JUDAS 1

1Hanin Judas inti'an, ischejab Comam Jesucristo wehan, yeb xin wuẍta inbahan yeb naj Jacobo, chiwatojan hune' carta ti' teyet hex wuẍtaj yeb hex wanab. Caw awtebilexxa yu Comam, yeb caw xahan ayex yu Comam Dios Mame, yeb xin caw tan̈ebilex yu Comam Jesucristo. 2Tz'ayojab isc'ul Comam teyin̈, yak'ab Comam ak'anc'ulal yeb isc'ulch'anil isc'ul teyet yin̈ caw niman. 3Hex wuẍtaj, hex wanab, caw xahan ayex wuhan. Caw tx'i'alxa el chiwochehan chiwa'tojan hune' incartati'an teyet yin̈ tzet ye cocolbanil xacochah tet Comam Dios. Yaj wal tinan̈ xin, chitit yin̈ wanmahan ta yilal wanitojan hune' carta ti' teyet, yu quexyiptzen yin̈ heyinahti heyanma heya'iln̈en hune' cuybanil bay ayco janma han̈on̈ yeton̈xa Comam. 4Caw yilal wanitojan hune' carta ti' yuto ay huntek'an mac lek'ti'aln̈e yu yoc texol. Huntek'an ebnaj tu' istx'ojaln̈e chiswatx'e ebnaj; chal ebnaj ta yu ayon̈xaco yin̈ isc'ulch'anil Comam xaisje cowatx'en sunil istx'ojal. Chiyintan̈ecanilto ebnaj tu' Comam Jesucristo Jahawil chon̈ijbani. Ha' ton yin̈ huntek'an ebnaj ti' tz'ibn̈ebilcano yul Yum Comam Dios yet payat ta yilal istocano ebnaj yin̈ isya'tajil. 5Waxan̈ca heyohtaxa hune' chiwalti'an yaja' chinnapaxtijan teyet yin̈ ebnaj Israel, iscon̈ob Comam Dios. Lahwi iscolnilo Comam ebnaj yul con̈ob Egipto, istan̈tzenilo Comam macta mach yayto yul yanma yin̈ tzet yal Comam. 6Yebpaxo xin, naweti tzet elico huntek'an ebnaj ángel nime winaj yute isba, isbejnicano ebnaj hune' yehobal ak'bil tet yu Comam Dios. Wal tinan̈ xin, c'alan ebnaj sic'lebil yu ch'en cadena, majan ebnaj xol k'ejholo yu Comam Dios yechman istz'ayical bay chul isya'tajil yiban̈ ebnaj yu Comam yin̈ huneln̈e. 7Hactic'apax tu' xin anma ay bey Sodoma yeb anma ay bey Gomorra yeb huntek'anxa con̈ob ayco yin̈la ishoyanil cabeb con̈ob tu', oc ebnaj winaj ixloj, yocpaxo ebix ix winajloj; chiswatx'en tzet mach yeto ay isnimanil. Huntek'an anma tu' ischah isya'tajil xol k'a k'a' yin̈ huneln̈e. Sunil tu', cancano yechelo tet sunil anma yun̈e istxumnilo tzet elico anma watx'en istx'ojal. 8Waxan̈ca hac tu' yute Comam Dios, yak'ni isya'tajil tet huntek'an anma yet payat tu', yaja' huntek'an ebnaj ayco texol tinan̈, chisman̈c'o ebnaj cuybanile aycano yu Comam Dios. Yu isyijen ebnaj tzet chal iswayic, chetan ebnaj isnimanil. Chalnipaxo ebnaj tzoti' tx'oj yin̈ ebnaj ángel. 9Yaj conabati yin̈ naj arcángel Miguel, yet yak'len howal naj yeb naj matzwalil yin̈ isnimanil naj Moisés, waxan̈ca caw aycan̈ yip naj Miguel tu', yaj machi yal naj tzoti' tx'oj chitz'acti'n̈en naj matzwalil tu', cachann̈e yal naj haca' ti': —Ha'ojab Comam Dios chaẍmaynoj, ẍi naj tet naj. 10Wal ebnaj chiwalti'an, ton̈etic'a chibuchwa ebnaj yin̈ hunu tzet ye tu' mach yohtajoj. Lahan isnabal ebnaj haca' no nok', ha' tzet yohta ebnaj mach chitxumcha yu ebnaj, ton̈etic'a chiswatx'e ebnaj tzet choche isc'ul. Ha' huntek'an tu' chi'etanto yanma ebnaj sata Comam Dios, cat ischahni ebnaj isya'tajil. 