SAN LUCAS 14

1Yet hune' tz'ayic xewb'al xto Comam Jesús wa'oj yatut hune' naj swi'al yin̈ heb'naj fariseo. Yaja' aycoj heb'naj sc'atni tzet chub' Comam. 2Ay paxictoj hune' naj ẍmal snimanil. 3Sk'amb'en Comam tet heb'naj cuywaom yin̈ sley ya' Moisés b'oj tet heb'naj fariseo tu': —¿Chim sje jan̈ten hunuj anma tx'oj ye yin̈ tz'ayic xewb'al ti' mato machoj?. 4Yaja' mach xta'wi heb'naj. Stzab'niay Comam sk'ab' naj tx'oj ye tu', x'an̈chacan naj. Lawitu' schejottoj naj pax yu Comam, 5xalni Comam tet heb'naj: —¿Mac hunujex tinan̈ ta ẍtohc'ay hunuj heyuninal mato he wacax yul hune' niman holan, taxca macheyihtij, waxan̈ca tz'ayic xewb'al? . 6Yaja' maẍtic'a xta'wi heb'naj. 7Ha' xilni Comam Jesús ta ch'ec' majmon heb'naj ijb'alom yin̈ hej tz'on̈ob'al yetn̈e anma k'a' ay smay yeyi, xalni Comam: 8—Yet chex to ijb'aloj yin̈ hunuj mohilal machex tz'on̈i sat tz'on̈ob'al k'a c'ul b'ay yetn̈e anma k'a' ay smay yeyi, haxca ta ch'apni hunujxa anma k'a' ayto smay te sataj, 9cat yapni naj xquex awten tu' yalnoj teyet: Acanoj hune' tz'on̈ob'al ti' tet naj ti', ẍinaoj naj. Somil tx'ixwilal cheyanojcanoj he tz'on̈ob'al tu' cat he toj he tz'on̈b'anoj he b'a yin̈ slahub'al tz'on̈ob'al. 10Yuxin yet chex to ijb'aloj, hat che tz'on̈b'a he b'a yin̈ slahub'al tz'on̈ob'al, haxin̈wal yet ch'apnoj naj quex awten tu' yalnoj teyet: Wamigo, ocan̈toj sat tz'on̈ob'al k'a c'ul, ẍinaoj naj. Hactu' chu yocoj he may yul sat hunk'aanxa heb'naj tz'on̈ancoj yin̈ meẍa b'oj hex. 11Haxca mac caw ahatoj stel chab'e, ch'ilaxojayoj, wal mac ahayoj ni'anb'ail, ch'alaxojcoj smay. 12Xalni Comam tet naj x'awten wa'oj tu': —Yet cha yamb'an anma wa'oj ta c'atan̈ machawawte hej hawamigo, hej hawuẍtaj, maca mac ayto hawu hab'a b'oj, ni hej mac k'alom ayayoj ta cawilal. Haxca taj chach yawte pax wa'oj, hat cha chana spaj yin̈ hactu'. 13Yuxin yet chawec'tzen hunuj k'in̈ awte anma meb'a' wa'oj ta c'atan̈, anma mach sk'ab', anma machu yeq'ui maca mactaj machu yilni. 14Ta hactu' chawute, sak'al hawet haxca hunk'aan anma tu' machu ya'ni spaj tawet. Yet chach pitzc'aojcan̈ b'oj anma c'ul xul yub'c'uj satyib'an̈k'inal ti', hato tu' cha chanoj spaj. 15Yet xab'en heb'naj hune' tu', hune' naj tz'on̈ancoj yin̈ meẍa xhalni tet Comam Jesús: —Sak'al yet mac ha'hun yin̈ hune' wa'oj b'ay aycoj Comam Dios Yahawoj. 16Xalni Comam: —Hunec, xiche hune' naj hune' niman k'in̈. Xawten naj tx'ihal anma wa'oj. 17Yet x'apni yorail syamicoj anma, xanitoj naj schejab' yalnoj tet mactaj awteb'il yu: Catwej, ayxa ayoj ita sat meẍa, ẍi naj chejab' tu' tet heb'naj. 18Yaja' sunil mactaj awteb'il tu' x'oc sk'ana snimanil sc'ul naj. Xalni naj b'ab'el: Lan̈anto hin lok'niloj hune' hin tx'otx'an. Caw yilal chin to wila'an b'ay ch'ec' tx'otx'. A' nimanc'ulal win̈an, machu hin toan, ẍi naj tet naj chejab' tu'. 