SAN JUAN 6

1Lawitu' xto Comam Jesús hunecxa sk'axepal ha' lago Galilea, hatic'a ha' Tiberias. 2Tx'ihal anma tzujan yin̈ Comam, haxca xil c'ayb'alc'ule xu Comam syeb'aniloj yet xan̈ten anma tx'oj ye sc'ul. 3Ha' x'ahapnoj Comam b'et hune' tzalan b'oj heb'ya' ẍcuywi yin̈, x'ay tz'on̈noj b'oj heb'ya'. 4Cawilxa yetij k'in̈ snab'aniltij scolb'anil heb'ya' israel. 5Ha' xilni Comam to caw tx'ihal anma xhul sc'atan̈, xalni tet ya' Felipe: —¿B'ay ẍco lok' tzet ẍlolaxi cat ja'ni wa'oj anma ti'?. 6Xal Comam hune' tu' yun̈e yilni tzet chute ya' Felipe. Wal xin, yohtajxa Comam tzet chu ya'noj wa'oj anma. 7Xta'wi ya' Felipe: —Waxan̈ca ay cab'oj ciento denario co melyu ẍlok'ni tzet ẍlolaxi, maẍtic'am ẍc'uxanni yi'ni anma huntaj tx'inanoj yet. 8Ay hune'xa ya' ẍcuywi yin̈ Comam, Andrés sb'ih, yuẍtaj ya' Simón Pedro, xhalni: 9—Ay hune' ho' ni'an b'eti' ay howeb' pan cebada yetb'i b'oj cac'on̈ no' cay, yaja' ¿tzet chaliloj ni'an solic ti' tet sunil anma ti'?. 10Xalni Comam: —Halwej tet anma ayojab' tz'on̈noj. Nab'a' chak'an̈ b'etu'. X'ay tz'on̈noj anma sunil, ay mi howeb'oj mil heb'naj winaj. 11Xinican̈ Comam ixim howeb' pan. Lawi ya'ni yuch'antioẍ tet Comam Dios, xitxk'antoj ixim yin̈ anma tz'on̈anayoj tu'. Hactu' xute pax yin̈ no' cay, xa'ni Comam hantaj choche anma slob'. 12Lawi snoh sc'ul heb'jetb'i, xalni Comam tet heb'ya' ẍcuywi yin̈: —Cutxb'awejcoj hantajto niẍtej xcan tu' yun̈e matzet ch'etaxtoj. 13Scutxb'ancoj heb'ya' ixim, cab'lan̈eb'to motx xnoh yin̈ ixim xcan tu'. 14Ha' xilni anma hune' c'ayb'alc'ule xu Comam syeb'aniloj, xalni anma: —Yin̈ caw yeli ha' ya' ti' schejab'lom Comam Dios halb'il ta chul satyib'an̈k'inal ti'. 15Xtxumni Comam to ay yala' heb'naj ta schilb'a heb'naj yoc Comam yahawoj, yuxin sheq'uiloj sb'a xol heb'naj, xto yichlaj witz hunecxa schuquil. 16Yet lan̈anxa yay numnayi x'ayapnoj heb'ya' ẍcuywi yin̈ Comam Jesús sti' ha' lago, 17x'octoj heb'ya' yul hune' te' barco sculusn̈enic'toj heb'ya' ha' lago yalni, cat sto heb'ya' yul con̈ob' Capernaum. Xax ay numnayi, yaja' maẍto ch'apni Comam sc'atan̈ heb'ya'. 18Ayxacoj heb'ya' yib'an̈ ha', x'ichican̈ hune' niman cak'e', caw nahat ch'ah job'la ha' smak'nican̈ cak'e'. 19Yictajxam scab' legua aycoj heb'ya' yib'an̈ ha' yul te barco yet xilni heb'ya' ta tzujan Comam, ẍb'elwi yib'an̈ ha'. Ha' xhitzicoj Comam sc'atan̈ te barco, xiwcan̈ heb'ya'. 20Xalni Comam: —Hayinan, machex xiwi. 21Caw xtzalacan̈ heb'ya' x'ocapnoj Comam yul barco. Yin̈n̈ena tu' x'apnina heb'ya' sti' ha' lago b'ay ch'apnoj yalni. 22Yet hunxa tz'ayic, aytoc'oj anma sunil sti' ha' lago tu'. Xilnitij to xax to heb'ya' ẍcuywi yin̈ Comam yul te' barco ahayoj b'etu', matxa hunujxa te' ahayaoj, yaja' mach x'octoj Comam Jesús sc'atan̈ heb'ya'. 23C'uxan x'apni hunk'aan te' barco speto yul con̈ob' Tiberias b'ay swa anma ixim pan lawi ya'ni Comam yuch'antioẍ yu ixim. 24Ha' xilni anma to matxac'oj Comam b'etu', machpaxc'oj heb'ya' ẍcuywi yin̈, x'octoj anma yul te' barco lan̈anto yapni tu', xto saywal yin̈ Comam yul con̈ob' Capernaum. 25Yet x'eq'uiloj anma sk'axepal ha' lago, x'ilotay Comam yu, xalni tet: —Mam Cuywaom, ¿hanic' cach hul b'eti'? . 