SAN LUCAS 22

1Yet yichixacoj k'in̈ snab'aniltij scolb'anil heb'ya' israel, yet ẍwalax ixim pan machcoj yan̈al, 2say heb'naj swi'al yin̈ heb'naj sacerdote b'oj heb'naj cuywaom yin̈ sley ya' Moisés tzet chu spotx'noj heb'naj Comam Jesús, haxca xiw heb'naj tet con̈ob'. 3Yin̈n̈ena tu', x'oc naj matzwalil yin̈ yanma naj Judas ah Queriot, naj stz'aj heb'ya' hunlan̈wan̈ ẍcuywi yin̈ Comam. 4Yuxin xto naj st'in̈b'a b'oj heb'naj swi'al yin̈ heb'naj sacerdote, b'oj heb'naj swi'al yin̈ heb'naj ẍtan̈en yul yatut Comam Dios, yin̈ tzet chu yanojcoj naj Comam yul sk'ab' heb'naj. 5Caw stzalacan̈ heb'naj, xalni heb'naj ta cha'a' heb'naj stohol naj. 6Hactu' xucanoj slahc'ulal heb'naj, yuxin x'oc naj saya' tzet chu yanicoj naj Comam yul sk'ab' heb'naj yin̈ ewantaj. 7Yet x'apni b'ab'el tz'ayic b'ay ẍwalax ixim pan machcoj yan̈al, yet ẍpotx'lax no' canelu yin̈ k'in̈ tu', 8xatoj Comam Jesús ya' Pedro b'oj ya' Juan, xalni tet heb'ya': —Aswej he watx'e tzet ẍco lo yin̈ k'in̈ ti'. 9Sk'amb'en heb'ya' tet Comam: —¿B'ay chon̈ to co watx'e hawalnian? . 10Xta'wi Comam: —Yet chex ocojapnoj yul con̈ob', cheyila' hune' naj ib'il hune' chok' ha' ha' yu. Ocan̈wej tzujnuj yin̈ naj masanto ch'apnoj naj yul hune' te' n̈ah. 11Cheyalnoj tet naj yahaw n̈ah tu': Schej co Cuywaom co k'amb'e' tawetan: ¿B'aytu' ay hune' cuarto b'ay ẍwec'tze' hune' k'in̈ ti' b'oj heb'ya' ẍcuywi win̈an? quex chinaoj. 12Cat syenoj naj hune' cuarto caw nimejal yin̈ scab' piso, watx'eb'ilxa yul. Hat che watx'e tzet ẍco lob'. 13Xto heb'ya', xchalo yu heb'ya' haca' xute Comam yalni. X'oc heb'ya' swatx'enoj tzet ẍlolax yin̈ sk'ejb'alil yin̈ hune' k'in̈ tu'. 14Yet x'apni yorail, x'oc Comam Jesús b'oj heb'ya' apóstol yin̈ meẍa, 15xalni Comam: —Ayxana caw xwoche chin wa' b'oj hex yin̈ hune' k'in̈ ti' yalan̈to maẍto chin caman. 16Haxca ẍwal teyetan ta matxa chin lob' hune' ita ti'an, masanto chija' sb'a b'ay ch'ocoj Comam Dios Yahawoj. 17Lawitu' xinican̈ Comam ch'en copa; xa'ni yuch'antioẍ tet Comam Dios, xalni tet heb'ya': —Chawej, itxk'awejtoj teyin̈ cat heyuc'ni, 18haxca ẍwal teyetan ta matxa ẍwuc'u' yal te' uva ti'an, masanto ch'ocoj Comam Dios Yahawoj. 19Lawitu' xinican̈ Comam ixim pan, xa'ni yuch'antioẍ tet Comam Dios, sk'axponay ixim, xa'ni tet heb'ya', xalni Comam: —Ha' ti' hin nimanil ẍwa'a' he colb'anilojan. Wawej, yun̈e hin he nanojtijan. 