1 Yet yec' Comam Jesús yin̈ isbel hunel, yilni Comam hune' naj caw maẍtic'a chu yilni yettaxtic'a ispitzc'ahi. 2 Isk'amben ebnaj chicuywi yinta Comam tu': —Mam cuywawom, ¿tzet yin̈ yuxin mutz'an sat hune' naj ti' yet ispitzc'a naj? ¿Tom yu ismul ismam naj mato yu ismul naj? ẍi ebnaj tet Comam. 3 Yalni Comam xin: —Maẍtaj yu ismul ismam naj yeb ismi' naj, maẍtajpaxo yu ismul naj yuxinto hac tu' ye naj. Wal xin Comam Dios caw choche isc'ul chisyelo yip yin̈ naj, yuxinto hac tu' ye naj. 4 Caw yilal inwatx'enan ismunil Comam an̈eintijan yak' isba tz'ayical to yuc'a' chiah ak'bal yet matxa chu comunlahi. 5 Yak' isba ay intoc'ojan yul sat yiban̈k'inal ti' caw haca' issajilk'inal wehayojan xol sunil anma, ẍi Comam. 6 Yet lahwi istzotel Comam xin, istzublayo Comam sat tx'otx', issomni Comam nich'an tz'otz'ew yu isk'ab, lahwi tu' xin ismasnico Comam yin̈ isbak'sat naj mutz'an sat tu'. 7 Yalni Comam tet naj: —Asi' bey ha' Siloé, hune' ha' etxan, cat xin hatx'ahnilo hasat, ẍi Comam tet naj. (Siloé chiyal yelapnoj Ak'biltij.) Hac tu' xin yu isto naj bey ha' Siloé tu', istx'ahni naj sat xol ha'. Haxa yet ispaxti naj xin, xayu yilni naj. 8 Yuxin ha' anma ayayo yatut iscawilal naj yeb huntek'anxa anma ohtan̈e naj, yal haca' ti': —¿Cochan ha' naj ti' chiec' tz'on̈la k'ano melyu? ẍi anma tu' yin̈ naj. 9 Ay mac xin halni: —Ho', ha' naj ti', ẍi anma. Aypaxo mac halni: —Machoj, maẍtaj naj, yaj etza hac ti' jilni naj, ẍipaxoj. Wal naj xin yal naj: —Ho', hanin-ton-an, ẍi naj. 10 Yoc anma isk'ambeno tet naj: —¿Tzet xin mayu ishajlo hasat? ẍi anma. 11 Yalni naj xin: —Hune' ya', Jesús isbi, ha' ya' somni nich'an tz'otz'ew, ismasnico ya' yin̈ insatan. Lahwi tu' xin, yalni ya' wetan: “Asi' bey ha' Siloé, cat hatx'ahnilo hasat xol ha',” ẍi ya' wetan. Hac tu' yu intohan intx'ahnolojan insatti'an; lahwi tu' xin ishajlo insatan, ẍi naj. 12 Isk'amben ebnaj tet naj: —¿Baytu'wal xin ay naj tinan̈? ẍi ebnaj. —Caw mach wohtajojan, ẍi naj. 13 Lahwi tu' xin, yilaxto naj mutz'antic'a sat tu' tet ebnaj fariseo. 14 Yet iswatx'en Comam nich'an tz'otz'ew yun̈e ishajlo sat naj tu', caw c'uxan istz'ayical xewilal. 15 Yuxinto ocpaxo ebnaj fariseo tu' isk'ambe' tet naj hunelxa: —¿Tzet yu ishajlo hasat ti'? ẍi ebnaj tet naj. Istak'wi naj: —Ya' Jesús masnico nich'an tz'otz'ew yin̈ insatan, lahwi tu' xin intohan intx'ahnolojan; hac tu' xin yu ishajlo insatan, ẍi naj. 16 Ay xin ebnaj fariseo halni: —Hune' naj tu', caw mach yeto Comam Dios ye naj yuto mach chisyije naj istz'ayical xewilal, ẍi ebnaj yin̈ Comam. Yaj ay ebnaj halnipaxoj: —Ya' Jesús tu', mach mulumo ya'. Wal xin tato mulum ya', ¿tom chiyu isyeni ya' hunu c'aybalc'ule haca' chisye ti'? ẍi ebnaj. 17 Yocpaxo ebnaj fariseo isk'ambeno tet naj maẍtic'a chiyu yilni tu': —Haxa hach ti', ¿tzet chawute hawalni yin̈ naj ak'ni hajlo hasat ti'? ẍi ebnaj. Yalni naj haca' ti': —Ha' hune' chiwute walnihan, to caw ischejab Comam Dios ye ya', ẍipaxo naj tet ebnaj. 18 Yaj caw maẍtic'a yaco ebnaj yahawil con̈ob Israel tu' yin̈ isc'ul tato hajlo sat hune' naj tu' yu Comam. Ha' yute isnani ebnaj to caw c'ultic'a ye sat naj, yuxinto awtelax ismam naj yeb ismi' naj yu ebnaj. 19 Isk'amben ebnaj tet ismam naj yeb ismi' naj haca' ti': —¿Ham naj ti', heyuninal cheyala tato caw maẍtic'a chu yilni yet ispitzc'ahi? ¿Tzet yu ishajlo sat naj? ẍi ebnaj. 20 Istak'wi ismam naj yeb ismi' naj: —Caw yeli juninalan̈ naj, caw yelpaxoj maẍtic'a chiyu yilni naj yet ispitzc'a naj. 21 Yaj caw mach johtajojan̈ tzet yu ishajlo sat naj, yeb xin mach johtapaxojan̈ mac ak'ni hajloho sat naj. ¡K'ambewe tet naj yuto ichamxa naj, chiyu yalni naj teyet! ẍi ismam naj yeb ismi' naj tet ebnaj tu'. 