SAN JUAN 3

1Xol heb'naj fariseo ay hune' naj Nicodemo sb'ih, swi'al xol heb'naj ah Judea. 2Yet ak'b'alil x'apni naj yila' Comam Jesús, xalni naj tet Comam: —Mam Cuywaom, johtajan to Comam Dios cach anitij hon̈ ha cuyu'an, haxca mach hunuj mac chu syeni hunk'aan haca' chawu ti', ta machcoj Comam Dios yin̈. 3Xalni Comam: —Yin̈ caw yeli ẍwal tawetan, mac mach ẍpitzc'a yin̈ scayel, mach'ocoj yul sk'ab' Comam Dios. 4Xalni naj: —¿Tzet chu spitzc'a hunuj anma yin̈ scayel ta ichamxa? ¿Tox ẍto meltzooj yin̈ snimanil smi' cat spitzc'a hunelxa?. 5Xalni Comam: —Yin̈ caw yeli ẍwal tawetan, mac mach ẍpitzc'a yu ha' ha' b'oj yu Yespíritu Comam Dios, mach'oc yul sk'ab' Comam. 6Yet chon̈ pitzc'a yin̈ co mi', k'inal co nimanil xco cha, yaja' caw yilal co pitzc'a yin̈ Yespíritu Comam Dios yun̈e co chani sk'inal Espíritu jin̈. 7Mach ẍc'ay ha c'ul haxca ẍwal hune' ti' tawetan, ta yilal chex pitzc'a yu hune' k'inale ẍtit tet Comam Dios. 8Haca' ye cak'e' ẍto b'aytic'a chal sc'ul, ton̈e ẍjab'e sk'an̈i, yaja' mat johtajoj b'ay ẍtita, matca johtajoj b'ay ẍca ẍtoyi, hactu' cha'le anma ẍpitzc'a yin̈ Yespíritu Comam Dios. 9Xalni pax naj: —¿Tzet chu yijnoj sb'a hune' tu'? 10—Hachti' nimej cuywaomach xol jetcon̈ob' israel, ¿tom macha txum tzet ẍwal ti'an? 11Caw syelal hune' ẍwal tawet ti'an. Ha' tzet johtajan ha' ẍjalan. Ha' tzet xjilan ha' ẍco tzotean. Yaja' macheya' yuluj he c'ul yin̈. 12Yet chin tzoten tzet ay satyib'an̈k'inal ti' teyetan, macheya' yuluj he c'ul yin̈, hajxam heya'ni yuluj he c'ul ta chin tzote yin̈ tzetet ay yul satcan̈ b'ay ay Comam Diosan. 13Maẍto mac x'ahtoj b'ay ay Comam Dios tu', to hayinn̈e Ab'ilintij yu Comam Dios xol jet-anmail ti'an, hat xquin tit b'etu'an. 14Haca' xu yanican̈ ya' Moisés yechel no' lab'ah yul tajin̈ witz ac'al, hactu' walaxojcan̈an, 15yun̈e mac cha' yuluj sc'ul win̈an, scha k'inal mach stan̈b'al. 16Mach sb'ih hantaj xoche Comam Dios anma, yuxin xquin yatij hayin yiptzilch'an Sc'ahol ti'an, yun̈e hantaj mac ch'a'ni yuluj sc'ul win̈an, mach ẍc'ayotoj, to schab' sk'inal mach stan̈b'al. 17Hayin hin Sc'ahol Comam Dios ti'an, xquin yatij Comam satyib'an̈k'inal ti'an, yun̈e hin colni anmaan, matoj yu hin cawxencoj smul yib'an̈an. 18Mac cha' yuluj sc'ul win̈an, hayin yiptzil in Sc'ahol Comam Dios ti'an, mach cawxicoj smul yib'an̈. Mac mach'a'ni yuluj sc'ul win̈an, cawxinajxacoj smul yib'an̈. 