SAN JUAN 7

1Lawitu' x'ichi yec' Comam yul scuenta Galilea, matxa sje sc'ul Comam ec'oj b'et Judea, haxca chal heb'naj ah Judea tu' spotx'o' Comam. 2Cawilxa yetij k'in̈ chinama, sk'in̈ anma israel. 3Xalni heb'naj yuẍtaj Comam tet: —Machach can b'eti'. As Judea yun̈e mac tzujan tawin̈ b'etu' chilpax hej tzetet chawu. 4Tato ẍjoche ta chon̈ ohtajn̈elaxiloj, machu juni hunuj tzetet yin̈ ewantaj. Yuxin ta yeli ay c'ayb'alc'ule chu hawuni, yilal ha yeni yin̈ sat anma. 5Hactu' yalni heb'naj haxca ha'hun heb'naj macha' yuluj sc'ul yin̈ Comam. 6Xalni Comam tet heb'naj: —Maẍto ch'apni stz'ayical hin toan, yaja' wal hexti', tzantzet stz'ayicalil c'ul teyet. 7Anma yet satyib'an̈k'inal ti' machex scaja, walinan chin scaj anmaan haxca ẍwalan to mat c'uluj tzetet chu. 8Aswej yin̈ k'in̈ tu', walinan machin toan, haxca maẍto ch'apni stz'ayical hin toan. 9Lawi yalni Comam tet heb'naj, xto cancanoj Comam Galilea. 10Yet xax to heb'naj yuẍtaj Comam tu' yin̈ k'in̈, xto pax Comam, yaja' yin̈ ewantaj. 11Ch'ec' sk'amb'eb'al heb'naj ah Judea yin̈ Comam yulb'al k'in̈ tu', chalni heb'naj: —¿B'aytaxca ay naj tu'?. 12Nanann̈e chal anma yin̈ Comam. Ay mac ẍhalni: Caw c'ul sc'ul naj, . Ay mac ẍhalni: Machoj, mat c'uluj naj, to ton̈e sub' naj anma. 13Yaja' ewantaj stzotel anma tu' haxca xiw tet heb'naj ah Judea tu'. 14Yulb'al ye k'in̈ yet x'apni Comam yamak' yatut Comam Dios, x'oc scuynuj anma. 15Xc'ay sc'ul heb'naj ah Judea yab'en tzet chal Comam, chalni heb'naj: —¿Tzet xute hune' naj ti' yohtajn̈en sunil hunk'aan ti'? Mat cuywinajoj naj. 16Xta'wi Comam: —Hune' cuywab'al ẍwa' teyet ti'an, mat wetojan, to yet mac xquin anitijan. 17Ta ay mac choche syijye' tzet chal Comam Dios, xtxumuluj ta yet Comam hune' cuywab'al ti', matoj wet yul hin wi' tzet ẍwalan. 18Mac yul swi' chitij tzet chala, hactu' chute yun̈e yoc smay yin̈ sat anma. Walinan, ha' mac xquin anitijan, ha' ẍwochean ta caw ay yelapnoj chucan yin̈ sat anma. Yuxin st'in̈anil ẍwalan, mat lek'ti'aloj yeyi. 19Ab'il sley Comam Dios teyet yu ya' Moisés, yaja' mach hunujex che yijye tzet chal hune' ley tu'. ¿Tzet yuxin chin he potx' heyalnian? ẍi Comam tet heb'naj. 20Xta'wi heb'naj: —Aymicoj hunuj yespíritu naj matzwalil tawin̈. ¿Mac xin chal hach potx'noj? . 21Xalni pax Comam: —Yu hune' c'ayb'alc'ule xwu yin̈ tz'ayic xewb'alan, te hunil xc'ay he c'ul. 22Hatax heb'ya' jichmam ichen̈ecan̈ hune' yechel circuncisión. Haxa ya' Moisés xalni ta yilal ẍyijyelaxi. Yuxin waxan̈ca tz'ayic xewb'al, cheya' circuncidar niẍtej unin sujk'inixto spitzc'ayi. 23Hexti', tz'ayicojab' xewb'al cheya' circuncidar niẍtej unin, yun̈e mache man̈c'o sley ya' Moisés. Ta hactu' cheyute, ¿tzet yuxin ẍchiwa he c'ul win̈an haxca yin̈ tz'ayic xewb'al xwan̈te hune' naj yin̈ tz'ajanlahanan? 24Mat ton̈c'aoj cheyiicoj heyetoj yin̈ anma, ta cheyi'can̈ he b'a yin̈, yaja' yin̈ st'in̈anil. 25Yuxin xal anma ah Jerusalén: —¿Mataj naj ti' chal heb'naj spotx'o? 26Ilwejc'anab'i, sajsajil stzotel naj xol anma, yaja' mach mac ay tzet ẍhalni tet naj. ¿Mato xax ya' heb'naj swi'al yuluj sc'ul ta ha' naj Cristo? 27Machmi, haxca yet chuluj naj Cristo, mach mac ohtajn̈e b'ay elnajcoj naj. Yaja' naj ti', johtaj b'ay elnajcoj naj. 28Ha' xab'en Comam tzet chal anma, yet lan̈an scuywayi yamak' yatut Comam Dios, xalni yin̈ ip: —Hexti' ham heyalni ta hin heyohtajan, heyohtaj pax b'ay elnajincojan, yaja' mat hacoj tu' yeyi, mat hayinoj xwitij hin b'aan, to ab'il xquin tit yu Comam st'in̈anil chala, hune' tu' mat heyohtajoj. 