SAN LUCAS 18

1Xal Comam Jesús hune' cuywab'al tet heb'ya' ẍcuywi yin̈ ta mach ẍcajtza sc'ul heb'ya' ya'ni yoración. 2Xalni Comam: —Yet hunec, ay hune' naj juez yul hune' con̈ob' maẍtic'a Dios sat, machca spixan anma tet naj. 3Yultic'a hune' con̈ob' tu' ay hune' ya' comi' camnajxa yichamil. Hunun tz'ayic sb'ey ya' sk'annoj tet naj juez tu' ta swatx'e naj sjusticia ya' b'oj hune' mac ch'anicoj howal yin̈. 4Tx'ihalxa el ẍb'ey ya' comi' tu' yila naj, yaja' matzet chal sc'ul naj juez tu' swatx'en sjusticia ya' tu'. Yaja' niẍtejal xalni naj: Waxan̈ca mach Dios hin satan, machca spixan anma wetan, 5k'a' t'in̈an hin watx'en sjusticia hune' ix ti'an yun̈e sb'ejnican ix yuli, haxca xa scajtza hin c'ul yul ix hin yilnojan. 6Hactu' yalni naj juez mach Dios sat tu'. 7Hajxam Comam Dios, toc'anab' mach scolo' Comam mactaj sic'leb'il yu ta ayn̈etic'acoj sk'anni hunun tz'ayic hunun ak'b'al tet Comam. ¿Taxca k'ahan yechman anma tu' Comam? 8Ẍwal teyetan ta lemb'il ẍcolwaoj Comam yin̈ anma tu'. Yaja' tzimi ta tx'ihal to mac ẍcawxi sc'ul yin̈ Comam Dios ẍchalooj wuan yet chin huluj hunecxa Hayin Ab'ilintij yu Comam Dios xol jet-anmail ti'an. 9Xalni pax Comam Jesús hune'xa cuyb'anile tet hunk'aan heb'naj chal sb'a c'ulal, to mach spixan yet-anmail heb'naj tet. Xalni Comam: 10—Cawan̈ heb'naj xb'ey ya'a yoración yatut Comam Dios. Hune' naj fariseo, hune'xa naj iomiloj melyu yet tohlab'al. 11Naj fariseo tu' lin̈an naj cha'ni naj yoración, yanman̈e naj xhalni: Dios Mam, ẍwa' yuch'antioẍ tawetan haxca mat hin lahanoj b'oj hunmajanxa anmaan: Elk'om, ec'naj sc'ul, ixlom. Matca hin lahanoj b'oj hune' naj iomiloj melyu yet tohlab'al ti'an. 12Cayel ẍwa' ayuno yulb'al semanaan, cat wa'ni sdiezmoal hantaj tzet ayinan, ẍi naj. 13Yaja' naj iomiloj melyu yet tohlab'al tu', nahatn̈e lin̈antij naj xulanay naj, xtac sc'ul naj, stin̈nicoj naj xtxam sc'ul, chalni naj: Dios Mam, ahmul hinan, tz'aojab' ha c'ul win̈an, ẍi naj. 14Ẍwal teyetan ta naj iomiloj melyu yet tohlab'al tu' k'a' xcan naj c'ulal yul sat Comam Dios yet xpaxtoj naj yatut. Yaja' naj fariseo, mach sc'ulal naj xcan yul sat Comam Dios. Haxca mac caw ahatoj stel chab'e, ch'ilaxojayoj, wal mac ch'ay ni'anb'ail, ch'alaxojcoj smay. 15Yet hunec xitoj hunk'aan heb'ya' comi' niẍtej yunin yu yanicoj Comam Jesús sk'ab' yin̈ swi'. Yaja' yet xilni heb'ya' ẍcuywi yin̈ Comam hune' tu', xmayni heb'ya' ya' comi' tu'. 16Yuxin xawte Comam heb'ya', xalni tet heb'ya': —Chawejtij niẍtej unin ti' tin c'atan̈an. Mache cach ẍtita, haxca mac haca' niẍtej unin chute sb'a, ha' yetwanoj yoc yul sk'ab' Comam Dios. 17Yin̈ caw yeli ẍwal teyetan, mac mach ẍchani Comam Dios Yahawoj haca' ẍchani hunuj ni'an unin, mach'ocoj yul sk'ab' Comam. 18Hune' naj swi'con̈ob' xk'amb'en tet Comam Jesús: —Mam Cuywaom caw c'ul, ¿tzet wal wunian yun̈e stzujchaojapnoj k'inal mach stan̈b'al wuan?. 19—¿Tzet yuxin chawal c'ul tu' win̈an? Hatcachan Comam Dios c'ul. 20Hachti' hawohtaj hej mandamiento ẍalni yin̈ hacti': Machex ixli, machex potx'wayi, machex elk'ani, mache hob'can̈ lek'ti'al yin̈ heyet-anmail. Ayojab' yelapnoj ye he mam he mi' yul he sat, ẍiayoj. 