SAN JUAN 4

1Yaben ebnaj fariseo ta chiyapaxocan̈ Comam Jesús ha' iswi' anma yeb xin ta caw ec'naxa anma tzujan yinta Comam satapaxo naj Juan; 2(Waxan̈ca maẍtaj caw Comam chianican̈ ha' iswi' anma tu', wal xin ha' ebnaj chicuywi yinta Comam, ha' ebnaj chianican̈ ha' iswi' anma.) 3Hayet yabenilo Comam Jesús ta yabe ebnaj fariseo hune' tu', yel Comam yul ismajul Judea, ismeltzoto bey yul ismajul Galilea, 4yaja' xin, caw yilal yec' Comam yul ismajul Samaria. 5Yapni Comam bey hune' con̈ob chiyij Sicar ayco yul ismajul Samaria tu', iscawilal hune' tx'o tx'otx' ak'bilcano yet payat yu naj Jacob tet isc'ahol, ha' ton naj José. 6Ha' bey tu' xin, ay hune' c'uh watx'ebil yu naj Jacob. Caw xin xasiqui Comam isbelwi, yuxin oc tz'on̈no Comam isti' hune' c'uh tu' yet lan̈anxa yoc chuman. 7- 8Wal ebnaj chicuywi yinta Comam tu' xin, to ebnaj yul con̈ob islok'o tzet chilolaxi. Hayet ayto ebnaj lok'wo tu' xin, yapni hune' ix ah Samaria ik'oti ha' yul hune' c'uh tu', yalni Comam tet ix: —Ak' nino hawa' tu' wuc'u'an, ẍi Comam. 9Istak'wi ix tet Comam: —Walach hach ti', caw ah con̈ob Israel hach, ¿tom caw mach hawohtajoj tato ah con̈ob Samaria inan? ¿Tzet yin̈ chak'anpaxo ha ha' hawuc'u wetan? ẍi ix tet Comam. (Yal ix haca' tu', yuto ha' anma Israel mach chischahle tzotelo isba yeb anma ah Samaria.) 10Yalni Comam Jesús tet ix xin: —K'inalo ta hawohta hune' mac chik'anni ha' tawet ti', yeb xin ta hawohta isc'ulal isc'ul Comam Dios chiyak' jet, chimhak'anpaxo hawa' wetan, catmi wak'nihan ha' chiak'ni k'inale machi istan̈bal tawet, ẍi Comam tet ix. 11Yalnipaxo ix tet Comam: —Mamin, caw nahat yehayto ha' yul c'uh lah, caw xin machi hanet chiinahti ha'. ¿Bay xin chaẍto hawik'ati ha' chiak'ni k'inale chawak' wettu'an hawalni? 12Naj Jacob, jichmam yettax payat tiempo, ha' naj an̈ecano hune' c'uh ti' jetan̈. Ha ha' yul hune' c'uh ti' xin yuc' naj yeb sunil yuninal, yebpaxo sunil isnok'. ¿Tom xin caw ec'bal hachto satapaxo naj Jacob tu'? ẍi ix tet Comam. 13Istak'wican̈ Comam tet ix: —Sunil mac chiuc'ni hune' ha ha' ti' chititpaxo istajinti'al hunelxa. 14Wal mac chiuc'ni ha ha' chiwak'ti'an xin, matxa bak'in chitaj isti', yuto hune' ha ha' chiwak'ti'an lahan haca' hunu isnuk' ha ha' chiahilo toptoni cat isbelwi, ha' chak'ni k'inale mach istan̈bal tet, ẍi Comam tet ix. 15Yalni ix tet Comam xin: —Mamin, ak' hune' ha' chawal ti' wuc'u'an haxinwal matxa chitaj inti'an, matxa chinhulan ik'o ha' bey ti', ẍi ix tet Comam. 16Yalni Comam tet ix: —As awteti hawichamil cat heyul bey ti', ẍi Comam tet ix. 17—Machi wichamilan, ẍi ix tet Comam. Yalni Comam tet ix: —Caw yel chawala, machi hawichamil. 18Yaj howan̈xa ebnaj chawik'le, walpaxo naj ik'bil hawu tinan̈ xin, mach hawichamilo naj. Yuxin caw yel chawala, machi hawichamil, ẍi Comam tet ix. 19Hayet yaben ix hune' tu' xin, yalni ix tet Comam. —Mamin, wal tinan̈, caw chitxumchalo wuhan tato caw ischejab Comam Dios hawehi. 