SAN LUCAS 12

1Wal xin caw ismilalxa anma iscutxba isba yaben tzet chal Comam Jesús, toxan̈e chistenle isba anma. Yalni Comam Jesús tet ebnaj iscuywom: —Cheyil heba tet ebnaj fariseo, yuto chal isba ebnaj c'ulal. Wal xin ha' iscuybanil ebnaj lahan haca' nich'an yan̈al ixim pan ch'oc xol ixim harina, sunil ixim chisipc'a yu. 2Yuto sunil tzet ebabil ch'elo yen̈el, yebpaxo sunil tzet ewan yehi ch'ixtan̈wilo sata anma. 3Yuxin yin̈ caw yel chiwalan teyet, sunil tzet cheyal xol k'ejholo chi'abelaxo yu anma yet tz'ayical, yebpaxo sunil tzoti' chihallax yin̈ nanc'ulal yul hunu n̈a, chihallaxo yin̈ caw ip istin̈a. 4Walex wamigo hexti'an, chiwalan teyet mach chexxiw tet ebnaj chu ispotx'ni camo henimanil, yuto matxa hunuxa tzet wal quexyuten ebnaj. 5Yaj chiwalan teyet, mac tet bay wal hexiwi, ha' ton tet Comam Dios, Comam chu quexyak'ni camoj, chilahwi tu' aypaxo yip quexyanito xol k'a k'a' mach istan̈bal. Ha' ton tet Comam tu' chexiwi. 6Chisje hetxumnilo yin̈ no' niẍte ch'ic, hoc'on̈ no' yin̈ cab centavo, yaj machi hunu no' chito nahul yu Comam. 7Hajxamex hex ti', caw niman hayelapno sata no'. ¿Tom mach cheyohtajoj ta sunil xil hewi' bisbil yin̈ hununtajil yu Comam? Yuxin chiwalan teyet, mach chexxiwi. 8Chiwalan teyet, macn̈etic'a mach chitx'ixwi yalnilo isba sata anma ta wetan yehi, Hanin Ak'bilintijan texol yu Comam Dios, chiwalan ta wetan anma tu' sata ebnaj yángel Comam ay bey satcan̈. 9Yaja' mac chitx'ixwi yalni sata anma ta wetan yehi, chiwalpaxojan sata ebnaj yángel Comam Dios tato mach wetojan ye anma tu'. 10Macta chibuchwahi cat yalni hunu tzoti' tx'oj win̈an, Haninan Ak'bilintijan texol yu Comam Dios, ayto nimanc'ulal yin̈, yaj mac chihalni tx'oj tzoti' yin̈ Comam Espíritu Santo, matxa nimanc'ulal yin̈. 11Hayet chexilaxto sata ebnaj yahawil yeco yin̈ iscapilla ebnaj Israel, maca sata ebnaj juez, maca satapaxo ebnaj alcal, mach ch'oc yin̈ hec'ul yin̈ tzet chu hecolni heba, yeb tzet chu hepajtzen istzoti' ebnaj. 12Yuto hayet chi'apni istiempohal heyilaxto sata ebnaj, ha' Comam Espíritu Santo chak'ni hehelanil hetzoteli, ẍi Comam tet anma. 13Xol anma tu', ay hune' naj halni tet Comam Jesús haca' ti': —Mam cuywawom, hal tet wuẍtati'an ink'ana'an yak'a'ab naj inmajulan yin̈ tzet ak'bilcano jetan̈ yu comaman̈, ẍi naj. 14Yaj yal Comam tet naj: —Hach wet anmahil, haninti'an mach alcalo wecojan texol, cat inpohnitojan tzet ye tu' teyin̈, ẍi Comam. 15Yalni Comam tet anma xin: —Nann̈e heyu, caw cheyil heba, mach chetz'unico heyanma yin̈ k'alomal, yuto isk'inal anma mach chipitzc'ati yin̈ tzettaj ay yul isk'ab, ẍi Comam. 16Yalni Comam hune' yechel ti' tet anma: —Ay hune' naj winaj caw k'alom, caw niman sat istz'unub yak'a. 17Yuxinto yal naj k'alom tu' ischuquil haca' ti': “¿Tzet wal wuten inbahan? Caw matxa chabe bay chinc'ubahan sat intz'unubti'an,” ẍi naj. 18Istit yin̈ isnabal naj, yalni naj haca' ti': “Wohtaxahan tzet chinwatx'e'an. Chiwuchc'ayojan huntek'an inc'un̈ati'an, cat inwatx'enojan huntek'anxa caw nimej chu, haxinwal c'uxan yocto sunil sat intz'unubti'an yul yeb sunil tzet ayinan. 19Chilahwi tu' xin cat inxewan yuto ay tzet ayinan yin̈ sunilbal tiempo. Chinxewan yeb chinwa'an, cat wak'nihan tzet choche wanmahan, cat wak'ni tzalaho inc'ulan,” ẍi naj tet yanma. 