SAN LUCAS 10

1Lahwi tu' xin, issic'lenilo Comam Jesús setentaxa ebnaj iscuywom. Catawan̈ xin yu yanito Comam ebnaj yul hunun con̈ob yeb xol wayan̈bal bayejtu'al bay chi-caw-yec'paxo Comam. 2Hayet maẍto chito ebnaj, yalni Comam tet ebnaj: —Lahan anma yeb ixim trigo xak'anbiloj. Yeli caw tx'i'al anma tu', yaja' haywan̈n̈e mac chalni Istzoti' Comam Dios xol anma. Yuxin txahlan̈we tet Comam Yahaw munil ti', hac tu' xin chischejti Comam ismunlawom chul inocan̈ anma, cat yanico isba yul ink'aban. 3Asi'we xin, haca' no' me' chito xol no' oj, hac tu' chexwute wanitojan xol anma. 4Machica xin cheyito hetz'ispa yeb xin hetx'uy bay ayayto hemelyu, yebpaxo hehelbal xan̈ab. Mach chexocpaxo lin̈no tzotelo yeb huno mac anmahil yulaj beh. 5Hayet chexapni bey hunu n̈a, halwe yin̈ babelal haca' ti': “Yak'abayo Comam Dios ak'anc'ulal tet hune' n̈ahil anma ti',” quexchi. 6Ta ay anma ch'ochen hune' ak'anc'ulal tu', ch'ak'lax tet haca' cheyute hek'anni tet Comam Dios. Ta ay mac mach chiochenpaxo xin, mach chu ischahni. 7Ha'tic'a bey hune' n̈a bay ch'ochelax ak'anc'ulal tu', ha' tu' chexcancanoj. Mach chehec' bay chexwayi. Sunil tzet ch'ak'lax helob, chelo cat heyuc'nipaxo tzet ch'ak'lax yiban̈ heyoch, yuto ha' naj munlawom ch'ak'lax tzet chislo naj. 8Hayet chexapni yul hunun con̈ob bay chexchahlaxi, chelo tzet cha'k'lax teyet. 9Cheyak'nipaxo cawxo anma ya'ay, cat heyalni tet sunil anma haca' ti': “Istiempohalxa heyanico heba yalan̈ yip Comam Dios tinan̈,” quexchi. 10Ta ay hunu con̈ob bay mach chexchahlaxi hayet chexpaxtij cheyalnicano yulaj iscallehal con̈ob tu' haca' ti': 11“¡Wal ispojojal hecon̈ob ma'oc yin̈ jojan̈ chicomak'ilojan̈ yin̈ hesat! Ha' xin chalniloj tato matxa jocan̈ teyin̈ tan̈e xin chijalcanojan̈ teyet, ta ayxaco yip Comam Dios hecawilal,” quexchi. 12Chiwalpaxojan teyet tato hayet ch'apni istz'ayical bay chul Comam Dios, cat yilni tzet ch'elico anma, ha' hune' con̈ob tu' ec'bal isya'tajil chischah sata con̈ob Sodoma, ẍi Comam Jesús tet ebnaj ischejab tu'. 13Yalnipaxo Comam Jesús: —Hex ay bey con̈ob Corazín, ¡c'anch'anex! ¡C'anch'anexpaxo ay bey con̈ob Betsaida! Ta ha' yul con̈ob Tiro yeb con̈ob Sidón yelax huntek'an c'aybalc'ule haca' chu texol ti', caw yin̈ an̈emi isbejcano anma istx'ojal, yamahto anma tan̈ yin̈ iswi', yamipaxico xil isk'ap chiyenilo bisc'ulal tet Comam Dios. 14Hayet chi'ayilo istz'ayical bay chil Comam Dios yin̈ tzet chielico anma, caw ec'naxa niman isya'tajil chechah sata con̈ob Tiro yebpaxo con̈ob Sidón. 