19Xalni hunxa naj scab': Xin lok' howeb' mohan no' bueyan, chin to wilwe'an ta c'ul smunla no'. A' nimanc'ulal win̈an, machu hin toan, ẍi pax naj. 20Xalni hunxa naj syox: Lan̈anto hin mohyilojan, yuxin machu hin toan, ẍi pax naj. 21Yet xmeltzo naj chejab' tu', xalni naj tet naj yahaw tzet xal heb'naj tu', yuxin xchiwacan̈ sc'ul naj. Xalni naj tet naj chejab' tu': Tinan̈, as yin̈ an̈e yulaj calle b'oj yulaj niẍtej b'eh yul con̈ob' ti', cat hawinitij hantaj anma meb'a', anma sc'antajil yeyi, hej mactaj machu yilni b'oj mactaj machu yeq'ui, ẍi naj yahaw tu'. 22Maytax tu', xhul naj chejab', xalni naj: Mamin, xax quin b'ey b'ay chawalan, yaja' caw ayto b'ay ch'eh anma, ẍi naj. 23Xalni naj yahaw tu' tet naj: As yulaj nimej b'eh b'oj yulaj tx'an̈b'eh xtxamcon̈ob' cat hawalni tet anma, caw yilal ẍtita, haxin̈wal ẍnohiloj yul watut ti'an. 24Haxca ẍwal teyetan: Mactaj xwawte sb'ab'elalan, mach hunuj ch'ab'lenoj ita ẍwa'a' ti'an, ẍi naj yahaw tu'. 25Yet hunec, caw tx'ihal anma tzujancoj yin̈ Comam Jesús. Xmeltzo t'an̈na Comam yin̈ heb'jetb'i, xalni Comam: 26—Ta ay mac choche ch'oc tzujnuj win̈an, yaja' k'a' aycoj yanma yin̈ smam smi' tin satajan, maca yin̈ yixal, yuninal, yuẍtaj, yanab', maca k'a' sya'iln̈e sb'a tin satajan, ta hactu' ye yul swi', mat chu yoc tzujnuj win̈an. 27Mac mach sje sc'ul yec' yi'noj tzet ẍwuan, hasta ya'ni camoj sb'a yin̈ culus, mach chu yoc tzujnuj win̈an. 28K'inaloj hex tinan̈, ta cheyoche heya'a'can̈ hunuj heyatut caw nimejal, ¿taxca mat b'ab'eloj chex oc tz'on̈noj cat heyoc tucnuj, cat heyilni hantaj che c'aya' yahb'al te' yu heyilni ta chex c'oji? 29Mato ton̈e niman xeyayoj xe' heyatut tu', matxa chu he lahni yah te'. Hantaj anma chex ilnoj, ch'ocoj hex stzeye', 30cat yalnoj: Hune' naj ti' ton̈e xichecoj naj yatut, matxa chu slahni naj, ẍim anma tu' yin̈. 31B'oj hunxa: Ta ay hunuj naj rey ẍto ya'a' howal yin̈ hunujxa naj rey, yaja' ta lahun̈eb'n̈e mil soldado naj, ¿taxca mat b'ab'eloj ch'oc tz'on̈noj naj cat yoc tucnuj naj yilni ta ẍc'ojoj naj yin̈ naj i'n̈e hunc'al mil soldado? 32Yaja' ta mach ẍc'oji naj chab'e, yet nahatto yeloj hune'xa naj tu', pet mi chatoj naj schejab' yala' tzet sk'an naj yocb'aloj heb'naj yin̈ ak'anc'ulal. 33Hactu' ye hune' ti', ta mache tin̈chacan tzet ayex, machu heyoc tzujnuj win̈an. 34Caw c'ul atz'am atz'am yocnicoj ju, yaja' ta ẍc'aytoj sc'achi'al atz'am, ¿tzet taxca chu sc'achib'iloj atz'am hunecxa? 35Matxa tzet ch'ocnicoj atz'am, ni janicoj scaliloj tx'otx'otx' ni xol abono, to b'ejb'ealxa chucan atz'am. Maquex cheyab'e hune' ti', a'wej heyanma he txumni tzet chaliloj.


Copyright
Learn More

will be added

X\