SAN LUCAS 22

1Yet lan̈anxa yayilo k'in̈ Pascua, yet chiwahlax ixim pan machi yan̈al chialaxicoj. 2Yoc ebnaj yahawil sacerdote yeb ebnaj chicuyni anma yin̈ isley naj Moisés issaya' yin̈ tzet chu ispotx'ni ebnaj Comam Jesús; yaj yin̈ ewantajil, yuto chixiw ebnaj tet anma. 3Yayto naj matzwalil yul yanma naj Judas, chihallaxpaxo Iscariote, naj ayco istz'ajo ebnaj cablahon̈wan̈ iscuywom Comam. 4Yuxin, to naj isc'atan̈ ebnaj yahawil yin̈ ebnaj sacerdote yeb isc'atan̈ ebnaj chitan̈en yatut Comam Dios, yu istzotel yin̈ tzet chu yanico naj Comam yul isk'ab ebnaj. 5Caw tzalacan̈ ebnaj yaben hune' tu', yuxinto yalte ebnaj melyu tet naj Judas. 6Hac tu' xin yu iswatx'encanayo ebnaj istzoti'; yuxinto oc naj Judas issaya' tzet chu yanico naj Comam yul isk'ab ebnaj yin̈ ewantajil. 7Hayet yayilo istz'ayical bay chiwahlax ixim pan machi yan̈al chialaxicoj, yeb yet chipotx'lax no' me' xahanbalil yin̈ k'in̈ Pascua, 8yalni Comam Jesús tet naj Pedro yeb naj Juan: —Asiwe hewatx'e' tzet chicolo yin̈ k'in̈ Pascua ti', ẍi Comam. 9Isk'amben ebnaj tet Comam: —¿Baytu'wal chawoche chon̈tohan̈ cowatx'e'an̈ hawalni? ẍi ebnaj. 10Yalni Comam tet ebnaj xin: —Hayet chexapno bey yul con̈ob tu', cheyila' hune' naj ik'bil hune' tz'ajab ha' yu. Chexocowe tzujno yinta naj masanto yul n̈a bay chiocto naj, 11cat heyalno tet naj yahaw n̈a tu': “Ha' ya' cuywawom macon̈chejnitijan̈, ẍi ya' haca' ti': ‘¿Baytu'wal ay hune' cuarto bay chinwa'ojan yin̈ k'in̈ Pascua yeb ebnaj incuywoman?’” ẍi ya', quexchi. 12Ha' naj chiyeno hune' niman cuarto yin̈ iscab piso c'ulxa yehi. Ha' bey tu' xin chewatx'e' tzet chicolo, ẍi Comam. 13Hac tu' xin yu isto ebnaj. Yilcha yu ebnaj haca'tic'a yu yalni Comam. Yoc ebnaj iswatx'eno tzet chilolax yin̈ k'in̈ Pascua. 14Hayet yapni yorahil, yoc Comam yeb ebnaj ischejab sat meẍa. 15Yalni Comam tet ebnaj: —Hayeltaxam chiwochehan chiwec'tzehan hune' wah yin̈ k'in̈ Pascua ti' yeb hex yet yalan̈to maẍto chincaman. 16Chiwalan teyet, matxa chiwec'tzehan hune' k'in̈ ti' masanto chij isba tzet yelapno ye hune' ti' yet ch'oc sunil yalan̈ yip Comam Dios, ẍi Comam. 17Lahwi tu' xin, yinican̈ Comam ch'en copa, bay ayayto yal te' uva, yak'ni yuch'andiosal tet Comam Dios, yalni Comam haca' ti': —Chahwej lah, uc'wej, awec'o teyin̈ hununex. 18Caw chiwalcanojan teyet, matxa chiwuc'an yal sat te' uva masanto yet ch'oc sunil yalan̈ yip Comam Dios. 19Lahwi tu' xin, yinican̈ Comam ixim pan, yak'ni Comam yuch'andiosal tet Comam Dios, isk'axpon Comam ixim, yak'ni Comam ixim tet ebnaj, yalni Comam: —Ha' hune' ti' yechel innimanilan chiwak'an yin̈ camical yu hecolchahi. Wawej, yu quinhenanitijan, ẍi Comam. 