SAN LUCAS 20

1Yet hune' tz'ayical, lan̈an scuyni Comam Jesús anma yamak' yatut Comam Dios, chalni Comam tzoti' c'ul yet colb'anil. Hatic'a tu', x'apni heb'naj swi'al yin̈ heb'naj sacerdote, heb'naj cuywaom yin̈ sley ya' Moisés, b'oj heb'naj swi'con̈ob'. 2Xalni heb'naj tet Comam: —¿Mac xalni tawet, yuxin xa chejiltoj anma b'eti yet ewi?. 3Xta'wi Comam: —Haquinan ay hune' tzet chin k'amb'e teyetan. 4Yet xhul ya' Juan Bautista ya'noj ha' yi'a' anma, ¿mac x'anitij ya'? ¿Tox Comam Dios mato anma?. 5X'oc heb'naj sahsonoj tet hunun, chalni heb'naj: —¿Tzet ẍjute jalni? Ta ẍjala' ta Comam Dios x'anitij naj: ¿Tzet yuxin mach xeya' yuluj he c'ul yin̈ tzet xal naj? ẍim naj. 6Taca ẍjala ta anma x'anitij naj, sunil mi con̈ob' ch'aoj b'oc'na hon̈ sc'ojnojcamoj. Haxca naj Juan tu', schejab'lom Comam Dios ye naj yul sat anma. 7Yuxin xal heb'naj: Mat johtajojan, 8ẍi heb'naj. —Haquinan, mach ẍwal teyetan mac ẍchejni wub' hune' tu'an. 9Lawitu' xalni Comam Jesús hune' cuywab'al ti' tet anma: —Ay hune' naj stz'unni te' uva sat xtx'otx'. Lawitu' xanitoj naj te' smunlan̈e hunk'aan heb'naj, haxca nahatil xto naj yul hunxa con̈ob'. 10Yet x'apni stz'ayical yuxlax te', xanitoj naj hune' schejab' schab' hantaj ch'a'laxoj tet yu heb'naj munlawom tu', yaja' ton̈e xb'ey naj ya'a' mak'a' sb'a. Lawi yec'ya' naj smak'ot, xchejlaxtoj naj paxoj, mach tzet xa' heb'naj tet naj. 11Xanitoj naj yahaw tx'otx' tu' hune'xa schejab'. Yaja' x'oc heb'naj pohloj yin̈ naj, xmak'ot pax naj. Lawi yec'ya' naj smak'laxi, xchejlaxtoj naj paxoj. Matzet xa' heb'naj tet naj. 12Xanipaxtoj naj yahaw tx'otx' tu' hune'xa naj syox. Lawi yec' ya' naj smak'laxi stzumb'elaxpaxtoj naj. 13Yuxin xal naj yahaw tx'otx' tu': ¿Tzet wal wuten hin b'a tinan̈an? K'a tinan̈ wa'a'toj hin c'ahol caw xahan ay wuan. K'a' ẍtom nanonoj heb'naj tet naj, ẍi naj. 14Yaja' ha xilnitoj heb'naj munlawom tu' naj c'ahole, xalni heb'naj tet hunun: Ha' naj ti' ẍcanoj yin̈ tzetet ay smam ti', k'a' t'in̈an co potx'o' naj haxin̈wal ẍcanojcan tx'otx' jet, ẍi heb'naj. 15Lawi yiotiltoj naj c'ahole tu' yin̈taj peyab' tu', xpotx'ot naj yu heb'naj munlawom tu'. ¿Tzet ẍtan̈oj heb'naj munlawom tu' yu naj yahaw tx'otx' heyalni? 16Chuluj naj stan̈tze'loj heb'naj, cat ya'noj naj xtx'otx' tet hunmajanojxa heb'naj munlawom. Ha' xab'en anma hune' tu' xalni heb'jetb'i: —Oẍimi machija' sb'a hune' tu'. 17Xt'an̈xicoj Comam yin̈ anma tu' xalni Comam: —Ta hactu', ¿tzet chaliloj tzet tz'ib'n̈eb'ilcan yul Yum Comam Dios b'ay chala:Ha' ch'en ch'en sb'ejiloj heb'naj aomcan̈ n̈ah, ha ch'en x'oc scawxeb'aniloj te' n̈ah, ẍiayoj? 18Tzantic'a mac ch'ayc'ay yib'an̈ hune' ch'en tu', hayk'ahil tam chucantoj, taca ha' ch'en ch'ayoj yib'an̈, sb'ala'can quich'chaoj ch'en, . 19Ha' xab'en heb'naj cuywaom yin̈ sley ya' Moisés b'oj heb'naj swi'al yin̈ heb'naj sacerdote to yet heb'naj ye tzet chal Comam, yin̈n̈ena tu' x'oc heb'naj tzab'aayoj Comam yalni, yaja' xiw heb'naj tet anma. 20Yuxin xchej heb'naj c'atlaxoj Comam, c'ul yub' heb'naj c'ulch'an stzotel heb'naj tet, yun̈e ta ay b'ay semc'o Comam cat yanojcoj heb'naj yul sk'ab' naj gobernador. 21Yuxin sk'amb'e heb'naj: —Mam Cuywaom johtajan ta st'in̈anil cha tzote yet cha cuyni anma. Lahan ye sunil anma yul ha sat, yin̈ st'in̈anil cha cuy stzoti' Comam Dios. 22Yuxin ẍco k'amb'e tawetan: ¿Tom yet ay co tohlawi tet naj César yahaw Roma mato machoj? . 