SAN LUCAS 1

1- 4Chin tz'ib'n̈etoj hune' hum ti' tawetan mamin Teófilo. Tx'ihal mac xacoj yin̈ sc'ul stz'ib'n̈encan hej tzetet xu co xol, haca' xu hon̈ scuyni heb'ya' caw x'ilni yettax x'ichitij, ha' heb'ya' xcolwa spujb'anc'oj hune' tzoti' ti'. Haquinan, lawi hin pich'ni yin̈ caw c'ul sunil yichob'anilan, xwacoj yin̈ hin c'ul hin tz'ib'n̈entoj xtxolil tawetan, yun̈e hawohtajn̈en st'in̈anil hej tzetet x'a'lax ha cuyu'. 5Yet aycoj naj Herodes reyal yul yet Judea, aycoj hune' ya' sacerdote Zacarías sb'ih, yin̈ xtxol smunil b'oj hunk'aanxa heb'naj sacerdote, Abías sb'ih hune' majan heb'naj tu'. Elizabet sb'ih yixal ya' Zacarías tu', yic'al ya' Aarón ye heb'ya' scawan̈il. 6Caw stoholal xu yehc'oj heb'ya' yul sat Comam Dios Jahaw, yijyom heb'ya' yin̈ sunil schejb'anil Comam. 7Maẍtic'a xil ya' Elizabet yin̈ hunuj yunin, yuxin mach yuninal heb'ya', ha' ye paxoj, ayxa sk'inal heb'ya'. 8Yet aycoj ya' Zacarías b'oj hej yetb'i yin̈ xtxol smunil yul yatut Comam Dios, 9xilwen heb'naj yin̈ mactaj ch'octoj sn̈usu' incienso sat altar yul yatut Comam Dios, haca'tic'a chute heb'naj. C'uxan yib'an̈ ya' Zacarías x'ayi. 10Yet lan̈an sn̈usni ya' Zacarías incienso tu', wal sunil anma aycan yin̈taj ya'ni oración. 11C'uxan ha' tu' syeni sb'a hune' yángel Comam Dios Jahaw tet ya', lin̈ancan̈ sc'atan̈ altar yin̈ swatx'. 12Ha' xilni ya' hune' ángel tu' xiwcan̈ ya', sc'ayiloj sc'ul ya'. 13Xalni hune' ángel tu' tet ya': —Zacarías, machach xiwi. X'apni haworación tet Comam Dios. Yuxin tinan̈ chila' hawixal Elizabet yin̈ hune' ni'an ha c'ahol. Juan chawa'a'coj sb'ihoj. 14Stzalab'al ha c'ul yeyi, b'oj tx'ihal anma stzalaoj yet ẍpitzc'aoj, 15haxca hune' ha c'ahol tu', caw ay smay chub' yul sat Comam Dios Jahaw. Mach chuc'u' vino ni hunujxa tzet uq'ueal. Ayxacoj yalan̈ schejb'anil Comam Espíritu Santo yalan̈to maẍto ẍpitzc'ayi. 16Tx'ihal hawetcon̈ob' Israel ẍmeltzoojcoj yin̈ Comam Dios Jahaw yu naj. 17Naj tu', ẍb'ab'ojtoj naj sataj Comam. Haca' scan̈il ye ya' Elías schejab'lom Comam Dios, hactu' scan̈il ye chub' naj. Yu scuywab'al naj ch'ocoj mame mi'e yin̈ ak'anc'ulal b'oj uninale, pax anma tx'oj, ẍmeltzoojcan̈ snab'al cat syijyenoj Comam Dios. Hactu' chu scuynuj naj anma yin̈ tzet chu schanoj Comam. 18Xta'wi ya': —¿Tzet chu scawxi hin c'ul yin̈ hune' chawal ti'an? Haxca hayin ti' b'oj wixalan ayxa co k'inalan. 19Xta'wi ángel: —Hayin ti' Gabriel hinan, schejab' Comam Dios wean, xquin yatij Comam wala' hune' tzoti' yak'lob'al ha c'ulan. 20Tinan̈ ẍmajojcan ha ti', ẍto pitzc'aoj ha c'ahol tu' cat to ha tzotelojcan̈, haxca machawa' yuluj ha c'ul yin̈ tzet ẍwal ti'an. Hune' ti' chija' sb'a yet ch'apnoj stz'ayicalil. 21Wal anma echmab'il yeliloj ya' yu, ẍc'ay sc'ul haxca x'ec' ni'an sk'inal ya' yul yatut Comam Dios. 22Ha' x'eliloj ya', matxa chu stzotel ya', toxan̈e ch'ec' sk'ab' ya', hactu' xu xtxumniloj anma to ay tzet sye sb'a tet ya' yul yatut Comam Dios. 23Ha' xtan̈c'o xtxol smunil ya' Zacarías yul yatut Comam Dios, xpaxtoj ya' yatut. 