SAN LUCAS 21

1Yet hunel ayicto Comam Jesús yul yatut Comam Dios, yilni yanayto ebnaj k'alom yofrenda yul caẍa bay chayto anma yofrenda. 2Yilnipaxo Comam yanayto hune' ix hunix caw meba' cabeb ch'en melyu. 3Yalni Comam haca' ti': —Yin̈ caw isyelal chiwalan teyet, ha' hune' ix hunix ti', caw meba' ix, yaja' caw ec'bal mayak' ix sata sunil mac mayayto yofrenda ti'. 4Yuto ha' ebnaj ti', isk'al xan̈e chak' ebnaj tet Comam. Wal hune' ix ti', caw meba' ix, yaja' caw c'uxan mayayto ix ismelyu chilok'ni tzet chiocnico yu, ẍi Comam. 5Ay huntek'an ebnaj cuywom ti' lan̈an yalni ta caw c'ulch'an jilni yatut Comam Dios yu huntek'an ch'en ch'en caw c'ulch'an ayco yin̈, yebpaxo yu issabehal anma ayco yelawiloj. Yuxinto yal Comam Jesús: 6—Sunil huntek'an cheyil ti', chul istiempohal bay chiuchc'alaxayoj. Matxa huno ch'en ch'en latz'bil ti' chican yiban̈ yet ch'enal, ẍi Comam. 7Isk'amben ebnaj iscuywom Comam: —Mamin, ¿bak'in chu hune' chawal ti'? ¿Tzet chiyenilo yet chul hune' tiempohal tu'? ẍi ebnaj. 8Yalni Comam: —Caw cheyil heba haxinwal machi mac chexak'ni subchahoj yuto caw ay mac chuli, cat yalni haca' ti': “Haninti'an Cristo hinan, ma'ayilo hune' istiempohal ti',” ẍi ebnaj. Yaj mach chexoc tzujno yinta tzet chal ebnaj tu', ẍi Comam. 9Hayet cheyabeni ta ay howal, yebpaxo yet ch'ah wejna anma howal yin̈ ebnaj yahaw tx'otx' nime con̈ob, mach chexxiwcan̈ yuto yilal yul huntek'an tu' babel, yaj maẍto istan̈balo yiban̈k'inal ti', ẍi Comam. 10Yalnipaxo Comam: —Chak'le howal hune' tx'otx' nime con̈ob yeb hunxa tx'otx' nime con̈ob, yebpaxo huntek'anxa con̈ob chak'lecan̈ howal yeb huntek'anxa. 11Chulpaxo nimeta chixcab, cat yul wahil, yebpaxo yabil caw how yulajla con̈ob yul sat yiban̈k'inal ti'. Ay huntek'an xiwbalc'ule yeb nimeta c'aybalc'ule chu satcan̈, caw chixiw anma yilni. 12Yaja' yet maẍto chul huntek'an tu', chextzablaxayoj, cat hetzumbelaxic'oj. Chexilaxto yulajla iscapilla ebnaj Israel cat heyilwelaxi, cat heyalaxico preso, cat heyilaxto sata ebnaj rey yeb sata huntek'anxa ebnaj yahawil, sunil huntek'an isya'tajil ti' chechah yu ayexxaco yul ink'aban. 13Hac tu' xin chu quinheyalnilojan tet ebnaj. 14Yaj mach cheyaco yin̈ hec'ul yin̈ tzet cheyal sata ebnaj yu hecolni heba yin̈ tzet chal ebnaj. 15Haninti'an chiwak'an hehelanil hetzoteli, haxinwal ha' ebnaj ayco ishowal teyin̈, mach chik'oji ebnaj yin̈ ispaj hetzoti', yeb matxa tzet tz'aj yala' ebnaj. 16Ayex chexalaxico yul isk'ab ebnaj yahaw yu hemam, hemi', yu heyuẍtaj, yu heyic'al yebpaxo yu heyamigo. Ayex chexak'lax camoj. 17Sunil anma ch'oc ishowal teyin̈ yuto ayco heyanma win̈an. 18Wal xin mach chexxiwi yuto Comam Dios chexcolni. Machi hunu xil hewi' chic'aytoj. 19Tohol cheyute heba haxinwal chexcolchahi. 