SAN LUCAS 21

1Yet hunec, ayictoj Comam Jesús yamak' yatut Comam Dios, chilni yaniaytoj heb'naj k'alom yofrenda yul snetb'alil ch'en melyu. 2Xilni pax Comam yaniaytoj hune' ix caw meb'a' camnajxa yichamil cab' niẍtej melyu caw mat tx'ihaloj sat. 3Xalni Comam: —Yin̈ caw yeli ẍwal teyetan, hune' ix meb'a' camnajxa yichamil ti', k'a' ec'b'alto xa' ix sataj hunujxa maca, 4haxca heb'naj ti', chaytoj heb'naj yofrenda b'aytet matxa ch'ocnicoj yu heb'naj. Wal ix ti' chaytoj ix ni'an solic' yec'b'al yu. 5Yet lan̈an stzoten hunk'aan heb'naj sc'ulch'anil ch'en ch'en aycoj yelawoj yin̈ yatut Comam Dios, b'oj yofrenda anma aycoj yin̈, xalni Comam Jesús: 6—Sunil hunk'aan cheyil ti', ch'apnoj stz'ayical b'ay ch'ec'oj wejnayi. Matxa hunuj ch'en ẍcanoj yib'an̈ hunxa ch'en. 7Sk'amb'en heb'ya' ẍcuywi yin̈ Comam Jesús: —Mam Cuywaom, ¿b'ak'in̈ chuuj hune' chawalti'? ¿Tzet ẍyeni ta toxa chuuj? . 8Xalni Comam: —Nann̈e heyu taj cheya' sub'u' he b'a. Haxca tx'ihal heb'naj ẍhob'nojcoj hin b'ih yin̈an cat yalnoj heb'naj: Hayinti' Cristo hinan, ẍinaoj heb'naj, maca: Slahub'alxa tz'ayic b'ay ayon̈, ẍinaoj heb'naj. Yuxin nann̈e heyu, machex oc tzujnuj yin̈ heb'naj. 9Yet cheyab'enoj sk'umal howal cha'acoj hune' con̈ob'al anma b'oj hune'xa, b'oj ch'ahoj b'oc'na anma yin̈ heb'naj yahaw con̈ob', taj chex xiwcan̈, haxca yilal yuluj hunk'aan tzetet tu' b'ab'el, yaja' maxto slahob'aloj tz'ayic. 10Xalni pax Comam tet heb'ya': —Hune' con̈ob'al anma cha'a' howal yin̈ hunexa con̈ob'al anma, ẍla yi'a'can̈ sb'a heb'naj yahaw con̈ob' yin̈ hunun. 11Tx'ihal b'ay ch'ec'oj nimejtaj chixcab', nananxan̈e b'ay ch'ichojcan̈ wahil b'oj hej yab'il. B'oj tx'ihal tzet xiwb'alc'ule chuuj. Ch'il-laxoj nimejtaj c'ayb'alc'ule satcan̈. 12Yaja' yet maẍto chijsb'a hunk'aan tzetet tu', b'ab'el chex tzab'laxoj, cat ya'laxoj ec'oj ya' heyanma. Chex ilaxojtoj yulaj capiya cat yinojcan̈ sb'a heb'naj teyin̈. Chex alaxojictoj yul presu, cat heyilaxojtoj yin̈ sat heb'naj yahaw, haxca cheya' yuluj he c'ul win̈an. 13Ha' ti' ch'a'noj hin he tzote' tet heb'najan. 14Mach cheya'a'coj yin̈ he c'ul tzet cheyala' he colb'aniloj yet ayexcoj yin̈ sat heb'naj. 15Haxca hayin ẍwa'a' stz'ajanil he c'ul he tzotelan, yuxin heb'naj aycoj showal teyin̈, mach ẍc'ojoj heb'naj spajtzenoj tzet cheyala'. 16Chex alaxojcoj yul sk'ab' heb'naj yahaw yu anma, hasta yu he mam b'oj heyuẍtaj b'oj mac ayto heyu he b'a b'oj, b'oj heyamigo. Ayex chex potx'laxoj. 17Sunil mac chex cajnojcan̈ haxca cheya' yuluj he c'ul win̈an. 18Yaja' hasta hunuj xil he wi' mach ẍc'ayojtoj. 19Ta ẍtechaoj heyu, cheyila' k'inal mach stan̈b'al. 20Yet hoyb'ilxa con̈ob' Jerusalén yu heb'naj soldado, che txumu' ta cawilxa yetij b'ay ẍtan̈ojiloj sunil tzetet. 