SAN LUCAS 11

1Yet hunec, lan̈an ya'ni Comam Jesús yoración. Lawitu', xalni hune' ya' ẍcuywi yin̈: —Mamin, cuyon̈an yin̈ tzet chu ja'ni joraciónan, haca' xu scuyni ya' Juan heb'ya' ẍcuywi yin̈,. 2Xalni Comam: —Yet cheya'ni he yoración halwej yin̈ hacti':Hach Comam hach co Diosan, xahann̈elaxojab' ha b'ih. Hulan̈ cat hawoc Jahawojan. 3Ẍco k'an tawetan ta chawa' tzet ẍco loh yet hunun tz'ayican. 4Tan̈tzecan co mulan, hacon̈an ẍja' nimanc'ulal yin̈ mac tx'oj chu jin̈an. Machon̈ ha cha ayoj yin̈ ilweb'alan, quex chi. 5Lawi yalni Comam hune' tu', xalnipaxoj: —K'inaloj ay hunuj heyamigo chul hex ilnoj yin̈ chuman ak'b'al cat yalni teyet: Wamigo ta ayto hawitah xcani, a' hanic'oj hin hela'an, 6haxca ay hune' wamigo lan̈anto yul tin c'atan̈an, nahat speto naj, yaja' matzet chin tz'aj wa'a' tet najan, ta ẍi naj teyet. 7Ta chex ta'wi, cheyalni: Machach awicoj win̈an, xax hin peb'a watutan, xax quin oc wayoj b'oj niẍtej wuninalan, yuxin machu wa'ni tzet cha k'an tu'an, ta quex chi. 8Ta cheya'a', yaja' matoj haxca yun̈e heyamigo naj yuxin chex ahojwanoj heya'a' tzet sk'an naj tu', to yun̈e sb'ejnican naj yawicoj teyin̈ yuxin chex ahwanoj heya'a'. 9Yuxin ẍwal teyetan: K'anwej, cat ya'noj Comam Dios tzet che k'ana. Saywej, cat schalooj heyu, awan̈wej sat pulta cat shajlaxoj te' teyet. 10Haxca mac ẍk'anni hunuj tzetet, ch'a'laxoj tet. Mac sayni hunuj tzetet, ẍchalooj yu. Mach ch'awi sat pulta, ẍhajlaxoj te' tet. 11K'inaloj hex mame hexti', ta sk'an heyuninal hunuj cay teyet, ¿tom cheya'a' hunuj no' lab'ah tet? 12Ta hunuj hos sk'an teyet, ¿tom cheya'a' hunuj no' ixcab' tet? 13Hexti' cheya' hej tzetet c'ul tet heyuninal yaja' mayu caw echemex, hajxam co Mam ay yul satcan̈, ¿tox macha'a' Comam Espíritu Santo teyet ta che k'ana?. 14Yet hunec, xiloj Comam Jesús hune' yespíritu naj matzwalil yin̈ hune' naj machu stzotel yu hune' espíritu tu'. Lawi yiniloj Comam hune' tu' yin̈ naj, stzotelcan̈ naj. Sunil anma xc'ayiloj sc'ul. 15Yaja' ay mac xhalni: —Naj Jesús ti' chiloj naj hej yespíritu naj matzwalil yin̈ anma, haxca naj Beelzebú, yahaw hej matzwalil aycoj yin̈ naj. 16Ay mac yu yilwen Comam, xalni ta sye Comam hunuj c'ayb'alc'ule ẍyeni ta yeli schejab' Comam Dios ye Comam. 17Yaja' xtxum Comam tzet nab'il yu heb'naj, yuxin xala: —K'inaloj ta aycoj howal yul hunuj con̈ob', ta hatic'a heb'naj swi'con̈ob' tu' ẍpaq'uicoj yin̈ hunun, lemb'iln̈em ẍtan̈iloj hune' con̈ob' tu'. Maca hunuj n̈ahil anma spohtoj sb'a, ẍtan̈ojpaxiloj. 18Hacmitu' cha'le' naj matzwalil, ta pohb'iltoj sb'a naj b'oj hej yetb'i, ¿tox chuuj smunlaoj scan̈il ye naj? Ẍwal hune' ti'an, haxca cheyala ta yu scan̈il ye naj Beelzebú ẍwiloj yespíritu naj matzwalil yin̈ anmaan. 19Yaja' ta hactu' ẍwute haca' heyalni ti'an, ¿mac ch'a'ni scan̈il ye heb'naj ẍcuywi teyin̈ chiniloj heb'naj hunk'aan espíritu tu' yin̈ anma? Yuxin hatic'a heb'naj ẍyenojiltoj ta mataj heyecoj. 20Yaja' ta yu scan̈il ye Comam Dios ẍwiloj yespíritu naj matzwalil yin̈ anmaan, ha' ẍyeniloj ta x'apni stz'ayical b'ay ch'oc Comam Dios yahawoj b'eti'. 