SAN LUCAS 2

1Yet hunec' tu', xal naj Augusto yahaw b'et Roma ta ch'ilaxcan̈ sb'isil hantaj anma aycoj yalan̈ schejb'anil naj. 2Yet aycoj naj Cirenio yahawoj yin̈ Siria, ha' tu' x'ah hune' b'ab'el sb'isil anma ti'. 3Sunil anma xto yulaj con̈ob' b'ay titnaj yic'al yu ya'ni ayoj sb'ih. 4Wal ya' José, hat xto ya' Belén b'et Judea ya'ayoj sb'ih, haxca yic'al ya' rey David ye ya'. Ya' rey David tu' hat pitzc'anaj ya' b'etu'. Speto ya' José tu' b'oj ya' María yul con̈ob' Nazaret b'et Galilea. 5Ya' María xto ya' yin̈ ya' haxca ta'web'ilxa yu ya' smohyi b'oj ya' José. Yaja' ta'an ayxa tzet ye ya' María. 6C'uxan hat ay heb'ya' Belén tu' yet x'apni stz'ayical swatx'i sc'ul ya'. 7Hat xpitzc'a ni'an b'ab'el yunin ya'. Lawitu' xanicoj ya' xtxow yin̈, shilb'anaytoj ya' yul hune' te' hucub' b'ay ẍlow no' cheh, haxca matxa b'ay xchaot heb'ya' yulaj mesón. 8Scawilal Belén tu' ay hunk'aan heb'naj tan̈eom canelu lan̈an swayn̈en no'. 9Ha' tu' syenican̈ sb'a hune' yángel Comam Jahaw tet heb'naj, toxan̈e ẍjepla yay sk'ak'al smay Comam Jahaw tu' b'ay ay heb'naj tu', yuxin caw xiw heb'naj. 10Yaja' xal ángel tu' tet heb'naj: —Machex xiwi, haxca chin hul wala' ab'ix stzalab'al he c'ulan b'oj yet sunil hej con̈ob' yeyi. 11Yul con̈ob' Belén, scon̈ob' ya' rey David, hat xpitzc'a Scolomal heyet, ha' Cristo, Comam Jahaw. 12Ha ti' ch'a'noj he txumu', to ni'an tz'ul tu' aycoj xtxow, hilanaytoj yul hune' te' hucub'. 13Lan̈anto tu', tx'ihalto hej ángel syecan̈ sb'a speto sc'atan̈ Comam Dios satcan̈, chanicoj smay Comam. Chalni: 14—Ja'acoj smay Comam Dios ay yul satcan̈. Hulujab' ak'anc'ulal sat tx'otx'otx' ti' tet anma ocheb'il yu Comam Dios. 15Lawi smeltzo hej ángel satcan̈ tu', sk'umlan sb'a heb'naj tan̈eom canelu tu', xalni heb'naj: —Ton̈wej jila' hune' tzet xu Belén tu', haca' xute Comam Jahaw ya'ni johtajn̈e'. 16Yin̈n̈ena tu' xto heb'naj yilnoj. Ha' x'ocapnoj heb'naj, xilni heb'naj ya' María, ya' José, b'oj ni'an tz'ul hilanaytoj yul te' hucub'. 17Ha' xilni heb'naj ni'an tz'ul tu', xalni heb'naj tet anma tzet xal ángel yin̈. 18Caw xc'ayiloj sc'ul mactaj x'ab'en tzet chal heb'naj. 19Ton̈e sc'ub'a ya' María hunk'aan tzetet tu' yin̈ yanma, xtxumtxun sc'ul ya' yin̈ tzet yelapnoj yeyi. 20Lawitu' xmeltzo heb'naj tan̈eom canelu tu', chanicoj heb'naj smay Comam Dios, cha'ni heb'naj yuch'antioẍ tet Comam yu hej tzetet xb'ey yila' b'oj xb'ey yab'e', haxca haca' xute ángel yalni tet heb'naj, hactu' x'elicoj. 21Shujk'in̈ spitzc'a ni'an tz'ul tu' x'a'lax circuncidar. X'alaxcoj Jesús sb'ihoj, haca' xu yalni ángel tet ya' María yet maẍto scha ya' yin̈ snimanil. 22Yet x'apni stz'ayical b'ay sajn̈e sb'a ya' María haca' yalni sley ya' Moisés, xto heb'ya' Jerusalén. Xinitoj heb'ya' ni'an tz'ul Jesús haltelaxoj tet Comam Jahaw. 23Hactu' xu syijyen heb'ya' tzet tz'ib'n̈eb'il yul sley Comam chalni yin̈ hacti': Sunil niẍtej b'ab'el winaj ẍpohlaxiloj yetoj Comam. 24Xitoj heb'ya' xahanb'al ya'a tet Comam haca' yalni ley: Cac'on̈ no' palamuẍ mato cac'on̈ no' muc'. 25Yet hunec' tu' ay hune' ya' comam ay yul con̈ob' Jerusalén, Simeón sb'ih. Caw tohol yanma ya' yul sat Comam Dios b'oj aycoj yanma ya' yin̈ Comam. Aycoj Comam Espíritu Santo yin̈ ya'. Echmab'il yu ya' yul hune' mac ch'a'ni yak'lob'al sc'ul sunil con̈ob' israel. 26Ha' Comam Espíritu Santo x'anicoj yin̈ sc'ul ya' ta mach camoj ya' to masanto chila' ya' yin̈ naj Cristo, cha'a'tij Comam Jahaw. 27Iptzeb'il ya' yu Comam Espíritu Santo xto ya' yamak' yatut Comam Dios. C'uxan hatu' x'iottoj ni'an tz'ul Jesús yu smam smi', yu syijyen sley Comam. 