15Haxa hex ah Capernaum, ¿ham heyalni ta chexilaxcan̈ satcan̈? ¡Machoj! Wal xin chexk'ojlaxto xol camom, ẍi Comam. 16Yalni Comam tet ebnaj ischejab tu': —Ha' mac ch'aben tzet cheyala, chabepaxo tzet chiwalan. Yaja' ha' mac chiyahni tzet cheyala chinisyahpaxojan. Ha' mac chinyahnitu'an, ha' yin̈ Comam Dios chiyahwahi yuto Comam an̈eintijan, ẍi Comam Jesús. 17Caw yin̈ tzalahilal meltzo ebnaj setenta ischejab Comam Jesús, yalni ebnaj tet Comam: —Mamin, sunil ischejab naj matzwalil yijen tzet jalan̈ yet jak'ni binahojan̈ habi, ẍi ebnaj. 18Istak'wi Comam tet ebnaj: —Caw yel cheyala, wilan istitc'ay naj matzwalil satcan̈ haca' isjebla hunu c'uh. 19Yaja' Haninan wak'an heyip hebelwic'o yiban̈ no' laba yeb xin yiban̈ no' c'olotx. Wak'nipaxojan heyip hek'oji yin̈ naj matzwalil, naj chichiwaco isc'ul jin̈. Hac tu' xin mach chu quexyetan naj. 20Chiwalan teyet mach chextzalahi yuto chi'el ischejab naj matzwalil yin̈ anma heyu, tzalahan̈wej yuto tz'ibn̈ebilxa hebi yul satcan̈, ẍi Comam tet ebnaj. 21Caw tzala yanma Comam Jesús yu yip Comam Espíritu Santo, yalni Comam: —Mam, Yahaw hach satcan̈, Yahaw hachpaxo yin̈ hune' sat yiban̈k'inal ti', chiwalan c'ulla tzoti' tawin̈ yuto chayelo tet ebnaj mach iscuyu huntek'an ewan ye hawu tet ebnaj caw ay iscuyu yeb caw ay tzet yohtaj. Hawute hac tu' Mamin, yuto hac tu' el yin̈ hac'ul, ẍi Comam. 22Lahwi tu' xin, yalni Comam tet anma: —Sunil ak'bilxa yul ink'aban yu Inmaman. Machi mac ohtan̈e hanin C'ahole inti'an, cachann̈e Comam ohtan̈e hinan. Machi mac ohtan̈e Inmaman, haninn̈ehan Isc'ahol inti'an wohtajan. Chiwak'paxojan ohtan̈elaxo Inmaman tet mac chiwochehan. 23Lahwi tu' xin yalni Comam tet ebnaj iscuywom ischuquil: —Sak'al yet mac ch'ilni huntek'an cheyil ti', 24yuto caw tx'i'al ebnaj ischejab Comam yet payat yeb ebnaj rey ec'lena payxa tu', yoche yila' huntek'an cheyil ti', yaj mach yil ebnaj. Yoche yabe'paxo ebnaj haca' hex ti', yaj machi yabe ebnaj, ẍi Comam. 25Ay hune' naj cuywawom yin̈ isley naj Moisés apni tzotelo tet Comam Jesús, yaj yun̈e yilwen naj Comam, yuxin yal naj haca' ti': —Mam cuywawom, ¿tzet wal wuten inbahan yun̈e inchahnihan hune' k'inal mach istan̈bal? ẍi naj. 26Istak'wican̈ Comam tet naj: —¿Hawohtami tzet tz'ibn̈ebilcano yin̈ isley naj Moisés? ¿Tzet cuybanilehal chawik'a yet chawilni? ẍi Comam. 