SAN LUCAS 12

1Caw tx'ihal anma syamb'acoj sb'a sc'atan̈ Comam Jesús, xan̈e stente sb'a. X'oc Comam yalnoj tet heb'ya' ẍcuywi yin̈: —Nann̈e heyu tet heb'naj fariseo taj quex cuywitoj yin̈ xtx'ojal nab'il yu heb'naj, haxca ton̈e chal sb'a heb'naj c'ulal. Hune' tu' lahan b'oj ni'an yan̈al pan. 2Yuxin nann̈e heyu haxca sunil tzet eb'ab'il, ch'eloj yen̈el, pax tzetet ewantaj yeyi, ch'eloj sk'umal. 3Sunil tzet cheyal yin̈ ewantaj ch'eloj sk'umal. Hantaj cheyal te xol yin̈ sahwil yet pehan pulta teyin̈, ẍhal-laxoj yin̈ caw ip xol anma yulaj b'eh. 4Walex wamigo ti'an ẍwal teyetan, machex xiw tet anma ẍpotx'ni he nimanil, haxca mach hunujxa tzet chu yuni. 5Ha' ti', xiwan̈wej tet Comam Dios, haxca lawi yiniloj Comam he k'inal, chu hex yaniaytoj xol sk'ak'al infierno. Tet Comam yet ay he xiwi. 6Iwejiloj heyet yin̈ no' niẍtej ch'ic ¿tox mach ẍji' hoc'on̈oj no' yin̈ cab' centavo? Yaja' mach hunuj no' nahuln̈eb'il yu Comam Dios. 7¿Tox mat ec'b'aloj heye sataj no' niẍtej ch'ic tu'? Hasta xil he wi' b'isb'il yu Comam. Yuxin machex xiwi. 8Ẍwal teyetan, mactaj cha' sb'a win̈ yin̈ sat anma Hayin Ab'ilintij yu Comam Dios xol jet-anmail ti'an, ẍwa'a' pax hin b'a yin̈, yin̈ sat hej yángel Comam Diosan. 9Yaja' mac mat sje ya'a' sb'a win̈ yin̈ sat anmaan, mach ẍwa'a' pax hin b'a yin̈, yin̈ sat hej yángel Comaman. 10Mac tx'oj stzotel win̈an, ẍto hu sb'ut'laxtan̈oj smul, yaja' ta yin̈ Espíritu Santo tx'oj stzoteli, matxa chu sb'ut'laxtan̈oj smul. 11Yet ch'a'wojc'ule anma teyin̈ cat he yilaxojtoj tet heb'naj swi'al yul capiya, b'oj yin̈ sat heb'naj swi'al yin̈ hej con̈ob', macheyacoj yin̈ he c'ul tzet cheyute he colnoj he b'a, mato tzet cheyute he pajtzenoj tet heb'naj. 12Haxca yet ch'apnoj hune' stz'ayical tu' ha' Espíritu Santo ch'a'noj heyohtajn̈e tzet cheyala'. 13Xol anma tu' aycoj hune' naj xhalni tet Comam Jesús: —Mam Cuywaom, hal tet wuẍtajan ta cha' hantaj yetwanoj ay hin chanian yin̈ tzet ab'ilcan jet yu co maman. 14Xalni Comam tet naj: —Wamigo, ¿mac xquin anicoj juezal te xolan yu witxk'an tzet ayex tu'an? . 15Xalni Comam tet anma: —Nann̈e heyu, mache tz'uncoj heyanma yin̈ k'alomal, haxca mataj tzet ayon̈, ha' ch'a'noj tzalalal jet. 16Xa'ni Comam hune' cuyb'anile tet anma tu': —Yet hunec, ay hune' naj k'alom, caw tx'ihal ixim trigo xi' sat xtx'otx'. 17X'oc tucnuj naj: ¿Tzet wal wuten hin b'a tinan̈an? Matxa b'ay ẍwa' hantaj xwi' sat hin tx'otx' ti'an, ẍi naj. 18Yaja' lawitu' xtit yin̈ sc'ul naj, xalni naj: ¡A..! Wohtajxaan tzet ẍwute'an. Chin hucha'ayoj hej hin c'un̈a ti'an cat wanojcan̈ hunk'aanxa k'a' nimejan. Hat chin c'ub'a' hantaj tzet xwi' ti'an, b'oj hantajto xcan yet hunb'i. 19Lawitu' cat walnoj tet ni'an wanma ti'an: Tinan̈ caw tx'ihalxa tzet c'uan ju. Ayxa tzet ch'a'noj ec'oj ju yulb'al hayeb'ojxa hab'il. Xewan̈ tinan̈, wa'an̈, huc' hantaj tzet chal ha c'ul, tzalaan̈, ẍi naj tet yanma. 