SAN LUCAS 23

1X'ah lin̈noj heb'naj swi'al tu' sunil, xinitoj heb'naj Comam Jesús yin̈ sat naj Pilato. 2X'oc heb'naj a'wojc'ule yin̈ Comam, chalni heb'naj: —Xchalo hune' naj ti' juan, sunil anma somk'atoj yul swi' yu naj. Scachni naj anma stohlawi tet naj César jahaw, chalni pax sb'a naj Cristoal, ha' chaliloj to rey naj. 3Sk'amb'en naj Pilato tet Comam: —¿Tom sreyal anma israel hawe chaltu'? ẍi naj. Xta'wi Comam: —Ho', yel haca' hawalni ti'. 4Xalni naj Pilato tu' tet heb'naj swi'al yin̈ heb'naj sacerdote b'oj tet sunil anma: —Mach hunuj smul naj ti' ẍchalo wuan. 5Yaja' k'a' caw x'ah xayna heb'naj, chalni heb'naj: —Sunil anma ah Judea somk'atoj yul swi' yu tzet chal naj. Hat ta x'ichitij naj scuyni anma Galilea, tinan̈ hactu' chute pax naj b'eti'. 6Ha' xab'en naj Pilato hune' tu', sk'amb'en naj tet heb'naj ta ah Galilea Comam. 7Haxa xab'en naj to ah Galilea Comam, xanitoj naj Comam tet naj Herodes, haxca ha' naj yahaw b'et Galilea, c'uxan ayc'oj naj yul con̈ob' Jerusalén yet hunec tu'. 8Ha' x'ilottoj Comam yu naj Herodes tu', caw stzalacan̈ naj haxca ayxana ichi yab'en naj sk'umal Comam, yuxin ay yala' naj chil naj Comam. Choche naj yila' ta ay hunuj c'ayb'alc'ule syeb' Comam. 9Caw tx'ihal tzet sk'amb'e naj yaja' maẍtic'a ninoj ẍta'wi Comam 10Heb'naj swi'al yin̈ heb'naj sacerdote b'oj heb'naj cuywaom yin̈ sley ya' Moisés, xin̈la xan̈e yah heb'naj ya'wic'ule yin̈ Comam. 11Naj Herodes tu' b'oj heb'naj soldado ton̈e x'oc heb'naj etlojcoj yin̈ Comam, xanicoj heb'naj hune' xil k'ape caw c'ul yin̈ Comam yun̈e stzeyelax Comam. Lawitu' xanitoj naj paxoj Comam tet naj Pilato. 12Yin̈tic'a hune' tz'ayic tu' xamigon̈encan sb'a naj Pilato b'oj naj Herodes, haxca yet yalan̈to caj chil sb'a heb'naj. 13Syamb'an pax naj Pilato heb'naj swi'al yin̈ heb'naj sacerdote b'oj heb'naj swi'con̈ob' b'oj sunil con̈ob'. 14Xalni naj tet heb'naj: —Xeyitij hune' naj ti' wetan, cheyalni ta somchacan̈ sunil anma yu naj, yaja' xin k'amb'e tet naj yin̈ he satan, mach smul naj ẍchalo wu yin̈ haca' heyalni ti'an. 15Machca xtx'ojal naj ẍchalo yu naj Herodes, yuxin xapaxtij naj naj wetan. Matzet tx'oj xu naj, cat he k'anni camoj naj. 16Yuxin ton̈e chin cheja' hatelaxoj najan, cat hin b'ejtzonoj najan. 17- 18Yaja' x'ah xayna anma sunil: —¡Iloj hune' naj ti' yin̈ co satan cat ha b'ejtzon naj Barrabás! 19Naj Barrabás tu' aycoj naj presu haxca xpaq'uicoj naj yin̈ naj yahaw ay yul con̈ob' Jerusalén, potx'om anma pax naj. 20Ay yala' naj Pilato sb'ejtzo' naj Comam Jesús, yuxin stzotel paxiltij naj tet heb'naj. 21Yaja' xcam ah xayna anma yawi: —¡Camojab' naj yin̈ culus! ¡Camojab' naj yin̈ culus! . 