28Schelnic'oj ya' Simeón ni'an tz'ul tu', xalni ya' tzoti' c'ul yin̈ Comam Dios, chalni ya': 29Wal tinan̈ Mam Wahaw, xa sje hin a chani camoj yin̈ ak'anc'ulal, hayin hin ha chejab' ti'an, haxca xax yij sb'a tzet xawal wetan, 30haxca xax wilicoj yin̈ Scolomal jetan, 31hune' lan̈an ha yeni yin̈ sat sunil anma ay satyib'an̈k'inal ti'. 32Ha' ch'a'nojpax sajilk'inal tet yanma mactaj mat israeloj b'oj caw ay yelapnoj ẍjub' yuan hayon̈ ha con̈ob' israel ti'an. 33Xc'ayiloj sc'ul smam b'oj smi' ni'an tz'ul tu' yu tzet xal ya' Simeón yin̈. 34Lawitu' sk'anni ya' sc'ulal sc'ul Comam Dios yib'an̈ heb'ya'. Xalni ya' tet ya' María: —X'alaxtij ni'an unin ti' yun̈e st'in̈k'oojcoj tx'ihal jetcon̈ob' israel, mato sc'aya'toj sb'a. Ha' ẍyenojiltoj tzet nab'il yu Comam Dios, yaja' tx'ihal anma tx'oj snab'al chia'can̈ sb'a yin̈. 35Hactu' chu syenojiltoj sb'a tzet ib'il yu sc'ul hunun anma. Stacb'al ha c'ul chub'cuj naj, chawab'e' sya'il b'isc'ulal haca' jab'en sya'il ẍk'axpon ch'en espada jin̈, ẍi ya' Simeón tet ya' María. 36Ay hune' ya' comi' caw ixnamxa, Ana sb'ih, schejab'lom Comam Dios ya', scutz'in ya' Fanuel, yic'al ya' Aser ye ya'. Ni'an k'opoto ya' yet xmohyi ya', hujeb'n̈e hab'il xi' sb'a ya' b'oj yichamil. 37Ochenta y cuatro hab'ilxa ya'. Hatn̈e ay ya' yamak' yatut Comam Dios hunun tz'ayicak'b'al shak'en Comam, cha'ni ya' yoración b'oj cha'ni ya' ayuno. 38C'uxan yet ay ya' José b'oj ya' María b'etu' x'apni pax ya', xa'ni ya' yuch'antioẍ tet Comam Dios. Lawitu' x'ichi yalni ya' tet anma mac anmail ni'an Jesús tu'. Xalni ya' hune' tu' tet mactaj ch'echman yul Scolomal con̈ob' Jerusalén. 39Lawi syijyen heb'ya' tzetet chal sley Comam Dios Jahaw, xpaxtoj heb'ya' yul scon̈ob' Nazaret, b'et Galilea. 40Wal ni'an unin tu', sak'al sch'ib'i, ch'oc yip snimanil, b'oj xch'ib' stz'ajanil sc'ul. Aycoj sc'ulch'anil sc'ul Comam Dios yin̈. 41Hunun hab'il, sb'ey smam smi' ni'an Jesús tu' Jerusalén yec'tze' k'in̈ snab'aniltij scolb'anil heb'ya' israel. 42Ha' stz'ajna ni'an Jesús tu' scab'lan̈eb' hab'il, xto heb'ya' b'oj yec'tze' k'in̈, haca' chu sb'ey anma hunun hab'il b'etu'. 43Ha' xtan̈c'o k'in̈ xmeltzo heb'ya', yaja' ni'an Jesús tu' xcancanoj Jerusalén tu', mat yohtajoj heb'ya' ta xcani. 44Ha' x'ec' yin̈ snab'al heb'ya' to tzujan yin̈ mactaj xb'ey yin̈ k'in̈ tu'. Hune' tz'ayic xb'elwi heb'ya', xilnitij heb'ya' ta machcoj xol anma. Sayni heb'ya' xol mac ayto yu sb'a b'oj, b'oj xol hej yetb'i heb'ya', 45yaja' mach xchalo xol anma tu', yuxin xmeltzo heb'ya' saya' Jerusalén tu'. 46Yin̈xa sca'fial ẍchalo yamak' yatut Comam Dios, tz'on̈an xol heb'naj cuywaom yin̈ sley ya' Moisés yab'eni, sk'amb'en pax tet heb'naj tzet chaliloj stzoti' Comam. 47Sunil mac x'ab'en tzet chala, xc'ayiloj sc'ul yu stz'ajanil sc'ul spajtzen stzoti' heb'naj. 48Ha' x'apni heb'ya' b'ay xcancanoj tu', xc'ayiloj sc'ul heb'ya'. Xalni smi' Comam tet: —Wunin, ¿tzet yuxin hacti' chon̈ hawutean? Caw tacnaj hin c'ul b'oj ha maman chach co saynian. 49Xta'wi: —¿Tzet yuxin nan b'ay chin he sayan? ¿Tox mach sna sb'a he c'ul to yul yatut hin Mam yet ay hin canan? 50Yaja' mach xtxum heb'ya' tzet yelapnoj ye hune' tzet xal tu'. 51Lawitu' xmeltzo b'oj heb'ya' b'et Nazaret. Caw yijyom xute sb'a tet heb'ya'. Ton̈e sc'ub'a smi' yin̈ yanma, xtxumtxun snab'al ya' tzet ch'elicoj hunk'aan tzetet xu tu'. 52Wal Comam Jesús, haca' chu ẍch'ib' snimanil, hactu' ẍch'ib' pax stz'ajanil sc'ul. Caw stzala Comam Dios yin̈, b'oj ẍcan c'ulal yul sat anma.


Copyright
Learn More

will be added

X\