20Lahwi iswa'ilo Comam yeb ebnaj yinipaxocan̈ Comam ch'en copa, yalni Comam: —Ha' hune' ayayto yul copa ti' ha' chak'ni henab yin̈ hune' ac' trato ak'bil yu Comam Dios, chij isba yet chimalto inchiq'uilan yu hecolchahi, ẍi Comam. 21Yaja' naj chinanicojan yul isk'ab ebnaj chichiwa isc'ul win̈an, ayco naj sat meẍa coxol ti'. 22Hanin Ak'bilintijan texol yu Comam Dios, yilal wec'an yin̈ camical haca' halbil yu Comam Dios, yaja' c'anch'an naj chinanicojan yul isk'ab camical, ẍi Comam. 23Hayet yaben ebnaj hune' tu', yichico ebnaj isk'amben tet hunun yin̈ mac ch'anico Comam yul isk'ab camical. 24Lahwi tu' xin, yichico ebnaj iscuywom iscajlen isba yin̈ mac ec'bal yelapno ye xol ebnaj. 25Yalni Comam Jesús tet ebnaj: —Ha' ebnaj ayco yahawo tx'otx' nime con̈ob ay yip ebnaj yiban̈ anma. Ebnaj ayco yahawilal tu' xin chihallax c'ulal yin̈ ebnaj yu anma. 26Wal xin mach haco tu' cheyute heba. Ta ay hunujex caw ay heyelapno cheyabe, iweyo heba haca' huno mac mach yelapno yehi. Yebpaxo ha' mac caw iswi'ehal yeco texol chabe yak'abico isba haca' hunu chejab. 27K'inalo ta ay hune' niman wah chioqui, ¿mactaxca caw niman yelapno ye heyalni? ¿Tom ha' naj ayco sat meẍa, mato ha' naj chibatxnic'o itah? Wal xin, ha' ton naj ayco sat meẍa caw niman yelapnoj. Yaja' walinan, ayinicojan texol haca' naj chibatxnic'o itah. 28Hex ti', caw ayexn̈etic'aco yet yul isya'tajil wiban̈an. 29Chexwacojan yahawiloj, haca' wocan yahawilo yu Inmaman. 30Hex ti', chexwa' sat inmeẍahan bay chinocan Yahawiloj, cat heyay tz'on̈no yul hecapil hununex, cat heyoc yahawil yiban̈ cablahon̈eb majan ebnaj Israel, ẍi Comam. 31Yalni Comam Jesús tet naj Pedro: —Simón, Simón xaisk'an naj matzwalil tet Comam Dios ta chexyilwe naj haca' chu istxayelax ixim trigo. 32Yaj xa'ink'anan tet Comam Dios haxinwal mach chabej iscawxi hawanma yin̈ Comam. Yaja' yet chawanico hawanma win̈an hunelxa, chawiptze sunil ebnaj hawuẍta xayaco yanma win̈an, ẍi Comam. 33Yalni naj Pedro tu' tet Comam: —Mamin, caw hinaninan intohan tawintaj, waxan̈ca yul preso maca yin̈ camical, ẍi naj. 34Yalni Comam Jesús tet naj xin: —Pedro, chiwalan tawet, yalan̈to maẍto chi'ok' no' icham chiyo, oxelxa chawala ta mach quinhawohtajojan, ẍi Comam tet naj. 35Isk'amben Comam Jesús tet ebnaj iscuywom: —Yet quexinchejnitojan yet walnihan teyet ta mach cheyito hetz'ispa yeb hemelyu, yeb hexan̈ab, ¿aymi tzet mach yabe yul hek'ab? ẍi Comam. Istak'wi ebnaj: —Matzet, ẍi ebnaj. 