SAN LUCAS 17

1Xalni Comam Jesús tet heb'ya' ẍcuywi yin̈: —Ayn̈etic'a tzet ch'a'ni semc'ooj anma cat yay yin̈ xtx'ojal. Yaja' c'antaj anma ch'ijb'an hunujxa yet-anmail yuni xtx'ojal. 2Ta ẍc'al-laxcoj hune' niman ch'en yin̈ snuk' hunuj anma cat sb'ejlaxaytoj yich ha' mar, k'a' ẍtom techa sya'tajil hune' tu' yu, sataj sya'tajil chila' mac ch'ijb'an hunuj anma hacn̈e ti' ye sc'ul yin̈ yuni xtx'ojal. 3Nann̈e heyu: Ta ay hunuj heyet-anmail tx'oj chu teyin̈, cachwej. Ta cheyila to ẍtac sc'ul yu tzet chu tu', a'wej nimanc'ulal yin̈. 4Ta hujel tx'oj chu teyin̈ yin̈ hune' tz'ayic, hujel chuluj pax sk'ana' nimanc'ulal teyet, yilal heya'ni nimanc'ulal yin̈. 5Xalni heb'ya' ẍcuywi yin̈ Comam Jahaw: —Cam a' scawxob'al co c'ul ja'ni yuluj co c'ul yin̈ Comam Diosan, ẍi heb'ya' 6—Ta yeli cheya' yuluj he c'ul yin̈ Comam Dios, waxan̈ca ni'anch'ann̈e scawxob'al he c'ul haca' sat te' mostaza, chim sje heyalni tet hunuj te' te': Hoc'atij ha b'a b'eti' cat ha to ha tz'unnujaytoj ha b'a yul ha' mar, ta quex chi, chim syijye te' tzet cheyala. 7—K'inaloj ta ay hunuj he munlawom xax hul sb'ey patxo' tx'otx' mato xb'ey ilo' wacax, taxca cheyal tet naj: Ocan̈, pisyan̈ cat ha wa'i, mat quex chioj. 8To ha' cheyal tet naj: Hel tawin̈, watx'e tzet chin loan, cat hawinitij wetan. Ẍto lahwoj hin wa'an, cat ha wa'oj paxoj, quex chi mi. 9¿Taxca cheya' yuch'antioẍ tet naj, lawi syijyen naj tzet cheyala? Machoj. 10Haquex pax tu', lawi heyuni sunil b'aytet chejb'il heyub' yu Comam Dios, cheyalni: Caw matzet ẍjaliloj hayon̈ ti', han̈c'a b'aytet yetwanoj ay juni, ha' xju, quex chi'. 11Yet lan̈an sto Comam Jesús Jerusalén, x'ec'toj b'ay scha sb'a tx'otx' Samaria b'oj tx'otx' Galilea. 12Yet x'apni Comam b'et hune' wayan̈b'al, x'eliloj lahun̈wan̈ heb'naj schanoj Comam. Aycoj yab'il lepra yin̈ heb'naj, yuxin nahat xcan lin̈noj heb'naj. 13Stzab'nicoj heb'naj yawi tet Comam: —Jesús, Mam Cuywaom, tz'aojab' ha c'ul jin̈an. 14Yet x'ilottoj heb'naj yu Comam, xalni tet heb'naj: —As yewej he b'a tet heb'naj sacerdote. Yaja' haniq'uixto ẍto heb'naj, x'an̈chacan heb'naj. 15Yet xilnitij heb'naj to c'ulxa ye heb'naj, xmeltzo hune' naj yin̈ tzalalal, chanicoj naj smay Comam Dios yin̈ caw ip. 16Ha x'apni naj sc'atan̈ Comam Jesús, x'aycan n̈ohnoj naj yin̈ sat Comam, cha'ni naj yuch'antioẍ tet Comam. Hune' naj tu' ah Samaria naj. 17Xalni Comam: —¿Tox mat lahun̈wan̈oj heb'naj x'an̈chayi? ¿B'ay xin ay b'alun̈wan̈xa heb'naj? 18¿Tzet yuxin han̈c'a hune' naj nancon̈ob'al ti' xmeltzo ya'a' yuch'antioẍ tet Comam Dios? . 