SAN LUCAS 2

1Ha' yin̈ hune' tiempohal tu', yalni naj Augusto César, yahawil yeco yin̈ tx'otx' Roma, ta ch'ilaxcan̈ isbisil sunil anma ayco yalan̈ yip tx'otx' Roma. 2Hayet yah hune' babel isbisil anma ti' ha' naj Cirenio ayco gobernadoral yul ismajul Siria. 3Sunil anma to istz'unu' isbi baytajtu'wal con̈ob titna yic'al. 4Yuxinto el naj José bey yul con̈ob Nazaret yul ismajul Galilea, isto naj bey Belén yul ismajul Judea, yuto ha' tu' pitzc'ana naj rey David, yichmam naj José tu'. 5Yuxin to naj José yeb ix María, ix tak'webilxa ismohyi yeb naj, istz'unu' isbi bey con̈ob Belén. Wal ix María tu', ayxa tzet ye ix. 6Hayet ay naj yeb ix María bey Belén, yayilo istz'ayical iswatx'i isc'ul ix. 7Yuxin ha' ta bey tu' pitzc'a nich'an isbabel unin ix. Ispichnico ix istxow nich'an yunin tu', ishilbanayto ix yul ishucub no nok', yuto matxa hamanil yul waybal. 8Bey iscawilal con̈ob Belén, ay huntek'an ebnaj tan̈en me'; chiwayn̈en isme' sat chek'an. 9C'uxan xin isyecan̈ isba hune' ángel tet ebnaj. Yaypaxo jopla isk'ak'al yip Comam Dios yiban̈ ebnaj, isxiwcanocan̈ ebnaj xin. 10Yalni naj ángel tet ebnaj: —Mach chexxiwi yuto ay hune' tzoti' caw c'ul chinhulan wala'an teyet. Ha' hune' chiwalti'an istzalabal hec'ul yeb istzalabal sunil anma. 11Bey yul con̈ob Belén, iscon̈ob naj rey David, ha' tu' mapitzc'a hune' Hecolomal, ha' ton Comam Cristo, Comam Jahawil. 12Ha' ti' ch'ak'no hetxumuloj, pichbilico istxow yin̈, hilanayto yul te' hucub bay chalaxayto istelaj no nok', ẍi naj tet ebnaj. 13Lan̈antotic'a xin, isyenican̈ isba hun bulanxa ebnaj ángel isc'atan̈ naj babel tu'. Istzabnico ebnaj isbitn̈en isbi Comam, chi-la-yalni ebnaj: 14Jalawe c'ulla tzoti' yin̈ Comam Dios ay yul satcan̈, ayojab ak'anc'ulal sat tx'o tx'otx' xol anma ochebil yu Comam Dios, ẍi ebnaj. 15Hayet ispaxto ebnaj satcan̈, yichico ebnaj tan̈em me' yalni tet hunun: —Ton̈we bey Belén jila' hune' mayu tu', hune' mayak' Comam Dios Jahawil johtan̈elo ti', ẍile ebnaj tet hunun. 16Yin̈ an̈e xin, to ebnaj yila'. Hayet yapni ebnaj xin, yilchayo ix María yeb naj José, yeb nich'an nene' ayayto yul ishucub no nok'. 17Yet yilnico ebnaj yin̈ nich'an nene' tu' xin, istzabloco yalni ebnaj tet sunil anma tzet hallax tet ebnaj yu naj ángel yin̈ hune' nich'an nene' tu'. 18Sunil anma aben huntek'an yal ebnaj tan̈em me' tu', caw c'aycanocan̈ isc'ul anma yabeni. 19Wal ix María xin, ton̈e isc'ubacano ix yul yanma yin̈ huntek'an tzet yal ebnaj, chi-la-ec' yin̈ isnabal ix yin̈ tzet caw yehi. 20Wal ebnaj tan̈em me', hayet ispaxto ebnaj yichico ebnaj yanico ismay Comam Dios, yak'nipaxo ebnaj yuch'andiosal tet Comam yin̈ tzet yabe' ebnaj, yeb xin yu tzet bey ebnaj yila', yuto haca'tic'a yu yallax tet ebnaj hac tu' elicoj. 