SAN LUCAS 19

1Yet x'apni Comam Jesús Jericó, x'ec'toj yictajb'al con̈ob'. 2Hat ay hune' naj Zaqueo sb'ih, caw k'alom, swi'al ye naj yin̈ heb'naj iomiloj melyu yet tohlab'al. 3Naj Zaqueo tu', xoche naj yila' Comam yun̈e yohtajn̈en naj Comam, yaja' machu yilni naj, haxca caw tx'ihal anma tzujan yin̈ Comam, b'oj caw txann̈e stel naj. 4Yuxin xb'ab'itoj naj yin̈ an̈e, x'ahtoj naj xol sk'ab' hune' te' sicómoro aycan̈ sti' b'eh, yun̈e yilnoj naj Comam, haxca hat ch'ec'ojtoj Comam yich te'. 5Ha' x'apni Comam b'etu', xt'an̈xiatoj yin̈ naj, xalni Comam: —Zaqueo, ayan̈tij yin̈ lemb'il haxca hat chin wayoj tawatut hune' ak'b'al ti'an. 6X'aynatij naj yib'an̈ sk'ab'te', toxan̈e stzala naj schani naj Comam yul yatut. 7Ha' xilni anma hune' tu' x'oc yalnoj sk'umal Comam, chalni heb'jetb'i: Hune' naj ti' tzimi anmail naj, haxca sk'an naj b'ay ch'ehi b'ay ay hune' naj mat t'in̈anoj yecoj. 8Wal naj Zaqueo tu' x'ah lin̈noj, xalni naj tet Comam: —Mamin, yin̈ hantaj tzet ayin ti'an, ẍwa'a' yictajoj tet anma meb'a'an, b'oj mactaj b'ay xquin elk'anan, can̈el el ẍwa' paxoj selel tetan. 9Xalni Comam tet naj: —Tinan̈ xax colcha hune' n̈ahil anma ti', haxca hachti' yic'al ya' Abraham hawe paxoj. 10Hayin Ab'ilintij yu Comam Dios xol jet-anmail ti'an, xquin hul hin saya' mactaj c'aynajtojan b'oj xquin hul hin colo'an. 11Yet lan̈an yab'en anma hunk'aan tu', xalni pax Comam Jesús hune' cuywab'al, haxca lan̈anxa yapni Comam Jerusalén. Chalni heb'jetb'i to lan̈anxa yapnoj stz'ayical b'ay ch'ocoj Comam Dios Yahawoj. 12Xalni Comam tet heb'jetb'i: —Yet hunec ay hune' naj caw ay smay smam smi' b'ay x'eli. Xto naj b'et hune' con̈ob' caw nahat yun̈e ẍchani naj yoc yahawoj yul scon̈ob' tu'. 13Yalan̈to maẍto ẍto naj, xawten naj lahun̈wan̈ schejab', xanican naj hune' ch'en melyu mina sb'ih tet hunun heb'naj. Xalni naj: Munlaan̈wej b'oj ch'en masanto chin hulujan, ẍi naj. 14Yaja' caw caj ch'ilot naj yu yetcon̈ob', yuxin tzujan xu sto hunk'aan heb'naj yin̈ naj, xb'ey heb'naj yalnoj: Mach ẍjochean ta ch'oc naj ti' jahawojan, ẍi heb'naj. 15Yaja' ẍtic'a alaxojcoj naj yahawoj scon̈ob' tu'. Yet xhul naj yul scon̈ob' tu', xawten naj heb'naj schejab' b'ay xac'oj ch'en melyu, yu yilni naj hantaj xi' hunun heb'naj. 16X'apni naj b'ab'el xalni naj: Mamin, ch'en melyu xawac'oj wetan, lahun̈eb'to ch'en xwi' yin̈ ch'enan, ẍi naj. 17Xalni naj yahaw tu' tet naj: Caw c'ul hach, haxca c'ul xu ha munla b'oj ch'en melyu xwac'oj tawetan waxan̈ca hanic'n̈e ch'en, yuxin chach wa'a'coj yahawoj yib'an̈ lahun̈eb' con̈ob'an, ẍi naj. 18X'apni pax naj scab', xalni naj: Mamin, ch'en melyu xawac'oj wetan, howeb' to ch'en xwi' yin̈ ch'enan, ẍi naj. 19Xta'wi naj yahaw, xalni naj hacatic'a xal tet naj b'ab'el: Chach wa'a'coj yahawoj yib'an̈ howeb' con̈ob'an, ẍi naj. 20X'apni hune'xa naj, xalni naj: Mamin, ay ha melyu la, xin c'ub'a ch'en yul hune' payu'an, 21haxca chin xiw tawetan. Wohtajan ta caw chin̈e ha chilb'a, haxca toxan̈e chawoche ha chab' stohol tzet swatx'e hunujxa anma, cat ha hatx'nican̈ tzetet mat hachoj xa tz'unu, ẍi naj. 22Yuxin xal naj yahaw tu': Hach chejab' caw mach hawalil. Yu tzet lan̈an hawalni ti' chach wa'a'coj yul sk'ab' sya'tajilan. Ta hawohtaj ta chin̈e hin chilb'a hunuj tzetetan, chin cha tzetet mat ya'tajoj xwi'an, chin hatx'iloj tzetet mat xin tz'unan, 23¿tzet yuxin mach xawa' hin melyu ti' munlaoj tet hunuj anmaan, waltu' ayxam yal ch'en yet chin hulan? ẍi naj. 24Yuxin xal naj yahaw tu' tet heb'naj ahayoj b'etu': Iwejiloj ch'en melyu tet naj ti', cat heyanic'oj ch'en tet naj i'n̈e ch'en lahun̈eb', ẍi naj yahaw tu'. 