36Yalnipaxo Comam tet ebnaj: —Wal tinan̈ xin, maquex ay hetz'ispa yeb hemelyu, iwetoj. Ha' mac mach yespada, istxon̈abto ischumpa cat islok'ni yet. 37Yuxinto chiwalan teyet, yilal yijnicano isba sunil tzet tz'ibn̈ebilcano win̈an yu ebnaj ischejab Comam bay chala: “Haca' ch'utelax ebnaj caw xiwquilta ismul, hac tu' ch'utelaxo naj,” ẍiayoj. Yuxinto yilal yijni isba sunil, ẍi Comam. 38Yalni ebnaj tet Comam: —Mamin, ay cabeb ch'en espada ik'bil juan̈ lah, ẍi ebnaj. Yalni Comam: —C'uxanxa xin, ẍi Comam. 39Lahwi tu', yelti Comam Jesús yul n̈a, isto bey hune' won̈an Olivo isbi, baytic'a chibeyc'o Comam. Istopaxo ebnaj iscuywom Comam yintaj. 40Hayet yapni Comam bey tu', yalni Comam tet ebnaj: —Txahlan̈wej, haxinwal mach chexayc'ay yul isk'ab istx'ojal, ẍi Comam. 41Lahwi tu' xin, yel Comam isc'atan̈ ebnaj haca'mi xol bay ch'apni hunu ch'en ch'en chik'ojlaxtoj. Ha' tu' xin, ay jahno Comam txahloj. 42Yalni Comam yin̈ istxah: Mamin, ta choche hac'ul, colinnilojan yin̈ hune' isya'tajil chul wiban̈ti'an, yaj machojab haca' chiwochehan, to haca'ojab tzet chal hac'ul, ẍi Comam. 43Lahwi tu' xin, yayilo hune' naj yángel Comam Dios yul satcan̈, yak'no yip yanma Comam. 44Caw occano niman isya'il yin̈ yanma Comam, yuxin caw islahico Comam istxahli yin̈ sunil yanma. Caw xin ch'el ha' yin̈ Comam haca' nimeta tu'an chic' yayc'ay sat tx'otx'. 45Yet islahwi istxahli Comam, isto bay cancano ebnaj iscuywom. Hayet yapni Comam isc'atan̈ ebnaj, caw wayan̈ chu ebnaj yu bisc'ulal. 46Yalni Comam tet ebnaj: —¿Tzet yin̈ xin chexwayi? Ahan̈wewanoj, txahlan̈wej haxinwal mach chexayc'ay yul isk'ab istx'ojal, ẍi Comam tet ebnaj. 47Lan̈anto yalni Comam Jesús hune' tu' yapni hun bulan ebnaj; babelico naj Judas sata ebnaj, naj ayco istz'ajo ebnaj cablahon̈wan̈ ischejab Comam. Ishitzico naj Judas tu' isc'atan̈ Comam yun̈e istz'ohni naj isk'otx Comam. 48Yalni Comam tet naj: —Judas, yet chatz'ohnilo ink'otxti'an, ¿tom hac tu' chu quinhawanicojan yul isk'ab camical? Hanin Ak'bilintijan texol yu Comam Dios, ẍi Comam. 49Hayet yilni ebnaj iscuywom Comam Jesús tzet lan̈an yul yiban̈ Comam, isk'amben ebnaj: —Mamin, ¿chimisje jak'nihan̈ ch'en espada yin̈ ebnaj ti'? ẍi ebnaj. 50Ay xin hune' naj xol ebnaj iscuywom Comam tu', pitnilto istxiquin hune' naj ischejab naj yahawil yin̈ ebnaj sacerdote, hune' istxiquin naj yin̈ iswatx'k'ab. 51Yalni Comam Jesús: —¡Bejwej! Mach cheyute haca' tu'. Istzabnico Comam istxiquin naj, iswatx'iloj. 52Ha' ebnaj beyc'o tzabnoti Comam, ha' ton ebnaj yahawil yin̈ ebnaj sacerdote, yeb ebnaj yahawil yilomal yatut Comam Dios, yeb ebnaj ichamta winaj iswi'ehal con̈ob; yalni Comam tet ebnaj: —¿Tom elk'ominan teyet yuxin ik'bil heyespada yeb hete', cat heyul quinhetzabnotojan? 