20Tzujan tu' xin, yalni Comam Dios tet naj: “¡Caw machi hawi'! Yin̈ hune' ak'bal ti' chaẍcamoj. ¿Mac tet xin chicanocano huntek'an c'ubabil hawu ti' hawalni?” ẍi Comam Dios tet naj. 21Haca' ton hune' naj winaj ti', hac tu' ye anma yin̈n̈etic'a k'alomal chaco yanma, yuxin yul sat Comam Dios caw meba' huntek'an anma tu', ẍi Comam. 22Lahwi tu' xin, yalni Comam Jesús tet ebnaj iscuywom: —Chiwalan teyet, mach cheyaco yin̈ hec'ul yin̈ tzet chelo yebpaxo yin̈ bay chitit istohol xil hek'ap cheyacoj. 23Heyohtaj tato ha' Comam Dios ch'ak'ni cocawil, ¿hatoc'anab tzet chicolo mach chak' Comam heyalni? Ha' Comam ak'nipaxo hune' conimanil ti' ¿tom mach chak'apaxo Comam xil cok'ap heyalni? 24Chisje hetxumni yin̈ no' hoh, machi yawal no' chacoj, mach chihatx'wipaxo no', machipaxo isc'un̈a no', yaja' Comam Dios chi'ak'ni tzet chislo no'. Hajexxam hex ti', to caw ec'bal heyelapno sata no'. 25¿Aymi hunujex ti' yu caw cheyaco yin̈ hec'ul chihitzto nich'anoxa hecawil yul sat yiban̈k'inal ti'? ¡Machoj! 26Yuxin ta mach chexk'oji hewatx'en tzet ye tu' niẍch'an, ¿tzet yin̈ xin cheyaco yin̈ hec'ul? 27Ilwec'anab te' caj, mach chimunla te', mach chichemlipaxo te', yaj chiwalan teyet naj rey Salomón yet payat, waxan̈ca caw k'alom naj, yaja' machi apni isk'aptzen isba naj haca' isc'ulch'anil te' caj tu'. 28Walca caw c'ulch'an jilni isxumaquil te' caj tu' tinan̈, yaj wal yet hecal cabe chin̈uslaxto te' yul horno. Ta chak' Comam isc'ulch'anil te' caj, ¿hatoc'anab xil hek'ab mach chak' Comam? hex ti' machi caw chicawxi hec'ul yin̈ Comam. 29Wal xin mach cheyaco yin̈ hec'ul bay chi-caw-istit tzet chelo. 30Wal anma mach ohtan̈e Comam Dios, caw chaco huntek'an tzet ye tu' ti' yin̈ isc'ul, yaja' walex hex ti', ay hune' Hemam yohtaxa tzet ch'ocnico heyu. 31Yuxin aweco heyanma heyijen yin̈ tzet chal Comam Dios babel, haxa huntek'anxa ch'ocnico heyu, chi'ak'laxo teyet, ẍi Comam Jesús tet ebnaj iscuywom. 32Yalnipaxo Comam Jesús tet ebnaj iscuywom: —Mach chexxiw hex xahan ay wuti'an. Caw haywan̈exch'an, yaja' xa'el yin̈ isc'ul Comam ay bey satcan̈ quexyanico yuninaloj. 33Txon̈weto tzet ayex, cat heyak'ni istohol tet anma matzet aya, hac tu' chu hewatx'en hune' istx'uyal hek'alomal mach chik'ato bey satcan̈. Huntek'an k'alomal tu' machi bak'inal chitan̈iloj yuto ha' bey tu' machi elk'om, machipaxo no' ih chi'etanotoj. 34Wal xin ha' bay ay hek'alomal ha' tu' ayco heyanma, ẍi Comam. 35Yalnipaxo Comam: —Caw helanojab cheyute heba haca' hunu naj soldado caw watx'ebilico xil isk'ap, yeb aypaxico k'a' yin̈ iscantil. 36Lahanojab cheyute heba haca' ebnaj chejab chismaj yul ispatrón chibey yin̈ hunu mohyilal. Hayet ch'apni naj bey yatut cat yahwi naj. Caw yin̈ an̈e xin chishaj ebnaj pulta tet naj patrón tu'. 37Caw sak'al yet ebnaj chejab elna iswayan̈ yet ch'apni ispatrón tu'. Chiwalan teyet, caw yin̈ an̈e chishelilo xil isk'ap naj patrón, cat yawten naj ebnaj wa'o sat meẍa; ha' caw naj chibatxnic'o tzet chislo ebnaj tu'. 38Yuxin waxan̈ca yin̈ chuman ak'bal, maca yet lan̈anxa issajbiloj, cat yapni naj patrón tu', caw sak'al yet ebnaj chejab ta elna iswayan̈ ebnaj. 39Nachaojabilo heyu huntek'an tzet chiwalti'an teyet: Haca' hunu naj yahaw n̈a, k'inalo ta yohta naj tzet orahil ch'apni naj elk'om yin̈ yatut, caw chimmajwa naj, machim chischacto naj naj yul yatut. 40Ha' quexpax tu' hex ti', helan cheyute heba. Ha' taxca yet mach nano heyu, cat wulan, Hanin Ak'bilintijan texol yu Comam Dios, ẍi Comam tet ebnaj iscuywom tu'. 