20Ebnaj jichmaman̈, ha' ti' hulic'o ebnaj iswi' hune' witz ti' yik'ayo isba tet Comam Dios, walexpaxo israelita hex ti', caw cheyala ta cachann̈ech'an yul con̈ob Jerusalén chiyu coto jinoyo coba tet Comam Dios, ẍi ix tet Comam. 21Yalni Comam tet ix: —Hach ix ach ti', ayto sunil tzet chiwalti'an yul hawanma. Chiapni hune' istiempohal yet matxa chexhul heyik'ayo heba tet Comam Dios bey hune' witz ti', yeb matxa yilalo chextopaxo bey Jerusalén. 22Hex ah con̈ob Samaria hex ti', cheyiyo heba tet Comam Dios heyalni, yaj xin mach heyohtajo Comam, walon̈ Israel on̈ti'an̈ xin, johtajan̈ Comam Dios bay chijiyo cobahan̈, yuto coxolan̈ chiel Iscolomal anma. 23Wal xin lan̈an yapni istiempohal, ha' ton tinan̈, yet chiyinayo isba anma yin̈ istoholal. Caw xin chíyo isba tet Comam Dios yin̈ sunil yanma yeb xin yin̈ caw isyelal, yuto hac tu' choche isc'ul Comam ta chiyiyo isba anma tet. 24Wal Comam Dios, caw Espíritu ye Comam, yuxin macn̈etic'a chiyiyo isba tet Comam, caw yilal chiyiyo isba yin̈ sunil yanma yeb xin yin̈ caw isyelal, ẍi Comam tet ix. 25Yalni ix tet Comam: —Caw wohtajan tato chul hune' naj Mesías, ha' ton Comam Cristo Cocolomal, yu Comam Dios. Hayet chihul naj tu' xin, ha' naj chi-cam-halni yin̈ tzet caw yelapno ye sunil, ẍi ix tet Comam. 26Yalni Comam xin: —Hanintonan hune' chawal ti', hune' lan̈an istzotel tawet ti', ẍi Comam tet ix. 27Hayet lan̈an istzotel Comam tu' xin, yapni ebnaj iscuywom. Caw c'ayilo isc'ul ebnaj yilni istzotel Comam yeb hune' ix ix tu'. Wal xin caw machi hunu ebnaj k'ambeni tzet yin̈ xin tzotel Comam yeb ix, yeb xin tzet chal Comam yeb ix. 28Lahwi tu' xin, isbejnicano ix istz'ahab isti' c'uh tu', isto ix yalno tet anma yul iscon̈ob haca' ti': 29—Catawej, ton̈we jila' hune' mac mahalni wetan yin̈ sunil tzet wehicojan. ¿C'uxan tato ha' naj tu' Cristo? ẍi ix. 30Hayet yaben anma hune' tu', istit anma yilno Comam. 31Yet maẍto chiapni anma isc'atan̈ Comam, yalni ebnaj iscuywom Comam: —Mam cuywawom, wa'an̈, ẍi ebnaj tet Comam. 32Istak'wi Comam tet ebnaj: —Ay hune' tzet chinlohan caw mach heyohtajoj, ẍi Comam. 33Yoc ebnaj iscuywom Comam tu' yalno tet hunun haca' ti': —¿Toc'anab xin ay mac mahulic'o ak'no tzet chislo Comam ti'? ẍi ebnaj. 34Yalni Comam xin: —Wal xin, ha' tzet choche Comam chejn̈eintijan, ha' chiwochehan chinwatx'ehan, cat xin inlahnihan ismunil ak'bilcano yul ink'aban. Yuxin hayet chinwatx'enan ismunil ti', caw lahan yeb haca' yet lan̈an inwa'an. 35Hex ti' cheyala ta can̈ebto ixahaw bay chic'uplaxcan̈ ixim trigo. Caw hactic'am tu', yaj chiwalan teyet: ¡T'an̈xan̈wetoj lah, naweloj! Caw maayilo istiempohal iscutxbalaxico anma wetan, haca' chiyu iscutxbalax ixim trigo yet chik'anbilo ixim. 36Ha' naj chic'upnican̈ ixim trigo chischah naj istohol, yechel naj ye naj chiinito anma isc'atan̈ Comam yu ischahni isk'inal chiyak' Comam. Yuxin naj chitz'unni ixim yeb naj chic'upnican̈ ixim, lahan istzala isc'ul ebnaj iscawan̈il. 37Haca' yalni anma chijabe: “Nan naj chitxihni ixim trigo, nanxapaxo naj chic'upnican̈ ixim,” ẍi. 38Yuxin chexinchejtojan xol anma, haca' ebnaj chic'upnican̈ ixim trigo tu', nan ebnaj babel munlanahi haca' yin̈ istxihnayo ixim, hex ti' xin caw toxan̈e chexec' hec'upu'can̈ ixim, ẍi Comam tet ebnaj. 