20Lawi swa'iloj heb'ya', hactu' xutepaxoj yin̈ ch'en copa, xalni Comam: —Hune' tzet ahaytoj yul copa ti', snab'aniltij hune' scab' lahc'ulal cha' Comam Dios teyet. Hin chiq'uil ch'eloj yu he colb'anilojan, ha' i'n̈e scab' lahc'ulal. 21Yaja' naj chin anojcoj yul sk'ab' heb'naj aycoj showal win̈an, hun ayon̈coj b'oj naj yin̈ meẍa ti'an. 22Yeli, Hayin Ab'ilintij yu Comam Dios xol jet-anmail ti'an, yilal wec'oj yin̈ camical halb'il yu Comam Dios, yaja' ¡c'antaj naj chin anojcoj yul sk'ab' camical tu'an!. 23Yu tzet xal Comam tu' x'oc heb'ya' sk'amb'enoj tet hunun, ¿mac hune' ẍpac'ojcoj yin̈ Comam? ẍi heb'ya'. 24Xalni pax heb'ya' hunecxa yin̈ mac k'a' ay yelapnoj ye xol heb'ya'. 25Xalni pax Comam Jesús: —Heb'naj swi'al hej nancon̈ob'al, caw nimej winaj chute sb'a heb'naj, yuxin chetli heb'naj yin̈ anma, yaja' xal-lax paxoj ta sc'ulaloj yet anma chu heb'naj. 26Yaja' te xol mat hacoj tu' chute sb'a. Ta ay hunuj hex k'a' ay yelapnoj heye cheyab'e, iwejay he b'a haca' mac comonaln̈e yeyi. Pax mac swi'al yeyi, yi'ab' ay sb'a haca' chejab'. 27K'inaloj ta ay hunuj wa'oj, ¿mactaxca k'a' ay yelapnoj ye heyalni? ¿naj aycoj yin̈ meẍa, mato naj ch'anicoj ita sat meẍa? Yin̈ caw yeli ẍwalan ta naj aycoj yin̈ meẍa k'a' ay yelapnoj yeyi, yaja' walinan ayincoj te xol haca' naj ch'anicoj ita sat meẍa tu'an. 28Hex xquex can tin c'atan̈ ti'an, hexn̈e xeyil ilweb'al b'ay xquin ec'an yichotax wichitijan. 29Yuxin chex wa'a'coj yahawoj haca' xu woc yahawoj yu Comam Diosan. 30Yet tu' chex wa'oj win̈an yet chin ocoj yahawojan, cat heyocoj tz'on̈noj yul hunun he tz'on̈ob'al b'ay chex ocoj yahawoj yib'an̈ cab'lan̈eb' con̈ob'al jet con̈ob' israel. 31Xalni pax Comam Jesús: —Simón, sk'an naj matzwalil tet Comam Dios ta chex yilwe naj haca' stzicob'tajn̈elax ixim trigo yun̈e yel sat ixim. 32Yaja' xax hin k'an tet Comaman, ta machawiloj hawanma win̈an. Yet chawinojtij hawanma tawin̈, chawiptze' heb'ya' hawetb'i yin̈ ya'noj yuluj sc'ul win̈an. 33Xalni ya' Simón: —Mamin, ta chach ilaxojtoj presu, caw hinan wanma hin to tawin̈an, waxan̈ca hayin hun chin cam tawin̈an. 34Xalni Comam tet ya': —Pedro, ẍwal tawetan ta oxel chawala' ta mat hin hawohtajojan yalan̈to maẍto ch'ok' no' chiyo. 35Xalni Comam Jesús tet heb'ya' ẍcuywi yin̈: —¿Chim tit yul he c'ul yet xwalni teyetan, ta macheyitoj he tz'ispa, he melyu, he xan̈ab'? ¿Ay mi tzet quex mahlani? ẍi Comam. —Machoj. 