21K'inaloj ta ay hunuj naj caw can̈ yeyi ay sch'en naj a'b'al howal, cat stan̈en naj yatut, mach mac chu yelk'aniloj tzet ay naj. 22Yaja' ta chul hunuj naj k'a' can̈to ye sataj naj, cat yayoj naj yu naj, chim yiloj naj sch'en naj b'ay ẍcawxi sc'ul b'oj sunil tzet aya, cat yitxk'antoj naj xol yetb'i. 23Mac machcoj wetb'iojan, xpaq'uic'oj win̈an. Mac mach ẍcolwa win̈ syamb'an anmaan, to ha' spohnitoj, ha' chu 24K'inaloj ay hunuj yespíritu naj matzwalil ch'el yin̈ hunuj anma, cat sto ec'oj colo yul tajin̈ witz ac'al saynoj b'ay xewi, yaja' ta mach xchalo yu b'ay ch'ehi, chalni: Mak'b'il hin meltzo b'ay xquin titan, ẍi naj. 25Haxa ch'apni, cat yilni to haca'xa hune' n̈ah tz'isb'ilxacan̈ k'alem yul, b'oj watx'eb'ilxa, hactu' ye yanma hune' anma tu'. 26Lemb'il ẍto yi'a'tij hujwan̈xa yet-matzwalilal k'a' ec'b'alto xtx'ojal, cat yapni pax ehoj yin̈ hune' anma tu', yuxin k'a' tx'ojto ch'elcanicoj sataj yet yalan̈to. 27Yet lan̈an yalni Comam Jesús hunk'aan tu', x'awican̈ hune' ix xol anma, xalni ix: —Sak'al yet ix ix x'a'ni ha k'inal b'oj cach imtzeni. 28Xta'wi Comam: —K'a' sak'alto yet mactaj ch'ab'en stzoti' Comam Dios cat syijyeni. 29Caw tx'ihal anma syamb'a sb'a x'oc hoynoj yin̈ Comam Jesús. Xalni Comam: —Hex ayex tinan̈, caw tx'oj hex, haxca che k'an heyila' hunuj c'ayb'alc'ule ẍyeni scan̈il ye Comam Dios, yaja' hune'n̈e ch'a'laxoj heyila', hune' haca' sye Comam Dios yin̈ ya' Jonás schejab'lom. 30Hune' xu Comam yin̈ ya' Jonás tu', yechel scan̈il ye Comam sye tet anma yul con̈ob' Nínive yet payxa. Haca' ye ya' Jonás tu', hactu' we Hayin Ab'ilintij yu Comam Dios xol jet-anmail ti'an, hayin ti'an yechel scan̈il ye Comam Dios ẍto yelaxoj teyet wean. 31Yet ch'apnoj stz'ayical yinojtij Comam Dios scuenta yin̈ sunil anma, ẍta'woj ix reina ay Sabá, chi'a'can̈ sb'a ix teyin̈, haxca caw nahat speto ix xhul ix yab'enoj hantaj stz'ajanil sc'ul ya' rey Salomón. Hayin ti'an ec'b'alin yib'an̈ ya' Salomón tu'an, yaja' mache yab'etoj tzet ẍwalan. 32Hactu' anma ah Nínive chi'a'can̈ sb'a teyin̈ yet hune' stz'ayical tu', haxca yet x'apni ya' Jonás yala' stzoti' Comam Dios tet anma ah Nínive, xacan xtx'ojal, yaja' ec'b'alinto yib'an̈ ya' Jonás tu'an, yaja' mache je' heya'a'can he tx'ojal yet chin tzotelan. 33Yet ẍco tzujb'an hune' candil, mach jactoj yalan̈ te' cahon maca hunujxa tzetet, to ẍjahtoj yib'an̈ hunuj tzetet nahat ay can̈, yun̈e smujli yin̈ mac ayictoj yul n̈ah. 34Sb'ak' co sat ha' smujlub'al co nimanil. Ta c'ul chil sb'ak' co sat, caw aycoj sajilk'inal jin̈ chaltu'. Yaja' ta xtx'ojal chil sb'ak' co sat, k'ejholo mi ay jin̈. 35Yuxin nann̈e heyu, taj ha' sb'ak' he sat ch'initij sajilk'inal teyin̈, taj sk'ejalholo cha'a' yin̈ heyanma. 36Yuxin ta aycoj sajilk'inal yin̈ heyanma mach k'ejholo aycoj yin̈, haca' xol sajilk'inal ayex chaltu'. Lahan hex mi b'oj hune' n̈ah b'ay caw sak'al smujli hune' candil. 