SAN LUCAS 23

1Sunil ebnaj ah wejnahi, yinito ebnaj Comam Jesús sata naj Pilato. 2Yoc ebnaj ak'oc'ule yin̈ Comam tet naj Pilato haca' ti': —Machalo hune' naj ti' juan̈, sunil anma chisomchato isnabal yu naj, cat iscachni naj anma ta mach chak' istohlabal tet naj César, naj jahaw ay bey Roma, cat yalnipaxo isba naj Cristohal, ha' chalilo jahawil, ẍi ebnaj. 3Isk'amben naj Pilato tet Comam: —¿Tom yahawil anma Israel hawehi? ẍi naj. Istak'wi Comam: —Ho', yeli haca' hawalni ti', ẍi Comam. 4Yuxinto yal naj Pilato tet ebnaj yahawil yeco yin̈ ebnaj sacerdote, yeb tet sunil anma cutxanico tu': —Ha' hune' winaj ti', machi hunu mule chi'ilchalo yin̈ wuhan, ẍi naj. 5Ischilban ebnaj, yalni yin̈ caw ip: —Lan̈an issomchato isnabal sunil anma yu cuybanile chak' naj. Ichiti naj iscuyni anma bey Galilea, tinan̈ xin hac tu' chutepaxo naj bey Judea ti', ẍi ebnaj. 6Hayet yaben naj Pilato hune' tu', isk'amben naj ta ah Galilea Comam. 7Hayet yaben naj ta ah Galilea Comam, yanito naj Comam yul isk'ab naj Herodes, yuto naj Herodes tu' ayco yahawilo bey Galilea. C'uxan xin ayc'o naj Herodes bey Jerusalén yet yuni hune' tu'. 8Hayet yilni naj Herodes Comam, caw tzalacan̈ naj yuto payxa ichi yochen naj yila' Comam. Caw xin tx'i'alxa bay chabe naj yin̈ Comam. Caw xin choche naj yila' iswatx'en Comam hunu c'aybalc'ule. 9Caw tx'i'al tzet isk'ambe naj tet Comam, yaja' maẍtic'a tak'wi Comam tet naj. 10Wal ebnaj iswi'ehal yin̈ ebnaj sacerdote yeb ebnaj chicuyni anma yin̈ isley naj Moisés, caw ischilba ebnaj yoc ak'oc'ule yin̈ Comam. 11Naj Herodes yeb ebnaj issoldado tu' oc ebnaj isbuchu' Comam. Yanico ebnaj hune' xilk'ape yin̈ Comam haca' chaco ebnaj rey yun̈e yoc ebnaj tzebo yin̈ Comam. Lahwi tu' xin, yanipaxto naj Herodes tu' Comam yul isk'ab naj Pilato hunelxa. 12Yin̈tic'a hune' tz'ayical tu', naj Pilato yeb naj Herodes oc ebnaj amigohal, yaj wal yet yalan̈to caw ayleco ishowal ebnaj yin̈ hunun. 13Iscutxbanico naj Pilato ebnaj iswi'ehal yin̈ ebnaj sacerdote, yeb ebnaj yahaw con̈ob, yebpaxo sunil anma yul con̈ob tu'. 14Yalni naj tet ebnaj: —Ha' hune' naj maxeyiti wetti'an cheyala ta lan̈an issomchancan̈ naj isnabal sunil anma. Wal xin tesata mank'ambehan tet naj, yaja' caw machi hunu ismul naj chi'ilchalo wuhan haca' cheyute heyalni ti'. 15Mawatojan naj yul isk'ab naj Herodes, yaja' mach ismul naj mailcha yu naj, yuxin mayapaxti naj Herodes tu' naj hunelxa wetan. Wal xin, mach ismul naj ch'ak'ni camoj. 16Ton̈e xin chiwak' hatelaxojan naj, cat inbejtzonan naj, ẍi naj Pilato tu', 17yuto yin̈ hunun k'in̈ Pascua chibejtzolax hunun ebnaj presowom. 