53Hunun tz'ayic ayinic'tojan yul yatut Comam Dios, yaja' mach quinhetzabayojan. Yaj wal tinan̈ ma'apni yorahil quinisbejtzonicojan Comam Dios yul hek'ab yeb tet naj yahawil k'ejholo, ẍi Comam. 54Lahwi tu' xin, istzabnayo ebnaj Comam, yilaxto Comam bey yatut naj yahaw yin̈ ebnaj sacerdote. Wal naj Pedro xin, nahat tzujan naj yinta Comam. 55Yanico xin ebnaj tu' isk'a' yictabal yamak'il te' n̈a, yoc tz'on̈no ebnaj k'aẍnoj. Ocpaxo tz'on̈no naj Pedro k'aẍno xol ebnaj. 56Ay xin hune' ix munlawom bey tu', ilni naj Pedro yet tz'on̈anico naj yin̈ k'a'. Yoc t'an̈no ix yin̈ naj, yalni ix: —Hune' naj ti', yetbi isba naj yeb naj Jesús, ẍi ix. 57Hayet yaben naj Pedro hune' tu', yalni naj: —Mach wohtajojan naj chawal tu', ẍi naj tet ix. 58Hunepixto xin, yillax naj Pedro yu hune' naj, yalni naj tet naj: —Hach ti' hawetbi haba yeb ebnaj tu', ẍi naj. Istak'wi naj Pedro: —Machoj, mach wetbiho inbahan yeb ebnaj, ẍi naj. 59Ayxam hunu orahil xin, ischilban yalni hune'xa naj yin̈ naj Pedro tu': —Yin̈ caw yeli, ha' naj ti' yetbi isba naj yeb naj Jesús ti', yebpaxo ah Galilea naj, ẍi naj. 60Yalni naj Pedro: —Mach wohtajan hune' tzet chawal ti', ẍi naj. Yet lan̈an yalni naj Pedro hune' tu' xin, yok'can̈ hune' no' icham chiyo. 61Ist'an̈xito Comam yin̈ naj Pedro tu'. Hac tu' xin yu isnaniti naj Pedro tzet yal Comam tet naj: “Oxelxa chawala ta mach quinhawohtajojan yet chi'ok'can̈ no' icham chiyo,” ẍi Comam Jesús tet naj. 62Hac tu' xin yu yelto naj, yoc naj ok'oj. 63Wal ebnaj ayco tan̈eno Comam Jesús tu', oc ebnaj tzebo yin̈ Comam, ismak'nipaxo ebnaj Comam. 64Yoc ebnaj ismajcheno sat Comam, chi-la-isk'amben ebnaj tet Comam: —Halilo mac macachmak'ni, ẍi ebnaj tet Comam. 65Hantato buchwal tzoti' yal ebnaj yin̈ Comam. 66Hayet issajbilo xin, iscutxbanico isba ebnaj ichamta winaj yin̈ con̈ob Israel, yeb ebnaj yahawil yin̈ ebnaj sacerdote, yeb ebnaj chicuywa yin̈ isley naj Moisés; ischejni ebnaj ilaxoti Comam Jesús sataj. Isk'amben ebnaj tet Comam: 67—Hal jetan̈, ¿tom yeli hach ti' Cristo hach? ẍi ebnaj. Istak'wican̈ Comam: —Ta chiwalan teyet ta Haninan Cristo hinan, mach cheyak'ayto yul heyanma. 68Taca ay tzet chink'ambepaxojan teyet, mach chepajtzepaxo wetan. 69Yaj wal tinan̈ Hanin Ak'bilintijan texol yu Comam Dios chinoctz'on̈nojan yin̈ iswatx'k'ab Comam Dios; Comam caw aycano yip, ẍi Comam. 70Yuxinto sunil ebnaj oc k'ambeno tet Comam: —¿Tom Isc'ahol Comam Dios hawe chal tu'? ẍi ebnaj. Istak'wi Comam Jesús: —Ho', Isc'ahol Comam Dios wehan haca' cheyute heyalni ti', ẍi Comam. 71Yalni ebnaj: —Tinan̈ matxa yilalo chicok'an anma chihalni ismul naj ti', to han̈-caw-on̈ majabe tzet chal naj, ẍi ebnaj yin̈ Comam.

will be added

X\