SAN JUAN 8

1Wal Comam Jesús, xto Comam yin̈ sc'ul witz Olivo, hat xcancan Comam hune' ak'b'al tu'. 2Yet sab'sahc'alil hunxa tz'ayic, x'apni Comam yamak' yatut Comam Dios, caw tx'ihal anma xhul sc'atan̈. Lawitu' x'ay tz'on̈noj, x'oc scuynuj anma. 3Hunip tu' xhul heb'naj fariseo b'oj heb'naj cuywaom yin̈ sley ya' Moisés sc'atan̈ Comam, ib'il hune' ix yu heb'naj. Xchaloloj ix yin̈ smul b'oj hune' naj. X'ilaxtij ix sataj anma ahayoj sc'atan̈ Comam. 4Xalni heb'naj tet Comam: —Mam Cuywaom, xchalo hune' ix ti' juan lan̈an ix yin̈ smul b'oj hune' naj. 5Chute sley ya' Moisés yalni ta heb'ix hactu' ye swi' ẍc'ojlaxcamoj heb'ix, ¿tzet chawute hawalni?. 6Xal heb'naj hune' tu', yu yilwen heb'naj ta ay b'ay semc'oj Comam cat ya'wojc'ule heb'naj yin̈. Yaja' ton̈e x'ay xulnuj Comam, ichi stz'ib'li sat tx'otx' yu yiximal sk'ab'. 7Ayn̈etic'acoj heb'naj sk'amb'en tet Comam tzet xtan̈canoj hune' tu'. Yuxin x'ah t'an̈na Comam, xalni tet heb'naj: —Hex mach ninoj he mul heyalni, hex b'ab'el cheyican̈ he ch'en cat he c'ojni ix. 8Lawitu' x'ay pax xulnuj, x'oc tz'ib'loj sat tx'otx' hunecxa. 9Ha' xab'en heb'naj tzet xal Comam, hununtajil xu yelcan̈ heb'naj. B'ab'el x'elcan̈ heb'naj k'a' ichamxa, schuquilxan̈e ix xcancanoj b'oj Comam. 10Lawitu' ẍt'an̈xican̈ Comam, xilni to schuquilxan̈e ix xcan sc'atan̈ Comam, xalni tet ix: —Iẍ, ¿b'ay ay heb'naj ch'a'wi c'ule tawin̈? ¿mach hunuj heb'naj cach c'ojnicamoj? ẍi Comam. 11—Machoj Mamin, mach hunuj maca, —Haquinan, machin chilb'aan ta chach c'ojlaxcamoj. Asi', paxan̈toj, matxa cha say yak'b'il ha mul. 12Xalni pax Comam Jesús tet anma: —Hayin ti'an chin mujli yin̈ yanma hej anmaan. Mactic'a ch'oc tzujnuj win̈an, ẍwa'a' sajilk'inal tet yanmaan. Yu hune' sajilk'inal tu' scha k'inal mach stan̈b'al, matxa ch'ec'oj xol k'ejholo. 13Xalni heb'naj fariseo: —Hachtic'a caw chawa' ha b'a tawin̈, yuxin matzet chaliloj tzet chawal ti'. 14Xalni pax Comam: —Waxan̈ca hayintic'a ẍwa' hin b'a win̈an, yaja' st'in̈anil ẍwalan, haxca yeli wohtaj b'ay xquin titan, wohtaj pax b'ay chin toan. Yaja' hexti' mat heyohtajoj b'ay xquin titan ni b'ay chin toan. 15Hexti' ton̈c'a cheyicoj heyetoj yin̈ tzet cheyilcoj yin̈ anma, walinan mach mac ẍwitij hin cuenta yin̈an. 16Yaja' ta ay mac ẍwitij cuenta yin̈an, st'in̈anil chu wunujan, haxca mat hin chuquilojan, to ha'hun hin Mam an̈eintijan, ha' ẍwet i'ni cuentaan. 17Yultic'a co ley chalayoj ta ay cawan̈oj mac lahann̈etic'a yalni, chu ja'ni yuluj co c'ul yin̈ tzet chala. 18Wal hinan, ay cawan̈ mac lahan yalni win̈an, hayin caw ẍwa' hin b'a win̈an, hin Mam xquin anitijan, ha' hunxa scha' pax sb'a win̈an, ẍi Comam tet heb'naj. 19Lawitu' sk'amb'en heb'naj tet Comam: —¿B'ay ay ha Mam tu'? ẍi heb'naj. Xta'wi Comam: —Hexti' mat hin heyohtajojan, matca heyohtajoj hin Mam tu'an. Ta hin heyohtajan, heyohtajmi pax hin Mam tu'an. 20Xal Comam hune' ti' yet lan̈an scuywa yamak' yatut Comam Dios scawilal b'ay ch'a'lax ch'en ofrenda. Yaja' mach mac x'initoj Comam presu, haxca maẍto ch'apni stz'ayical b'ay ẍcami. 