26Xta'wi Comam: —Yin̈ caw yeli ẍwal teyetan, hexti' chin he sayan haxca xnoh he c'ul yu ixim pan xwa' teyetan, matoj haxca xe txumu tzet chaliloj c'ayb'alc'ule xwa' heyila' tu'an. 27Mat han̈c'aoj tzet ẍco lo cheyacoj yin̈ he c'ul he sayni, haxca hune' tu' ẍlahwojiloj. Ay hune'xa haca' tzet ẍco lo, maẍtic'a ẍtan̈ojiloj, hune' ch'a'ni k'inal mach stan̈b'al, ha' hune' tu' cheyacoj yin̈ he c'ul he sayni. Hayin Ab'ilintij yu Comam Dios xol jet-anmail ti'an, hayin ẍwa' hune' tu' teyetan, haxca sye Comam to hayin sic'leb'ilin yuan. 28Sk'amb'en pax heb'naj: —¿Tzet taxca wal junian cat yijni sb'a tzet choche Comam Dios jin̈an?. 29—Ha' choche Comam Dios ta cheya' yuluj he c'ul win̈an, haxca ha' xquin anitijan. 30Sk'amb'en pax heb'naj: —¿Tzet hunuj cha ye jetan cat ja'ni yuluj co c'ul tawin̈an? ¿Tzet hunuj chawu? 31Haxca ay hune' c'ayb'alc'ule ilb'il yu heb'ya' jichmam payxa, yet swani heb'ya' maná b'et tajin̈ witz ac'al, haca' yalni yul Yum Comam Dios: Hune' ita x'ayiloj satcan̈ xa' Comam Dios slob' scon̈ob', ẍiayoj. 32Xalni Comam: —Yin̈ caw yeli ẍwal teyetan, hune' ita xa' ya' Moisés tet heb'ya' jichmam tu' mat yetwanoj satcan̈ yeyi. Wal ita cha' hin Maman caw yetwanoj satcan̈ yeyi. 33Haxca hune' ita cha' Comam Dios ti', ha' caw satcan̈ ẍtita. Ha' ch'a'ni k'inal mach stan̈b'al tet sunil anma. 34Xalni heb'naj: —Mamin, a' hune' ita tu' jet stohb'alk'inalan. 35Xalni Comam: —Hayin hune' ita ch'a'ni k'inal tu'an. Mactaj chul wetan, matxa b'ak'in̈ ẍn̈ohchaoj, mactic'a cha' yuluj sc'ul win̈an, matxa b'ak'in̈ ẍtajoj sti'. 36Yaja' ẍwal teyetan, waxan̈ca chin heyilan, ¿tox haxca hactu' cheya' yuluj he c'ul win̈an? 37Sunil mac cha' hin Mam wetan, wet chulujan. Mactic'a chuluj wetan, mach hunuj chin pahatojan. 38Xquin ayiloj satcan̈an matoj yu wuni b'aytet chal hin c'ulan, to yu hin yijyen b'aytet chal sc'ul mac xquin anitijan. 39Ha' mac xquin anitij tu'an, choche ta hantaj mac xa' wetan mach hunuj chin c'ayatojan, choche ta chin pitzc'a'can̈ yin̈ slahob'al tz'ayican. 40Ha' choche hin Maman to mac chin ilnian, cat ya'ni yuluj sc'ul win̈an, scha sk'inal mach stan̈b'al, cat hin pitzc'anojcan̈ yin̈ slahob'al tz'ayican. 41Ha' xab'en heb'naj ah Judea hune' tu', mach scha swi' heb'naj, x'oc heb'naj yalnoj sk'umal Comam, haxca xala: Hayin ti'an, haca' hune' ita ch'ayiloj satcan̈ wean. 42Xalni heb'naj: —¿Tox mataj naj ti' Jesús, sc'ahol naj José? Johtaj smam smi' naj. ¿Tzet yuxin chal naj ta satcan̈ x'ayiloj naj?. 43Xalni Comam: —B'ejwejcan yab'xal he c'ul win̈an. 44Ha' in Mam xquin anitijan, ha' ay smunil. Mach mac ton̈c'a chul win̈an, ta mataj hin Mam ch'initij wetan. Mactaj chul wetan chin pitzc'a'can̈ yin̈ slahob'al tz'ayican. 45Tz'ib'n̈eb'ilcan yul Yum Comam Dios yu heb'ya' schejab'lom Comam, chalni heb'ya': Sunil mac chi'a' scuyb'anil yu Comam Dios, ẍi. Yuxin mac ch'ab'en tzet chal hin Maman cat scuywiloj yin̈, wet chulujan. 46Mach mac xax ilni hin Mam tu'an, to hayinn̈e xquin tit b'etu'an, hayin xax wilan. 47Yin̈ caw yeli ẍwal teyetan, mac cha' yuluj sc'ul win̈an, scha sk'inal mach stan̈b'al. 48Hayin hune' ita ch'a'ni k'inal tu'an. 49Heb'ya' jichmam, swanaj heb'ya' maná b'et tajin̈ witz ac'al, yaja' sunil heb'ya' xcamtoj. 