SAN LUCAS 16

1Yalnipaxo Comam Jesús hune'xa yechel ti' tet ebnaj iscuywom: —Ay hune' naj k'alom, ay xin hune' naj ayco yahawo ismunil naj. Yaja' yabelo naj patrón tu' ta lan̈an isc'aynilo naj ilom munil tu' tzet ay naj. 2Yuxinto yawte naj patrón naj ilom munil tu', yalni naj tet naj: “Mahul hallaxo wetan tato ach ti' lan̈an hac'aynilo tzet ayinan. Wal tinan̈ xin, caw yilal tz'ajan chawak'cano sunil tzet ayco yul hak'ab wuhan, yuto chaẍwilojan yin̈ inmunilti'an,” ẍi naj. 3Yalni naj ilom munil tu' yin̈ isnabal: “¿Tzet chiwute inbahan, yuto chiyik'alo inpatronan inmunilti'an? Yaj matxa k'aynajo innimanilti'an yin̈ munil caw ya'taj. Chintx'ixwipaxojan wec'an k'ano tzet ye tu' matanil tet anma. 4Wal tinan̈ wohtaxahan tzet chiwute inbahan, waxan̈ca machi inmunilan ay mac chinchahnihan bey yatut,” ẍi naj. 5Lahwi tu' xin, yichico naj yawten ebnaj ay isc'as tet ispatrón tu' yin̈ hununtajil. Isk'amben naj tet naj babel: “¿Hanta hac'as tet inpatronan?” ẍi naj. 6Yalni naj xin: “Hune' cien barril te' aceite inc'asan,” ẍi naj. Yalni naj ilom munil tu': “Tinan̈ xin, ay yumal hac'as lah. Ayan̈ tz'on̈noj, cincuenta xan̈e chawuteco hac'as yin̈ hune' hum ti' yin̈ an̈e,” ẍi naj. 7Lahwi tu' xin, isk'amben naj tet hunxa naj: “¿Hanta hac'as tet inpatronan?” ẍi naj. Istak'wi naj: “Hune' cien mal ixim trigo,” ẍi naj. Yalni naj ilom munil tu': “Ay yumal hac'as lah, ochenta xan̈e chawuteco hac'as yin̈ te',” ẍi naj. 8C'ayilo isc'ul naj patrón tu' yin̈ naj ilom munil tu', waxan̈ca tx'oj isnabal naj, yaj caw helan naj iscolni isba. Yuxin chiwalan teyet, caw bisc'ulal, yuto ha' anma mach ohtan̈e Comam Dios, caw helan iswatx'en istx'ojal. Wal ebnaj yet Comam yehi, caw mach helano ebnaj iswatx'en tzet choche Comam Dios. 9Chiwalan teyet, ha' ch'en melyu chu iswatx'en ch'en istx'ojal; walex hex ti' xin, yin̈n̈eojab isc'ulal cheyaco hemelyu, haxinwal ay mac chaco isba yul isk'ab Comam Dios. Ta hac tu', hayet matxa tzet ch'ocnico ch'en melyu heyu, Comam Dios chexchahni bey hune' heyatut satcan̈ yin̈ huneln̈e. 10Ha' mac c'ul chute isba yin̈ nich'an ch'ak'lax yul isk'ab, caw c'ulpaxo chute isba yin̈ niman ch'ak'lax tet. Hac tu' xin, ha' mac machiswalil chute isba yin̈ nich'an ch'ak'lax tet, caw machiswalil chutepaxo isba yin̈ niman ch'ak'lax yul isk'ab. 11Yuxin ta mach c'ulo cheyute heba yin̈ hek'alomal yul sat yiban̈k'inal ti', ¿ha' tom xin hune' isk'alomal satcan̈ chi'ak'lax teyet? ¡Machoj! 12Hac tu' xin ta mach c'ulo cheyute heba yin̈ tzet ye tu' mach heyeto yehi, ¿hato c'anab hune' heyettic'a yehi chiak'lax teyet? ¡Machoj! 13Machi hunu naj munlawom chu ismunla yinta cawan̈ patrón, yuto ta choche naj naj babel, chisyah naj naj iscab. Yebpaxo ta yijem chute isba naj tet naj babel, chisman̈c'o naj tzet chal naj iscab. Hac tu' xin mach chu coyijen tzet chal Comam Dios ta ayco janma yin̈ k'alomal, ẍi Comam Jesús tet ebnaj iscuywom tu'. 14Haxa yet yaben ebnaj fariseo tzet yal Comam Jesús, yoc ebnaj buchwal yin̈ Comam, yuto caw ayco yanma ebnaj yin̈ ismelyu. 15Yalni Comam tet ebnaj: —Hex ti', satan̈e anma caw c'ul cheyute heba, yaj Comam Dios yohta tzet ayayto yul heyanma. Ha' tzet ye tu' caw niman yelapno ye yul sat anma, machi yelapno yul sat Comam Dios, ẍi Comam Jesús. 