20Hayet hoyanxaco ebnaj soldado yin̈la Jerusalén ti', cheyohtan̈eweloj ta toxa chiuchc'alaxayoj. 21Ha' mac ay yul sunil ismajul Judea ti' tojab yeba' isba iswi'la witz. Haxa mac ay yul con̈ob Jerusalén ti', elojabcan̈. Yebpaxo ha' mac ayto xol ismunil, matxaojab chimeltzo yul con̈ob ti'. 22Yuto hayet hune' tiempohal tu', chul isya'tajil yiban̈ anma ay yul hune' con̈ob ti', ha' ton ispaj sunil istx'ojal tzet xa'iswatx'e, cat yijnicano isba tzet tz'ibn̈ebilcano yul Yum Comam Dios. 23Yaj c'anch'an ebix ix ayxa tzet ye yin̈ hune' tiempohal tu', yeb ebix chito txutxwi yunin yin̈. Yuto chitit ishowal Comam Dios yiban̈ anma ti', cat yul isya'tajil yiban̈ hune' tx'otx' con̈ob ti'. 24Caw tx'i'al anma chicam xol howal, cat yilaxto anma yulajla nan con̈obal, cat yoccano con̈ob Jerusalén yalan̈ yoj anma mach Israeloj masanto ch'apni istz'ayical bay halbil yu Comam Dios. 25Ay huntek'an yechel chisyecan̈ isba yin̈ tz'ayic yeb yin̈ ixahaw, yeb yin̈ tx'umel. Wal anma ay sat yiban̈k'inal ti', chisomchaocan̈ isc'ul yu xiwquilal yaben ishuccha ha' mar yet chismak'nican̈ isba ha', yuto caw ayxa ismay chute ha'. 26Chipaxilo yip anma yu xiwquilal yu isnani tzet chu yul sat yiban̈k'inal ti'. Yebpaxo sunil tzet caw ay yip satcan̈ chitzicobtan̈elaxi. 27Chilahwi tu' xin, cat yilni anma wayilojan xol moyan Hanin Ak'bilintijan texol yu Comam Dios. Chinhulan yeb sunil isk'ak'al wipan. 28Hayet lan̈an istzabnico yuni huntek'an chiwalti'an, cheyaweco yip heyanma, cat het'an̈xiwecan̈ satcan̈ yuto toxa chexcolchahi, ẍi Comam Jesús. 29Yanipaxico Comam hunxa yechel ti': —Chisje hetxumnilo yin̈ te' higuera yeb hunuxa te' comon k'eptaj. 30Hayet cheyilni yelilo xaj te', chinachalo heyu ta toxa ch'oc n̈ab. 31Hacpax tu', yet chiyuni huntek'an ti' cheyohtan̈eweloj tato toxa ch'oc Comam Dios Yahawiloj. 32Yin̈ caw yeli chiwalan teyet, chul huntek'an chiwalti'an yet maẍto chilahwilo iscam huntek'an anma Israel ti'. 33Ha' satcan̈ yeb tx'o tx'otx' ti' chitan̈iloj, yaj wal Intzoti'an xin mach ch'ec'to yet yijni isba tzet chala. 34Caw nann̈e heyu, machojab cheyak' cawxolo henabal yu pek'al, yu uc'u te', yeb yin̈ tzettaj ye tu' bay cheyaco heyanma yul yiban̈k'inal ti', haxinwal yet chul hune' tz'ayic tu', mach tona nahul ayex. 35Yuto haca' hunu latz'ab, hac tu' chu yul hune' tz'ayic tu' yiban̈ anma ay yul sat yiban̈k'inal ti'. 36Yuxin caw majwan̈wej, txahlan̈we yin̈ sunilbal tiempo, haxinwal chu hecolni heba yalan̈ huntek'an tzet chihul tu', haxinwal mach chexxiw yet chexoc lin̈no insatajan, Hanin Ak'bilintijan texol yu Comam Dios, ẍi Comam Jesús. 37Yet tz'ayical chicuywa Comam Jesús yul yatut Comam Dios, haxa yet ak'balil xin, chibey Comam bey hune' won̈an Olivo isbi. 38Wal xin, hunun sac'ayal yapni anma yul yatut Comam Dios yaben tzet chal Comam.

will be added

X\