19Lawitu' xalni Comam tet naj: —Ahan̈lin̈noj, paxan̈toj, haxca xawa' yuluj ha c'ul yin̈ Comam Dios, yuxin cach an̈chayi. 20Sk'amb'en heb'naj fariseo tet Comam Jesús b'ak'in̈ ch'ocoj Comam Dios Yahawoj. Xta'wi Comam: —Yocb'al Comam Dios Yahawoj mach ẍjil yuli. 21Machca chu heyalni: Hat ay b'eti', maca hat ay b'etu', mat quex chioj. Haxca yin̈ janma ch'oc Comam Dios Jahawoj. 22Lawitu' xalni Comam tet heb'ya' ẍcuywi yin̈: —Ch'apnoj stz'ayical b'ay cheyala': Oẍimi chul mac Ab'iltij yu Comam Dios co xol, waxan̈ca hunujn̈e tz'ayical ẍjila', quex chi mi, yaja' macheyila' yin̈. 23Waxan̈ca ẍhal-laxoj teyet: Hat ay naj b'eti', mato: Hat ay naj b'etu', ta ẍi, macheya'a' yuluj he c'ul, machca chex oc tzujnuj yin̈. 24Haca' yay jepna cayompa sunil b'ay ch'apni smujlub'al, hactu' chu yixtan̈woj wulb'al Hayin Ab'ilintij yu Comam Dios xol jet-anmail ti'an. 25Yaja' b'ab'el caw ch'ec'oj ya' wanmaan cat hin paha'toj yu anma ay tinan̈an. 26Haca' xute sb'a yet x'ehc'oj ya' Noé, hactu' chub' paxoj yet chin huluj paxan. 27Yet tu', han̈c'a wa'oj b'oj mohilal nab'il yu anma, ha' lan̈an yuni heb'jetb'i yet x'octoj ya' Noé yul te' arca. Yin̈en̈a tu' ẍnohcan̈ satyib'an̈k'inal yu ha' nimej ha', sunil anma xcami. 28Hactu' xa'le pax anma yet x'ehc'oj ya' Lot. Matzet chal sc'ul. Sak'al swa'i, slok'i, xtxon̈i, tz'untz'uni, chanican̈ yatut. 29Man̈e x'el ya' Lot tu' yul con̈ob' Sodoma, lan̈antic'a tu', x'ayiloj k'a' k'a' b'oj k'ol satcan̈. Sunil anma xtan̈iloj yu k'a'. 30Haca' xu tu', hactu' chub' yet chin hulujpaxan. 31Yet chuuj hune' tu', mac ahatoj swi' yatut mach'aytij yi'altij stzetet ay yul n̈ah. Mac aytoj xol smunil, matxa ẍmeltzo yatut. 32Tijab' yin̈ he c'ul tzet xa'le yixal ya' Lot. 33Mactic'a ch'ok' scami, sc'aya'toj sk'inal, wal mac hinan scam win̈an, schab' sk'inal huneln̈e. 34Ẍwalni pax teyetan ta yin̈ hune' ak'b'al tu' cawan̈ mac ẍway sat hune' tx'at, hune' ch'ilaxojtoj, hune' ch'alaxojcanoj. 35- 36Cawan̈ heb'ix lan̈an scawni. Hune' ix ch'ilaxojtoj, hune' ix ch'alaxojcanoj. 37Ha' xab'en heb'ya' hune' tu' sk'amb'en heb'ya': —Mamin, ¿b'ay chuuj hune' tu'? . Cajxam yalni anma: —B'ayn̈etic'a ay camnaj nok', hat ch'apni somna no' usmij.


Copyright
Learn More

will be added

X\