41Isk'amben naj Pedro tet Comam: —Mamin, ¿han̈em jetan̈ chawal hune' yechel ti', mato tet sunil anma? ẍi naj. 42Yalni Comam: —Hune' ti' chiwalan yin̈ hune' naj ilom munil caw yijem yeb caw ay isnabal, ak'bilico yu naj yahaw munil yul yatut yu yak'ni tzet chislo ebnaj munlawom haca' yalni naj yahaw tu'. 43Caw sak'al yet naj ta lan̈an isyijen naj haca' tzet halbilcano tet yet ch'apni naj yahaw munil. 44Yin̈ caw isyelal chiwalan teyet: Naj yahaw munil tu' chaco naj naj yijem tu' yahawo yin̈ sunil tzet aya. 45Yaj ta chal naj ischuquil: “Wal ya' wahawan, ¿bak'in tam chul ya'?” ta ẍi naj, cat yoc naj ismak'ni ebnaj chejab yeb ebix chejab, yeb xin han̈c'an̈e yin̈ wa'o chaco yanma naj, yeb xin yin̈ tzet chuc' naj, cat yoccano naj uc'u te'. 46Haxa yet istz'ayical mach echmabilo yahaw naj yu caw tona nahul ay naj, cat yul lemna naj yahaw tu', hac tu' xin caw ch'ak'lax ec'oya' yanma naj xol isya'tajil cat yalaxto naj xol ebnaj mach yijemo chute isba. 47K'inalo ta ay hunu naj chejab yohta tzet choche yahaw, yaja' mach chaco naj yin̈ isc'ul iswatx'eni, yeb xin mach chisyijepaxo naj tzet chal naj yahaw tu', ha' hune' naj chejab tu' niman isya'tajil chischah naj. 48Walpaxo naj chejab, mach yohtajo ta tx'oj tzet chiswatx'e, ha' naj tu' hanic'n̈ech'an tz'um ch'ak'lax yija'. Ha' mac niman tzet ak'bilcano tet, nimanpaxo chik'anlax tet, yebpaxo mac niman tzet ak'bilico yul isk'ab, ec'balxa niman chu isk'anlaxayo tet, ẍi Comam. 49Yalnipaxo Comam Jesús: —Haninti'an hulnajinan wak'acojan hune' haca' k'a' yul yiban̈k'inal ti'. Ay wala'an ta chiah xaj hune' k'a' tu' tinan̈. 50Ay hune' niman isya'tajil chihul wiban̈an, ha' ton hune' tu' ayco yin̈ wanmahan, caw xin ch'ec'ya' wanmahan masanto chija' isba hune' tu'. 51¿Ham heyalni ta yu wanicojan ak'anc'ulal xol anma yuxin quinhulan? Machoj, to yu ispohlen isba. 52Wal tinan̈ istzabloxaco hune' ti' xol anma. K'inalo ta ay howan̈o yul hunu n̈a, oxwan̈ ch'oc howal yin̈ cawan̈, haxa cawan̈ tu' ch'oc howal yin̈ oxwan̈. 53Naj mame, ch'oc naj howal yin̈ isc'ahol, naj c'ahole ch'oc howal yin̈ ismam, ix mi'e ch'oc ix howal yin̈ yunin, ix unine ch'oc ix howal yin̈ ismi'. Wal ixnam alibe ch'oc ixnam howal yin̈ yalib, cat yocpaxo ix alibe howal yin̈ ixnam alibe tu', ẍi Comam. 54Yalni Comam Jesús tet anma: —Hayet cheyilni moyan bay chito tz'ayic, caw an̈e chenaloj cat heyalni: “Chak'a' n̈ab tinan̈,” quexchi. Caw xin chij isba tzet cheyala. 55Hayet cheyaben istit jak'ek' yin̈ sur, cheyalpaxoj: “Caw chixobxonoj,” quexchi. Hac tu' xin chu yijni isba. 56Hex cheyal heba c'ulal ti', caw helanex hetxumni yin̈ tzet chute isba tx'o tx'otx' ti', yeb tzet ye tu' cheyil satcan̈ yet chishelni isba tiempo, yaj mach chinacha heyu tzet yelapno ye hune' tiempo bay ayexico ti', ẍi Comam. 57Yalnipaxo Comam: —¿Tzet yin̈ yuxin caw mach chewatx'elo hunu tzet ye tu' texol hechuquil yin̈ caw istoholal? 58K'inalo ta ay hunu mac chachawten sata naj alcal, ha'ojab yet lan̈an isto naj yul beh, cat hak'anni nimanc'ulal tawin̈ tet naj yin̈ ak'anc'ulal. Ta mach xin, yet chaẍapni sata naj alcal, chaẍalaxico yul isk'ab naj mayor, cat cachyanicto naj yul te' preso. 59Chiwalan tawet mach chaẍelti yul preso tu' tato mach tz'ajano chawak' hamulta, ẍi Comam.

will be added

X\