29Walinan wohtaj Comaman, haxca yin̈ xquin titan, ha' xquin anitijan. 30Yet lan̈an yalni Comam hune' tu', ay heb'naj xal inojtoj Comam presu, yaja' mach mac xala stzab'ni Comam, haxca maẍto ch'apni stz'ayical scami. 31Yin̈ sunil mac yamanc'oj tu' tx'ihal mac x'a'ni yuluj sc'ul yin̈ Comam, xalni heb'jetb'i: —Yet chuluj naj Cristo, ¿tox k'a' ec'b'alto c'ayb'alc'ule chub' naj sataj naj ti' yu syenoj ta ha' naj Cristo?. 32Ha' xab'entij heb'naj fariseo tzet stzote anma yin̈ Comam Jesús, syamb'an sb'a heb'naj b'oj heb'naj sacerdote, xanitoj heb'naj heb'naj ẍtan̈en yatut Comam Dios yi'a'tij Comam presu. 33Yuxin xal Comam: —Hanic'xan̈e chin ehojc'oj te xolan, lawitu' cat hin meltzooj sc'atan̈ mac xquin anitijan. 34Hexti' chin he saya'an, yaja' mach chin chaloj heyuan, haxca machu heyapni b'ay chin apnoj tu'an. 35Chalni heb'naj ah Judea tet hunun: —¿B'aytaxca ẍtoj naj ti', yuxin chal naj ta mach ẍchalooj naj ju? ¿Ham xol heb'naj jetcon̈ob' pujantoj xol heb'naj nancon̈ob'al, hat ẍtoj naj scuyu' heb'naj mat jetcon̈ob'oj? 36¿Tzet ch'elicoj hune' tzet chal naj ti': Chin he saya'an, yaja' machin chalooj heyuan, haxca machu heyapni b'ay chin apnojan, ẍi naj?. 37Yet-xa niman k'in̈, ha' hune' tu' k'a' k'in̈ tet anma israel, tx'ihal anma xyamicoj, yuxin xah lin̈noj Comam Jesús xalni yin̈ ip: —Ta ayex caw cheyoche che cha he k'inal mach stan̈b'al hulan̈wej tin̈ c'atan̈an. Haca' heyuc'ni ha' ha' yet ẍtaj he ti', hactu' chu he chani he k'inal ẍwa'an. 38Mactaj cha' yuluj sc'ul win̈an, chija' sb'a haca' yalni Yum Comam Dios: Haca' hunuj snuk' ha' ha' ch'el yojomal, hactu' chu swayican̈ yin̈ yanma, ẍiayoj. 39Hactu' xute Comam yalni ta mactaj cha' yuluj sc'ul yin̈, schab' Comam Espíritu Santo. Ton̈e maẍto ch'ayiloj Comam Espíritu Santo yet tu', haxca maẍto ch'iottoj Comam Jesús satcan̈. 40Yet xab'en anma yamanc'oj tu' tzet xal Comam Jesús, ay mac ẍhalni: —Yin̈ caw yeli ha' naj ti' schejab'lom Comam Dios chul yeyi. 41Ay mac ẍhalni paxoj: —Ha' naj ti' Cristo. Hunmajanxa anma, ẍhalni: —Naj Cristo tu', ¿tom Galilea xtij naj heyalni? 42Chal yul Yum Comam Dios to yul con̈ob' Belén, scon̈ob' ya' rey David, hat ẍpitzc'aoj naj, haxca yin̈ yic'al ya' chuluj naj. 43Yuxin spohtoj sb'a anma yu Comam. 44Ay mac xal inojtoj Comam presu, yaja' ẍnanon yanicoj sk'ab' yin̈ Comam. 45Ha' xmeltzo heb'naj ẍtan̈en yatut Comam Dios tu' sc'atan̈ heb'naj fariseo b'oj heb'naj swi'al yin̈ heb'naj sacerdote, xalni heb'naj: —¿Tzet yuxin mach xeyitij naj Jesús tu' 46Xalni heb'naj tu': —Mach hunecoj ta ay mac k'a' c'ul stzotel haca' stzotel hune' naj tu'. 47Xalni heb'naj fariseo: —¿Tom hex hun cheya' sub'u' he b'a tet hune' naj tu'? 48¿Tox ayxa hunuj naj yahaw cha' yuluj sc'ul yin̈ naj xin? Pax hayon̈ fariseoon̈ ti'an mach ja' yuluj co c'ul yin̈ najan. 49Han̈c'a anma comonaln̈e yeyi, ha' cha' yuluj sc'ul yin̈ naj, haxca mat yohtajoj sley ya' Moisés, yuxin ch'ayoj stz'acti' Comam Dios yib'an̈ hunk'aan mac cha' yuluj sc'ul yin̈ naj. 50Naj fariseo Nicodemo, naj xb'ey tzoteloj b'oj Comam ak'b'alil, xal naj tet heb'naj: 51—Ha' chute co ley yalni to machu scawxicoj smul hunuj naj yib'an̈ ta maẍto ẍjab'ecoj tzet chal naj, b'oj tzet chu naj. 52Yuxin xal heb'naj tet naj: —¿Tom ah Galilea hach paxoj? Sayc'anab' yul Yum Comam Dios cat hawilni to mach hunuj schejab'lom Comam Dios ch'eltoj b'et Galilea tu'. 53Lawitu' xla paxtoj heb'naj yatut.


Copyright
Learn More

will be added

X\