JUDAS 1

1Hayin ti' Judas in, schejab' Comam Jesucristo wean, wuẍtaj hin b'a b'oj ya' Jacoboan. Ẍwatoj hune' wum ti' teyet hex xahan ay yu Comam Dios Padre, awteb'ilexxa yu Comam, b'oj yan̈eb'il hex pax yu Comam Jesucristo. 2Tz'a'ojab' sc'ul Comam Dios teyin̈, ya'ab' Comam ak'anc'ulal teyet b'oj syeb'ab'i ta caw ocheb'ilex yu. 3Hex xahan ay wu ti'an, mach sb'ih hantaj xwoche wa'a'toj hune' wum teyet yin̈ co colb'anil xax co cha. Yaja' tinan̈ chin txuman to yilal ẍwatoj hune' wum ti' teyetan, chex wiptzen yin̈ heyinitij heyanma he colni hune' cuywab'al b'ay xja' yuluj co c'ul ti', hune' x'a'lax yin̈ huneln̈ecanoj jet co hunil hayon̈ hon̈ yet-xa Comam. 4Haxca ay heb'naj nantic'a tzet nab'il yu x'oc te xol. Chalni heb'naj ta yu sc'ulch'anil sc'ul Comam Dios chu juni tzetet tx'ixwub'al. Chin̈tajn̈en heb'naj Jahaw Jesucristo, Yahaw yin̈ sunil tzetet. Heb'naj tu', cawxinajxacoj smul yib'an̈ yettax yalan̈to, haca' yalni Yum Comam. 5Yeli heyohtajxa, yaja' chin natij teyetan, ta xiloj Comam scon̈ob' b'et Egipto. Waxan̈ca hactu', xtic'a sc'ayiloj Comam mactaj mach xa' yuluj sc'ul yin̈. 6Hacpaxtu' hej ángel mach xyijyen schejb'anile, stin̈chancan b'ay aya, majan tinan̈ xol k'ejholo, c'alan yin̈ huneln̈ecanoj, toxan̈e chechma tzet ẍtan̈oj, yet ch'apnoj hune' stz'ayical caw ay yelapnoj yeyi. 7Hactu' xa'le anma ay yul con̈ob' Sodoma b'oj Gomorra, b'oj hej con̈ob' aycoj shoyanil. Xtx'ojn̈etoj heb'jetb'i swi', x'oc yunuj b'aytet mat yetoj ay yuni yin̈ snimanil. Ch'ec' ya' yanma tinan̈, b'oj ẍto ec'oj ya' yanma yin̈ stohb'alk'inal xol k'a' k'a'. Hactu' x'utelax hunk'aan con̈ob' tu' yun̈e machon̈ oc tzujnuj yin̈ tzet xu heb'jetb'i tu'. 8Haca' xute hunk'aan anma tu' yet payxa, hactu' chute heb'naj x'oc te xol ti'. Caw aytocoj yin̈ snab'al heb'naj yuni squistalil, ha' ch'a'ni yeta'toj heb'naj snimanil, matxa yelapnoj ye hej mac yahaw yul sat heb'naj, tx'oj tzotel heb'naj yin̈ hej ángel ay smay. 9Yaja' yet steyen sb'a ángel Miguel, swi'al yin̈ hej ángel, b'oj naj matzwalil yin̈ snimanil ya' Moisés, matoj mach sk'ahul xu tzotel tet naj, to han̈c'a xala: Comam Jahaw chach maynoj, ẍin̈e ángel Miguel tu'. 10Yaja' heb'naj ẍwal tu'an, maẍtic'a sk'ahul yalni heb'naj tx'oj yin̈ hej tzetet mat yohtajoj. Chetantoj sb'a heb'naj yu hej tzetet yohtaj, hej tzetet chab'e heb'naj yipla yin̈ snimanil haca' yab'en sb'a no' nok', hactu' yab'en sb'a heb'naj. 11¡C'antaj heb'naj! Ha' xtx'ojal ib'il yu naj Caín ha' ib'il yu heb'naj. Yu pek' melyual, lemb'il x'ec' heb'naj yi'a' xtx'ojal naj Balaam. Ẍcamoj