24Mach nahatilwinayoj ayxa tzet ye ya' Elizabet; smajchenn̈a sb'a ya' howeb' x'ahawil, chalni ya': 25Yu scan̈il ye Comam Jahaw, yuxin hacti' wean, yun̈e mach'el hin pixanan, machca mac ay tzet stz'aj yala' win̈an haxca maẍtic'a wunin xwil yalan̈toan. 26Swajeb'xa x'ahaw tu', xanipaxtoj Comam Dios ángel Gabriel yul hune' con̈ob' b'et Galilea, Nazaret sb'ih, 27tet hune' ix k'opo María sb'ih, ta'web'ilxa yu smohyi b'oj naj José, yic'al ya' rey David. 28Ha' x'ocapnoj ángel yul n̈ah b'ay ay ix, xalni tet ix: —Tzalaan̈ María, haxca aycoj sc'ulch'anil sc'ul Comam tawin̈, cach sic'le Comam xol hawet-ixal. 29Ha' xab'en ix tzet xal ángel tu', xb'isb'on yanma ix, chalni ix: ¿Tzet xin ch'elicoj hune' ti'? ẍi ix. 30Xalni ángel tet ix: —María, machach xiwi, haxca xahan ayach yu Comam Dios. 31Tinan̈ ẍpitzc'aoj hune' nian ha winaj unin. Yet ẍpitzc'aoj, Jesús chawa'a'coj sb'ihoj. 32Caw ay yelapnoj yeyi. Sc'ahol Comam Dios Ec'b'al Yib'an̈ Sunil Tzetet, ẍhal-la'xoj yin̈. Ha' Comam ch'anojcoj reyal seleloj yichmam David. 33Ha' ch'ocoj yahawoj con̈ob' Israel yin̈ stohb'alk'inal, maẍtic'a stan̈b'al yocoj yahawoj. 34Xta'wi ix María: —¿Tzet chu yijnoj sb'a hune' ti' haxca maẍto wichamilan?. 35Xalni pax ángel: —Chuluj Comam Espíritu Santo tawin̈ cat hach yen̈lenoj scan̈il ye Comam Dios Ec'b'al Yib'an̈ Sunil Tzetet, yuxin ni'an unin ẍpitzc'aoj tawet tu', nantic'a sic'leb'ililoj yu Comam, Sc'ahol Comam Dios ẍhal-laxoj yin̈. 36Hactu' ya' Elizabet ha nohto, caw ayxa sk'inal ya', yaja' chila' ya' yin̈ hune' ni'an yunin. Ohtajb'il to maẍtic'a b'ay xil ya' yin̈ hunuj yunin, yaja' wajeb'xa x'ahaw tzet ye ya' tinan̈, 37haxca matzet sya'tajil yijni sb'a tet Comam Dios. 38Xta'wi ix María: —Yub'ab' b'aytet chal sc'ul Comam Jahaw win̈ haca' hawalni ti', haxca yu wocnicoj tet Comam Diosan, yuxin ayinan. Lawitu' xmeltzo ángel. 39Lawi tu', lemb'iln̈e xto ya' María yul hune' con̈ob' ay chewal tx'otx' yul scuenta Judea. 40Ha' x'ocapnoj ya' yul yatut ya' Zacarías, xtiyoẍli ya' tet ya' Elizabet. 41Ha' xab'en ya' stiyoẍli ya' María, xb'ilican̈ ni'an unin aycoj yin̈ snimanil ya'. Lemb'il x'oc ya' yalan̈ schejb'anil Comam Espíritu Santo. 42Xalni ya' yin̈ ip: —K'a' sak'alto tawet sunil xol heb'ya' jet-ixal. Sak'al pax yet ni'an unin ẍpitzc'aoj tawin̈. 43¿Tox caw ay yelapnoj wean yuxin chul smi' Comam Wahaw hin yila'an? 44Man̈e wab'e ha tiyoẍb'alan, xb'ilinacan̈ ni'an wunin win̈ yu tzalalalan. 45Sak'al hawet xawa'ni yuluj ha c'ul yin̈ tzet xal Comam Jahaw, haxca chija' sb'a tzet xal Comam tawet. 46Yuxin xal ya' María: Sunil hin c'ulan ẍwanicoj smay Comam Jahawan. 47Stzala wanma yin̈ Comam Dios Scolomal wetan. 48Waxan̈ca mach yelapnoj wean, yaja' stz'a' sc'ul Comam win̈an, yuxin sunil anma ẍhalnoj ta caw sak'al wetan. 49Haxca Comam Dios can̈ yeyi, syeni Comam c'ayb'alc'ule win̈an, mach hunujxa b'ihe chu slahb'ancoj sb'a haca' sb'i Comam. 50Sunilb'al k'inal stz'a'oj sc'ul Comam yin̈ mactaj ẍnanon tet. 51Yu scan̈il ye Comam ẍhuchatoj hej tzetet ay yin̈ snab'al anma chal sb'a can̈ yeal. 52Chiloj Comam mactaj aycoj yahawoj hej con̈ob' yul stz'on̈ob'al.Chanicoj smay mactaj hacn̈e ti' ye sc'ul. 53Cha' Comam nohoj sc'ul mactaj ẍn̈ohchayi. Mactaj k'alom, cha'a'cantoj paxoj yin̈ man̈ tzetal. 