SAN JUAN 4

1Xab'eloj heb'naj fariseo to cha' pax Comam Jesús ha' yi'a' anma b'oj k'a' ch'apni anma tet Comam sataj tet ya' Juan. 2Ha' heb'ya' ẍcuywi yin̈ Comam, ha' heb'ya' ch'a'ni ha' yi'a' anma, mataj Comam. 3Ha' xab'en Comam to xab'eloj heb'naj fariseo tu', x'el Comam b'et Judea, xmeltzo Galilea. 4Yaja' yilal hat ẍca yec'oj Comam yul scuenta Samaria. 5- 6Chumanxami x'apni Comam b'et hune' tx'otx'otx' ab'ilcan yu ya' Jacob tet sc'ahol José, scawilal Sicar aycoj tx'otx' yul scuenta Samaria tu'. Hat ay hune' ok' watx'eb'il yu ya' Jacob tu'. Siquinajxa Comam yin̈ sb'el, yuxin xto stz'on̈b'a' sb'a sti' hune' ok' tu'. 7- 8Wal heb'ya' ẍcuywi yin̈ xto heb'ya' yul con̈ob' lok'o' tzet ẍlolaxi. C'uxan ha' tu' x'apni hune' ix ah Samaria i'o ha' b'et ha' ok' tu'. Xalni Comam tet ix: —Ihtij ninoj ha' wuc'u'an. 9Xta'wi ix: —Hachti' ah israel hach, hayin ti'an, ix hinan, ah Samariain paxan, ¿tzet yuxin cha k'an ha' wetan?. (Haxca mach scha sb'a anma ah Samaria b'oj anma israel, yuxin hactu' xute ix yalni.) 10Xalni Comam tet ix: —B'inoj hawohtaj mac anmailinan, b'oj hawohtaj sc'ulal Comam Dios cha'a, chim ha k'an ha' wetan, catmi wa'ni ha' ha' ch'a'ni k'inal tawetan. 11Xalni ix tet Comam: —Mamin, caw nahat yeytoj ha', mach ha netb'al ch'iniahtij ha'. ¿B'ay chach to hawi'a'tij ha' ha' ch'a'ni k'inal tu' cat hawa'ni ha' wetan? 12Haxca ya' Jacob payat jichmam, ha' ya' an̈ecan hune' ok' ti' jetan. Ha' ha', xuc' ya' b'oj yuninal b'oj snok'. ¿Tox k'a' ec'b'alto hawe sataj ya' Jacob tu'?. 13Xta'wi Comam: —Hantaj mac ch'uc'ni hune' ha' ti' ẍtajoj sti' hunecxa. 14Wal mac ch'uc'ni ha' ha' ẍwa' ti'an, matxa b'ak'in̈ ẍtajoj sti', haxca ha' ha' ẍwa' ti'an haca' hune' snuk' ha' ch'el yojomal ẍwaycan̈ yin̈ yanma anma schani sk'inal mach stan̈b'al yu. 15Xalni ix: —Mamin, a' ha' ha' chawal tu' wetan, haxin̈wal matxa ẍtajoj hin ti'an, matxaca chin huluj wi'a'tij ha' b'eti'an. 16Xta'wi Comam: —As awtetij hawichamil tu'. 17—Mach wichamilan. Xalni Comam: —Yel chawala, mach hawichamil. 18Haca' howan̈ heb'naj xawi'a, naj ib'il hawu tinan̈, mat hawichamiloj naj. Yin̈ hune' ti' yel chawala mach hawichamil. 19Xta'wi ix: —Mamin, tinan̈ chin txuman to schejab'lom Comam Dios haweyi. 20Hej co mam co mi'an, hat xhul swi' hune' witz ti' shak'e' Comam Dios, yaja' hex israel hexti', cheyala to han̈c'a yul con̈ob' Jerusalén chu co hak'en Comam Dios. 21Xalni Comam tet ix: —Iẍ, a' yuluj ha c'ul yin̈ tzet ẍwal ti'an. Ch'apnoj stz'ayical b'ay matxa ẍhak'elaxoj Comam Dios swi' hune' witz ti', matcataj con̈ob' Jerusalén. 22Hex ah Samaria hexti', che hak'e Comam Dios, yaja' mat heyohtajoj Comam. Hayon̈ israelon̈ ti'an johtaj Comam Dios ẍco hak'ean, haxca co xol ch'eltoj Scolomal anmaan. 23Yuxin tinan̈ x'apni stz'ayicalil tet mac caw yeli ẍhak'en Comam Dios, caw yilal shak'en pax yin̈ yanma b'oj yin̈ st'in̈anil, haxca choche Comam Dios ta hactu' chute anma shak'eni. 24Comam Dios Espíritu ye Comam, yuxin hayon̈ ẍco hak'e Comam, yilal co hak'en yin̈ janma b'oj yin̈ st'in̈anil. 25Xalni ix: —Wohtajan ta chuluj naj Mesías, naj Cristo. Yet chuluj naj, ẍcam yala' naj jetan tzet yelapnoj ye sunil hunk'aan ti'. 26—Hayin hune' chawal tu'an, hayin lan̈an hin tzotel tawet ti'an. 27Lan̈anto b'in stzotel Comam b'oj ix, x'apni heb'ya' ẍcuywi yin̈, caw xc'ayiloj sc'ul heb'ya' haxca stzotel Comam b'oj hune' ix ix. Yaja' mach hunuj heb'ya' xk'amb'eni tzet yuxin stzotel Comam b'oj ix, b'oj tzet chal Comam. 