SAN JUAN 9

1Yet aycoj Comam Jesús yin̈ b'el b'oj heb'ya' ẍcuywi yin̈, xilni Comam hune' naj machu yilni yettax xpitzc'ayi. 2Sk'amb'en heb'ya' tet Comam: —Mam Cuywaom, ¿tzet yuxin hacti' xu spitzc'a naj ti'? ¿Tom yu smul smam smi' naj, mato yu smul naj yuxin hacti' ye naj? ẍi heb'ya'. 3—Mat yuuj smul smam smi' naj, matca smuluj sb'a naj yuxin hacti' ye naj. To yun̈e syeniloj sb'a scan̈il ye Comam Dios, yuxin hacti' ye naj. 4Yilal juni smunil mac xquin anitijan, yak'n̈e sb'a tz'ayicalto ayon̈, haxca yayxa ak'b'al matxa mac chu smunlayi. 5Yulb'al ayintoc'oj satyib'an̈k'inal ti'an, haca' sajilk'inal we tet sunil anmaan. 6Lawi yalniloj Comam hune' ti', stzub'li sat tx'otx', swatx'en ni'an sok'om yu stzub', smasnicoj yin̈ sb'ak' sat naj machu yilni tu'. 7Xalni tet naj: —As b'et ha' Siloé, cat ha tx'ahni ha sat . (Siloé tu', Ab'iltij, chaliloj.)Yuxin xto naj xtx'aha' sat yin̈ ha' ha' tu'. Haxa xmeltzo naj, xa yil naj. 8Yuxin xal mac ahayoj scawilal yatut naj b'oj hantaj mac xtic'a ilni k'anni naj tzetet smatanoj: —Cochen̈e ha' naj ti' ẍtic'a ec' tz'on̈la k'ano' tzetet smatanoj. 9Ay mac ẍhalni: —Ha' naj. Ay mac ẍhalni: —Machoj, mataj naj, ton̈e lahan jilni heb'naj. Yaja' xal naj: —Ho', hayin hun ti'an. 10Yuxin sk'amb'e anma tu' tet naj: —¿Tzet xu shajlo sb'ak' ha sat?. 11Xalni naj: —Hune' naj Jesús sb'ih, xwatx'en ni'an sok'om, smasnicoj naj yin̈ sb'ak' hin sat ti'an, lawitu' xalni naj: As b'et ha' Siloé cat ha tx'ahni ha sat, ẍi naj. Xquin b'ey hin tx'ahnoj hin satan, yuxin xa hu wilnian. 12Sk'amb'en heb'naj: —¿B'ay ay naj tu' tinan̈? ẍi heb'naj. —Mat wohtajojan. 13Lawitu' x'ilaxtoj naj maẍtic'a chu yilni tu' tet heb'naj fariseo. 14C'uxan tz'ayic xewb'al yet swatx'en Comam ni'an sok'om, xanicoj Comam yin̈ sb'ak' sat naj, yun̈e xhajloyi. 15Yuxin sk'amb'e heb'naj fariseo tet naj: —¿Tzet xu shajlo sb'ak' ha sat ti'? ẍi heb'naj. —Naj Jesús smasnicoj ni'an sok'om yin̈ sb'ak' hin sat ti'an, lawitu' xquin to hin tx'ahnojilojan, yuxin xa yu wilnian. 16Yuxin xal hunk'aan heb'naj fariseo: —Hune' naj tu' mat yetoj Comam Dios ye naj, haxca mach syijye naj tz'ayic xewb'al. Yaja' xal hunk'aanxa heb'naj: —¿Tox chu yunuj naj hunuj c'ayb'alc'ule ta ahmul naj xin? Yuxin spohtoj sb'a heb'naj. 17Sk'amb'en pax heb'naj tet naj maẍtic'a chu yilni tu': —Haca' hach, ¿tzet chawute hawalni yin̈ naj, haxca xhajlo sb'ak' ha sat yu naj? ẍi heb'naj. —Ha' ẍwute walnian to schejab'lom Comam Dios ye naj. 18Yaja' maẍtic'a cha' heb'naj ijb'alom ah Judea tu' yuluj sc'ul ta xhajlo sb'ak' sat naj. To c'ultic'a ye naj yalan̈to tu' chute heb'naj yalni, yuxin xawte heb'naj smam smi' naj. 19Sk'amb'en heb'naj tet heb'jetb'i: —¿Tom ha' naj ti' heyuninal, naj cheyala to machu yilni yet xpitzc'ayi? ¿Tzet xu shajlo sb'ak' sat naj?. 20—Juninal ho'an; yet xpitzc'a ho' machu yilni ho'. 