37Lawi stan̈c'o stzotel Comam Jesús, hune' naj fariseo x'initoj Comam wa'oj yatut. Ha' x'ocapnoj Comam yul n̈ah, x'oc yin̈ meẍa. 38Xc'ayiloj sc'ul naj fariseo tu' haxca mach xtx'ah Comam sk'ab' yet x'oc wa'oj haca' ye scuywab'al heb'naj. 39Yuxin xal Comam tet naj: —Hex fariseo hexti', han̈c'a yin̈taj hej vaso, b'oj he pulato ha' cheyacoj yin̈ he c'ul he sajn̈eni, yaja' heyanma, han̈c'a elek' nab'il yu, b'oj hunk'aanxa tzet tx'oj. 40¡Caw wi'eexcanoj! ¿Mat heyohtajoj to ha' Comam xwatx'en tzet ẍjilicoj yin̈, hatic'a Comam xwatx'en tzet mach ẍjil yin̈? 41Ta cheyoche he sajn̈e he b'a yul sat Comam, sunil he c'ul che yitxk'antoj tzetet ayex tet anma mach tzet aya. 42¡C'antajex hexti' fariseo! Cheya' sdiesmoal te' alawena, te' ruda b'oj yet sunil niẍtej ita tet Comam Dios, yaja' macheyacoj yin̈ he c'ul heya'ni yilalil heyet-anmail, machca cheyoche Comam Dios. Ha' hunk'aan ti' cheya' yilal he yijyeni, yaja' matoj yu mache yijyepax hunk'aanxa tu'. 43¡C'antajex hexti' fariseo! Han̈c'a tz'on̈ob'al k'a c'ul cheyoche b'ay chex tz'on̈i yul capiya, b'oj ay heyala' caw nimej xiquiltaj chu stiyoẍli anma teyet yulaj calle. 44¡C'antajex! Lahanex b'oj b'ay mujb'il camom, matxa ninoj yec'len ẍjila, yuxin ha' ch'ec' xan̈xon anma yib'an̈, chetatoj sb'a, haxca mat yohtajoj ta ay quistal ewan ye b'etu'. 45Xta'wican̈ hune' naj cuywaom yin̈ sley ya' Moisés: —Mam Cuywaom, hayon̈ hun chon̈ tz'atoj yin̈ tzet chawal ti'an. 46Xalni Comam: —¡C'antajex hex cuywaom yin̈ sley ya Moisés ti'! haxca caw tx'ihal tzetet ya'taj che chej syijye anma, haca' hunuj ijatz caw al, yaja' ni hunuj yiximal he k'ab' mach sje he c'ul heya'a'coj yin̈. 47¡C'antajex! haxca che watx'ecan̈ b'ay mujb'il heb'ya' schejab'lom Comam Dios potx'b'il yu heyichmam. 48Yin̈ tzet cheyu ti', che yeloj to ayexcoj stz'ajoj yin̈ tzet xu heyichmam tu', haxca ha' heb'naj xpotx'ni heb'ya' schejab'lom Comam Dios, hexxa xin, chex b'ey he watx'e yib'an̈ b'ay mujb'il heb'ya'. 49Yuxin xal Comam Dios yin̈ stz'ajanil sc'ul: Chin cheja'toj heb'naj hin chejab'lom yala' hin tzoti' te xolan. Xol heb'naj tu', ay mi mac che potx'o', ay mi mac ton̈e ch'ec'oj ya' heyu. 50Yuxin ẍtij scuenta Comam yin̈ anma ay tinan̈, cat stohlanoj schiq'uil heb'ya' schejab'lom Comam potx'b'il yettax x'ichitij satyib'an̈k'inal ti'. 51Ch'ichitij yin̈ scamical ya' Abel, masanto yin̈ ya' Zacarías potx'b'il yamak' yatut Comam Dios yin̈taj altar b'ay ẍpotx'lax no' nok' ch'oc xahanb'alil. Yuxin ẍwal teyetan ta cha'a'tij Comam Dios sya'tajil te yib'an̈ yu scamical sunil heb'ya' potx'b'il tu'. 52¡C'antajex, hex cuywaom yin̈ sley ya' Moisés ti'! Haxca he yetwanoj he cuyni anma yin̈ stzoti' Comam, yaja' che yeb'a tet. Ni hex mach sje he c'ul he txumu', machca che cha xtxumu' anma choche syijye. 53Lawi yeltij Comam b'etu', xcam tit showal heb'naj cuywaom tu' b'oj heb'naj fariseo yin̈ Comam. Tx'ihal tzetet x'oc heb'naj sk'amb'e' tet Comam 54yun̈e ta' yin̈ tu' ẍlecta Comam yin̈ hunuj tzoti' cat ya'wojc'ule heb'naj yin̈ Comam yalni.


Copyright
Learn More

will be added

X\