20Yaja' mach xhitzwi yoj xalni Comam Dios tet naj: ¡Tzet canoj ha sucal! Yin̈ hune' ak'b'al ti' chach camoj. ¿Mac tet ẍcanoj hantaj tzetet cha c'ub'acan ti'? ẍi Comam tet naj. 21Hactu' cha'le anma stz'uncoj yanma yin̈ k'alomal, yaja' wal yin̈ yet Comam Dios mach tzet aya. 22Lawitu' xalni Comam Jesús tet heb'ya' ẍcuywi yin̈: —Ẍwal teyetan, macheyacoj yin̈ he c'ul tzet che lob', b'oj b'ay ẍtij stohol xil he k'ap. 23Ta cha' Comam Dios co k'inal, ¿tox macha'a' Comam tzet ẍco lo? Ta cha' Comam co nimanil, ¿tox macha'a' Comam xil co k'ap? 24Iwejiloj heyet yin̈ no' hoh. Mach sc'un̈a no' snohtze, mach strigo no' stz'unu, yaja' ẍtic'a low no' yu Comam Dios. Hajxam hex to k'a' ec'b'alto heye sataj no'. 25¿Mac hunuj hex tinan̈ waxan̈ca caw che tx'inb'acoj yin̈ he c'ul, ¿tox chu heyanicoj yak'b'il he k'inal? 26Yuxin ta machex c'oji heyuni hej tzetet niẍch'an, ¿tzet yuxin cheyacoj hunk'aanxa tu' yin̈ he c'ul? 27Iwejiloj heyet yin̈ te' hak'b'al ẍch'ib' xol telaj. Mach xtx'alwi te', machca ẍchemli te', yaja' ẍwal teyetan: Ya' rey Salomón, caw k'alom ya', yaja' mach x'apni sk'aptzen sb'a ya' haca' sc'ulch'anil te'. 28Ta hactu' ya'ni Comam Dios sc'ulch'anil xumac te' tinan̈, yaja' hecal yul horno xa ẍn̈uslaxojtoj te', hajxam hex, to anmaex. Yaja' caw mach ẍcawxi he c'ul yin̈ Comam Dios. 29Yuxin macheyacoj yin̈ he c'ul b'ay ẍtij tzet che lo. 30Haxca anma mat ohtajn̈eoj Comam Dios k'a' chacoj hunk'aan tzetet tu' yin̈ sc'ul, yaja' wal Comam Dios co Mamwej yohtaj ta ch'ocnicoj hunk'aan tzetet tu' heyu. 31Yuxin, a'wej heyanma heyijyen tzet choche Comam Dios Jahaw, wal hunk'aan tzetet tu' ẍtic'a he chab'. 32Mach ẍtac he c'ul, hex xahan ay wu ti'an, haywan̈ex ch'an, yaja' xax el yin̈ sc'ul Comam co Mamwej hex yanicoj yul sk'ab'. 33Txon̈wejtoj tzet ayex cat he sanitoj stohol tet anma meb'a'. Hactu' chu he watx'en hunuj sc'uanb'al he melyu mach b'ak'in̈ ẍtan̈ojiloj, cat heyamb'an he k'alomal yul satcan̈. Hune' tu' maẍtic'a b'ak'in̈ ẍtan̈ojiloj. B'etu' mach'apni heb'naj elk'om yin̈, machca ch'oc snok'al. 34Haxca b'aytic'a ẍco yamb'a co k'alomal, hat ẍjacoj janma. 35Itz'at cheyute he b'a haca' hune' naj tzejb'il scandil yu, itz'at ye naj smajni yul naj yahaw munil. 36K'inaloj ta ay heb'naj chejab' ẍmajni yul naj yahaw munil speto sb'ey yin̈ hunuj k'in̈ yet mohilal, yet ch'apni naj cat sc'on̈q'uen naj te' pulta, itz'at ye heb'naj chejab' tu' shajni te' yin̈ lemb'il. Haca' chute heb'naj tu' hactu' cheyute paxoj. 37Sak'al yet heb'naj schejab' naj yahaw munil tu' ta chiloj heb'naj swayan̈ yechman yul naj. Yin̈ caw yeli ẍwal teyetan, ha' caw naj yahaw munil tu' chi'a'can̈ sk'ab' scamiẍ cat yawtenojcoj naj heb'naj yin̈ meẍa wa'oj. Ha' caw naj ch'ec'oj b'atxb'on tet heb'naj. 38Waxan̈ca yin̈ chuman ak'b'al, maca yet toxa sajb'i cat yuluj naj, ta itzitzn̈etic'a heb'naj yechmanc'oj yul naj, caw c'ul yet heb'naj chaltu'. 39Txumwej hune'xa ẍwal ti'an: K'inaloj naj yahaw n̈ah, ta yohtajxa naj tzet orail chuluj naj elk'om yin̈, chim smaj naj, mach mi schactoj naj naj elk'om tu' yul yatut. 