SAN LUCAS 19

1Hayet yapni Comam Jesús bey Jericó, yec' Comam yul con̈ob tu'. 2Ha' bey tu', ay hune' naj winaj caw k'alom, Zaqueo isbi. Yahaw yeco naj yin̈ ebnaj ik'omilo tohlabal chito bey con̈ob Roma. 3Naj Zaqueo tu', yoche naj yila Comam Jesús, yaj mach chiyu yilni naj yuto hantan̈e anma tzujanico yinta Comam, yebpaxo yu caw nich'an ch'an istel naj. 4Yuxin babic'o naj sata anma, yahto naj yin̈ isk'ab hune' te' sicómoro aycan̈ isti' beh, yu yilni naj Comam yet ch'ec'to bey tu'. 5Hayet yec'to Comam yich te', ist'an̈xahto Comam yin̈ naj, yalni Comam tet naj: —Zaqueo, ayan̈ti yin̈ an̈e, yuto ha' bey hawatut chincanojan hune' ak'bal ti', ẍi Comam tet naj. 6Hayet yaben naj Zaqueo hune' tu', yin̈ an̈e ayti naj, isto naj. Caw xin chitzala isc'ul naj yet ischahni naj Comam yul yatut. 7Hayet yilni anma hune' tu', yichico anma buchwal yin̈ Comam yuto cancano Comam bey yatut hune' naj mulum. 8Ha' naj Zaqueo tu', ah lin̈no naj, yalni naj tet Comam: —Mamin, wal tinan̈ chiwak'an yicta tzet ayinan tet anma meba', yeb xin ta ay mac ec'bal wutelojan ismelyu, can̈elto ec'bal selel chiwak'an tet, ẍi naj. 9Yalni Comam: —Mahul hune' colbanile bey hune' n̈a ti' tinan̈; naj Zaqueo ti' caw yuninalpaxo icham Abraham ye naj. 10Wal xin Hanin Ak'bilintijan texol yu Comam Dios, hulnajinan insaya'an yeb incolnihan anma c'aynato yu ismul, ẍi Comam. 11Yet lan̈an yaben anma yin̈ tzet chal Comam Jesús tu', lan̈anxa xin yapni Comam bey Jerusalén yoc yin̈ isnabal anma ta lan̈anxa yapni istiempohal bay ch'oc Comam Dios Yahawilo anma, yuxin yicheco Comam yalni hune' yechel ti'. 12Yalni Comam: —Yet hunel ay hune' naj caw c'ultic'a yin̈bal. Awtelax naj yul hune' niman con̈ob yu ischahni naj yoc yahawilo yul iscon̈ob yet chimeltzohi. 13Yet maẍto chito naj, yawte naj lahon̈wan̈ ebnaj chimunla yintaj, yak'nicano naj niman melyu tet hunun ebnaj yu ismunla ebnaj yeb ch'en. Lahan yutecano naj isbisil ch'en yin̈ ebnaj. Yalnicano naj tet ebnaj: “Munlahan̈we yeb ch'en inmelyuti'an masanto yet chinhulan, cat heyak'ni ch'en yeb yal wetan,” ẍi naj, isto naj xin. 14Yaja' wal ebnaj yet con̈ob naj xin, caw chichiwa isc'ul ebnaj yin̈ naj, yuxin yet isto naj, tzujantic'a yu isto huntek'an ebnaj ak'oc'ule yin̈ naj tet naj awten naj tu', yalni ebnaj tet naj caw yahaw tu' haca' ti: “Ha' hune' naj ti' caw mach chijochehan̈ ch'oc naj yahawilo yul cocon̈oban̈,” ẍi ebnaj. 15Yaj caw ak'laxtic'a hune' ismunil naj yoc yahawo iscon̈ob tu'. Haxa yet ayxa naj yul iscon̈ob hunelxa, yawten naj ebnaj lahon̈wan̈ bay yak' naj ismelyu tu' yu isk'amben naj hantaxa yal ch'en yik' hunun ebnaj. 16Yapni hune' naj babel, yalni naj: “Mamin, ha' ch'en hamelyu hawacano yul ink'aban, lahon̈ebto ch'en wik'an yu ch'en,” ẍi naj. 17Istak'wi naj yahaw tu' tet naj: “Hach ti', caw c'ul yu hamunla yin̈ hanic'ch'an wacanojan tawet, yuxinto chaẍwacanicojan yahawo lahon̈eb con̈ob,” ẍi naj. 18Lahwi tu' xin, yapni hunxa naj munlawom, yalni naj haca' ti': “Mamin, ha' ch'en hamelyu hawak'cano yul ink'aban, howeb to ch'en wik'an yin̈ ch'en,” ẍi naj. 19Yalni naj yahaw tu' tet naj: “Hach ti', chaẍwacanicojan yahawilo howeb con̈ob,” ẍi naj. 20Lahwi tu' xin yapni hunxa naj, yalni naj tet naj yahaw tu' haca' ti': “Mamin, ay hamelyu lah. C'ubabil ch'en yul hune' payu'e ti' wuhan. 21Caw quinxiwan intzabnihan hamelyu ti', yuto wohtajan ta caw how ach, yebpaxo toxan̈e chachah tzet ye tu' maẍtajach watx'en̈e, yeb ton̈e chahatx' tzet ye tu' maẍtajach tz'unn̈e,” ẍi naj tet naj yahaw. 22Yalni naj yahaw tu' tet naj: “Walach hach ti', caw machiswalil yu hamunlahi, yu tzet maxawal wetti'an yuxin chaẍwacanicojan yin̈ isya'tajil. 