21Yaja' mat johtajojan tzet xu shajlo sb'ak' sat ho', matca johtajojan mac xhajni sb'ak' sat ho'. K'amb'ewej tet ho'. Ayxa sk'inal ho', xa hu yalni ho' teyet. 22Haxca xiw heb'jetb'i tet heb'naj ijb'alom tu', yuxin hactu' xute heb'jetb'i yalni. Haxca halb'il yu heb'naj: Mac ẍhalni ta naj Jesús ha' naj Cristo, matxa ẍco chab'ictij yul capiya, ẍi heb'naj. 23Yuxin xal heb'jetb'i: K'amb'ewej tet ho', ayxa sk'inal ho'. 24Lawitu' xawten pax heb'naj naj xhajlo sb'ak' sat tu', xalni heb'naj tet naj: —Yin̈ sat Comam Dios haliloj st'in̈anil jetan tzet xu shajlo sb'ak' ha sat, haxca johtajan to ahmul naj x'a'ni hajlooj sb'ak' ha sat. 25—Mat wohtajojan ta ahmul naj mato machoj. Hatcachan ti' wohtajan, to yet yalan̈to machu wilnian, yaja' tinan̈ xa hu wilnian. 26Sk'amb'en pax heb'naj: —¿Tzet caw cach yute naj? ¿Tzet xu shajlo sb'ak' ha sat yu naj? ẍi heb'naj. 27—Xax wal teyetan, yaja' macheyab'etoj. ¿Tzet yuxin che k'amb'e hunecxa? ¿Mato chex oc pax tzujnuj yin̈ naj heyalni?. 28Ha' xalni naj hune' tu', x'oc heb'naj sb'ahnoj naj: —Hachti' ayachcoj yin̈ naj, walon̈an yin̈ tzet stz'ib'n̈e ya' Moisés tzujanon̈an. 29Johtajan ta ha' caw Comam Dios x'a'ni stzoti' tet ya' Moisés. Wal naj ti' mat johtajojan b'ay elnajcoj naj. ẍi heb'naj. 30—¿Tzet cheya'le? Mat heyohtajoj b'ay elnajcoj naj chaltu', yaja' chim heyila xhajlo sb'ak' hin sat yu najan. 31Johtaj ta macha' Comam Dios tzet sk'an hunuj naj ahmul. Hatcachan mac ẍhak'en Comam, cat syijyen tzet chala, ha' b'ay cha' Comam tzet sk'ana. 32B'oj hunxa, maẍto b'ay ẍjab'e sk'umal ta ay hunuj naj ẍhajnitoj sb'ak' sat hunuj mac machu yilni yettax xpitzc'ayi. 33K'inaloj ta mataj Comam Dios x'anitij naj Jesús tu', mach mi tzet chu yuni naj, ẍi naj tet heb'naj. 34—Hachti' ahmul hach cach pitzc'ayi. ¿Tom hach to chon̈ ha cuyu'an? Stenniltij heb'naj naj yul capiya. 35Ha' xab'en Comam Jesús ta xtenotiltij naj xhajlo sb'ak' sat tu', xto Comam saynoj naj. Ha' xchalo naj, xalni Comam tet naj: —¿Chim hawa' yuluj ha c'ul yin̈ mac ab'iltij yu Comam Dios xol jet-anmail ti'? ẍi Comam. 36—¿Maca Mamin? hal wetan cat wa'ni yuluj hin c'ul yin̈an, ẍi naj. 37—Xax hawila. Hayin chin tzotel tawet ti'an, hayin hune' tu'an. 38Yet xalni Comam hune' tu', x'ay jahnoj naj yin̈ sat Comam, shak'en naj, chalni naj: —Ho' Mamin, ẍwa' yuluj hin c'ul tawin̈an. ẍi naj. 39Xalni Comam: —Yu hin watx'encoj anmaan yuxin xquin hul satyib'an̈k'inal ti'an, haxca ay mac machu yilni yet Comam Dios tinan̈, yaja' hayin chin haja'toj sb'ak' satan. Ay pax mac chu yilni yet Comam Dios yalni, yaja' haca'tic'a tz'opb'ojcan wuan. 40Ha' xab'en heb'naj fariseo aycoj xol anma hune' tu', xalni heb'naj tet Comam: —¿Tom hayon̈ hun tz'opon̈ hawalni ti'an? ẍi heb'naj. 41—K'inaloj ta tz'opex yin̈ yet Comam, mach mi he mul ẍcawxicoj teyib'an̈. Yaja' haxca cheyala ta chu heyilni, yuxin k'a' ayto he mul, ẍi Comam tet heb'naj.


Copyright
Learn More

will be added

X\