50Wal mac ẍloni hune' ita ch'ayiloj satcan̈, maẍtic'a b'ak'in̈ ẍcamoj. 51Hayin hune' ita ch'a'ni k'inal speto satcan̈ tu'an. Mac ẍloni hune' ita ti', itzitzn̈etic'a ye yin̈ stohb'alk'inal. Hune' ita ẍwa' lolaxoj ti'an, ha' hin nimanilan, ha' ẍwa' yu schani anma k'inal mach stan̈b'alan. 52Ha' xab'en heb'naj ah Judea hune' tu', xtit showal heb'naj, chalni heb'naj tet hunun: —¿Tzet chute hune' naj ti' ya'ni snimanil co c'uxu'?. 53Xalni Comam: —Hayin Ab'ilintij yu Comam Dios xol jet-anmail ti'an, yin̈ caw yeli ẍwal teyetan, ta mache c'ux hin chib'ealan cat he yuc'ni hin chiq'uilan, mache chab' he k'inal mach stan̈b'al. 54Wal mac ẍc'uxni hin nimanilan, chuc'ni hin chiq'uilan schab' sk'inal mach stan̈b'al, chin pitzc'anojcan̈ yin̈ slahob'al tz'ayican. 55Haxca hin nimanilan ec'b'alto ye sataj hunujxa tzantzet itail, b'oj hin chiq'uilan, ec'b'alto ye sataj hunujxa tzantzet ch'uc'laxi. 56Mactaj ẍc'uxni hin nimanilan, chuc'ni hin chiq'uilan, ch'ehojcoj win̈an, cat wehojpaxcoj yin̈an. 57Hin Mam xquin anitijan itzitzn̈etic'a stohb'alk'inal. Yuxin itzitzin paxan. Hactu' mac ẍc'uxni hin nimanilan, itzitz pax wuan. 58Hayin ti'an haca' ita x'ayiloj yul satcan̈ wean. Mat lahanoj hin b'oj maná swa heb'ya' jichmam yet payxaan. Waxan̈ca swa heb'ya' maná tu', yaja' xtic'a cam heb'ya'. Mactaj ẍc'uxni hin nimanil ti'an, itzitzn̈etic'a stohb'alk'inal. 59Ha' ti' scuy Comam Jesús tet anma yul capiya b'et Capernaum. 60Ha' xab'en anma xcuywi yin̈ Comam Jesús hune' ti', tx'ihal mac xhalni tet hunun: —Caw ya'taj co txumni tzet chal ya' ti'. ¿Mac ẍc'oji syijyeni?. 61Ha' xtxumni Comam tzet chal heb'ya' tet hunun, xalni Comam: —¿Tom ẍcab'concan̈ he c'ul yu tzet ẍwal ti'an? 62Hayin Ab'ilintij yu Comam Dios xol jet-anmail ti'an, ta cheyil hin meltzoatoj satcan̈ b'ay xquin titan, ¿tzitam cheyala? 63Ha' Comam Espíritu ha' ch'a'ni k'inal mach stan̈b'al. Co nimanil ti' matzet cha'a. Hunk'aan tzoti' ẍwal teyet ti'an, yet Comam Espíritu yeyi, yuxin chu ya'ni k'inal mach stan̈b'al. 64Yaja' ayex macheya' yuluj he c'ul win̈an. Xal Comam hune' tu', haxca yettax yalan̈to yohtajxa Comam mactaj yel chala cha' yuluj sc'ul yin̈, yohtajxa paxoj mac ch'anojcoj yul sk'ab' camical. 65Yuxin xala: —Haxca ayex macheya' yuluj he c'ul win̈an, yuxin ẍwal teyetan ta mach mac chu yul wetan ta mataj hin Mam ch'anicoj yin̈ sc'ul stitan. 66Hatax tu' tx'ihal anma xtic'a cuywi yin̈ Comam sb'ejcanoj yec' yin̈. 67Yuxin sk'amb'e tet heb'ya' cab'lan̈wan̈ apóstol: —Haca' hexti', ¿chex el pax heyalni? . ẍi Comam tet heb'ya' 68Xta'wi ya' Simón Pedro: —Mamin ¿macc'anab' yin̈ chon̈ oc tzujnujan? Haxca tzet chawal ti', han̈c'a ch'a'ni k'inal mach stan̈b'al. 69Walon̈an xax ja' yuluj co c'ul tawin̈an, johtajan to hachti' Sic'leb'il hach yu Comam Dios. 70Xalni pax Comam tet heb'ya': —¿Tox mat hayinoj xquex hin sic'le hex cab'lan̈wan̈ ti'an? Yaja' ay hune' hex aycoj naj matzwalil yin̈ yanma. 71Yu naj Judas sc'ahol naj Simón ah Queriot, yuxin xal Comam hune' tu'. Stz'aj heb'ya' hunlan̈wan̈ ye naj, yaja' cha'a'coj naj Comam yul sk'ab' camical.


Copyright
Learn More

will be added

X\