19Xquin hul satyib'an̈k'inal ti'an yu wa'ni sajilk'inal tet anmaan, yaja' ay mac mach ch'ocheni, yuxin cawxinajxacoj smul yib'an̈, haxca xtx'ojaln̈e chu, yuxin k'ejholo choche. 20Sunil mac xtx'ojal chu, machoche yila' sajilk'inal machca sjetij sc'ul yin̈, haxca mach sje ta ch'el yen̈el xtx'ojal chu. 21Wal mac ẍyijyen st'in̈anil scuywab'al Comam Dios, choche ehojcoj sb'a yin̈ sajilk'inal yu ẍyeniloj to aycoj Comam Dios yin̈ yanma tu' yu hej tzetet c'ul chu., ẍi Comam tet naj Nicodemo 22Lawitu' xto Comam Jesús b'oj heb'ya' ẍcuywi yin̈ yul scuenta Judea. Hat x'eh Comam b'etu' b'oj heb'ya', cha'ni heb'ya' ha' yi'a' anma. 23Wal ya' Juan, hat cha' ya' ha' yi'a' anma b'et Enon scawilal Salim, haxca caw ay ha' ha' b'etu'. Hat x'apni anma tet ya' yu yi'ni ha'. 24Yet maẍto ch'alaxictoj ya' Juan yul presu hat tu' xuni hunk'aan tzetet ti'. 25Yet hunec tu' x'oc heb'ya' ẍcuywi yin̈ ya' Juan tzoteloj b'oj hune' naj ah Judea yin̈ tzet chu co sajn̈en co b'a. 26Xto heb'ya' yalnoj tet ya' Juan: —Mam cuywaom, ya' ay ta c'atan̈ yet ayach sk'axepal ha' Jordán, ya' xa tzote jetan, tinan̈ lan̈an ya'ni ya' ha' yi'a' anma. Caw tx'ihal mac ch'apni tet ya'. 27Xalni ya' Juan tu': —Mach mac stzujchaapnoj smay yu, ta mataj Comam Dios ch'a'ni tet. 28Hex caw xeyab'e walnian to mat hayinoj Cristo hinan, ton̈e xquin alaxtij yalan̈to maẍto chul ya'an. 29K'inaloj yin̈ hunuj mohilal, naj ẍmohyi i'n̈e ix k'anab'e. Ha' naj yamigo naj aycoj sc'atan̈, caw stzala naj yab'en stzotel naj ẍmohyi tu'. Haca' stzala naj amigo tu', hactu' hin tzala wab'en yapni anma tet ya' Jesús tu'an. 30Yilal cam yoc smay ya'. Walinan stan̈xa wet ti'an., ẍi ya' Juan tet heb'ya' ẍcuywi yin̈ tu' 31Hune' mac x'ayiloj yul satcan̈, han̈c'a ec'b'al co sataj. Walon̈, han̈c'a tzet ay sat tx'otx'otx' ti' ẍjala, haxca yet satyib'an̈k'inal ti' jeyi, yaja' ha' mac ec'b'al co sataj, ha' speto yul satcan̈. 32Yuxin ha' tzet ilb'il yu b'oj tzet xab'e b'etu' ha' chala, yaja' mach mac ch'a'ni yuluj sc'ul yin̈ tzet chala. 33Yaja' ta ay mac ch'a'ni yuluj sc'ul yin̈ tzet chal tu', cha' sb'a yin̈ to st'in̈anil ye tzet chal Comam Dios. 34Ha' hune' mac ab'iltij yu Comam, ha' ẍalnicoj stzoti' Comam, haxca tz'ajan xa' Comam Yespíritu tet. 35Caw ocheb'il Sc'ahol Comam Dios yu, yuxin xacoj Comam sunil tzetet yul sk'ab'. 36Mactaj cha' yuluj sc'ul yin̈ Sc'ahol Comam, schab' sk'inal mach stan̈b'al, yaja' mac mach ẍyijyen tzet chal Sc'ahol Comam, mach schab' sk'inal mach stan̈b'al, to aytij showal Comam yin̈.


Copyright
Learn More

will be added

X\