21Hujebxa tz'ayic ispitzc'a nich'an Jesús tu', yalaxico yechel isnimanil, hune' chiyij circuncisión. Jesús yijcano isbi haca' yu yalnicano naj ángel tet ix yet maẍto chipitzc'ati nich'an unin yin̈ ix. 22Yet yayilo istz'ayical bay chisajn̈e isba ebix haca' yalni isley naj Moisés, yinito naj José yeb ix María nich'an nene' tu' yelaxo tet Comam Dios bey Jerusalén. 23Isyije naj yeb ix haca' tu' yuto tz'ibn̈ebilcano yul Yum Comam Dios haca' ti': “Ha' niẍte winaj unin chibabel pitzc'ahi, chi'ak'lax tet Comam Dios Jahawil,” ẍi yul Yum Comam. 24Yinito naj yeb ix isxahanbal haca' yalni isley naj Moisés bay chala: “Caw yilal yak'ni cac'on̈ no' palamuch maca cac'on̈ no' muc',” ẍiayoj. 25Yul con̈ob Jerusalén, yin̈ hune' tiempohal tu', ay hune' icham chiyij isbi Simeón, caw c'ulcano isbeybal icham, han̈ech'an tet Comam Dios bay chiyiyo isba. Echmabiln̈etic'a yul Iscolomal con̈ob Israel yu icham. Ayco Comam Espíritu Santo yin̈ ichmam. 26Ha' ch'ak'ni nachaholo yu tato maẍto chicami masanto chiyilico yin̈ Comam Cristo, Comam chejbilti yu Comam Dios. 27Ayxacto icham Simeón tu' yul yatut Comam Dios yu Comam Espíritu Santo yet yapni naj José yeb ix María yeb nich'an Jesús. Apni iscawan̈il yul yatut Comam tu' yu isyijen tzet tz'ibn̈ebilcano yin̈ ischejbanil ebnaj Israel yu Comam Dios. 28Ischelnilo icham Simeón nich'an nene' tu', yalni icham c'ulla tzoti' tet Comam Dios haca' ti': Mamin, hachejab wehan. Wal tinan̈ xin, xayu incaman 29yuto mayij isba tzet halbilcano hawu wetan. 30Yuto mawilicojan yu insatan yin̈ Cocolomalan̈ ti'. 31Ha' hune' mac ti' chawacanico yin̈ sat sunil anma ay yul sat yiban̈k'inal ti'. 32Ha' xin ch'ak'no sajbolo yanma hanta anma mach Israeloj, cat xin isbinahocano con̈ob Israel yu Cocolomalan̈ ti', ẍi icham Simeón tet Comam Dios. 33Caw xin, c'aycan̈ isc'ul naj José yeb ix María yet yaben sunil tzoti' caw c'ul yal icham Simeón yin̈ naj nene' tet Comam Dios. 34Lahwi tu' xin, isk'annicano icham Simeón isc'ulal isc'ul Comam Dios yiban̈. Yalni naj tet ix María: —Naj nich'an ti' caw ixtan̈xa yehi ta caw hantan̈e anma Israel chic'ayo'to yanma yu naj, yaj caw ixtan̈xa yepaxo tato caw hantan̈e anma Israel chiswatx'e'paxo isbeybal yu naj. Ha' naj chiyenolo tzet chiyub iscolchaho anma xol istx'ojal, yaj xin caw ay anma chiyahno naj. 35Hac tu' xin chu yixtan̈wicanilo tzet ch'ec' yul isnabal anma yeb tzet ch'ec' yul yanma anma. Walach hach ti', ch'ayolo hune' tz'ayic yet caw chi'oco bisc'ulal yin̈ hawanma yu naj nene' ti'. Haca' isya'il chispolto huno ch'en espada, hac tu' isya'il ch'elico hawanma, ẍicano icham Simeón tet ix María. 36Bey yul yatut Comam Dios tu' xin, ha' tu' ayicto hune' ixnam chitzotel yu yip Comam Dios. Hune' ixnam tu', Ana isbi, iscutz'in naj Fanuel, titna yin̈ yuninal naj Aser. Yet k'opo ixnam yik'ni ixnam yichamil, yaj hujeb ch'an habil yik'le isba naj yeb ix, iscam naj. 37Caw xin ochenta y cuatro habilxa iscancano ixnam hunixal. Tz'ayic ak'bal ayn̈etic'acto ixnam yul yatut Comam Dios yu istxahli yeb yu yinayo isba tet Comam. Caw xin chisyijepaxo ixnam hune' yet mach chon̈wa'i yu cotxahli tet Comam. 