SAN LUCAS 15

1Sunil heb'naj iomiloj melyu yet tohlab'al yin̈ anma b'oj heb'naj mat t'in̈anoj yecoj, x'apni yab'e' stzoti' Comam Jesús. 2Yuxin x'oc heb'naj fariseo b'oj heb'naj cuywaom yin̈ sley ya' Moisés sahsonoj tet hunun, chalni heb'naj: —Naj Jesús ti', caw stzan naj yoc xol anma mat t'in̈anoj yecoj cat swa' naj b'oj. 3Yuxin xal Comam hune' cuywab'al tet heb'naj: 4—K'inaloj ta ay hunuj naj ay hunuj ciento scanelu, yaja' ẍc'aytoj hunuj no', ¿taxca machacan naj no' 99 sat slowb'al, cat sto naj saynoj no' ẍc'aytoj tu' masanto ẍchalo no' yu naj? 5Yet ẍchalo no', toxan̈e stzala naj, chaniatoj naj no' swixic' cat sto naj yatut. 6Ha' ch'apni naj, syamb'an naj yamigo b'oj mac ahayoj shoyanil yatut naj cat yalni naj: Tzalaan̈wej win̈an, haxca xchalo no' hin canelu c'aynajayojan, ẍi naj. 7Yuxin ẍwal teyetan, hactu' ye b'ay ay Comam Dios. Waxan̈ca hune'n̈e mac sb'ejcan xtx'ojal, caw ay tzalalal yin̈ b'etu', sataj 99 anma xalni ta mach yeẍtooj sb'ejcanoj xtx'ojal. 8K'inaloj ta ay hunuj ix ay hunuj yuwe b'ay txolancoj lahun̈eb' ch'en melyu, yaja' ta ẍlin̈moj xtx'an̈al ch'en cat sc'aytoj hunuj ch'en, ¿taxca mach stzujb'a ix scandil cat stz'isni ix yul yatut sayni ix yin̈ nanc'ulal masanto schalo ch'en? 9Lawi schalo ch'en yu ix, syamb'an ix yet-ixal b'oj mac ahayoj scawilal yatut ix, chalni ix: Tzalaan̈wej win̈an haxca xchalo hin melyu xc'aytoj wuan, ẍi ix. 10Yuxin ẍwal teyetan, hactu' ye b'ay ay Comam Dios, k'a' ẍto tzala Comam yin̈ sat hej yángel yu hune' anma sb'ejcan xtx'ojal. 11Xalni pax Comam Jesús hune' ejemplo: —Hune' ya' comam ay cawan̈ sc'ahol, 12yaja' naj scab' c'ahole tu', xal naj tet smam tu': Mam, a' hantaj yetwanoj ay hawa'ni wet tu'an, ẍi naj. Yuxin xitxk'atoj ya' mame tzet ay yin̈ heb'naj scawan̈il. 13Hayeb'ixto tz'ayic tu', x'oc naj scab' c'ahole tu' xtxon̈o'loj sunil tzet xa' smam tet. Lawitu' xto naj yul hune' con̈ob' caw nahat. Hat xb'ey naj sc'ayaloj stohol tzetet xa' smam tet, yin̈ hej xtx'ojal. 14Yet xax stan̈tzecaniloj naj sunil smelyu, xhul hune' niman wahil yul hune' con̈ob' tu'. X'ichi yec' ya' yanma naj man̈ tzetal. 15Yuxa hune' tu' xto naj saya yet smunil tet hune' naj ah con̈ob' tu'. Hactu' xu yaottoj naj tan̈e' txitam sat xtx'otx' naj tu'. 16Yuxa n̈ohchalal ay yala' naj ch'oc naj slob' sat te' te' ch'a'lax slob' no' txitam, yaja' mach mac ch'a'ni tzet slo naj. 17Yuxin xtxumniloj sb'a sc'ul naj, xalni naj: Caw tx'ihal heb'naj smunlawom hin mam caw ay tzet sloan. Walinan, ch'ec' ya' wanma n̈ohchalal b'eti'an. 18Tinan̈, meltzoojin yatut hin maman cat walnoj tet ya'an: Mam, xwacoj hin mul tet Comam Diosan b'oj tawet. 19Matxa yetoj ay hin hawalni ha c'aholojan, to ha c'amte'xa ẍwucojan, quin chinaojan, ẍi naj. 20Lawitu' xanican naj smunil tu', xmeltzo naj sc'atan̈ smam.Ayto yapni naj, x'ilottoj naj yu smam. Caw stz'a'can̈ sc'ul smam naj yin̈. Xto ya' yin̈ an̈e slak'nojayoj naj, x'oc ya' stz'ohnoj naj. 21Xalni naj tet smam tu': Mam, xwacoj hin mul tet Comam Diosan b'oj tawet. Matxa yetoj ay hin hawalni ha c'aholojan, ẍi naj. 22Yaja' xal smam naj tet heb'naj schejab': Chin̈e he lema, as iwejiltij hunuj xil k'ape caw c'ul cat heyanicoj yin̈ hin c'ahol ti'an. Awejcoj scolk'ab' ho' cat heyanipaxcoj xan̈ab' ho'. 23Cat he to heyinojtij no' ni'an wacax b'ak'ichn̈eb'il. Potx'wej no', haxca chon̈ wa'ojwej, jec'tzewej yulb'al hin c'ahol ti'an. 24Haxca hin c'ahol ti'an hacatic'a xax cami, yaja' xpitzc'acan̈, c'aynajxatoj, yaja' xchalopaxoj, ẍi ya' mame. Lawitu' x'oc heb'naj yec'tzenoj k'in̈. 25Yaja' naj b'ab'el c'ahole, aytoj naj munil. Haxa xhul naj, x'apni naj scawilal yatut. Xab'en naj yoc te' son b'oj ay can̈al chui. 26Xawten naj hune' naj chejab', sk'amb'en naj tet naj: ¿Tzet yelapnoj ye hune' k'in̈ ch'ectzelax ti'? ẍi naj. 27Xalni naj chejab': To xhul hawuẍtaj. Yuxin schej ha mam potx'laxoj no' ni'an wacax b'ak'ichn̈eb'il, haxca c'ul ye ho' xhul ho', ẍi naj. 28Caw xchiwacan̈ sc'ul naj b'ab'el c'ahole tu', mach sjectoj naj yul n̈ah. Ha' xab'en smam naj, x'eltij ya' smontectoj naj. 29Xalni naj tet smam: Tijab' yin̈ a c'ul mam, hayeb'xa hab'il ichi hin munlatijan. Mach hunecoj xin man̈c'o tzet chawalan. Yaja' hasta hunuj ni'an caplaẍ mach hunecoj xawa' hin c'uxu b'oj hej wamigoan. 30Tinan̈ haxca xhul hune' naj ha c'ahol ti', ton̈e xb'ey etanojtoj ha melyu yin̈ heb'ix tx'oj ye swi', yuxin cha potx' no' ni'an wacax b'ak'ichn̈eb'il, ẍi naj tet smam. 31Xalni smam naj tet: C'ahol, walach huneln̈etic'a hawe tin c'atan̈an, sunil tzet ayinan, hawet paxoj. 32Tinan̈ yettic'a aya ẍco k'in̈n̈e yulb'al hawuẍtaj, haxca haca' xaxtic'a cam ho', yaja' xpitzc'acan̈ ho', c'aynajtoj ho', yaja' xchalo ho', ẍi ya' mame tu'.


Copyright
Learn More

will be added

X\