28Lawitu' xanican ix schok' sti' ha' ok' tu', xto ix yul con̈ob' yalnoj tet anma, chalni ix: 29—Ton̈wej jila' hune' ya' xhalniloj sunil tzet wecojan. ¿Wac'amta ha' ya' tu' Cristo?. 30Ha' xab'en anma tu', xto ilwal yin̈ Comam Jesús. 31Yet maẍto ch'apni anma sc'atan̈ Comam, xalni heb'ya' ẍcuywi yin̈ tet: —Mam Cuywaom, wa'an̈. 32Xta'wi Comam: —Ay hune' ita mat heyohtajoj chin loan. 33Yuxin xal heb'ya' tet hunun: —¿Toc'anwal ayxa mac x'initij tzet slo Comam?. 34Xalni pax Comam: —Ha' ẍwochean ta b'aytet choche mac xquin anitijan ha' ẍwuan, cat hin lahni smunil xac'oj yul hin k'ab'an. Ha' yet chin yijyen hune' tu'an, lahan b'oj tzet chin loan. 35Cajxam yalni anma, can̈eb'to x'ahaw b'ay ẍc'uplax ixim trigo. Hacmitu', yaja' ẍwal teyetan, t'an̈xan̈wejtoj, to xax hul stz'ayical syamb'alaxtij anma wet, haca' sc'uplax ixim trigoan yet k'anxa ixim. 36Ay mac lan̈an schani stohol yu smunlan̈en syamb'ancoj anma yun̈e schani sk'inal mach stan̈b'al, haca' ye naj ẍc'upnican̈ ixim. Yuxin heb'naj xmunlan̈en spujb'antoj stzoti' Comam b'oj heb'naj xyamb'ancoj anma, lahan chub'can stzalalal heb'naj. 37Cajxam yalni anma: Nan naj xtxihniay ixim, nanxa naj ẍc'upnican̈ ixim, ẍi. 38Chex watoj xol anma haca' naj ẍc'upnican̈ ixim trigo tu'an, b'ay nan heb'naj b'ab'el xmunla haca' naj xtxihniay ixim. Hexxa chex eloj wal yin̈ hune' munil tu'. 39Tx'ihal anma ay yul hune' con̈ob' tu' xa' yuluj sc'ul yin̈ Comam, haxca xal ix tu': Xaliloj ya' sunil tzet wecojan. 40Yet x'apni anma ah Sicar tu' sc'atan̈ Comam, xalni tet ta ẍcan yul scon̈ob' heb'jetb'i, yuxin xcan Comam cab' tz'ayic b'etu'. 41Tx'ihalto anma xa' yuluj sc'ul yet xab'en scuywa Comam. 42Xalni heb'jetb'i tet ix tu': —Tinan̈ ẍja' yuluj co c'ulan, matn̈etaj yu tzet xawal jetan, to hayon̈ caw ẍjab'e tzet chal ya'an, yuxin johtajan to ha' ya' Scolomal jet co hunil, hayon̈ ayon̈ satyib'an̈k'inal ti'. 43Lawi yec'toj cab' tz'ayic b'et Samaria tu', xto Comam Jesús b'et Galilea. 44Halb'ilxa yu Comam to mach hunuj schejab'lom Comam Dios xahan ch'ilot yul scon̈ob'. 45Ha' x'apni Comam Galilea tu', caw c'ul xu schaot yu anma haxca x'ilot tzet xu Comam b'et Jerusalén yet xb'ey heb'jetb'i ilo' k'in̈. Hune' k'in̈ tu' ha' ẍnanitij tzet xu scolcha heb'ya' israel. 46X'apni pax Comam yul con̈ob' Caná, b'ay xpac'i ha' ha' vinoal. Yul con̈ob' Capernaum ay hune' naj nimej munlawom yin̈ naj rey, ay hune' sc'ahol naj tx'oj ye sc'ul. 47Ha' xab'en naj to xtit Comam Judea, xhul Galilea, xhul naj ilwal yin̈ Comam, sk'anni naj tet ta ch'aytij yatut naj yan̈te hune' sc'ahol lan̈an scami. 48Xalni Comam: —Hexti' ta macheyil hej c'ayb'alc'ule ẍyeni scan̈il wean, macheya' yuluj he c'ul win̈an. 49Xalni naj tet Comam: —Ton̈ Mamin, ton̈ yin̈ lemb'il yalan̈to mach ẍcam hin c'aholan. 50Xalni Comam: —Paxan̈toj, mach ẍcamoj ha c'ahol tu'. Xa' naj yuluj sc'ul yin̈ tzet xal Comam, xpaxtoj naj yatut. 51Yet lan̈anxa yapnoj naj b'et yatut Capernaum tu', xhul heb'naj schejab' naj chawal yin̈, xalni heb'naj: —C'ulxa ye ha c'ahol. 52Sk'amb'en naj tet heb'naj: —¿Hanic' x'ichi swatx'iloj sc'ul hin c'ahol tu'an? . Xalni heb'naj: —Yet ewi yin̈ slahwi chuman x'el k'a' yin̈ naj. 53Xtitcan̈ yin̈ sc'ul naj to yin̈tic'a hune' ora tu' xal Comam tet naj: Mach ẍcamoj ha c'ahol tu'. Yuxin xa' naj yuluj sc'ul yin̈ Comam b'oj sunil mac ayictoj yul yatut. 54Hune' c'ayb'alc'ule ti' sye Comam yet ay b'et Galilea lawi sb'ey ilo' k'in̈ b'et Judea. Ha' ti' scab' sc'ayb'alc'ule sye Comam b'etu' syeni scan̈il yeyi.


Copyright
Learn More

will be added

X\