54Chul Comam hon̈ scolo' hayon̈ israelon̈ ti', hayon̈ hon̈ schejab' ti', haxca snatij sc'ulch'anil sc'ul jib'an̈, 55haca' xu yaltencan Comam tet ya' jichmam Abraham b'oj sunil yic'al yin̈ stohb'alk'inal. 56Oxeb' x'ahaw xcan ya' sc'atan̈ ya' Elizabet, xto meltzo ya' yatut. 57Yet x'apni stz'ayical spitzc'a ni'an swinaj unin ya' Elizabet, 58x'apni mac cawil yecoj yin̈ heb'ya' b'oj mac ayto yu sb'a b'oj heb'ya', tzalaoj yin̈ ya' yu hej tzetet c'ul xu Comam Dios. 59Yin̈ shujk'in̈al x'a'lax circuncidar ni'an tz'ul tu' x'apni pax anma. Xalni heb'jetb'i ya'a'coj Zacarías sb'ihoj haca' sb'ih smam yalni. 60Yaja' xal ya' Elizabet yin̈ hacti': —Machoj, to Juan ch'oc sb'ihoj. 61Yaja' xal heb'jetb'i: —¿Tzet yu? Haxca xol mac ayto heyu he b'a b'oj, mach hunuj mac hactu' sb'ih. 62Yuxin x'ec' sk'ab' anma sk'amb'en tet ya' Zacarías tzet b'iheal chacoj ya' sb'ihoj. 63Sk'anni ya' hune' ni'an ak'in, stz'ib'n̈en ya' sat te', chalni: Juan ch'oc sb'ihoj naj, ẍi ya'. Sunil mac ayictoj b'etu' xc'ayiloj sc'ul yab'eni. 64Hunip tu', stzotelcan̈ ya', x'ichi yanicoj ya' smay Comam Dios. 65Xc'ayiloj sc'ul sunil mac ahayoj scawilal heb'ya' tu', spujb'anc'oj sk'umal hune' tu' b'et chewal tx'otx' yul scuenta Judea. 66Hantaj mac x'ab'en ti', x'oc tucnuj, chalni: —¿Tzet taxca yelapnoj ye ni'an unin ti'? . Haxca caw yeli, aycoj scan̈il ye Comam Jahaw yin̈. 67Yet hunip k'inanil tu' x'ocna ya' Zacarías yalan̈ schejb'anil Comam Espíritu Santo, xalni ya': 68Hal-laxojab' tzoti' c'ul yin̈ Comam co Diosal hayon̈ israelon̈ ti, haxca xhul Comam hon̈ scolo', 69chanojtij Comam hune' Scolomal jet caw can̈ yeyi. Xol yic'al ya' rey David schejab' Comam ẍpitzc'aoj. 70Hactu' xu yalten Comam Dios tet heb'ya' schejab'lom sic'leb'il yu yettax caw payxa, 71to chon̈ scolo'loj tet mactaj aycoj showal jin̈, mactaj ẍchiwacoj sc'ul jin̈. 72Xalni ta stz'a'oj sc'ul yin̈ heb'ya' jichmam, cat snanojtij syijyenoj tzet halb'ilcan yu tet heb'ya'. 73Yin̈ hune' ti' b'ay ya'naj Comam Dios stzoti' tet jichmam Abraham 74ta chon̈ scolo' tet hej mactaj aycoj showal jin̈, yun̈e matxa chon̈ nanon co hak'en Comam, 75st'in̈anil ẍju, yijyomon̈ tet Comam stohb'alk'inal. 76Hachti' c'ahol, chach hal-laxoj schejab'oj Comam Dios Ec'b'al Yib'an̈ Sunil Tzetet, haxca chach b'ab'oj sataj Comam ha cuyu' scon̈ob' yin̈ sb'ejnican yuni hej xtx'ojal, haca' shamlax hunuj b'eh. 77Hach chawala' yab'e anma tzet chu schanoj scolb'anil yet ch'a'laxoj nimanc'ulal yin̈ smul. 78Haxca yu snimanil sc'ul Comam Dios jin̈, xatij Scolomal jet, haca' yet ch'ahiloj tz'ayic. 79Yu yinitij sajilk'inal jet hayon̈ aycoj k'ejholo yin̈ janma, b'oj xiwc'ulal je yu camical. Ha' chon̈ anojcoj yin̈ ak'anc'ulal. 80Wal ni'an unin tu', ha' sch'ib' snimanil, xch'ib' pax stz'ajanil sc'ul yin̈ Comam Dios. Yet tzehxa, xto ehoj b'ay hune' tx'otx'otx' caw tajin̈ witz ac'al masanto x'apni stz'ayical ya'ni yohtajn̈e' sb'a tet yetcon̈ob' Israel.


Copyright
Learn More

will be added

X\