36Xalni Comam tet heb'ya': —Wal tinan̈, mac hex ay he tz'ispa, b'oj he melyu, iwejtoj. Wal mac mach yespada, xtxon̈ab'toj yet yib'an̈ xil sk'ap cat slok'ni ch'en. 37Haxca ẍwal teyetan ta yilal yijnoj sb'a tzet tz'ib'n̈eb'ilcan yu heb'ya' schejab'lom Comam Dios win̈an, yet chalni heb'ya': Haca' ch'utelax heb'naj caw xiquiltaj smul, hactu' ch'utelaxoj naj, ẍiayoj. Sunil tzet tz'ib'n̈eb'ilcan win̈an, yilal yijnoj sb'a. 38Xalni heb'ya' tet Comam: —Mamin, ay cab' ch'en espada b'eti', ẍi heb'ya'. —Awejcan tzet cheyal tu'. 39Lawitu' x'eltij Comam Jesús yul n̈ah, xto b'et ni'an witz Olivo b'aytic'a ẍb'eyc'oj, xto pax heb'ya' ẍcuywi yin̈. 40Ha' x'apni b'etu', xalni tet heb'ya': —Ocan̈wej yin̈ oración haxin̈wal machex ayoj yet chex ec'oj yin̈ ilweb'al. 41Lawitu' aymi hunuj tx'an̈il shec'toj sb'a Comam sataj heb'ya', x'ay jahnoj x'oc yin̈ oración. 42Chalni Comam: —Mam, ta sje ha c'ul, coliniloj tet hune' sya'tajil lan̈an yul win̈ ti'an, haxin̈wal mach ẍwab'e sya'ilan, yaja' mat haca'oj chal hin c'ulan, to haca' chal ha c'ul. 43Yin̈n̈ena tu' xwayican̈ hune' yángel Comam Dios x'a'ni snimanil sc'ul Comam. 44Yaja' yu b'isc'ulal tx'inancoj yin̈ yanma Comam, caw xicantij yanma yin̈, x'oc yin̈ oración, calan chic' ye ha ha' ch'elcanoj yin̈ Comam ch'aycanoj t'ujla sat tx'otx'. 45Yet lawi ya'niloj Comam yoración, x'ah lin̈noj, xto yilnoj heb'ya' ẍcuywi yin̈ tu'. Yet x'apni sc'atan̈ heb'ya', xilni to wayoj chu heb'ya'. Xtit swayan̈ heb'ya' haxca xtib'ay b'isc'ulal yu heb'ya'. 46Xalni Comam tet heb'ya': —¿Tzet yuxin chex wayi? Ahan̈wej lin̈noj cat he ya'ni he yoración yun̈e machex ay yu ilweb'al, . 47Lan̈anto stzotel Comam Jesús yet x'apni naj Judas stz'aj heb'ya' hunlan̈wan̈ ẍcuywi yin̈ Comam, tx'ihal anma ib'il yu naj. Ha' xhitzicoj naj, stz'ohni naj Comam haca' tioẍb'alil. 48Xalni Comam tet naj: —Hach Judas, ¿tom yu hin ha tz'ohnian chin hawanicoj yul sk'ab' camical Hayin Ab'ilintij yu Comam Dios xol jet-anmail ti'an?. 49Ha' xilni heb'ya' hunlan̈wan̈ tzet lan̈an yul yib'an̈ Comam, sk'amb'en heb'ya' tet: —Mamin, ¿ẍja' ch'en jespada ti yin̈ heb'naj?. 50Yaja' pettic'a x'elnatoj sk'ab' hune' ya' b'oj ch'en espada yin̈ hune' naj schejab' naj yahaw yin̈ heb'naj sacerdote, smasniltoj ya' xtxiquin naj aycoj yin̈ swatx'. 51Yaja' xal Comam tet heb'ya': —C'ojb'ilxa, matxa cheyute. Stzutznicoj Comam xtxiquin naj yin̈ lemb'il. 52Xalni Comam tet heb'naj swi'al yecoj yin̈ heb'naj sacerdote, b'oj heb'naj swi'al yecoj yin̈ heb'naj ẍtan̈en yatut Comam Dios b'oj heb'naj icham winaj swi'con̈ob', heb'naj tu' x'apni tzab'noj Comam: —¿Tox tx'oj ye hin wi' cheyilan, yuxin ib'il heyespada b'oj he te' chex hul hin he tzab'nojtojan? 