SAN LUCAS 10

1Lawitu', sic'len Jahaw Jesús 72 heb'ya' ẍcuywi yin̈. Catajwan̈ xu yanitoj Comam heb'ya' yul hej con̈ob' b'oj b'aytaj tu' ch'ec'oj. 2Xalni Comam tet heb'ya': —Lahan anma b'oj ixim trigo xax k'anb'iloj. Yeli, caw tx'ihal anma tu', yaja' haywan̈n̈e mac ẍhalni stzoti' Comam Dios tet. Yuxin k'anwej tet Comam Yahaw munil, yun̈e yanitij Comam mac ch'a'ni stzoti' tet anma. 3Aswej, hayin chex watoj xol anmaan haca' janitoj niẍtej canelu xol no oj. 4Mach he tz'ispa cheyitoj, mach he melyu cheyic'oj yul he tx'uy, macheyitoj hun k'u'ojxa he xan̈ab', machca chex oc lin̈noj hunay tzoteloj b'oj anma yulaj b'eh. 5Yet chex ocapnoj yul hunuj n̈ah, k'anwej scawil anma, cheyalni: Ya'ab' Comam Dios ak'anc'ulal teyet, quex chi. 6Ta ay mac ch'ochen ak'anc'ulal, ch'a'laxoj tet haca' cheyute heyalni tu'. Ta mach hunuj maca, machija' sb'a tzet cheyal tu'. 7Hune'n̈e n̈ahil b'ay chex ehi; mache hec'ob'tajn̈e he b'a. Hatic'a tzet slo anma, ha' che lo pax yin̈. Haxca mac ẍmunlayi, yettic'a ay ya'lax wa'oj. 8Yet chex apni yul hunun con̈ob' b'ay chex chalaxi, b'aytet cha' anma he lob', chawej. 9Ta ay anma tx'oj ye sc'ul, an̈tewej, cheyalni: X'apni stz'ayicalil heyocoj yul sk'ab' Comam Dios, quex chi. 10Ta ay hunuj con̈ob' b'ay machex chalaxi, halwej yulaj b'eh: 11Hasta spojojal he con̈ob' xcan yin̈ jojan ẍco pan̈ilojan yecheloj to matxa co c'as ẍcan yin̈ hune' ti'an, yaja' cam cheyab'ecanoj to x'apni stz'ayical yoc anma yul sk'ab' Comam Dios, quex chi. 12Ẍwal teyetan, yet ch'apnoj stz'ayical b'ay chuluj Comam yi'a'tij cuenta yin̈ anma, hune' con̈ob' tu' ec'b'alto sya'tajil schab' sataj con̈ob' Sodoma. 13Hex ah Corazín hexti', c'antajex, b'oj hex ah Betsaida, c'antajex. Ta yul con̈ob' Tiro b'oj Sidón xu hunk'aan c'ayb'alc'ule xu te xol ti', lemb'iln̈em xacoj xil k'ape ehom yin̈, b'oj xam yahtoj tan̈ xol xil swi', syeb'aniloj to ẍtac sc'ul yin̈ smul. 14Haxa yet ch'apnoj tz'ayical b'ay chuluj Comam yi'a'tij cuenta yin̈ anma, k'a' ec'b'alto sya'tajil che chab' sataj anma ay yul con̈ob' Tiro b'oj Sidón tu'. 15Pax hex ah Capernaum, ham heyalni ta chex ilaxojcan̈ nahat. Machoj, to ch'ilaxojiloj he pixan cat heyalaxojaytoj yul camb'al. 16Walex chex cuywi win̈ ti'an, mac ẍyijyen tzet cheyala, hayin chin syijyean. Mac chex pahnitoj, hayin chin spahtojan. Mac chin pahnitojan, spahtoj Comam Dios xquin anitijan. 17Lawi syijyen heb'ya' 72 smunil b'ay ẍb'eyi, xmeltzo heb'ya' yin̈ tzalalal b'ay ay Comam Jesús. Xalni heb'ya': —Mamin, somanta hej yespíritu naj matzwalil ẍyijyen tzet ẍjalan yet ẍja'ni b'inaoj ha b'ihan. 18Xalni Comam: —Ho', xwilan tzet xu stitc'ay naj matzwalil yul satcan̈ haca' yay jepna cayompa. 19Hayin xwa' scan̈il heye heyanicoj heyoj yib'an̈ no' lab'aan, b'oj no' ixcab'. Ay pax scan̈il heye yib'an̈ yip naj matzwalil yun̈e matzet chu hex yetani. 20Yaja' matoj haxca ch'el hej yespíritu naj matzwalil yet che chejniloj, yuxin chex tzalayi. To ha' chex a'ni tzalaoj, to tz'ib'n̈eb'ilxa he b'ih b'ay ay Comam Dios. 21Yin̈n̈ena tu' x'a'ot tzalalal tet Comam Jesús yu Comam Espíritu Santo. Xalnican̈ Comam: —Ẍwacoj ha mayan Mam, Yahaw satcan̈ b'oj tx'otx'otx', haxca xaweb'a hunk'aan ti' tet anma cuywinaj b'oj tet mac can̈ ye chute sb'a yin̈ sat anma. Xawa'ni yohtajn̈e' anma hacn̈e ti' ye sc'ul. Hactu' Mam, haxca chawoche ta hactu' chu. 22Lawitu' xalni Comam tet anma: —Xac'oj hin Mam sunil tzetet yul hin k'ab'an. Mach mac ohtajn̈e hayin hin Sc'ahol Comam Dios ti'an, to han̈c'a Comam ohtajn̈e hinan. Machca mac ohtajn̈e hin Maman, to hayinn̈e hin Sc'ahol ti' wohtajan, b'oj mac chal hin c'ulan ẍwa' pax yohtajn̈e'an. 23Yet schuquilxan̈e Comam b'oj heb'ya' ẍcuywi yin̈, xalni tet heb'ya': —Sak'al heyet hexti', yu tzet lan̈an heyilni tinan̈. 