21Xalni Comam Jesús hunecxa: —Wal hinan chin toan, yuxin nab'axan̈e chin he saya'an. Hexti' yin̈ he mul chex camojtoj, machu he to b'ay chin to tu'an. 22Yuxin xal heb'naj ah Judea tu': —Tita spotx'o' sb'a naj, yuxin chal naj ta machu japni b'ay ch'apni naj. 23Xalni pax Comam: —Hexti' sat tx'otx'al ti' heyeyi. Walinan scuenta satcan̈ wean. Hexti' yet satyib'an̈k'inal ti' heyeyi. Hayin ti'an mat yetoj satyib'an̈k'inal ti' wean. 24Yuxin ẍwal teyetan ta yalan̈tic'a he mul chex camojtoj. Haxca ta macheya' yuluj he c'ul ta hayin cawan, yalan̈tic'a he mul chex camojtoj. 25Sk'amb'en pax heb'naj: —¿Mac anmail hach chaltu'?. Xta'wi Comam: —Halb'ilxatic'a wu teyet yalan̈toan mac anmail hinan. 26Caw tx'ihal tzet yet ay walni teyin̈an ta ẍwitij cuenta teyin̈an, yaja' ha' mac xquin anitijan st'in̈anil chala, yuxin han̈c'a tzet halb'il wet yuan, ha' ẍwal tet anmaan. 27Yaja' mach xtxum heb'naj to ha' Comam Dios chal Comam. 28Yuxin xal Comam tet heb'naj: —Hato yet chin heyanojcan̈ yin̈ culusan che txumnojiloj to Ab'ilintij yu Comam Dios xol jet-anmail ti'an, catto heyohtajn̈enojiloj to mat wetoj yul hin wi' tzet ẍwu ti'an, to han̈c'a tzet chal hin Mam wetan, ha' ẍwalan. 29Ha' mac xquin anitijan, ha' aycoj wetb'iojan. Machin sb'ejcan hin chuquilan, haxca b'aytet chal sc'ul, han̈c'a' ẍwuan. 30Yet xalni Comam hune' ti', tx'ihal mac xa' yuluj sc'ul yin̈. 31Xalni Comam Jesús tet heb'jetb'i ah Judea xa' yuluj sc'ul yin̈: —Ta hunel cheyutecoj heyanma yin̈ tzet ẍwal ti'an, yin̈ caw yeli tzujan hex win̈ chaltu'an. 32Cheyohtajn̈enoj st'in̈anil tzet ye Comam Dios, ha' st'in̈anil tu', ha' chex sb'ejtzonoj. 33Xalni heb'naj: —Yic'al ya' Abraham jean. Mach b'ay txon̈b'ilon̈ tet anmaan, ¿tzet yuxin chawala ta chon̈ b'ejtzolaxojan? . 34Xta'wi Comam: —Yin̈ caw yeli mac chacoj smul, txon̈b'il chucan tet mule. 35K'inaloj ta ay hunuj naj txon̈b'il tet hunuj naj yahaw munil, mach ẍcan naj stz'ajoj sfamilia naj yahaw tu' yin̈ huneln̈e, yaja' wal naj c'ahole, aytic'acoj naj yin̈ sfamilia tu' huneln̈e. 36Yuxin ta hayin chex hin b'ejtzoan, yin̈ caw yeli b'ejtzob'il cheyucanoj, haxca Sc'ahol Comam Dios wean. 37Wohtajan to yic'al ya' Abraham heyeyi, yaja' cheyal hin he potx'o'an, haxca mach ẍchawicoj hin tzoti' yin̈ heyanmaan. 38Ha' tzet ilb'il wu yin̈ hin Maman, ha' ẍwal teyetan. Walex ha' tzet chal he mam, ha' cheyu. 39—Hayon̈ ti'an, yic'al ya' Abraham jean, ẍi heb'naj. —Ta yic'al ya' Abraham heyeyi, chim he yijye tzet xu ya'. 40Yaja' cheyal hin he potx'o'an haxca han̈c'a st'in̈anil halb'il wet yu Comam Diosan, ha' ẍwal teyetan. Wal ya' Abraham mach hunecoj xute ya' hactu'. 