heb'naj haca' xu scam naj Coré, yu xpaq'uicoj naj yin̈ Comam Dios. 12Yet cheyec'tzen he k'in̈ b'ay hun chex wa'i, ha' heb'naj tu' ch'etantoj sunil. Maẍtic'a xtx'ixwi heb'naj yay tz'on̈noj wa'oj te xol, han̈c'a sc'ulal yet heb'naj sayic'oj. Lahan heb'naj b'oj asun mach sb'ih b'ay ẍca yinitoj cak'e', mach ninoj n̈ab' chayoj. Lahan heb'naj b'oj te' te' mach hunuj sat cha'a, caw tajnajxaloj haxca tzicb'ilcan̈ xe'. 13Lahan heb'naj b'oj haca' yec' job'la ha' mar, haca' yaniloj ha' shujuyal, hactu' syeniloj heb'naj tx'ixwilal chu. Lahan heb'naj b'oj tx'umel xax yiloj sb'a yin̈ sb'eh. Cawxinajxacoj yib'an̈ heb'naj stojcanoj yin̈ stohb'alk'inal xol sk'ejalholo ẍpalc'on sk'ejal. 14Hactu' xu yalni ya' Enoc yin̈ heb'naj ti', ya' shuj yetoj yin̈ yic'al ya' Adán. Iptzeb'il ya' yu Comam Dios, xalni ya': Ab'ewej, ẍtij Comam Jahaw b'oj hantaj smilalxa mac yet-xa. 15Chuluj Comam yi'a'tij cuenta yin̈ sunil anma, scawxenojcoj Comam smul yib'an̈ mactaj mach Dios sat, yu hantaj tzet tx'oj xu, b'oj yu hantaj xtx'ojal tzoti' xaliltoj yin̈ Comam. 16Heb'naj tu' a'omc'ule, halom k'umale, han̈c'a tzet choche snimanil sayic'oj. Can̈tajn̈e ye stzoteli, c'ul stzotel heb'naj tet anma, yaja' yun̈e yi'niloj yet yin̈, yuxin hactu' chute heb'naj. 17Hex xahan ay wuan, tijab' yin̈ he c'ul tzet halb'il yu heb'ya' yapóstol Jahaw Jesucristo. 18Xalni heb'ya': Yet slahub'al tz'ayic tu', ay anma stzeyenoj stzoti' Comam, iptzeb'il yu xtx'ojal chochetoj, ẍi heb'ya'. 19Ha' hunk'aan heb'naj tu' ẍpohnitoj heb'ya' jetb'i, han̈c'a chal yec'najil yanma ha' chu, machcoj Yespíritu Comam Dios yin̈. 20Walex hex xahan ay wu ti'an, lin̈b'awej he b'a yin̈ b'ay ẍja' yuluj co c'ul ẍtit tet Comam Dios. A'wej heyoración yu scolwal Comam Espíritu Santo. 21A'wej yilal heyab'en yin̈ heyanma hantaj chex yoche Comam Dios, cheyechmanc'oj stz'ayical b'ay cha'a' Jahaw Jesucristo k'inal mach stan̈b'al jet yu caw stz'a sc'ul jin̈. 22Tz'aojab' he c'ul yin̈ mactaj ẍcab'con sc'ul. 23Colwejpaxiloj hunk'aanxa mac lan̈an ẍto xol k'a' k'a'. Tz'a'ojab' pax he c'ul yin̈ hunk'aanxa maca, yaja' nann̈e heyu, mache b'actoj he b'a yin̈ squistalil tzet yeyi. 24- 25Comam Dios Scolomal jet ye yu Jahaw Jesucristo, chu hon̈ scolni yun̈e machon̈ lectayi, yun̈e mach ninoj co mul yin̈ sat Comam, yun̈e hon̈ ya'ni tzalaoj yin̈ yeltich'anil b'ay aya. Hal-laxojab' yin̈ to han̈c'a Comam ib'iltic'a smay, ay yelapnoj yeyi, ay scan̈il yeyi, b'oj Yahaw ye yettax x'ichitij, tinan̈, b'oj yin̈ stohb'alk'inal. Amén.


Copyright
Learn More

will be added

X\