejab Comam Dios yet payat, yebpaxo xin yin̈ Salmos, ẍi Comam. 45Hac tu' yu yak'ni Comam Jesús yohtan̈elo ebnaj yin̈ tzet tz'ibn̈ebilcanayo yul Yum Comam Dios. 46Yalnipaxo Comam: —Tz'ibn̈ebilcanayoj ta yilal yec'ya' wanmahan, cat incaman, Hanin Cristo inti'an. Lahwi tu' xin, cat witzitzbican̈an yin̈ yox tz'ayic. 47Caw xin, yilal yallaxic'o Intzoti'an babel yul Jerusalén ti', yebpaxo sunil yul sat yiban̈k'inal ti', ta yilal yanico isba anma yul isk'ab Comam Dios cat isbejnicano istx'ojal, haxinwal ch'ak'lax nimanc'ulal yin̈ ismul. 48Hex ti', cheyak'aco heba heyalnolo huntek'an ti', yuto hex cawex heyila'. 49Tinan̈ xin, wal heye bey Jerusalén ti' masanto chechah yip Espíritu Santo chinchejtijan bey satcan̈; hune' halbilcano yu Inmaman, ẍi Comam tet ebnaj ischejab tu'. 50Lahwi tu' yinito Comam Jesús ebnaj ischejab yul ismajul Betania. Yinican̈ Comam isk'ab, isk'anni Comam isc'ulal Comam Dios yiban̈ ebnaj ischejab tu'. 51Lan̈antotic'a tu' xin, yilaxto Comam satcan̈. 52Yoc ebnaj yalno c'ulla tzoti' yin̈ Comam, ispaxto ebnaj bey Jerusalén yin̈ caw tzalahilal. 53Hunun tz'ayic xin iscutxban isba ebnaj yul yatut Comam Dios, chalni ebnaj c'ulla tzoti' yin̈ Comam Dios. ¡Hacojab tu'!

will be added

X\