22Xalni naj Pilato yin̈ syoxel tet heb'naj: —¿Tzet yu? ¿Tzet tx'ojal xu naj heyalni? Mach hunuj smul naj ẍchalo wu yin̈ tzet ch'a'ni camojan, yuxin ton̈e chin cheja' hatelaxoj najan cat hin b'ejtzon najan. 23Yaja' k'a' caw xto ah yaw heb'naj sk'anni camoj heb'naj Comam. Haxca ston̈etic'a niman heb'naj yawi, 24yuxin xal naj Pilato ta ẍcam Comam haca' yalni heb'naj tu'. 25Wal naj aycoj presu haxca xpaq'uicoj naj yin̈ naj yahaw b'oj yu potx'wal xu naj, ha' naj sb'ejtzolax yu naj Pilato haca' xu sk'anni heb'naj tu', wal Comam Jesús, x'alaxcoj Comam yul sk'ab' heb'naj. 26Yet lan̈an yilaxtoj Comam Jesús b'ay ch'alaxojcan̈ yin̈ culus, stzab'ni heb'naj hune' naj ah Cirene, Simón sb'ih, speto xol smunil. Schilb'an heb'naj naj yinitoj sculus Comam, x'oc tzujnuj naj yin̈ Comam. 27Caw tx'ihal anma tzujan, ay pax heb'ix caw tz'ab'alc'ule yok' yin̈ Comam. 28Xt'an̈xicoj Comam yin̈ heb'ix, xalni Comam: —Hex ah Jerusalén hexti', machex ok' win̈an, ok'an̈wej teyin̈ b'oj yin̈ niẍtej heyunin. 29Haxca ch'apnoj tz'ayical b'ay ẍhal-laxoj: Sak'al yet heb'ix man̈ unin, b'oj heb'ix maẍtic'a yunin xtxutxwi yin̈, ẍinaoj. 30Yet tu' chala' anma: Oẍimi ẍtitc'ay hune' witz ti' jib'an̈ cat co mujicantoj yalan̈, ẍinaoj. 31Hayin ti'an lahan hin b'oj te' yaxla te'an, yaja' ilwejc'anab' tzet chin yute heb'najan. Hajxam hexti' k'a' tx'ihal to tzet chex utelaxoj haxca lahan hex b'oj te' tajin̈ te'. 32Ay pax cawan̈ heb'naj caw xiquiltaj smul x'ilaxtoj camoj b'oj Comam Jesús. 33Yet x'apni heb'naj b'ay ẍal-lax Calaverail, hat xacan̈ heb'naj Comam yin̈ culus. Hactu' x'utelax pax heb'naj cawan̈ tu', hune' naj yin̈ swatx' Comam hune'xa naj yin̈ smec. 34Yet lan̈an yalaxcan̈ Comam yin̈ culus, xalni Comam: —Mam, a' nimanc'ulal yin̈ heb'naj chin anican̈ yin̈ culus ti'an, haxca mat yohtajoj heb'naj ta tx'oj chu heb'naj.. X'oc heb'naj soldado ya'noj tul yin̈ xil sk'ap Comam, yun̈e yilni heb'naj mac ch'i'nojcanoj. 35Sunil anma t'an̈ancoj ch'ilni. Heb'naj swi' con̈ob' stzeye heb'naj Comam, chalni heb'naj: —Ta ha' naj ti' Cristo Sic'leb'il yu Comam Dios, yiab'aytij sb'a naj, haca' xu scolni naj hunmajanxa anma. 36Ha'hun heb'naj soldado tu' stzeyen Comam, cha'ni heb'naj pahla vino yuc'u'. 37Chalni heb'naj: —Ta sreyal anma israel haweyi, iytij ha b'a jila'an. 38Yin̈ swi' sculus Comam tz'ib'n̈eb'ilcoj hunk'aan tz'ib' xalni: Ha' naj ti' srey anma israel, ẍicoj yin̈. 