SAN LUCAS 15

1Ha' ebnaj chiinilo ch'en tohlabal chito bey Roma, yeb ebnaj mach c'ulo tzet chiswatx'e, ha' ebnaj hitzico yaben tzet chal Comam Jesús. 2Yu hune' tu' xin oc ebnaj fariseo yeb ebnaj cuywawom yin̈ isley naj Moisés buchwal yin̈ Comam, yalni ebnaj: —Wal naj Jesús ti', caw chischah naj ebnaj mulum, cat iswa'paxo naj yeb ebnaj, ẍi ebnaj yin̈ Comam. 3Yuxin yal Comam hune' yechel ti' tet ebnaj: 4—K'inaloj ta ay hunu naj ay cien isme', yaja' ta chic'ayico hunu no', ¿mataxca mach chacano naj no' noventa y nueve bay chilowi, cat isto naj issayno no' c'aynato tu' masanto chi'ilcha no' yu naj? 5Hayet chi'ilcha no' yu naj, caw chitzalacan̈ isc'ul naj, cat yanahto naj no' yiban̈ iswixic', cat istit naj. 6Haxa yet ch'apni naj yatut, cat iscutxbanico naj yamigo yeb anma ayayo iscawilal naj, cat yalni naj: “Tzalahan̈we wintajan yuto ma'ilcha hune' inme'an c'aynatoj,” ẍi naj. 7Yuxin chiwalpaxojan teyet, hayet ch'oc hune' anma mulum yul isk'ab Comam Dios, ay tzalahilal yul satcan̈ satapaxo yin̈ noventa y nueve anma chisna ta machi ismul, ẍi Comam. 8Yalnipaxo Comam Jesús: —K'inaloj ta ay hunu ix ix ay lahon̈eb ismelyu, yaja' ta chisc'ayto ix hunu ch'en, ¿mataxca mach chistzujba ix k'a' yin̈ iscantil, cat istz'isni ix yul yatut, cat issayni ix yin̈ nan̈c'ulal masanto chi'ilcha ch'en yu ix? 9Lahwi yilcha ch'en yu ix xin, cat iscutxbanayo ix iswalix yeb anma ayayo iscawilal, cat yalni ix: “Tzalahan̈we wintajan, yuto ma'ilcha inmelyuhan c'aynatoj,” ẍi ix. 10Yuxin chiwalan teyet, hac tu' yul satcan̈, caw ay tzalahilal xol ebnaj yángel Comam Dios yu hune' naj mulum chisna isba cat yoc yul iskab Comam Dios, ẍi Comam. 11Yalnipaxo Comam Jesús: —Ay hune' naj mame cawan̈ isc'ahol. 12Yaja' naj tzujan winaj tu' yal naj tet ismam: “Mam, ak'cano inmajulan tinan̈,” ẍi naj. Yuxin ispohto naj mame tu' tzet ay yin̈ ebnaj iscawan̈il. 13Hayebixto tz'ayic xin iscutxbanayo naj istohol ismajul ak'lax tet, isto naj bey hune' con̈ob nahat, yoc naj isc'aytzenolo ismelyu yin̈ istx'ojal. 14Hayet xaistan̈tzelo naj sunil ismelyu tu', yichico hune' niman wahilal bey hune' con̈ob tu'. Niẍtejal xin yoc naj yijlen wahil yu man̈tzetal. 15Yuxin to naj isk'ana' yet munil tet hune' naj ay yul con̈ob tu'. Ischejlaxto naj tan̈e txitam sat istx'otx' naj yahaw no'. 16Yu n̈ohchahilal xin yoche naj islob sat te' tx'alib chi'ak'lax islob no' txitam, yuto machi mac ch'ak'ni tzet chislo naj. 17Lahwi tu' xin, istit yin̈ isnabal naj, yalni naj ischuquil: “Sunil isc'amte' inmaman caw ay tzet chislo, wal inpaxojan xin, lan̈an incaman yu wahil bey ti'. 