21Yuxin, mactaj ay b'et Judea, tojab' yeb'a sb'a yulaj witz. Mac ay yul con̈ob' Jerusalén elojab'can̈. Mactaj ayto xol smunil matxa ẍmeltzo yul con̈ob'. 22Haxca yin̈ hune' stz'ayical tu' chuluj hune' niman sya'tajil spajoj xtx'ojal chu anma. Ha' tu' chija' sb'a tzet tz'ib'n̈eb'ilcan yu heb'ya' schejab'lom Comam Dios. 23¡C'antaj heb'ix ayxa tzet yeyi yet ch'apnoj hunk'aan stz'ayical tu', b'oj heb'ix aytocoj yunin yin̈ im! Haxca caw ay tacb'alc'ule b'oj hune' niman sya'tajil chuluj yib'an̈ hune' con̈ob' ti' yu showal sc'ul Comam Dios. 24Caw tx'ihal anma ẍcamoj yin̈ howal. Ay mac ch'ilaxojtoj presu b'ay nancon̈ob'al, cat yocojcan con̈ob' Jerusalén ti' yalan̈ yoj heb'naj mat israeloj yun̈e yetalaxi, masanto ch'apnoj stz'ayicalil b'ay halb'il yu Comam Dios b'ay ch'ilaxojiloj yip heb'naj mat israeloj tu'. 25Ay c'ayb'alc'ule ch'il-laxoj yin̈ tz'ayic, yin̈ x'ahaw b'oj yin̈ hej tx'umel. Wal sat tx'otx'otx' ti' ẍb'oc'chaojcan̈ anma yu xiwquilal yab'en sk'an̈ ha' mar yet ẍb'ilojcan̈ sat ha'. 26Ẍpaxojiloj yip anma xiwquilal, ẍb'isb'onoj sc'ul yu tzet chuuj satyib'an̈k'inal ti', haxca ẍb'ilojcan̈ yib'an̈k'inal. 27Lawi yuujiloj sunil hunk'aan tzetet tu', cat yil-laxoj wuluj xol hune' asun Hayin Ab'ilintij yu Comam Dios xol jet-anmail ti'an. Ay smay chu wuluj yin̈ scan̈il wean. 28Yet lan̈an ichi yijni sb'a hunk'aan tzetet tu', iwejtij heyanma teyin̈ cat he t'an̈xican̈ yu tzalalal haxca toxa chex colchaoj. 29Xalni pax Comam tet heb'ya': —Iwejiloj heyet yin̈ te' higo mato tzan tzet te'al. 30Yet cheyilni stit xaj te', che txumu to cawilxa yetij n̈ab'il. 31Hactu' yet ch'ichojcan hunk'aan tzetet tu', heyohtajxa to cawilxa yetij b'ay ch'ocoj Comam Dios Yahawoj. 32Yin̈ caw yeli ẍwal teyetan, sunil hunk'aan ti' chuuj yalan̈to maẍto ẍcamic'oj hun con̈ob'al anma ti'. 33Satcan̈ b'oj tx'otx'otx' ti' ẍtan̈ojiloj, yaja' wal tzet ẍwal teyet ti'an, mach'ec'ojtoj yet yijnoj sb'a. 34Nann̈e heyu tajca che cha ayoj he b'a yul sk'ab' hej tzetet tx'oj: Hej uc'ute', b'oj he tz'unnicoj heyanma yin̈ tzetet yet satyib'an̈k'inal. Ẍwal hune' ti' teyetan yun̈e mat nahuloj heyeyi yet chuluj hune' tz'ayic tu'. 35Haxca haca' hunuj latz'ab' ẍlipc'oyi, hactu' chu yuluj hune' tz'ayic tu' yib'an̈ sunil anma. 36Yuxin majwejc'oj, ocan̈wej yin̈ oración stohb'alk'inal haxin̈wal ẍtechaoj heyu heyec'toj xol hunk'aan tzetet chuuj tu', haxin̈wal sunil he c'ul chex apni yin̈ hin sat Hayin Ab'ilintij yu Comam Dios xol jet-anmail ti'an. 37Yet tz'ayical, ẍcuywa Comam yamak' yatut Comam Dios. Yet ak'b'alil, xto Comam b'et ni'an witz Olivo. 38Haxa hunxa sahc'alil, sab' ch'apni anma yamak' yatut Comam Dios yab'e' scuywab'al Comam.


Copyright
Learn More

will be added

X\