40Haquex tu', itz'at cheyute he b'a haxca taj nahul heyeyi cat wuluj Hayin Ab'ilintij yu Comam Dios xol jet-anmail ti'an. 41Sk'amb'en ya' Pedro tet Comam: —Mamin, ¿jetn̈em ye hune' cuyb'anil chawal ti'an, mato tet sunil anma chawala?. 42Xalni Comam: —Hune' ti' lan̈an walni tet heb'naj caw yijyoman, tz'ajan sc'ul, ab'ilcoj yu naj yahaw munil yun̈e ya'ni heb'naj stohol heb'naj munlawom yet ch'apni stz'ayical stohlalax heb'naj. 43Sak'al yet naj chejab' tu' ta lan̈an syijyen naj yet chul naj yahaw tu'. 44Yin̈ caw yeli ẍwal teyetan: Cha'a'coj naj yahaw tu' naj schejab' tu' yahawoj yin̈ tzet aya. 45Yaja' k'inaloj ta chala' naj chejab' yin̈ hacti': Xax ec'nicantoj yulb'al naj wahaw ti'an, ẍi naj, cat yocoj naj smak'noj heb'naj yet-munlawomal b'oj heb'ix chejab', ch'ocoj naj ec'tze' k'in̈ cat scamtzenoj naj swi' yu te' uq'ue. 46Mach ninoj ch'ec' yin̈ sc'ul naj, nahul ye naj cat yulujcan̈ lemna naj yahaw tu'. Yuxin ch'a'laxoj ec'oj ya' yanma naj yin̈ sic'leb'il, cat yalaxojcaniltoj naj xol heb'naj mach ẍcawxi sc'ul yin̈ Comam Dios. 47K'inaloj ay hunuj naj chejab' yohtajxa tzet choche naj yahaw tu', yaja' mach syamb'a naj hej tzetet ch'ocnicoj tu', machca syijye naj tzet chal naj yahaw tu', caw ch'a'laxoj ec'oj ya' naj. 48Yaja' naj chejab' mat yohtajoj ta tx'oj chu, hanic'n̈e sya'tajil ch'a'laxoj tet naj. Mactic'a tx'ihal tzetet ch'a'laxcoj yul sk'ab', ec'b'alto chu ẍk'anlaxojayoj tet. 49Hayin ti'an xquin hul wa'a'coj hune' haca' k'a' satyib'an̈k'inal ti'an. ¡Ay wala'an lan̈an schaw hune' k'a' tu' tinan̈! 50Yilal yec'oj ya' wanmaan, ha' ch'ocoj wi'b'aloj ha'an. ¡Caw b'isc'ulal yeloj wanmaan masanto chija' sb'a hune' tu'! 51Ham heyalni ta yu wanicoj anma yin̈ ak'anc'ulalan, yuxin xquin hulan. Machoj, to yu spohnitoj sb'a anma, yuxin xquin hulan. 52Haxca yin̈xa schab'toj ti' howan̈ yin̈ hune' familia spohotoj sb'a, oxwan̈ chutecoj sb'a yin̈ cawan̈, cawan̈ chutecoj sb'a yin̈ oxwan̈. 53Naj mame scaja'can̈ sb'a naj b'oj sc'ahol, ix mi'e scaja'can̈ sb'a ix b'oj ix unine, ix mi'e scaja'can̈ sb'a ix b'oj yalib'. 54Xalni pax Comam Jesús tet anma: —Yet cheyilni stit asun b'ay ẍca sto tz'ayic, cheyala: Cha'a' ha' n̈ab' tinan̈, quex chi. Yeli hactu' chute sb'a. 55Yet yeq'uiloj cak'e', cheyala: Caw ẍpohojcan̈ k'a', quex chi. Yeli hactu' chute sb'a. 56Hex cheyal he b'a c'ulal ti', tz'ajan he c'ul he txumni tzet chute sb'a sat tx'otx'otx' ti' b'oj satcan̈ yet shelni sb'a satyib'an̈k'inal ti', yaja' ¿tzet yuxin mach e txum paxoj tzet lan̈an yixtan̈wi te xol? 57¿Tzet yuxin mache txumiloj teyin̈ yin̈ tzet c'ul heyuni te xol? 58K'inaloj ta ay hunuj naj chex initoj yin̈ sat naj alcal, yet ayextocoj yin̈ b'eh b'oj naj, c'ul mi ta che watx'ecan he b'a yin̈ ak'anc'ulal yun̈e machex yacoj naj yin̈ sat naj alcal tu'. Haxca ta chex apni yin̈ sat naj, yilal hex yanojc'oj naj tet naj policío, haxa naj chex anojictoj yul presu. 59Yin̈ caw yeli, ẍwal teyetan ta mach chex elojtij b'etu' masanto tz'ajan cheya'ayoj he multa.


Copyright
Learn More

will be added

X\