41Ha' tzet xu he mam, ha' cheyu. Yuxin xal heb'naj: —Walon̈an, mat ton̈eoj sic'b'ilon̈ yu co mi'an, han̈c'a Comam Dios co Maman. 42Xalni Comam: —Ta yeli he Mam Comam Dios, xahanmi chin heyilan, haxca yin̈ Comam xquin titan yet xquin hul b'eti'an. Mat ton̈c'aoj xwitij hin b'aan, to ha' Comam Dios xquin anitijan. 43¿Tzet yuxin mache txum tzet ẍwalan? ¿Tzet yu? haxca mach sje he c'ul he yab'etoj. 44Naj matzwalil, ha' naj he mam. Hex yet naj, yuxin ha' tzet choche naj, ha' cheyacoj yin̈ he c'ul heyuni. Potx'om anma naj yettax x'ichitij satyib'an̈k'inal ti'. Matzet chaliloj st'in̈anil tet naj, haxca mat st'in̈aniloj chal naj. Yet chalni naj lek'ti'al, ha' tzet ye naj, ha' chal naj, haxca lek'ti' naj. Ha' naj x'ichencan̈ lek'ti'al. 45Walinan, haxca st'in̈anil ẍwalan, yuxin macheya' yuluj he c'ul yin̈ tzet chin tzotean. 46¿Mac hunuj hex chu heyalni ta ay hin mulan? Ta caw st'in̈anil chin tzotean, ¿tzet yuxin macheya' yuluj he c'ul yin̈ tzet ẍwalan? 47Mactaj yet Comam Dios, choche yab'e' stzoti' Comam, yaja' hexti' matex yetoj Comam Dios, yuxin mach sje he c'ul heyab'e. 48Xalni heb'naj ah Judea tu' tet Comam Jesús: —¿Tox mat yeloj ẍjalan, to ah Samaria ach, b'oj hawetb'i ha b'a b'oj hune' yespíritu naj matzwalil? ẍi heb'naj. 49—Machoj, mat wetb'ioj hin b'a b'oj hune' yespíritu naj matzwalil tu'an, to ha' wetan ẍwacoj smay hin Maman, yaja' hexxa cheyiloj hin pixanan. 50Hayin ti'an, mataj yoc hin may ayc'oj yin̈ hin c'ulan, to ay hune' mac ch'anicoj hin mayan, ha' ẍhalnoj mac yel chala. 51Yin̈ caw yeli ẍwal teyetan, mac ẍyijyen tzet ẍwalan mach b'ak'in̈ ẍcamoj, ẍi Comam. 52—Wal tinan̈ ha' jecojan yet ẍjalnian ta aycoj hune' yespíritu naj matzwalil tawin̈. Ya' Abraham b'oj heb'ya' schejab'lom Comam Dios, sunil heb'ya' xcamtoj, wal hawalni: Mac ẍyijyen tzet ẍwalan, maẍtic'a ẍcamoj, cachi. 53¿Tox k'a' ec'b'alto hawe sataj ya' jichmam Abraham tu'? Xcamtoj ya' b'oj heb'ya' schejab'lom Comam tu'. ¿Mac xin anmail hach hawalni?. 54Yuxin xal pax Comam: —Ta hayintic'a caw ẍwacoj hin mayan, matzet chaliloj tzet ẍwalan, yaja' hin Mam ch'anicoj hin mayan. Ha' hin Mam tu'an, ha' cheyal he Diosoj. 55Yaja' nab'an̈e cheyala' haxca mat heyohtajoj Comam. Walinan, wohtaj Comaman. K'inaloj ta ẍwalan to mat wohtajoj Comaman, lahanmi hin lek'ti'al b'oj hexan. Wal xin, yeli wohtaj Comaman, sunil tzet chala, chin yijyean. 56Ya' jichmam Abraham caw stzala ya' yet xilni ya' wulan. Yuxin yet xquin hulan, caw stzala ya' yilni, ẍi Comam. 57—Maẍto hach 50 hab'il, hajxam hawilni ya' jichmam Abraham, ẍi heb'naj. 58—Yin̈ caw yeli ẍwal teyetan, yet maẍto ẍpitzc'a ya' Abraham tu', ayinxatic'aan. 59Yuxin xican̈ heb'naj sch'en sc'ojnicamoj heb'naj Comam yalni. Yaja' xeb'aloj sb'a Comam, x'eltij yamak' yatut Comam Dios.


Copyright
Learn More

will be added

X\