18Yaj sunil anma cutxanico bey tu', ah yaw yin̈ caw ip: —¡Ilo hune' naj ti' yin̈ cosatan̈, cat hebejtzon naj Barrabás! ẍixan̈e anma. 19Yaj naj Barrabás tu', ayco naj preso yu hune' howal yicheco naj yul con̈ob tu', yebpaxo potx'om anma naj. 20Wal naj Pilato, caw yoche naj isbejtzo' Comam Jesús, yuxinto tzotelilti naj xol anma hunelxa. 21Yaja' anma tu', caw ec'balto ah yaw, yalni haca' ti': —¡Camojab naj yin̈ culus! ¡Camojab naj yin̈ culus! ẍixan̈e anma tu'. 22Yalni naj Pilato yin̈ yoxel tet ebnaj: —¿Tzet yu? ¿Tzet istx'ojal iswatx'e naj heyalni? Mach hunu ismul naj chi'ilchalo yin̈ wuhan ch'ak'ni camoj. Wal xin ton̈e chinchejan hatelaxo naj, cat inbejtzonan naj, ẍi naj. 23Ischilban ebnaj yel yaw yin̈ caw ip, isk'anni camo ebnaj Comam yin̈ te' culus. Yu caw ch'el yaw ebnaj yuxinto ak'lax tzet choche ebnaj. 24Yuxinto isyije naj Pilato tzet isk'an ebnaj. 25Wal xin, ha' naj ayco preso yu howal yeb yu potx'wal, ha' naj isbejtzoto naj Pilato haca' yu isk'anni ebnaj. Yanico naj Pilato Comam yul isk'ab ebnaj. 26Yet lan̈an yilaxto Comam Jesús bay ch'alaxcan̈ yin̈ culus, istzabnayo ebnaj hune' naj, Simón isbi. Lan̈an yocto naj yul con̈ob tu', ha' bey tx'otx' Cirene ay naj. Yalaxico isculus Comam yiban̈ naj, yoc tzujno naj yinta Comam. 27Caw hantan̈e anma oc tzujno yinta Comam; xol anma tu' ay huntek'an ebix caw ch'ok' yu bisc'ulal yin̈ Comam. 28Ist'an̈xiti Comam yin̈ ebix, yalni Comam tet ebix: —Hex ix ah Jerusalén ti', mach chexok' win̈an. Ok'an̈we teyin̈ yeb yin̈ niẍtej heyunin. 29Yuto chihul istz'ayical bay chihallax haca' ti': “Sak'al yet ebix ix maẍtic'a yunin, yeb ebix maẍtic'a unin chitxutxwi yin̈,” ẍi anma tu'. 30Yet hune' tiempohal tu', chal anma haca' ti': “Majaltam chititc'ay witz ti' jiban̈, cat comujicano yalan̈,” ẍi anma tu'. 31Ta haninti'an, lahaninan haca' hunu te' k'epta caw yax, yaj ch'ec'ya' wanmahan yu anma, hajxamex hex ti', lahanex yeb te' tajin te' caw niman isya'tajil cheyila, ẍi Comam. 32Aypaxo cawan̈xa ebnaj caw xiwquilta ismul, ilaxto camo yin̈ culus yinta Comam. 33Hayet yapni ebnaj bey hune' tx'otx' chij Calavera, chalilo Isbajil Wi'e, yalaxcan̈ Comam yin̈ culus. Hac tu' utelax cawan̈ ebnaj xiwquilta ismul tu', hune' naj ah yin̈ iswatx'k'ab Comam, hunxa naj yin̈ ismeck'ab Comam. 34Hayet aycan̈ Comam yin̈ culus tu', yalni haca' ti': —Mamin, ak' nimanc'ulal yin̈ anma ti', yuto mach chinachalo yu ta tx'oj tzet chiswatx'e, ẍi Comam. Yoc ebnaj soldado yilweno isba yin̈ mac chiinito xil isk'ap Comam. 35Sunil anma tu' t'an̈anico yilni tzet chuhi; yoc ebnaj yahaw con̈ob buchwal yin̈ Comam, yalni ebnaj: —Ta ha' naj ti' Cristo sic'bililo yu Comam Dios, iscolabayti isba naj, haca' yu iscolwa naj yin̈ anma, ẍi ebnaj. 36Hacpax tu' ebnaj soldado, oc ebnaj buchwal yin̈ Comam, yak'ni ebnaj pahla vinagre yuc'u' Comam. 