39Hune' naj aycan̈ yin̈ culus sc'atan̈ Comam, tx'oj chal pax naj tet Comam, chalni naj: —Ta hachti' Cristo hach, iytij ha b'a cat hon̈ a colnipaxan. 40Xcachwa hunxa naj yetb'i naj, xalni naj: —Hachti' mach ninoj chach xiw tet Comam Dios, lahan ayon̈coj yin̈ sya'tajil b'oj naj. 41Yettic'a aya ch'ec' ya' janma hayon̈ ti' haxca lan̈an co tohlan co mul, yaja' hune' naj ti', mach ninoj xtx'ojal xu naj. 42Xalni naj tet Comam: —Mam Jesús, chin ha nab'tij yin̈ ha c'ulan yet chach ocoj Yahawoj. 43Xalni Comam tet naj: —Yin̈ caw yeli ẍwal tawetan, to ha'tic'a tinan̈ chach apnoj b'ay ay Comam Dios tin c'atan̈an. 44- 45Chumanmi xk'ejholiloj sunil sat tx'otx'otx', matxa ẍmujli tz'ayic masanto xapni yin̈ a las tres. Xhatz'motoj k'ap k'ape aycan̈ yul yatut Comam Dios. Cab'n̈e x'ay k'ap. 46Yet lan̈an yuni hune' tu', x'awican̈ Comam Jesús yin̈ ip, chalni: —Mam, yul ha k'ab' ẍwac'oj hin pixan ti'an. Lawi yalni Comam hunk'aan tzoti' tu', xcamiloj. 47Yet xilni naj capitán romano sunil tu', x'oc naj yanojcoj smay Comam Dios, chalni naj: —Yin̈ caw yeli mach smul hune' naj ti'. 48Sunil anma yamanc'oj matz'loj b'etu', ha' xilni tzet xu tu' toxan̈e stin̈icoj heb'jetb'i xtxam sc'ul, xpaxtoj yul con̈ob'. 49Wal hantaj anma yohtaj sb'a b'oj Comam Jesús, b'oj heb'ix x'oc tzujnuj yin̈ yet xtit Galilea, nahatn̈e lin̈antij chilni tzet cha'le Comam. 50Ay hune' ya' José sb'ih, ah Arimatea ay b'et Judea. Caw c'ul sc'ul ya' b'oj tohol yanma. Ha'hun ya' aycoj stz'ajoj heb'naj swi'con̈ob' lahti'wom, 51yaja' mach xacoj sb'a ya' yin̈ xtx'ojal xu heb'naj yin̈ Comam Jesús, to chechma ya' yoc Comam Dios Yahawoj. 52X'oc ya' José tu' tet naj Pilato sk'anni ya' snimanil Comam. 53Lawi yiniaytij ya' snimanil Comam yin̈ culus, spich'nicoj ya' hune' k'ape yin̈, xinitoj ya' snimanil Comam mujlaxoj. Xanictoj ya' Comam yul hune' ch'en ch'en tz'ujb'il b'ay ch'eh camom. Maẍto hunuj camom ch'ec' yul ch'en. 54Lan̈anxa caw yichojcoj tz'ayic xewb'al, yuxin lan̈an swatx'en anma tzet ch'ocnojcoj yu yin̈ hune' tz'ayic xewb'al tu'. 55Heb'ix tzujan xu stit yin̈ Comam b'et Galilea, x'oc tzujnuj heb'ix yin̈ yet xto mujuj, xilni heb'ix ch'en n̈ahch'en b'ay x'alaxictoj snimanil Comam b'oj tzet xu yalaxayoj. 56Lawi xpaxtoj heb'ix, swatx'en heb'ix camajan an̈ xuk' sam yun̈e yanojcoj heb'ix yin̈ snimanil Comam yalni. Yin̈ tz'ayic xewb'al tu', syijye heb'ix xew haca' yalni sley ya' Moisés.


Copyright
Learn More

will be added

X\