11Caw c'anch'ancano huntek'an ebnaj tu', yuto lahan tzet chiswatx'e ebnaj haca' tzet iswatx'e naj Caín. Chiswatx'epaxo ebnaj haca' tzet yute naj Balaam, yu ch'en melyu iswatx'e naj istx'ojal. Chiswatx'epaxo ebnaj haca' iswatx'e naj Coré, cam naj yu mach isyije naj tzet yal Comam Dios; hac tu' xin chu istan̈tzelaxilo ebnaj ti' yu isman̈c'omal. 12Tx'ixobal chuco ebnaj texol yet checutxban heba wa'o yin̈ yet Comam. Maẍtic'a nino tzet chal isc'ul ebnaj yet ch'oc ebnaj wa'o texol yeb machi nino chixiw ebnaj. Lahan ebnaj haca' hunu naj tan̈em me', ha'n̈e ayco yin̈ isc'ul istan̈en isba. Lahanpaxo ebnaj haca' hunu moyan machi n̈ab ik'bil yu, ton̈e chi'ec' ijon yu jak'ek'. Lahanpaxo ebnaj haca' hunu te te' machi satni; ton̈e chitajayoj yeb sunil xe' yin̈ huneln̈e. 13Lahan ebnaj haca' yet ch'ah pok'la ha' mar cat yanilo ha' ishujuyal, hac tu' chu jilni k'alem ayco xol ha', hac tu' xin chu isyenilo ebnaj tzettaj tx'ixobal chiswatx'e. Lahanpaxo ebnaj yeb tx'umel xaisheq'uilo isba yul yehobal, ha' istx'ojal ebnaj tu' chicawxento isto yin̈ huneln̈e xol k'ejholo; hune' k'ejholo tu' caw xapalc'oncano isk'ejholohal. 14Naj Enoc, naj ishuj mame yinta naj Adán, yet payat tiempo, tzotel naj yu yip Comam Dios yin̈ huntek'an ebnaj ti': —¡Abewej! Chihul Comam Dios Jahawil yeb ismilalxa yángel yintaj. 15Chul Comam yila' yin̈ tzet iswatx'e sunil anma, cat yanocanico isya'tajil yiban̈ mac caw tx'oj chiswatx'e yin̈ Comam; macta machi Comam yul sat yeb hanta istx'ojal tzoti' chalico yin̈ Comam, ẍi naj Enoc tu'. 16Ha' ebnaj ayco texol tu', ak'omc'ule ebnaj, buchwawompaxo ebnaj. Han̈ech'an yin̈ tzet choche isnimanil ebnaj chaco isnabal. Nime winaj chute isba istzoteli. Caw c'ulch'an chutepaxo istzotel ebnaj tet anma, yaja' cabeb isnabal ebnaj. Hac tu' chute ebnaj yun̈e c'ul ch'ec' yila' ebnaj. 17Hex xahan ay wuti'an, tijab yin̈ hec'ul yin̈ tzet halbil yu ebnaj ischejab Comam Jesucristo, 18yet yalni ebnaj haca' ti': —Hayet toxa chul islahobal tz'ayic, ay anma chitzebi yin̈ tzet chal Comam Dios, cat iswatx'en istx'ojal choche isc'ul, ẍicano ebnaj. 19Ha' huntek'an ebnaj tu' chi'anico pohlebahil texol. Han̈ech'an yin̈ tzet choche isnimanil ebnaj ayco isnabal; machipaxo Comam Espíritu Santo yin̈ yanma ebnaj. 20Yaja' hex caw xahan ay wuti'an, lin̈bawe heba yin̈ cuybanile xaheyayto yul heyanma titna tet Comam Dios. Txahlan̈we yu yip Comam Espíritu Santo. 21Huneln̈ehojabn̈etic'a heyeco yin̈ isc'ulch'anil isc'ul Comam Dios. Hac tu' chu heyechman istz'ayical bay chak' Comam Jesucristo Jahawil hune' cok'inal mach istan̈bal yu isc'ulch'anil isc'ul Comam. 22Tz'ayojab hec'ul yin̈ anma chicapcon yanma yin̈ Comam, ak'we meltzoho isnabal yin̈ Comam. 23Yebpaxo anma haca'tan̈e ayxato xol k'a k'a', tzacweltij, hac tu' chu hecolni xol k'a'. Caw yilal istz'ay hec'ul yin̈ anma, yaja' nann̈eojab heyu yin̈ tzet chiswatx'e yuto ay ismay heyetaxto yu. Yahwe huntek'an istx'ojal chiswatx'e tu', haca' chiyu coyahni hunu xilk'ape bacbilico yal tx'ac yin̈. 24Ha' Comam Dios chu con̈isc'ubani yun̈e machi bay chon̈lectahi. Aypaxo yip Comam con̈yanico yin̈ isc'ulch'anil bay aya yin̈ tzalahilal, yuto matxa comul yul sat, yu sajxa je yu Comam. 25¡Hallaxojab c'ulla tzoti' yin̈ Comam Dios, hune'n̈ech'an Comam Cocolomal! Jalawej ta caw ay yelapno ye Comam, caw ay yip Comam, yeb xin sunil tzet aya, ayco yul isk'ab Comam yet payat, yeb tinan̈, yeb yin̈ sunilbal tiempo. ¡Hacojab tu'!

will be added

X\