18Wal tinan̈ meltzohoj intohan bey yatut inmamtu'an, cat walnihan tet ya': ‘Mam, caw mawaco inmulan yul sat Comam Dios yebpaxo yul hasat. 19Matxa chu wocan hac'aholoj, to hac'amte'xa chiwucojan,’ quinchin̈etic'ahan,” ẍi naj ischuquil. 20Lahwi tu' xin, ispaxto naj bey yatut ismam. Ayto yapni naj xin, yillaxto naj yu ismam; caw tz'aycan̈ isc'ul ismam naj yilni. Isto lemna naj mame tu' ischahno naj. Yoc lak'no naj yin̈ isc'ahol tu', istz'ohnipaxo naj isk'otx naj yu tzalahilal. 21Yalni naj tet ismam: “Mam, caw mawaco inmulan yul sat Comam Dios, yebpaxo tawet. Matxa chu wocan hac'aholoj,” ẍi naj. 22Yalni naj mame tu' tet ebnaj ischejab: “As iwelti yin̈ an̈e hunu xilk'ape caw c'ul, cat yoc yin̈ inc'aholti'an, cat heyanico isjolk'ab naj yeb isxan̈ab naj, 23cat hetopaxo heyinoti hunu no' wacax caw bak'ich, cat hepotx'ni camo no', yuto chijec'tze hunu k'in̈, cat cowa'wej. 24Yuto ha' hune' inc'aholti'an haca'tan̈e camnaxa, yaja' haca'tan̈e mahulcan̈ isc'ul naj. Haca' ta c'aynaxato naj, yaj tinan̈ ma'ilcha naj,” ẍi naj mame tu'. Lahwi tu' xin yec'tzelax hune' k'in̈ tu'. 25Yet ayco ebnaj yin̈ hune' k'in̈ tu', yul naj babel c'ahole yin̈ ismunil. Yaja' ayto yapni naj bey yatut yaben naj hune' k'in̈ tu'. 26Yawten naj hune' ischejab ismam, isk'amben naj: “¿Tzet yin̈ yuxin ayco hune' k'in̈ tu'?” ẍi naj. 27Yalni naj chejab tu' tet naj: “To hawuẍta mahuli, yuxin mayal hamam ta chipotx'lax camo hunu no' wacax caw bak'ich yuto cawn̈e mayu yul naj,” ẍi naj. 28Yaja' caw tit ishowal naj, yuxin mach isjecto naj yul yatut ismam. Haxa yet yaben naj mame tu', yelti naj, yay sat naj tet isc'ahol tu' ta ch'octo naj yul n̈a. 29Yalni naj tet ismam tu': “Mam, caw hawohtaj hantaxa tiempo wichicojan inmunlahan tawintaj. Machi hunelo chinman̈c'ohan tzet chawala, yaj nitam hunu no' nich'an chiw chawak' wetan cat wec'tzenan hunu k'in̈ yeb ej wamigohan,” ẍi naj. 30“¿Tom yu mahul hune' hac'ahol ti' yuxin maxapotx' camo no' wacax caw bak'ich? Naj ton̈e etanto hamelyu yin̈ ebix ix tx'oj ye iswi',” ẍi naj tet ismam tu'. 31Istak'wi naj mame tu': “C'ahol, hach ti', ayachtic'aco inc'atan̈an sunilbal tiempo, yeb sunil tzet ayinan hawetpaxo yehi. 32Yaja' tinan̈ caw yilal yoc hune' k'in̈ ti' cat jak'ni tzala coc'ul, yuto hune' hawuẍta ti' haca'tan̈e camnaxa, yaj mahulcan̈ isc'ul hunelxa. Haca' ta c'aynaxato naj, yaj tinan̈ xin ma'ilcha naj,” ẍi naj mame tu', ẍi Comam.

will be added

X\