37Yalni ebnaj: —Ta yeli yahaw anma Israel hawehi, colayti haba, ẍi ebnaj. 38Yin̈ iswi' isculus Comam tz'ibn̈ebilico hayeb tz'ib, chalni haca' ti': “Ha' naj ti', yahawil anma Israel,” ẍicoj. 39Xol ebnaj cawan̈ alaxcan̈ yin̈ culus yinta Comam, ay hune' naj tx'oj istzotel tet Comam, yalni naj tet Comam: —Ta hach ti' Cristo hach, colayto haba, cat con̈hacolnipaxaytojan̈, ẍi naj. 40Haxa hune'xa yetbi naj cachwa yin̈ haca' ti': ¿Tom mach chaxiw tet Comam Dios? ¿Tom mach chawila tato lahan jeco yin̈ isya'tajil yeb ya'? 41Wal han̈on̈ ti', lan̈an yec'ya' janma yu cotohlan istx'ojal cowatx'e, wal ya' ti', machi nino istx'ojal iswatx'e ya', ẍi naj tet yetbi tu'. 42Yalni naj tet Comam: —Mam Jesús, chinhanaba'tijan yet chaẍhul cat hawoc yahawil, ẍi naj tet Comam. 43Yalni Comam tet naj: —Yin̈ caw isyelal chiwalan tawet, ha'tic'a tinan̈ chaẍapno inc'atan̈an bey hune' ehobal chij Paraíso, ẍi Comam tet naj. 44Yet chuman xin isk'ejholilo yul yiban̈k'inal ti' masanto yin̈ ch'en oxeb yin̈ k'ejbiyal issajbipaxiloj. 45Istzilmopaxayo hune' k'ap k'ap aycan̈ yul yatut Comam Dios, cab ayico k'ap. 46Yah yaw Comam yin̈ caw ip, yalni: —Mam, yul hak'ab chiwacanicojan wanmati'an, ẍi Comam. 47Hayet yilni naj yahawil ebnaj soldado ah Roma hune' tu', yoc naj yalno c'ulla tzoti' yin̈ Comam Dios, yalni naj: —Yin̈ caw yeli, hune' winaj ti' mach ismul, ẍi naj. 48Sunil anma cutxanico bey tu', hayet yilni tzet yuhi, cawtoxan̈e chistin̈ anma istxam isc'ul yu bisc'ulal yet ispaxto yatut. 49Wal sunil anma yohta isba yeb Comam Jesús, yeb huntek'an ebix tit yinta Comam bey Galilea, nahat lin̈anti yilni tzet chuhi. 50Ay hune' naj José isbi, ay bey con̈ob Arimatea, yul ismajul Judea; naj tu', caw c'ul isc'ul naj, caw c'ulpaxo isbeybal naj. Ayco naj xol ebnaj iswi'ehal yin̈ lahti' yul con̈ob Israel. 51Yaja' mach yaco isba naj yin̈ istx'ojal iswatx'e ebnaj yetbi tu' yin̈ Comam Jesús, yuto chechma naj yoc Comam Dios Yahawiloj. 52Isto naj José tu' isk'anno isnimanil Comam tet naj Pilato. 53Lahwi tu' xin, isto naj yinoyti isnimanil Comam yin̈ te' culus, ispichnico naj hune' sábana caw c'ul yin̈. Isto naj yanocto isnimanil Comam yul hune' ch'en ch'en holbil yul, caw xin maẍto hunu camom chi'alaxicto yul ch'en. 54Ha' yin̈ hune' tz'ayical tu' chisk'uy isba anma Israel yin̈ tzet chislo yin̈ tz'ayic xewilal. Lan̈anxa xin isto tz'ayic cat yichico tz'ayic xewilal. 55Ha' ebix ix tit yinta Comam bey Galilea, topaxo ebix mujwal yin̈ Comam, yilni ebix ch'en ch'en bay alaxicto Comam, yilnipaxo ebix tzet yucanicto isnimanil Comam. 56Lahwi ispaxto ebix, iswatx'en ebix cab majan an̈ caw xuk' sam ch'oc yin̈ isnimanil Comam. Lahwi tu' xin yichico tz'ayic xewilal, yuxin xew ebix haca'tic'a yalni isley naj Moisés.

will be added

X\