1 Ha' yin̈ hune' tiempohal tu' ay huntek'an ebnaj apni halno tet Comam Jesús yin̈ tzet yu ispotx'lax huntek'an ebnaj ah Galilea yu ischejbanil naj Pilato. Ismalto ischiq'uil ebnaj xol ischiq'uil no nok' lan̈an yak'lax xahanbalil tet Comam Dios. 2 Yalni Comam Jesús tet ebnaj: —¿Ham heyalni ta ec'bal ismul ebnaj cam tu' sata huntek'anxa ebnaj ay bey Galilea tu'? ¡Machoj! 3 Wal xin, chiwalan teyet, ta mach chebejcano hetx'ojal, chexcam haca' ebnaj tu'. 4 Haca'paxo ebnaj waxajlahon̈wan̈ cam bey Siloé yet yayc'ay hune' torre yiban̈ ebnaj, ¿tom caw ec'bal ismul ebnaj tu' sata huntek'anxa anma bey con̈ob Jerusalén, heyalni? 5 ¡Machoj! Haquexpax tu' hex ti', ta mach chexmeltzoco yul isk'ab Comam Dios, chexcampaxoj, ẍi Comam. 6 Yalni Comam Jesús hunxa yechel ti' tet anma: —Ay hune' naj, ay hune' te' higuera sat istx'otx'. Isto naj yilno ta ay sat te', yaja' haxa yet yapni naj yilno te', machi huno sat te' ilcha yu naj. Isto naj yalno tet naj chitan̈en istx'otx' tu'. 7 Yalni naj tet naj: “Oxebxa habil chilan wulic'ojan wilnojan ta ay sat hune' te' higuera ti', yaja' caw machi huno sat te' chak'a. Wal tinan̈ xin, tzoc'can̈ te', naban̈e majbililo tx'otx' yu te',” ẍi naj. 8 Istak'wican̈ naj chitan̈en istx'otx' naj tu': “Mamin, acano te' hune'xa habil ti'. Chint'oco'an tx'otx' yich te', cat wanicojan yabonohal te'. 9 Ta chiyak'a sat te', c'ul chal tu', ta mach xin, cat hatzoc'nican̈ te',” ẍi naj. 10 Yin̈ hune' tz'ayical xewilal yet iscuywa Comam yul iscapilla ebnaj Israel, 11 ayicto hune' ix ix waxajlan̈ebxa habil yoc hune' yabil yin̈ yu hune' ischejab naj matzwalil, caw c'on̈anxa ye ix yu, maẍtic'a xin chu istoholban̈en isba ix. 12 Hayet yilnito Comam Jesús ix, yawtenti Comam ix isc'atan̈, yalni Comam tet ix: —Hach ti' miyay, macachcolchalo yul isk'ab hune' yabil ti', ẍi Comam. 13 Lahwi tu' xin yanayo Comam isk'ab yiban̈ ix. Hac tu' yu istoholban̈en isba ix. Yichico ix yalni c'ulla tzoti' yin̈ Comam Dios. 14 Yaja' caw tit ishowal naj yahawil yin̈ capilla, yuto cawxican̈ hune' ix tu' yu Comam yin̈ istz'ayical xewilal. Yalni naj tet anma: —Caw wajeb tz'ayic chon̈munla yul semana, yuxin yulbal wajeb tz'ayic tu' hulan̈we heyak'a' an̈te heba, yaj maẍtaj yin̈ istz'ayical xewilal, ẍi naj. 15 Istak'wican̈ Comam: —Hex cheyal heba c'ulal ti', ta ay hunu hewacax maca to hunu hecheh xecan yin̈ istz'ayical xewilal, ¿tom mach chepuhilo no', cat heto heyak'no uc'u ha' no'? 16 Wal hune' ix ix ti', yichmam ix ye icham Abraham, waxajlan̈ebxa habil istzabloti ix yu hune' yabil ak'bilico yu ischejab naj matzwalil ti'. ¿Tom xin yu istz'ayical xewilal yuxin mach chu iscolcha ix yin̈ hune' isya'tajil ayco yin̈ ti', heyalni? ẍi Comam. 17 Hayet yalni Comam haca' tu', sunil ebnaj ayco ishowal yin̈ Comam tx'ixwican̈ ebnaj yet yaben hune' tu'. Wal sunil anma xin, caw chitzala isc'ul yilni sunil nimeta c'aybalc'ule iswatx'e Comam. 18 Yalnipaxo Comam Jesús: —¿Tzet chu isch'ib isbisil anma ch'oc yul isk'ab Comam Dios, heyalni? ¿Baytet yeb c'ul inlahbanan? 