23¿Tzet yin̈ yuxin mach hawak' inmelyuti'an c'amil tet anma, haxinwal yet manhulti'an ayxa yal ch'en chik'a?” ẍi naj. 24Yalni xin naj yahaw tu' tet ebnaj ayco isc'atan̈ haca' ti': “Iwelo ch'en melyu tet naj ti', cat heyak'ni ch'en tet naj ik'ni ch'en lahon̈eb to,” ẍi naj yahaw tu'. 25Yalni ebnaj: “Mamin, yaj hune' naj chawal tu', caw lahon̈ebxa ch'en ec'bal ik'bil yu naj,” ẍi ebnaj. 26Istak'wi naj yahaw tu' xin: “Ha' mac ay yet, ch'ak'lax yak'bil tet, ha' mac machi yet, ha' nich'an ay yul isk'ab tu', chi'ilaxolo tet. 27Yebpaxo xin, ebnaj ayco ishowal win̈an mach choche chinocan yahawilo yul con̈ob ti', iweti ebnaj bey ti', cat hepotx'ni camo ebnaj yin̈ insatan,” ẍi naj yahaw tu', ẍi Comam. 28Lahwi yalni Comam Jesús huntek'an tu' xin, isto Comam bey Jerusalén yeb ebnaj iscuywom. 29Hayet ayco Comam yin̈ istzalanil won̈an Olivo, xolbal con̈ob Betfagé yeb con̈ob Betania, ischejnito Comam cawan̈ ebnaj iscuywom, yalni Comam tet ebnaj: 30—Asiwe bey hune' aldea cosatac'to ti'. Yet chexapno bey tu', cheyila' hune' no' burro xecan, maẍto hunu mac chi'ahto yiban̈ no'. Chepuholo no', cat heyinoti no' wetan, ẍi Comam. 31Yalnipaxo Comam: —Ta ay mac chik'amben teyet, “¿Tzet yin̈ xin chepuhilo no'?” ta ẍi, cheyala'we haca' ti': “Ay ch'ocnico no' yu Comam Jesús,” quexchi, ẍi Comam. 32Isto ebnaj iscuywom tu', yilcha no' yu ebnaj haca'tic'a yu yalni Comam. 33Yet lan̈an ispuhnilo ebnaj no' yapni ebnaj ay yet no' tu', yalni ebnaj: —¿Tzet yuxin chepuhilo no'? ẍi ebnaj. 34Istak'wi ebnaj: —To ay ch'ocnico no' yu Comam Jesús, ẍi ebnaj. 35Lahwi tu' xin yinito ebnaj no' tet Comam, yanahto ebnaj huntek'an xil isk'ap yiban̈ no', tzujan tu' xin iscolwa ebnaj yanahto Comam yiban̈ no'. 36Hayet lan̈an yec'to Comam xin, islitx'banayo anma xil isk'ap yul beh sata Comam yu chitzala isc'ul anma yin̈ Comam. 37Hayet lan̈anxa yapni Comam yin̈ isxulanil won̈an Olivo tu', yah yaw sunil anma tzujan yinta Comam yu tzalahilal. Yalni anma c'ulla tzoti' yin̈ Comam Dios yu sunil c'aybalc'ule xayil anma. 38Chalni anma haca' ti': —Jala'we c'ulla tzoti' yin̈ Jahawil chul coxol yu Comam Dios. Ayojab ak'anc'ulal yul satcan̈, caw jak'aweco ismay Comam Dios. 39Ay xin huntek'an ebnaj fariseo ayco xol anma tu', halni tet Comam: —Mam cuywawom, cach huntek'an anma ch'el yaw ti', ẍi ebnaj. 40Yalni Comam Jesús tet ebnaj: —Chiwalan teyet, ta chisbeja' anma yelo yaw, haxam ch'en ch'en chi'aho yaw selelo anma ti', ẍi Comam. 41Haxa yet lan̈anxa yapni Comam iscawilal con̈ob Jerusalén, yok'can̈ Comam yilni con̈ob tu'. 42Yalni Comam haca' ti': —Tinan̈ xin, hex ah Jerusalén, majaltam yet hune' tz'ayic ti' chinachalo heyu yin̈ hune' mac chu yak'ni ak'anc'ulal yul heyanma, yaj wal xin mach chinachalo hune' ti' heyu yuto caw ewan ye yul hesat. 43C'anch'anex, ay hune' tiempo bay chihulo isya'tajil teyiban̈ yu anma ayco ishowal teyin̈. Chihoylaxayo hecon̈ob ti', haca' xan̈e peyab chuco ebnaj soldado, cat yanico ebnaj howal teyin̈. 44Chitan̈tzelaxilo hune' con̈ob ti'. Matxa hunu ch'en ch'en chicancano yiban̈ yet ch'enal, cat ispotx'lax camo sunil anma yuto mach hechah hune' Mac Ak'bilti texol Hecolomalo yu Comam Dios, ẍi Comam. 45Lahwi tu' xin, yocto Comam Jesús yul yatut Comam Dios, istzumbenilti Comam anma chitxon̈wi bey tu'. 46Yalni Comam tet anma: —Tz'ibn̈ebilcano yul Yum Comam Dios haca' ti': “Ha' watutan yet txah yehi,” ẍicanoj. Yaj hex ti' haca' hunu isn̈ach'en elk'om ye heyu, ẍi Comam tet ebnaj. 47Hunun tz'ayic isbey Comam Jesús cuywal yul yatut Comam Dios. Yaja' ebnaj yahawil yeco yin̈ ebnaj sacerdote, yeb ebnaj cuywawom yin̈ isley naj Moisés, yebpaxo ebnaj yahaw yeco yin̈ con̈ob, caw issay ebnaj tzet chute yak'ni camo Comam. 48Yaja' mach chitxumcha yu ebnaj tzet chu ispotx'lax Comam, yuto caw ayco yanma sunil anma yaben tzet chal Comam.

will be added

X\