38Yapni ixnam isc'atan̈ naj José yeb ix María, yak'ni ixnam yuch'andiosal tet Comam Dios. Lahwi tu' xin, istzabloco yalnic'o ixnam cuybanil yin̈ naj nene' tu' tet sunil anma ch'echman yul iscolbanil con̈ob Jerusalén. 39Hayet islahwi isyijencano naj José yeb ix María yin̈ tzet chal ischejbanil ebnaj Israel yu Comam Dios, ispaxto naj yeb ix bey iscon̈ob Nazaret yul ismajul Galilea. 40Wal nich'an unin tu' xin, caw sak'al isch'ibi, caw ch'ocpaxo yip isnimanil yeb yitz'atil iswi'. Caw xin ayayo isc'ulch'anil isc'ul Comam yiban̈. 41Hunun habil isbeyc'o ismam ismi' nich'an Jesús yul yatut Comam Dios bey con̈ob Jerusalén yin̈ k'in̈ Pascua. 42Haxa yet istz'ajna naj nich'an Jesús yin̈ iscablahon̈eb habil, isto naj yinta ismam yeb ismi' yin̈ k'in̈ haca' chu isbeyic'o anma yin̈ hunun habil. 43Lahwin̈e k'in̈ tu' xin, ismeltzoto naj José yeb ix María. Wal naj nich'an Jesús, cancano naj bey yul con̈ob Jerusalén, yaja' mach yohtajo ismam naj yeb ismi' naj tato cancano naj. 44Ha' yalni ismam naj yeb ismi' naj ta paxto naj xol anma ilom k'in̈. Hune' tz'ayicxa isbelwito ismam yeb ismi' naj, yoc ismam yeb ismi' naj issaynoyo naj xol yic'al yeb xol mac ohtan̈e nich'an Jesús tu'. 45Yaja' maẍtic'a ilcha naj, yuxin meltzoto naj José yeb ix María saywal yin̈ naj bey yul con̈ob Jerusalén. 46Haxa yet yox tz'ayic xin, yilchati naj nich'an tu' yul yatut Comam Dios yu ismam yeb ismi'. Tz'on̈anicto naj xol ebnaj ichamta winaj caw yahawil yin̈ iscuyni anma yin̈ isley naj Moisés. Caw ayco naj nich'an Jesús tu' yaben tzet chal ebnaj, chisk'ambenpaxo naj tet ebnaj. 47Wal xin, caw chic'ay isc'ul ebnaj chi'aben tzet chiyal naj nich'an Jesús tu' yuto caw helan naj, yeb xin caw c'ul ispaj istzoti' ebnaj chiyak' naj. 48Haxa yet yilcha naj yu ismam yeb ismi', caw c'ayilo isc'ul. Yalni ismi' naj tet: —Wunin, ¿tzet yin̈ yuxinto hac ti' chon̈hawutehan̈? Haninan yeb hamam caw bisc'ulal jehan̈ cachcosaynic'ojan̈, ẍi ix. 49Istak'wican̈ naj nich'an Jesús: —¿Tzet yin̈ nan bay chinhesayic'ojan? ¿Tom mach heyohtajo tato yul yatut Inmaman caw yilal incanan? ẍi naj tet ismi' tu'. 50Wal xin machi txumchalo yu ismam yeb ismi' yin̈ tzet chalilo hune' yal naj tu'. 51Lahwi tu' xin, ismeltzo naj yinta ismam yeb ismi' bey yul con̈ob Nazaret. Caw xin yijem naj tet ismam yeb tet ismi'. Ton̈e xin isc'uba ismi' naj yin̈ yanma yin̈ huntek'an tu', chistxumni ix yin̈ tzet yelapno yehi. 52Wal naj nich'an Jesús tu' xin, haca' isch'ib isnimanil, hac tu' isch'ibpaxo yitz'atil iswi' naj. Caw chitzala yanma Comam Dios yin̈ naj, caw chitzalapaxo anma yin̈ naj.

will be added

X\