21Xalni naj tet Comam: —Sunil ti' xin yijyetij yin̈tax hin ni'antoalan. 22Ha' xab'en Comam hune' tu', xalni tet naj: —Hune' to tzetet caw yet ay hawuni. Txon̈toj sunil tzet ayach tu', cat hawitxk'antoj stohol yin̈ anma meb'a'. Waltu' ay ha k'alomal cha chab' b'ay ay Comam Dios. Lawi hawitxk'antoj stohol tu' cat hawoccan tzujnuj win̈an. 23Ha' xab'en naj hune' tu', x'oc b'isc'ulal yu naj haxca caw k'alom naj. 24Ha' xilni Comam ta caw b'isc'ulal xucan naj, xalni tet naj: —Tzet sya'tajil yoc anma k'alom yul sk'ab' Comam Dios. 25K'inaloj ta ay hunuj no' cameyo tinan̈, ¿tox chu yec'toj no' yul sholanil ch'en acuẍa? Hactu' ye anma k'alom, caw ya'taj yoc yul sk'ab' Comam Dios. 26Mactaj x'ab'en tzet xal Comam tu' xalni yin̈ hacti': —Ta hactu', ¿mactaxca chu scolchayi? . 27Xalni Comam: —B'aytet mach ẍc'oji anma yuni, wal Comam Dios, chu yuni Comam. 28Xalni ya' Pedro tet Comam: —Mamin, walon̈an sunil tzet ayon̈an xjacanan xcon̈ occan tzujnuj tawin̈an. 29Xta'wi Comam: —Yin̈ caw yeli ẍwal teyetan, mac ch'anicanoj yatut, yixal, yuẍtaj, yanab', smam smi' mato yuninal yu smunla yalnic'oj tzet chu yoc Comam Dios Yahawoj, 30tx'ihal spaj schab' satyib'an̈k'inal ti' cat schanoj k'inal mach stan̈b'al yet b'ak'in̈aloj. 31Nan xawteloj Comam Jesús heb'ya' cab'lan̈wan̈ ẍcuywi yin̈, xalni tet heb'ya': —Tinan̈ jahojxahapnoj Jerusalén b'ay chija' sb'a tzet tz'ib'n̈eb'ilcan yu heb'ya' schejab'lom Comam Dios win̈ Hayin Ab'ilintij yu Comam Dios xol jet-anmail ti'an. 32Chin alaxojcoj yul sk'ab' heb'naj mat israelojan cat hin tzeyelaxojan. Tx'ixwub'al chin utelaxojan b'oj chin tzub'n̈elaxojan. 33Lawi hin shatenoj heb'najan, cat hin spotx'noj heb'najan, yaja' yin̈ sca'fial, chin pitzc'aojcan̈an. 34Yaja' mach xtxum heb'ya' tzet chal Comam, mat yohtajoj heb'ya' tzet chaliloj, haxca ewanto ye yul sat heb'ya'. 35Yet lan̈anxa yapni Comam Jesús yul con̈ob' Jericó, tz'on̈anayoj hune' naj machu yilni sti' b'eh, sk'anni tzetet smatanoj tet anma. 36Ha' xab'en naj to xayanxan̈e anma ch'ec'toj, sk'amb'en naj tzet chu b'etu'. 37Xhal-lax tet naj to lan̈an yec'toj Comam Jesús ah Nazaret. 38Ha' xab'en naj, x'awican̈ naj: —Jesús yic'al ya' rey David, tz'a'ojab' ha c'ul win̈an. 39Yaja' xcachot naj yu anma b'ab'inajcoj sataj Comam ta sb'ejcan naj yawi. Yaja' k'a' ẍto niman naj yawi yin̈ ip, chalni naj: —Hach yic'al ya' rey David tz'a'ojab' ha c'ul win̈an. 40X'oc lin̈noj Comam, ẍchejni ilaxojtij naj sc'atan̈. Yet x'apni naj sc'atan̈ Comam, sk'amb'en Comam tet naj: 41—¿Tzet chawoche ta ẍwu tawin̈an? ẍi Comam. —Mamin, ẍwochean ta chawa' hin mujlub'alan. 42Xalni Comam: —Yub'ab' yin̈ hactu' haxca chawa' yuluj ha c'ul win̈an. 43Yin̈n̈ena tu' xa hu yilni naj. X'oc tzujnuj naj yin̈ Comam, xa'ni naj yuch'antioẍ tet Comam Dios. Hantaj anma x'ilni hune' tu' x'oc pax ya'a'coj smay Comam Dios.


Copyright
Learn More

will be added

X\