SAN LUCAS 16

1Xalni pax Comam Jesús tet heb'ya' ẍcuywi yin̈: —Yet hunec ay hune' naj stan̈eomal munil ch'etantoj tzetet ay naj yahaw tu'. Ha' xab'en naj yahaw tu' ta aycoj naj tu' yetantoj tzet ay naj, 2xawten naj naj stan̈eomal munil tu'. Xalni naj tet naj: Xhul hal-laxoj wetan ta chach elk'ancoj yin̈ tzet ayin ti'an. Tinan̈ tz'ajan chawacanayoj tzet aycoj yul ha' k'ab' wuan, matxa chach oc ha tan̈e hin munil ti'an, ẍi naj yahaw tu'. 3Ẍb'isb'on sc'ul naj, chalni naj: ¿Tzet chin tan̈ojan, haxca chin yiloj naj wahaw yin̈ smunil ti'an? Matxa k'aynajoj hin nimanil ti' yin̈ comon munilan. Chin tx'ixwi pax in k'anni tzetet in matanojan. 4Tinan̈ ha' wal wunian, yun̈e ay mac chin chanoj yul yatutan yet chin eloj yin̈ hin munil b'eti'an, ẍi yanma naj. 5Hactu' xu yawten naj heb'naj ay sc'as tet naj yahaw tu' yin̈ hununtajil. Xalni naj tet naj b'ab'el: ¿Hantaj ha c'as tet naj jahaw ti'? ẍi naj. 6Xta'wi naj ay sc'as tu': Hune' ciento tz'aab'il aceite, ẍi naj. Xalni naj tan̈eom munil tu': Ay hawum, la. Tz'on̈yan̈, hel yumal ha c'as tu'. Cincuentaxan̈e chawuteayoj, ẍi naj. 7Lawitu' sk'amb'en naj tet hune'xa naj: ¿Hantaj ha c'as tet naj jahaw ti'? ẍi naj. Xta'wi naj ay sc'as tu': Howeb' ciento quintal trigo, ẍi naj. Ay hawum, la. Hel yumal ha c'as tu', can̈eb' cientoxan̈e chawuteayoj, ẍi naj. 8Xc'ayiloj sc'ul naj yahaw tu', xalni naj to caw tz'ajan sc'ul naj tan̈eom munil caw tx'oj tu'. Haxca ay anma machcoj yin̈ Comam Dios, k'a' tz'ajanto sc'ul yamigon̈en sb'a b'oj anma, sataj anma ayxacoj sajilk'inal Comam Dios yin̈. 9Haxca sub'utaj juni tx'ojal yu ch'en melyu, yuxin ẍwal teyetan, c'ul chu he munlan̈en ch'en, haxin̈wal cheyamigon̈e he b'a b'oj anma yu ch'en. Ta hactu' cheyute, yet matxa ch'ocnojcoj ch'en heyu, chex ẍchab' Comam Dios yul hune' n̈ah yin̈ stohb'alk'inal. 10Mac t'in̈an smunla yin̈ ni'an solic', hactu' smunlaoj pax yin̈ tx'ihal ch'a'laxoj tet. Mac mat t'in̈anoj smunla yin̈ ni'an solic, hajxam wal tx'ihal ẍcha, mach chuuj yu. 11Yuxin ta mat t'in̈anoj cheyute he b'a yin̈ sk'alomal satyib'an̈k'inal ti', mac toc'anab' ch'anojc'oj sk'alomal Comam Dios yul he k'ab'. 12B'oj hunxa, ta mat t'in̈anoj cheyute he b'a yin̈ tzet mat he yetoj, mac toc'anab' ch'a'noj tzet caw heyet yeyi. 13Mach hunuj naj chejab' chu syijyen tet cawan̈ yahaw munil, haxca k'a' xahann̈e naj naj b'ab'el cat syahnoj naj hune'xa naj scab'. Yijyom chute sb'a naj tet hune' naj, yaja' tet hunxa naj, sman̈c'o naj. Machu co yijyen tzet chal Comam Dios ta tz'unb'ilcoj janma yin̈ ch'en melyu. 14Yet xab'en heb'naj fariseo tzet xal Comam tu', x'oc heb'naj stzeyenoj Comam haxca caw aycoj yanma heb'naj yin̈ ch'en melyu. 