25Xta'wi heb'naj: Mamin, yaja' lahun̈eb'xa ch'en yetb'i naj tu', ẍi heb'naj. 26Xta'wi naj yahaw tu': Ẍwal teyetan ta mac tx'ihal ay tet, ch'a'laxoj yak'b'il tet. Mac ni'anch'ann̈e yet, hasta ni'an solic ay tet tu', ch'ilaxojiloj tet. 27Yaja' heb'naj ẍchiwacoj sc'ul win̈an, heb'naj mach sje' chin oc yahawojan, iwejtij heb'naj b'eti' cat he potx'ni heb'naj yin̈ hin satan, ẍi naj, . 28Lawi yalni Comam Jesús hunk'aan tzoti' ti', b'ab'el Comam yu heb'ya' ẍcuywi yin̈, xi'nitoj sb'elal Jerusalén. 29Yet x'apni Comam xolb'al Betania b'oj Betfagé yin̈tajic'toj swi' witz Olivo, schejnitoj Comam cawan̈ heb'ya' ẍcuywi yin̈, xalni tet heb'ya': 30—Aswej yul ni'an wayan̈b'al co sataj ti'. Yet chex apnoj b'etu', cheyila' to xecan hune' no' burro maẍto hunuj mac ch'ec' yib'an̈. Puhwejiloj no' cat heyinitij no'. 31Ta ay mac ẍk'amb'enoj teyet tzet yuxin che puhiloj no', cheyala': Ch'ocnicoj no' yu Comam Jahaw, quex chinaoj. 32Xto heb'ya', c'uxan x'elicoj haca' xute Comam yalni. 33Yet lan̈an spuhniloj heb'ya' no', x'apni heb'naj yahaw no', sk'amb'en heb'naj: —¿Tzet yuxin che puhiloj no'?. 34Xta'wi heb'ya': —Ch'ocnicoj no' yu Comam Jahaw. 35Xinitoj heb'ya' no' tet Comam. Xaniatoj heb'ya' xil sk'ap sk'an̈oj stel yin̈ no', lawitu' xcolwa heb'ya' yaniatoj Comam yib'an̈ no'. 36Yet lan̈an sb'elwi Comam, slib'anay anma xil sk'ap yul b'eh. 37Yet xulmatoj Comam yin̈ ni'an witz Olivo scawilalxa Jerusalén, hantaj heb'ya' ẍ'ab'en tzet chal Comam tzujancoj heb'ya' yin̈, x'oc yanojcoj smay Comam Dios yin̈ tzalalal yu hej c'ayb'alc'ule xil heb'ya' yuni Comam. 38Xalni heb'ya' yin̈ ip: —Caw xahann̈eb'il co Rey ab'iltij co xol yu Comam Dios. Ehojab' ak'anc'ulal yul satcan̈, cat yalaxcoj smay Comam Dios. 39Xalni hunk'aan heb'naj fariseo aycoj xol anma tu' tet Comam: —Mam Cuywaom, cach ninoj hawetb'i tzujan tawin̈ ti'. 40Xta'wi Comam: —Ẍwal teyetan, ta sb'ejcanoj anma ti' yawi, haxam ch'en ch'en ch'awican̈. 41Yet x'apni Comam scawilal Jerusalén, x'ok'can̈ Comam yin̈ con̈ob' tu'. 42Xalni Comam: —Hex ah Jerusalén, oẍimi che txum tinan̈ tzet ch'a'ni ak'anc'ulal teyet, yaja' mache txumiloj haxca ewanto ye yul he sat. 43C'antajex, haxca ch'apnoj stz'ayical b'ay chuluj heb'naj soldado nancon̈ob'al cat yanojcoj heb'naj peyab' shoyanil he con̈ob' ti', yet hoyb'ilxa yu heb'naj cat stoj heb'naj teyib'an̈. 44Lawitu' cat yocoj heb'naj shuynujay hej te' n̈ah cat spotx'noj heb'naj mactaj ayictoj yul te', matxa hunuj ch'en ẍcanoj yib'an̈ hunxa ch'en. Sunil smak'a'can tiẍchaoj heb'naj. Sunil hunk'aan tzetet ti' chuuj haxca mache txumu, ta tinan̈ xquin hul hex hin colo'an. 45Lawitu' x'apni Comam Jesús yamak' yatut Comam Dios, x'oc stennojiltij anma xtxon̈i b'oj ẍlok'i yul tu'. 46Chalni Comam tet heb'jetb'i: —Tz'ib'n̈eb'ilcan yul Yum Comam Dios chalni: Watut ti'an yatut oración yeyi, ẍiayoj. Yaja' haca' n̈ahch'en b'ay cheb'a sb'a heb'naj elk'om ye heyu. 47Hunun tz'ayic scuywa Comam yamak' yatut Comam Dios. Wal heb'naj swi'al yin̈ heb'naj sacerdote, b'oj heb'naj cuywaom yin̈ sley ya' Moisés, b'oj heb'naj swi'con̈ob', aycoj heb'naj sayni tzet chu spotx'noj heb'naj Comam. 48Yaja' mach xtxumcha yu heb'naj tzet chute heb'naj spotx'ni Comam, haxca sunil anma aycoj yin̈ sc'ul chab'eni tzet chal Comam.


Copyright
Learn More

will be added

X\