SAN LUCAS 17

1Yalni Comam Jesús tet ebnaj iscuywom: —Ayn̈etic'a istx'ojal bay ch'ayc'ay anma yul sat yiban̈k'inal ti', ¡yaja' c'anch'an mac ch'ak'ni ayc'ayo hunu maca! 2Ha' hune' mac tu', c'ulojab isc'allaxico hunu niman ch'en yin̈ isnuk', cat istirlaxto xol ha' mar sata ta chak' ayc'ayo yin̈ istx'ojal hunu mac uninto win̈an, ẍi Comam. 3Yalnipaxo Comam: —¡Nann̈eojab heyu hex ti'! Ta ay hunu heyuẍta maca hunu heyanab chaco ismul teyet, cachwan̈we yin̈. Yaj ta chishel isbeybal, ak'we nimanc'ulal yin̈, 4waxan̈ca hujel chaco ismul teyet yin̈ hune' tz'ayic, yaj ta hujel ch'apni isk'ana' nimanc'ulal teyet, yilal heyak'ni nimanc'ulal yin̈, ẍi Comam. 5Isk'anni ebnaj ischejab Comam Jesús tet haca' ti': —Ak' yip janmahan̈ yin̈ Comam Dios, ẍi ebnaj. 6Istak'wi Comam tet ebnaj: —Ta caw cheyaco heyanma yin̈ Comam Dios, waxan̈ca chiichico haca' hunu te' nich'an hin̈at mostaza, wal tu' chu heyalni tet hunu te' k'ebtaj morera haca' ti': “Hoc'ati haba bey ti', cat hato hatz'unnayto haba xol ha' mar,” ta quexchi, chisyije te' tzet cheyala, ẍi Comam. 7Yalni Comam: —Ta ay hunu hemunlawom ispeto t'oco tx'otx', maca ilo wacax, mataxca cheyal tet naj: “Ocan̈, ayan̈ tz'onoj cat hawa'i,” ¿Tom quexchi xin? 8¡Machoj! To ha' cheyal tet naj: “Watx'e tzet chinlohan, chilahwi tu', cat hawoc habatx'nic'o tzet chiwochehan, chilahwo inwa'canojan xin, cat hawa'o hach ti',” quexchi. 9¿Tom xin cheyak' yuch'andiosal tet naj yu chisyijen naj tzet cheyala? ¡Machoj! 10Haca' hune' naj munlawom tu', haquex tu' hex ti'. Lahwi hewatx'en sunil baytet chejbil hewatx'e yu Comam Dios, cat heyalni haca' ti': “Wal xin caw ismunlawom Comam Dios jecanojan̈ yuxin caw yilal coyijenan̈ tzet chal Comam Dios,” quexchiojabi, ẍi Comam. 11Yet lan̈an isto Comam Jesús yul isbelal Jerusalén, yec'to Comam xolbal ismajul Samaria yeb ismajul Galilea. 12Hayet yapni Comam bey hune' aldea, yelilo lahon̈wan̈ ebnaj winaj ischahno Comam. Ayco yabil lepra yin̈ ebnaj, yuxin nahat cancano lin̈no ebnaj. 13Istzabnico ebnaj yahwi tet Comam: —Mam Jesús, Mam cuywawom, caw tz'ayojab hac'ul jin̈an̈, ẍi ebnaj. 14Hayet yilni Comam Jesús ebnaj, yalni Comam tet ebnaj: —As yewe heba sata ebnaj sacerdote Israel, ẍi Comam tet ebnaj. Hayet lan̈an isbelwi ebnaj tu', yelcano hune' yabil tu' yin̈ ebnaj. 15Hune' naj xol ebnaj tu', hayet yilni naj ta caw c'ulxa ye isnimanil, ismeltzoti naj yin̈ caw tzalahilal yalni c'ulla tzoti' yin̈ Comam Dios yin̈ caw ip. 16Hayet yapni naj isc'atan̈ Comam Jesús, yay jahno naj sata Comam yu yak'ni naj yuch'andiosal tet Comam. Hune' naj tu', ah Samaria naj. 17Lahwi tu', yalni Comam Jesús: —Yaj lahon̈wan̈ ebnaj mael hune' yabil ti' yin̈, ¿baytu'wal ayco balon̈wan̈xa ebnaj? 18¿Tom han̈c'an̈e hune' naj nan con̈obal ti' mahul ak'no yuch'andios tet Comam Dios? ẍi Comam. 