22 Wal xin, hac tu' yute yalni ismam naj yeb ismi' naj yuto caw chixiw tet ebnaj yahawil yehico yin̈ con̈ob Israel, yuto halbil yu ebnaj haca' ti': “Macn̈etic'a chihalni tato ha' naj Jesús ti' Cristo, matxa chicochacti yul capilla ti',” ẍi ebnaj. 23 Yuxinto hac tu' yute yalni ismam naj yeb ismi' naj: “K'ambewe tet naj, ichamxa naj, xayu yalni naj teyet,” ẍi. 24 Lahwi tu' xin, yawtenpaxti ebnaj naj hajlo sat tu' hunelxa, isk'amben ebnaj tet naj: —Caw chabe Comam Dios caw halilo isyelal jetan̈, wal xin caw johtajan̈ ta caw mulum hune' naj chawal ti', ẍi ebnaj tet naj. 25 Yalni naj xin: —Haninti'an, caw mach wohtajojan tato mulum ya' maca machoj, yuxin mach chiyu walnihan teyet; hachcachann̈e wohtajan to maẍtic'a chiyu wilnihan yet yalan̈tocanoj, wal tinan̈ xin xayu wilnihan, ẍi naj tet ebnaj. 26 Isk'amben ebnaj hunelxa: —¿Tzet caw caẍyute naj? ¿Tzet caw yu ishajlo hasat ti' yu naj? ẍi ebnaj. 27 Yalni naj xin: —Caw mawalan teyet, yaj to caw mach cheyaco yin̈ hec'ul. ¿Tzet yin̈ xin cheyoche chiwalan teyet hunelxa? ¿Mato cheyoche chexocpaxo cuywo yinta ya'? ẍi naj tet ebnaj. 28 Yet yalni naj haca' tu', istzabnico ebnaj isbahni naj, yalni ebnaj tet naj: —Hach ti', ayachxaco yinta naj, wal han̈on̈ti'an̈ yinta iscuybanil naj Moisés tzujanon̈an̈. 29 Walon̈ti'an̈ caw johtajan̈ tato ha' caw Comam Dios anicano cuybanile tet naj Moisés tu'. Wal naj chawal ti', caw mach johtajojan̈ baytu'wal titnaco naj, ẍi ebnaj. 30 Istak'wican̈ naj tet ebnaj xin: —Caw chic'ay inc'ulan yuto cheyala tato mach heyohtajo bay titnaco ya', yaja' caw cheyila hajlo insatan yu ya'. 31 Caw johtaj tato mach chabe Comam Dios tzet chisk'an anma mulum, hachcachann̈e anma caw ayco yanma yin̈ Comam, cat yinayo isba tet, hachcachann̈e huntek'an anma tu' chak' Comam ispaj tzet chisk'ana'. 32 Wal xin, caw maẍto bay chijabe isk'umal tato ay huno mac chiyu yak'ni hajloho sat hunu anma maẍtic'a chiyu yilni yettaxtic'a ispitzc'ahi. 33 Tato maẍtaj Comam Dios an̈eti ya' ti', caw machim nino tzet chiyu iswatx'en ya', ẍi naj tet ebnaj. 34 Istak'wi ebnaj tet naj: —Walach hach ti', caw mulumach yettaxtic'a hapitzc'ahi. ¿Tom chaẍoc con̈hacuyu'an̈ hawalni? ẍi ebnaj tet naj, hac tu' yu istennilti ebnaj naj tu' yul capilla. 35 Yabe Comam Jesús tato tenlaxilti naj hajlo sat tu' yul capilla, haxa yet ischahloyo naj yu Comam, yalni Comam tet naj haca' ti': —¿Chimhawayto yul hawanma yin̈ Hanin Ak'bilintijan texol yu Comam Dios? ẍi Comam tet naj. 36 Isk'amben naj tet Comam: —Mamin, ¿mac hune' chawal tu'? Hal wetan cat xin wanico wanmahan yin̈, ẍi naj. 37 Yalni Comam tet naj: —Caw xahawil yin̈; Hanintonan hune' mac bay lan̈an hatzotel ti', ẍi Comam tet naj. 38 Yet yaben naj haca' tu', yay jahno naj yin̈ sat Comam, yalni naj: —Caw chiwaco wanmahan tawin̈ Mam, ẍi naj. 39 Yalni Comam tet naj: —Wal haninti'an, hulnajinan bey yul sat yiban̈k'inal ti' yun̈e wilnihan tzettaj chi'elico anma, yuto ay anma ti' caw mach chiyu yilni, yaj xin haninan chiwak' hajlohojan sat. Aypaxo anma caw c'ul yilni, yaj chimutz'icano sat wuhan yun̈e matxa chiyu yilni, ẍi Comam. 40 Ay xin huntek'an ebnaj fariseo ayco isc'atan̈ Comam, yet yaben ebnaj yin̈ tzet yal Comam tu', yalni ebnaj: —¿Tom xin ha' hunon̈an̈ mach chiyu jilnihan̈ hawalni? ẍi ebnaj. 41 Istak'wi Comam tet ebnaj: —K'inalo tato mach chiyu heyilni tzettaj ye tu' yet Comam Dios yehi, caw machim hemul. Yaj cheyala tato caw chiyu heyilni tzettaj ye tu' yet Comam Dios, yaj mach cheyijepaxoj, yuxinto caw ay hemul, ẍi Comam tet ebnaj.