39Caw tx'i'al anma yul hune' con̈ob ay yul ismajul Samaria tu' chahnicano Comam yul yanma yuto caw wiyom yalni ix haca' ti': “Mayalilo naj wetan yin̈ sunil tzet xale inwatx'ehan,” ẍi ix. 40Yuxin hayet yapni anma tu' isc'atan̈ Comam, yalni anma tet Comam tato chicancano Comam yul con̈ob tu'. Hac tu' xin yu iscancano Comam cab tz'ayical bey tu'. 41Caw xin hantan̈eto anma chahnicano Comam yul yanma yet yaben iscuywacanto Comam. 42Yalni anma tet ix tzotel tet Comam haca' ti': —Wal tinan̈, caw chijaytojan̈ yul janmahan̈, yaj maẍn̈etaj yu tzet maxawal jetan̈, to yu han̈-caw-on̈an̈ majabehan̈ tzet chal Comam, yuxinto caw johtajan̈ ta ha' Comam ti' Cristo, ha' Cocolomal cosunil yul sat yiban̈k'inal ti', ẍi anma tet ix. 43Yet islahwi cab tz'ayic yec' Comam Jesús bey ismajul Samaria tu' xin, isto Comam bey yul ismajul Galilea. 44Caw xin halbilxatic'a yu Comam tu' tato caw machi hunu ebnaj ischejab Comam Dios xahan chiillax yul iscon̈ob. 45Hayet yapni Comam bey Galilea tu' xin, caw c'ul yu ischahlax Comam yu anma, yuto yil anma tzettaj iswatx'e Comam yet yec' k'in̈ Pascua bey Jerusalén, yet isbeyc'o anma yin̈ k'in̈. 46Yapni Comam Jesús bey yul con̈ob Caná bay elico ha ha' vinohal yu Comam. Ha' bey yul con̈ob Capernaum xin, ay hune' naj niman yelapno ismunil chimunla yinta naj rey, ay xin hune' isc'ahol naj caw tx'oj ye isc'ul yu yabil. 47Yet yaben naj tato tit Comam Jesús bey Judea yapni bey ismajul Galilea tu', isto naj yilno Comam. Isk'anni naj tet Comam tato chito Comam yila' hune' isc'ahol naj caw how yehico yabil yin̈, lan̈anxa iscami. 48Yalni xin Comam tet naj haca' ti': —Wal hex ti', tato mach cheyil sunil wipan yeb ej c'aybalc'ule chinwatx'ehan, caw maẍtic'am chinhechahan yul heyanma, ẍi Comam. 49Yalni naj tet Comam: —Mamin, ton̈ yin̈ an̈e yak' isba maẍto chicam inc'aholan, ẍi naj tet Comam. 50Yalni Comam tet naj: —Paxan̈to hawatut, cawxa naj hac'ahol, ẍi Comam tet naj. Hac tu' yu yanayto naj yul yanma yin̈ tzet yal Comam, ispaxto naj yatut. 51Yet ayco naj yin̈ isbel bey con̈ob Capernaum tu', yapni huntek'an ebnaj ismunlawom naj chahwal yin̈ yul beh, yalni ebnaj tet naj: —Cawxa naj hac'ahol, ẍi ebnaj tet naj. 52Isk'ambenilo naj mame tu' tet ebnaj ismunlawom: —¿Hanic' mawatx'ilo isc'ul inc'aholtu'an? ẍi naj. Yalni ebnaj: —Ewitax yin̈ ch'en hujeb yel k'a' yin̈ naj, ẍi ebnaj. 53Istxumni naj mame tu' ta haca'tic'a orahil chal ebnaj ismunlawom naj tu', hac tu' orahil yet yalni Comam Jesús tet naj haca' ti': “Cawxa naj hac'ahol tu' tinan̈,” ẍi Comam. Hac tu' xin yu ischahnicano naj Comam Jesús yul yanma yeb sunil mac ay bey yul yatut naj tu'. 54Ha' hune' c'aybalc'ule ti' iswatx'e Comam yul ismajul Galilea lahwi isbey Comam yin̈ k'in̈ bey Judea. Ha' xin iscab c'aybalc'ule ti' iswatx'e Comam.

will be added

X\