19Yalni Comam tet naj: —Ahan̈lin̈noj, cat hapaxtoj. Yu maxawaco hawanma yin̈ Comam Dios, yuxin macachan̈chahi, ẍi Comam tet naj. 20Ay huntek'an ebnaj fariseo k'amben tet Comam Jesús bak'in chihul istiempohal yet ch'oc Comam Dios Jahawiloj. Istak'wi Comam: —Hayet ch'oc Comam Dios heyahawiloj, mach chu jilni yu cosat. 21Yuxin machi mac chu yalni: “Ha' bey ti' aya,” maca to “Ha' bey tu' aya,” mach ẍioj. Yuto haxa yul yanma anma ch'oc Comam Dios Yahawoj, ẍi Comam. 22Lahwi tu' xin, yalni Comam tet ebnaj iscuywom: —Chi'ayilo hune' tiempohal bay cheyala: Ayxic'a chul Comam Ak'bilti coxol yu Comam Dios hunelxa, waxan̈ca hune'n̈e tz'ayic quexchi, yaj maẍtic'a chinheyila'an. 23Yuxin, waxan̈ca ay anma chihalni teyet: “Ay Comam bey ti' lah,” maca to aypaxo anma chihalni: “Ha' tu' ay Comam bey tu' lah,” waxan̈ca ẍi, caw mach chexoc tzujnu yinta ebnaj. 24Yuxin chiwalcanojan teyet, haca' chu yah jepla c'uh yin̈ sunil satcan̈, hac tu' chu wulan, Hanin Ak'bilintijan texol yu Comam Dios. 25Yaja' yin̈ babel caw chiak'lax ec'oya' wanmahan yu anma cat quinyintan̈encaniltojan yin̈ hune' tiempohal ti'. 26Haca' yu anma yin̈ istiempohal naj Noé, hac tu' chiyupaxo anma yet chinhulan yin̈ iscayelal, Hanin Ak'bilintijan texol yu Comam Dios. 27Yin̈ istiempohal naj Noé tu', ay ebnaj wa'o chu, aypaxo ebnaj uc'u te', ay mac lan̈an ismohyi. Ha' huntek'an tu' lan̈an iswatx'en anma yet yocto naj Noé yul te' niman barco. Lahwi yocto naj Noé tu', istit hune' niman yaxn̈ab, iscamilo sunil anma yu ha'. 28Hac tu' yupaxo anma yin̈ istiempohal naj Lot. Caw matzet chal isc'ul anma, sak'al iswa'i yeb chi'uq'uipaxoj. Chilok'wi cat istxon̈wi. Chistz'unni istz'unub, chahnipaxocan̈ yatut. 29Yaja' yet yelti naj Lot yul con̈ob Sodoma tu', haca' xan̈e yay n̈ab, hac xan̈e tu' yayilo k'a' yeb asufre satcan̈. Iscamilo anma sunil yu hune' k'a' tu'. 30Haca' yu anma yet hune' tiempohal tu', hac tu' chu anma yin̈ hune' tz'ayical bay chinhulan, Hanin Ak'bilintijan texol yu Inmaman. 31Yet hune' tz'ayical tu', ha' mac ayahto yiban̈ yac'alil yatut mach chu yayti yinolti isk'uybe yul yatut, yeb mac ayto xol ismunil, matxa chu ispaxti yatut. 32Tijab yul hec'ul yin̈ yixal naj Lot. 33Ha' mac ch'ok' yanma yin̈ tzet aya, mach chischah isk'inal yin̈ huneln̈e. Haxa mac hinan isc'ul isbejnicano tzet ye tu' win̈an, chischah isk'inal mach istan̈bal. 34Chiwalan teyet, ta ay cawan̈ anma chiway sat istx'at yet hune' ak'bal tu', hune' chi'ilaxtoj, hune' chicancanoj. 35Cawan̈ ebix ix hune'n̈e lan̈an iscawni, hune' ix chi'ilaxtoj, hune'xa ix chicani. 36Cawan̈ ebnaj hune'n̈e chimunlahi, hune' naj chi'ilaxcan̈, hune'xa naj chicani, ẍi Comam. 37Isk'amben ebnaj iscuywom Comam: —Mamin ¿baytu'wal chub hune' tu'? ẍi ebnaj. Istak'wi Comam tet ebnaj: —Caw haban hune' tu', ha' baytic'a pac'anayo hunu camom, ha' tu' chiscutxba isba no' usmij, ẍi Comam Jesús.

will be added

X\