19 Anma chaco isba yul isk'ab Comam Dios, lahan yeb hunu nich'an yin̈atil te' mostaza chistz'un hunu naj sat istx'otx'. Chich'ibcan̈ te', cat yoc te' nime te'al, hac tu' xin chu yapni no' ch'ic iswatx'enoco yatut xol isk'ab te', ẍi Comam. 20 Yalnipaxo Comam: —Chiwalan hune'xa yechel ti' teyet yin̈ tzet chu isch'ib isbisil anma chaco isba yul isk'ab Comam Dios. 21 Lahan haca' nich'ano yan̈al ixim pan chaco hunu ix ix xol oxeb mal ixim harina. Caw xin chisipc'acan̈ sunil ixim yu, ẍi Comam. 22 Hayet isto Comam Jesús yul beh chi'apni bey Jerusalén, ay huntek'an con̈ob yeb huntek'an aldea bay ec' Comam cuywal. 23 Ay xin hune' naj k'amben tet Comam: —Mamin, ¿tom haywan̈ch'ann̈e mac chicolchahi? ẍi naj. Istak'wi Comam: 24 —Ak'we heyanma heyocto yul hune' pulta nich'an ch'an sat. Wal xin chiwalan teyet, caw tx'i'al mac choche chi'octoj, yaj mach chu yu. 25 Wal xin haninti'an lahaninan haca' hunu yahaw n̈a. Yet ak'balil xin chinpebaltijan ispultahil te'. Lahwi tu', hex chexcancano istin̈a ch'elicto heyaw sat pulta, cheyalni: “Mamin, hajon̈ic'tojan̈,” quexchi. Yaj chintak'wihan teyet: “Mach quexwohtajojan,” quinchiyan. 26 Yet ayex istin̈a tu', cheyalnictoj: “Caw hune'n̈e con̈wa'i, con̈hacuynipaxojan̈ yulajla beh,” quexchi. 27 Cat xin intak'wipaxojan teyet: “Mawalan teyet ta mach quexwohtajojan. ¡Elan̈we inc'atan̈an hex istx'ojaln̈e chewatx'e!” quinchiyan teyet yin̈ hune' tz'ayical tu'. 28 Hac tu' xin chu heyoc ok'oj, cat isn̈etx'la heyeh yu isya'tajil yet cheyilni icham Abraham yeb naj Isaac yeb naj Jacobo yeb sunil ebnaj ischejab Comam Dios ayco isc'atan̈ Comam. Walex hex ti', mach chexchahlaxictoj. 29 Wal xin chitit anma yulajla con̈ob yul sat yiban̈k'inal ti', cat iscutxico isc'atan̈ Comam Dios, cat iswa' sat meẍa isc'atan̈ Comam Dios Yahawil. 30 Ay mac machi yelapno yul sat anma tinan̈, yaj caw ay yelapno ye yul sat Comam Dios, ha' caw c'ul ch'elcanico yet bak'in. Aypaxo anma, caw ay yelapno ye tinan̈ yul sat anma, yaj mach c'ulu ch'eloco yet bak'in, ẍi Comam. 31 Ha'tic'a yin̈ hune' tz'ayic tu', apni huntek'an ebnaj fariseo isc'atan̈ Comam Jesús, yalni ebnaj: —Mamin, elan̈ yul cocon̈obti'an̈ yuto choche naj Herodes cachispotx'o', ẍi ebnaj. 32 Istak'wi Comam: —As halwe tet hune' naj lek'ti' tu' haca' no' wech ta hune' tz'ayic ti' yebpaxo hecal chiwak' cawxojan anma ya'ay, yebpaxo xin chiwilojan ischejab naj matzwalil yin̈ anma, ha' to yet cabe chilahwi inmunilti'an. 33 Yuto yilal inlahnihan hune' inbelti'an tinan̈ yeb hecal, yet cabe xin chinapnihan bey Jerusalén, yuto sunil ischejab Comam Dios yilal iscam bey Jerusalén tu', ẍi Comam tet ebnaj. 34 Yalnipaxo Comam: —Hex ah Jerusalén hex ti', chepotx' camo ebnaj ischejab Comam Dios, chek'ojni camo ebnaj chejbilti texol yu Comam. Caw tx'i'al el quexwawtecojan yul ink'aban, haca' chu yawtenico no' mi'e chiyo niẍte yunin yalan̈ xic', yaja' machi heje. 35 Wal tinan̈ chiwalcanojan teyet, hune' bay ayex ti' chibejlaxcanoj. Chiwalnipaxcanojan teyet tato matxa chinheyilan masanto ch'apni yorahil bay cheyala': “Jalawe tzoti' c'ul yin̈ Mac chul coxol yin̈ isbi Comam Dios,” quexchi, ẍi Comam.