27Istak'wi naj: —Oche Comam Dios Jahawil yeb sunil hawanma yeb sunil hac'ul yeb sunil hanabal, yebpaxo sunil hawip. Xahan chawil hawet anmahil haca' chu haya'iln̈en haba, ẍiayoj, ẍi naj. 28Yalni Comam tet naj: —Caw c'ul mayu hawalni. Ta chayije tzet chala, ay hak'inal mach istan̈bal, ẍi Comam tet naj. 29Yaja' hune' naj cuywawom tu', yoche naj challax naj c'ulal yin̈ sat anma, yuxin yal naj tet Comam Jesús: —¿Mac xin wet anmahilan hawalni? ẍi naj. 30Yalni Comam tet naj: —Yet hunel ay hune' naj winaj lan̈an isto yul isbelal Jerusalén chi'apni bey con̈ob Jericó, ay huntek'an ebnaj elk'om elilo yin̈ naj yul beh tu'. Yinilo ebnaj sunil tzet ik'bil yu naj, yinipaxilo ebnaj xil isk'ap naj. Ismak'ni taho ebnaj naj, etza cam naj yu ebnaj, lahwi tu' yelcan̈ ebnaj. 31C'uxan xin yec'to hune' naj sacerdote Israel yul hune' beh tu', hayet yilnico naj naj, ishec'nilo isba naj tet naj, isto naj yin̈ isbel. 32Yec'paxto hune' naj levita yul hune' beh tu', ton̈e yilpaxico naj yin̈ naj, ishec'nipaxo isba naj, isto naj xin. 33Yaj ay hune' naj ah Samaria ec'paxo yul hune' beh tu'. Hayet yilnico naj yin̈ naj etza cam tu', caw tz'aycan̈ isc'ul naj yin̈ naj. 34Ishitzico naj isc'atan̈ naj, yan̈ten naj islahwilal naj tu' yu aceite yeb vino. Ispichnico naj k'ap yin̈ islahwilal naj tu'. Yanahto naj naj yiban̈ ischeh. Yinito naj naj bey hune' waybal, yoc naj yilno naj. 35Haxa yin̈ hunxa tz'ayic yet ispaxto naj, yak'ni naj cabeb ch'en melyu denario tet naj yahaw waybal tu', yalni naj xin: —Chawilcano hune' naj ti' ink'ana'an. Ta ayto tzet chac'ay yin̈ naj, chintohlahan yet chinhulan hunelxa, ẍi naj. 36Isk'amben Comam Jesús tet naj cuywawom yin̈ isley naj Moisés haca' ti': —Xol ebnaj oxwan̈ tu', ¿mac caw yet anmahil naj etza cam yu ebnaj elk'om tu' chute hawalni? ẍi Comam tet naj. 37Istak'wican̈ naj cuywawom tu': —Ha' naj tz'ay isc'ul yoc colwal yin̈ naj, ẍi naj. Yalni Comam Jesús: —Wal tinan̈ xin, ha' tzet iswatx'e naj tu', hacojab tu' chawute, ẍi Comam tet naj. 38Isto Comam Jesús yin̈ isbel, yapni Comam bey hune' aldea. Ha' bey tu' xin ay hune' ix, Marta isbi. Ischahni ix Comam yul yatut. 39Aypaxo hune' isnoh ix, María isbi. Ix María tu', ay tz'on̈no ix yich yoj Comam Jesús yu yaben ix tzet chal Comam. 40Walpaxo ix Marta, caw ha' iswatx'en ix ismunil ayco yin̈ isc'ul. Yuxin hitzico ix isc'atan̈ Comam Jesús, yalni ix: —Mamin, ¿tzet yin̈ ton̈e chawila chinisbejnicanojan ix innohti'an munil inchuquilan? Hal tet ix colwaojab nino ix win̈an, ẍi ix Marta tet Comam. 41Istak'wican̈ Comam xin: —Marta, Marta, caw yin̈n̈e hamunil ayco hanabal. Caw machi ak'anc'ulal yul hawanma. 42Yaj hune'n̈e tzet caw yilal yehi, ha' ton bay ayco yanma ix María ti', yuxin machi mac chu yinilo tet ix, ẍi Comam.

will be added

X\