15Xalni pax Comam tet heb'naj: —Hexti' k'a' cheyoche yalaxcoj he may yu anma, yaja' yohtaj Comam Dios tzet ib'il yu he c'ul. Haxca b'aytet chal anma c'ulal, syah Comam Dios. 16Yalan̈to maẍto chul ya' Juan Bautista xcuylax sley ya' Moisés b'oj tzet stz'ib'n̈ecan heb'ya' schejab'lom Comam Dios. Yin̈xa ya' Juan, x'ichi spujb'alaxc'oj stzoti' c'ul jocb'al yul sk'ab' Comam Dios, tx'ihal anma cha' yilal yoqui. 17K'a' sub'utaj sc'ayiloj satcan̈ b'oj tx'otx'otx' sataj stan̈tzelaxiloj hunuj ni'an tz'ib' yin̈ sley Comam Dios. 18Ta ay hunuj naj spoh sb'a b'oj yixal cat smohyi naj b'oj hunujxa ix, chacoj naj smul yul sat Comam Dios. Taca ay hunujxa naj ẍmohyi b'oj ix tin̈chab'ilcan tu', chapaxcoj naj smul yul sat Comam Dios. 19Xalni pax Comam Jesús: —Yet hunec ay hune' naj caw k'alom, xil k'ape caw ay stohol chacoj naj yin̈. Hunun tz'ayic yec'tzen naj k'in̈ yul yatut. 20- 21Ay pax hune'xa naj caw meb'a', Lázaro sb'ih, xb'ey stz'on̈b'a sb'a sti' yatut naj k'alom tu'. Ay yala naj ch'a'lax ita ẍcan sat smeẍa naj k'alom tu' slob' naj, yaja' mach'aot tet naj. Penaxan̈e ye snimanil naj yu yab'il ch'el yal, ch'apni pax metx'i slek'a' tet naj. 22Yet hune' tz'ayic, xcamtoj naj Lázaro tu', x'ilaxtoj spixan naj yu hej ángel sc'atan̈ ya' Abraham. Lawitu' xcampaxtoj naj k'alom tu', x'ilaxtoj naj mujuj. 23Yet ay naj k'alom tu' yul camb'al, caw ch'ec' ya' naj, ha' xt'an̈xitoj naj xilnitoj naj ya' Abraham, aycoj naj Lázaro sc'atan̈ ya'. 24X'awican̈ naj, chalni naj yin̈ hacti': Mam Abraham tz'a'ojab' ha c'ul win̈an, hal tet naj Lázaro slab'ahab' naj swi' yiximal sk'ab' xol ha' ha', cat yanicoj naj sat wak'an, haxca caw ch'ec' ya' wanma xol xaj k'a' k'a' ti'an, ẍi naj k'alom tu'. 25Xta'wi ya' Abraham tet naj: C'ahol, tijab' yin̈ ha c'ul yet ayach satyib'an̈k'inal, sc'ulaln̈e cach b'ey hawila'c'oj. Wal naj Lázaro ti', sya'tajiln̈e xb'ey yila'c'oj naj. Tinan̈ ch'a'lax tzalaoj sc'ul naj. Yaja' wal hach, sya'tajil ch'a'lax hawila'. 26B'oj hunxa, aycoj hune' niman pahaw co xol, yun̈e mac ay b'eti' waxan̈ca choche ch'ec'toj b'ay ayex tu' machu yec'toj. B'oj mactaj ay b'ay ayex tu', machu yec'tij b'eti', ẍi ya' tet naj. 27Xalni naj k'alom tu': Ta chal tu' mam Abraham, chin k'an tawetan, chejtoj naj Lázaro tu' yatut hin maman 28yala' yab'e' howan̈ heb'naj wuẍtajan, haxin̈wal machul heb'naj b'ay lan̈an yec' ya' wanma ti'an, ẍi naj. 29Xta'wi ya' Abraham: Sayab' heb'naj yila' b'aytet tz'ib'n̈eb'ilcan yu ya' Moisés b'oj heb'ya' schejab'lom Comam Dios yin̈ b'aytet wal yuni heb'naj, ẍi ya'. 30Xalni naj: Machoj mam Abraham, mat c'ojb'ilojn̈e yil-lax tzet tz'ib'n̈eb'ilcan yu ya' Moisés tu', yaja' ta ay hunuj camom ti' ẍpitzc'acan̈, cat sto yalnoj tet heb'naj, chim sheltoj heb'naj yul swi', ẍi naj. 31Xalni ya' Abraham tet naj: Ta machab'etoj heb'naj tzet tz'ib'n̈eb'ilcan yu ya' Moisés b'oj heb'ya' schejab'lom Comam Dios, waxan̈ca ẍpitzc'acan̈ hunuj camom cat sto yalnoj tet heb'naj, matoj ẍtic'a yab'e'toj heb'naj tzet chala', ẍi ya' Abraham.


Copyright
Learn More

will be added

X\