23Yaja' lemb'il xtxumna Comam to tx'oj nab'il yu heb'naj, xalni Comam: 24—Yewej hunuj ch'en melyu tu' wila'an. ¿Mac najil ay yechel aycoj yin̈ ch'en, b'oj b'ihe aycoj yin̈ sat ch'en? Xta'wi heb'naj: —Yet naj César yahaw con̈ob'. 25—Ta hactu', yijyewej heya'ni tet naj César b'aytet yet naj, cat heyijyen heya'ni tet Comam Dios b'aytet yet Comam, . 26Mach hunuj tzoti'al b'ay xu semc'o Comam yu heb'naj yin̈ sat anma. Ha' xuteloj sb'a to xc'ayiloj sc'ul heb'naj yin̈ tzet xu spajtzen Comam, yuxin matxa tzet xal heb'naj. 27Lawitu' x'apni hunk'aan heb'naj saduceo yila' Comam Jesús. Heb'naj tu', xalni ta mach ẍpitzc'aojcan̈ anma camnajxa. Yuxin sk'amb'e heb'naj tet Comam: 28Mam Cuywaom, ay hune' ley stz'ib'n̈enajcan ya' Moisés: Ta ẍcamtoj yichamil hunuj ix ix, yaja' mach hunuj yuninal naj chacan tet ix, yilal smohyi pax ix b'oj yuẍtaj naj camom tu' yun̈e chu yeh yuninal naj b'oj ix, cat yoc yuninaloj naj camom tu'. 29Hactu' xa'le hujwan̈ heb'naj yuẍtaj sb'a co xol ti'an. Xmohyi naj b'ab'el, yaja' mach yuninal naj x'eh b'oj yixal, xcam naj. 30Xmohyi naj scab' b'oj ix. Maẍtic'a yuninal naj xcan tet ix, xcam naj. 31Xmohyi pax ix b'oj naj syox; hactu' xu yi'ni heb'naj ix shujwan̈il. Xcamtoj heb'naj sunil, maẍtic'a hunuj heb'naj x'eh yuninal tet ix. 32Tzujanxa xcamtoj ix. 33Yet ẍpitzc'aojcan̈ camom, ¿mactaxca heb'naj caw yichamil ix b'etu', haxca shujwan̈il heb'naj xmohyi b'oj ix? . 34Xta'wi Comam: —Satyib'an̈k'inal ti' ẍmohyi naj winaj b'oj ix ix. 35Yaja' mactaj stzujchaapnoj spitzc'acan̈ xol camom cat yoctoj yin̈ hune'xa k'inale, matxa chi' naj winaj yixal, machca chi' ix ix yichamil. 36Haxca matxa b'ak'in̈ ẍcamoj anma, to lahanxa chub' b'oj ángel. Yuninalxa Comam Dios chub'canoj haxca xpitzc'acan̈ yin̈ camical. 37Hactu' ya' Moisés tu' xa' ya' johtajn̈e' ta ẍpitzc'aojcan̈ camom, haxca stz'ib'n̈ecan ya' yin̈ tzet xa'le yet lan̈an slon̈chacoj k'a' k'a' yin̈ hune' k'uyan telaj, b'ay stzoteliltij Comam Dios tet ya'. Chalni Comam: Hayin ti' chin shak'e ya' Abrahaman, ya' Isaac b'oj ya' Jacob, ẍiayoj, ẍi Comam. 38Mat sDiosaloj anma camom ye Comam Dios, to sDiosal anma itzitz ye Comam. Yul sat Comam sunil anma itzitzn̈etic'a. 39Xalni hunk'aan heb'naj cuywaom yin̈ sley ya' Moisés tet Comam: —Mam Cuywaom, caw st'in̈anil chawala, 40Matxa hunecoj sk'amb'e heb'naj hunuj tzetet tet Comam. 41Xalni Comam Jesús tet anma yaman b'etu': —¿Tzet yuxin ẍhal-laxi ta yic'aln̈e ya' rey David ye naj Cristo echmab'il yuli? 42Haxca ha' caw ya' David xhalni yul hum yet Salmo, chalni ya':Xal Comam Dios Jahaw tet Wahawan: Tz'on̈yan̈ yin̈ hin watx' ti'an, 43masanto ẍwa'a'coj mac ẍchiwa sc'ul tawin̈ yalan̈ hawojan, ẍi Comam Dios, ẍi ya' David. 44—Ta yic'aln̈e ya' ye naj Cristo, ¿tzet yuxin chal ya' naj Yahawoj?. 45Sunil anma aycoj yab'en tzet chal Comam Jesús yet xalni tet heb'ya' ẍcuywi yin̈: 46—Nann̈e heyu tet heb'naj cuywaom yin̈ sley ya' Moisés, haxca choche heb'naj ya'a'coj xil k'ape caw nimej shoji yoj yin̈, choche pax heb'naj ta stiyoẍli anma tet heb'naj yin̈ caw xiquiltaj yet ch'ec' heb'naj yul calle. Choche heb'naj sic'leloj hej tz'on̈ob'al caw ay smay yulaj capiya b'oj yet ch'awtelax heb'naj wa'oj yin̈ hej k'in̈. 47Haca' yeyi chelk'aloj heb'naj tzet ay heb'ix camnajxa yichamil. Yun̈e mach syeloj, caw hunay cha' heb'naj yoración yun̈e yalni anma ta caw c'ul heb'naj. Caw tx'oj spaj ch'a'laxoj tet heb'naj.


Copyright
Learn More

will be added

X\