53Hunun tz'ayic ayin te xol yamak' yatut Comam Diosan, yaja' mach xquin he tzab'an. Yaja' wal tinan̈ x'apni hora hin can yul he k'ab'an b'oj yul sk'ab' naj yahaw k'ejholo., ẍi Comam tet heb'naj 54Lawi stzab'laxayoj Comam Jesús, x'ilaxtoj Comam yatut naj swi'al yin̈ heb'naj sacerdote. Nahat tzujann̈e ye ya' Pedro yin̈ Comam. 55Lawi yanicoj heb'naj tan̈eomal yatut Comam sk'a' amak', x'ay tz'on̈noj heb'naj k'aẍnoj yin̈ shoyanil k'a'; ha'hun ya' Pedro x'ay tz'on̈noj xol heb'naj. 56Ay hune' ix ẍmunla b'etu' x'ilni ya' yet tz'on̈anayoj ya' yin̈ k'a' tu', x'occan t'an̈noj ix yin̈ ya', xalni ix: —Hune' naj ti', yetb'i sb'a naj b'oj naj Jesús. 57Yaja' xeb'a ya' Pedro, xalni ya': —Iẍ, mat wohtajoj naj chawal tu'an. 58Hunep tu', x'ilot pax ya' yu hune'xa naj. Xalni naj tet ya': —Hachti' hawetb'i ha b'a b'oj heb'naj ti', Xta'wi ya': —Machoj, mat wetb'ioj heb'najan. 59Maytax tu' xin, schilb'an hune'xa naj: —Yin̈ caw yeli, hune' naj ti' yetb'i sb'a naj b'oj naj Jesús, haxca ah Galilea naj. 60Xta'wi pax ya': —Yin̈ caw yeli mat wohtajoj hune' chawal tu'an, Yet lan̈anto stzotel ya', x'ok'can̈ no' chiyo. 61Xmeltzo t'an̈na Comam yin̈ ya'. Hactu' xu xtitcan̈ yul sc'ul ya' tzet yalnaj Comam tet ya': Yin̈tic'a hune' ak'b'al ti', yalan̈to maẍto ch'ok' no' chiyo, oxel chawala' ta mat hin hawohtajojan. 62Shec'niltoj sb'a ya' xol heb'naj, x'oc ya' ok'oj. 63Heb'naj ẍtan̈en Comam Jesús, x'oc heb'naj stzeye' Comam, smak'ni pax heb'naj. 64Smajchen heb'naj sat Comam, chalni heb'naj: —Haliloj mac cach mak'ni. 65Tx'ihal to tzet chal heb'naj sb'ahni heb'naj Comam. 66Yet tz'ayicalxa, xyamicoj heb'naj icham winaj swi'con̈ob', heb'naj swi'al yecoj yin̈ heb'naj sacerdote b'oj heb'naj cuywaom yin̈ sley ya' Moisés. Xchejni heb'naj ilaxojtij Comam yin̈ sat, sk'amb'en heb'naj tet Comam: 67—Haliloj jetan, ta yeli hachti' Cristo hach. Xta'wi Comam: —Ta ẍwal teyetan ta hayin Cristo hinan macheya'a' yuluj he c'ul. 68Taca ay tzet chin k'amb'e teyetan, machex ta'woj pax wetan. 69Yaja' yin̈xa ẍtoj ti', Hayin Ab'ilintij yu Comam Dios xol jet-anmail ti'an, chin ocoj tz'on̈noj yin̈ swatx' Comam Diosan, Comam Sunil Chu Yu. 70Yuxin sunil heb'naj xk'amb'en tet Comam: —¿Ta hactu' chaltu', Sc'ahol Comam Dios haweyi? . Xta'wi Comam: —Ho', hactu' yeyi haca' heyalni ti'. 71Xalni pax heb'naj: —Tinan̈ matxa yeẍtooj ay mac ẍalni jet. Hayon̈ caw xjab'e tzet xal naj.


Copyright
Learn More

will be added

X\