16Yalnipaxo Comam Jesús: —Yalan̈to maẍto chul naj Juan anican̈ ha' iswi' anma, cuylax isley naj Moisés yeb tzet tz'ibn̈ebilcano yu ebnaj ischejab Comam Dios yet payat. Yin̈xa istiempohal naj Juan tu' xin, ichico ispujbalaxic'o tzoti' c'ul yin̈ tzet chu yoc anma yul isk'ab Comam Dios, ha' anma tu' chak' yip yanma yoc yul isk'ab Comam. 17Hune' satcan̈ ti' yeb tx'o tx'otx' chitan̈iloj, wal isley Comam Dios, machi hunu cuybanil ch'ec'to yet yijni isba sunil, ẍi Comam. 18Yalnipaxo Comam Jesús: —Ta ay hunu naj winaj chispole isba yeb yixal, cat ismohyi yeb hunuxa ix, chaco naj ismul yul sat Comam Dios. Yebpaxo naj chi'ik'ni ix pohlebil isba yeb yichamil tu', chapaxico ismul naj yul sat Comam Dios, ẍi Comam. 19Yalnipaxo Comam Jesús hune'xa cuybanile haca' ti': —Yet hunel ay hune' naj winaj caw k'alom, han̈c'an̈e k'ap xilk'ape caw c'ul, caw ay istohol chaco naj yin̈. Chec'tzen naj nimeta k'in̈ yul yatut hunun tz'ayic. 20- 21Aypaxo hune' naj caw meba', Lázaro isbi; chiay tz'on̈no isti' ispultahil yatut naj k'alom tu', caw choche naj yak'a' noho isc'ul yu isk'al isti' naj k'alom chi'ayc'ayti sat meẍa. Caw xin ya'ay naj yu tx'ac, ch'apni xin metx tx'i' islek'a' istx'ac naj tu'. 22Yaj hul hune' tz'ayic bay cam naj Lázaro tu', yilaxto yanma naj yu ebnaj yángel Comam Dios bey hune' ehobal ch'ij paraíso isc'atan̈ icham Abraham. Iscampaxo naj k'alom tu', ismujlax naj. 23Haxa yet ayxa naj k'alom yul cambal, lan̈an xin yec'ya' yanma naj bey tu', ist'an̈xito naj yilnito naj naj Lázaro isc'atan̈ icham Abraham. 24Yah yaw naj k'alom tu', yalni naj haca' ti': “Mam Abraham, tz'ayojab hac'ul win̈an. Chejti naj Lázaro inc'atan̈an ink'ana'an, islaba'ab naj iswi' yiximal isk'ab xol ha ha', cat yul yak'no chewbo naj wak'an, yuto caw ch'ec'ya' wanmahan xol hune' k'a k'a' ti',” ẍi naj k'alom tu'. 25Istak'wi icham Abraham tu': “Hach wet anmahil tijab yul hac'ul yet ayach yul sat yiban̈k'inal, caw c'ulch'ann̈e ec' hawila', wal naj Lázaro ti', caw isya'tajiln̈e bey naj yila'. Yaja' tinan̈, lan̈an yak'ni tzalaho isc'ul naj, walach xin, lan̈an hawaben isya'tajil. 26Yebpaxoj, ay hune' niman xab coxol, walca ta ay mac choche ch'ec'to bay ayex tu', mach chuhi, yebpaxo ta ay mac bay ayex tu' choche ch'ec'ti bey ti', mach chupaxoj,” ẍi icham Abraham tu' tet naj. 27Yalnipaxo naj k'alom tu': “Ta hac tu' xin, Mam Abraham, caw chink'anan tawet ta chachejto naj Lázaro tu' bey yatut inmaman, 28cat yalni naj yabe' howan̈ wuẍtajan ay bey tu', haxinwal mach chul ebnaj yeta' yanma bay ay inti'an,” ẍi naj. 29Yalnipaxo icham Abraham tu': “Wal ebnaj hawuẍta tu', ayco tzet tz'ibn̈ebil yu naj Moisés yeb tzet tz'ibn̈ebil yu ebnaj ischejab Comam Dios tet ebnaj. ¡Isyijeojab ebnaj tzet chala!” ẍi icham. 30Istak'wican̈ naj k'alom tu': “Ho', yeli Mam Abraham, yaja' ta ay hunu naj camnaxa chiitzitzibican̈, cat isto yalno tet ebnaj wuẍtatu'an chimisbeja'cano ebnaj istx'ojal,” ẍi naj. 31Yalnipaxo icham Abraham: “Tato mach choche ebnaj yabe tzet yalcano naj Moisés yeb tzet halbilcano yu ebnaj ischejab Comam Dios, waxan̈ca ay hunu naj camnaxa chiitzitzbican̈ xol camom, cat isto yalno tet ebnaj, maẍtic'am chahpaxico ebnaj yin̈ isc'ul,” ẍi icham Abraham tet naj, ẍi Comam Jesús.

will be added

X\