24Haxca tx'ihal heb'ya' schejab'lom Comam Dios b'oj heb'naj rey x'ec'le payxa xoche yila' hunk'aan tzetet cheyil tinan̈, yaja' mach xil heb'ya'. Xoche pax heb'ya' yab'e' tzet cheyab'e ti', yaja' mach xab'e. 25X'ahlin̈noj hune' naj cuywaom yin̈ sley ya' Moisés, x'oc naj yilwenoj Comam: —Mam Cuywaom, ¿tzet wal wunian yun̈e hin chani k'inal mach stan̈b'alan?. 26—¿Tzet tz'ib'n̈eb'il yul sley ya' Moisés? ¿Tzet chawute hawalni yin̈ sat anma?. 27Xta'wi naj: —Ochewej Comam Dios Jahaw yin̈ sunil he c'ul, sunil he yanma, sunil heyip b'oj sunil he nab'al. Chalni paxoj: Haca' he yan̈en he b'a, hactu' he xahann̈en mactaj aycoj he cawilal, ẍiayoj. 28—Caw c'ul xawute hawalni. Ta cha yijye, cha chab' k'inal mach stan̈b'al. 29Yaja' yun̈e mach can naj quewail yin̈ sat anma, yuxin xal naj: —¿Mactaj xin ahayoj hin cawilal yetwanoj hin xahann̈enan?. 30Xalni Comam: —Yet hunec, aycoj hune' naj yin̈ b'eh xto Jerusalén ch'ayapnoj Jericó. X'eliloj hunk'aan heb'naj elk'om yin̈ naj, caw x'ec' ya' naj smak'ot yu heb'naj, etza xcam naj. Lawitu' xelk'aniloj heb'naj sunil tzet ib'il yu naj, hasta xil sk'ap naj aycoj yin̈ xitoj heb'naj. 31C'uxan x'ec'toj hune' ya' sacerdote yul b'eh tu', yaja' ton̈e xt'an̈xicoj ya' yin̈ naj lahwinaj tu', palan xu yec'toj ya'. 32Hacpaxtu' hune' ya' levita, ton̈e xt'an̈xipaxcoj ya' yin̈ naj, shec'ni ya' sb'eh. 33Hato hune' naj ah Samaria x'ec'toj, ha' xilnito naj naj lahwinaj tu', stz'a'can̈ sc'ul naj yin̈ naj. 34Xhitzicoj naj sc'atan̈ naj, xan̈ten naj slahwilal naj yu aceite b'oj vino, spichni naj. Lawitu' xaniatoj naj naj yib'an̈ scheh, xinitoj naj naj yul mesón, hat xtan̈eot naj. 35Yet hunxa tz'ayic, yet stohxa naj ah Samaria tu', xiniatij naj cab' denario ch'en melyu, xanic'oj naj tet naj yahaw mesón, xalni naj: Yuch'antioẍ chin k'an tawetan, tan̈e hune' naj ti', ta ayto ch'en cha c'aya' yin̈ naj, ẍwa'a'paxoj selel ch'en tawetan yet chin meltzoojan, ẍi naj. 36—Tinan̈, chin k'amb'e tawetan: Yin̈ heb'naj oxwan̈ tu', ¿mac najil xta'wencoj yin̈ ta yeli cawil yecoj naj yin̈ naj x'ec' ya' yul sk'ab' heb'naj elk'om tu'?. 37—Ham naj stz'a'can̈ sc'ul yin̈ naj. Yuxin xal Comam: —Ta hactu', yet schab'toj ti' hactu' chawutepaxoj, . 38Ha' xto Comam Jesús hanic'xa b'oj heb'ya' ẍcuywi yin̈, x'apni yul hune' wayan̈b'al. Hat ay hune' ya' Marta sb'ih, ẍchani ya' Comam yul yatut. 39Ay hune' snoh ya', María sb'ih. Lemb'il x'ay tz'on̈noj ya' María tu' yich yoj Comam yab'e' tzet chala. 40Wal ya' Marta, caw k'a' ye ya' yin̈ tzet chu, xhitzicoj ya' sc'atan̈ Comam, xalni ya': —Mamin, xo' hin noh ti'an xquin stin̈chacan xo' yul sk'ab' munilan. Hal ninoj tet xo' colwaojab' xo' win̈an. 41Xta'wi Comam tet ya': —C'antajach Marta, caw tx'ihal tzet cha tx'inb'acoj yin̈ ha c'ul. 42Hune'n̈e tzet caw yilal yeyi. Xo' María ti', hune' tzet k'a' yilal ye tu', ha' sic'le xo', mach mac ch'inojiloj tet xo'.


Copyright
Learn More

will be added

X\