SAN JUAN 21

1Lawitu' syeni sb'a Comam Jesús tet heb'ya' ẍcuywi yin̈ hunecxa, yet ay heb'ya' sti' ha' lago Tiberias. Ha' tzet xu syeni sb'a Comam, 2to yaman ya' Simón Pedro b'oj ya' Tomás, ẍhal-lax Tioẍ uninal, ya' Natanael ah Caná yet Galilea, heb'ya' sc'ahol ya' Zebedeo, b'oj cawan̈xa heb'ya'. 3Xalni ya' Simón Pedro: —Chin to tzab'o' cayan, —Chon̈ to tawin̈an. Lawitu' xto heb'ya', x'octoj heb'ya' yul hune' te' barco. Yaja' hune' ak'b'alil tu' mach hunuj no' cay xi' heb'ya'. 4Haxa yet lan̈an sajb'iloj, lin̈anxacan̈ Comam sti' ha', yaja' mach xtxum heb'ya' ta ha' Comam. 5Xalni Comam: —Cho'wej, ¿maẍto no' cay cheyi'a? —Maẍto no' ẍji'an, ẍi heb'ya'. 6—Awejaytoj tx'an̈ txim tu' yin̈ he watx', haxin̈wal cheyi'a' no'. Ha' xaniaytoj heb'ya' tx'an̈ txim matxa xc'oji heb'ya' yiniatij tx'an̈ yul a' yu yalil no' cay xi'a. 7Haxa hune' ya' caw xahan ay yu Comam xhalni tet ya' Pedro: —Comam Jahaw hune' ti'. Man̈e yab'e ya' Pedro ta Comam Jahaw, xaninacoj ya' xil sk'ap yin̈, haxca han̈c'an̈e yet yul xil sk'ap ya' aycoj yin̈. Sb'ejninaaytoj sb'a ya' yul ha' xto ya' yilnoj Comam. 8Haxa hunk'aanxa heb'ya' x'initoj te' barco sti'ha' lago, can̈eb' mi tx'an̈il yec'toj te' yul ha'. C'alb'ilcoj tx'an̈ txim tu' yin̈ te' yu heb'ya', haxca caw nohnaj tx'an̈ yu no' cay. 9Haxa xhul heb'ya' sti' ha', xilni heb'ya' to lan̈an schaw k'a', aycoj hune' cay yib'an̈ tzak'a', ay paxayoj ixim pan scawilal tu'. 10Xalni Comam: —Iwejtij hayc'on̈oj no' cay xeyi' tu'. 11Yuxin x'ahtoj ya' Pedro yul te' barco, xiniloj ya' tx'an̈ txim sti' ha'. Caw nohnaj tx'an̈ yu no' nimej cay, yaja' mach lin̈mo tx'an̈; 153 no' xi' heb'ya'. 12Lawitu' xalni Comam tet heb'ya': —Catwej, wa'ojon̈, ẍi Comam.—Mach hunuj heb'ya' xk'amb'eni mac anmail, haxca yohtajxa heb'ya' to ha' Comam. 13Lawitu' xto Comam yinojcan̈ ixim pan xa'ni tet heb'ya'; hactu' xutepax yin̈ no' cay. 14Yu hunec ti', stz'ajna syoxel sye sb'a Comam tet heb'ya' ẍcuywi yin̈ yichotax spitzc'acan̈ xol hej camom. 15Lawi swa'iloj heb'ya', xalni Comam tet ya' Simón Pedro: —Simón, sc'ahol ya' Juan, ¿xahan mi chin hawil sataj heb'ya' ti'an? ẍi Comam. —Ho' Mamin, hawohtaj ta chach wochean, ẍi ya' tet Comam. —Ta hactu', haca' chute hune' naj tan̈eom canelu slotzen niẍtej scanelu, hactu' chawute ha cuyni mac ayxacoj win̈an. 16Xalni pax Comam: —Simón, sc'ahol ya' Juan, ¿xahan mi ayin hawuan? —Ho' Mamin, hawohtaj ta chach wochean, ẍi pax ya'. —Ta hactu', tan̈e mac tzujanxa win̈an, haca' chute naj stan̈en scanelu, hactu' chawute. 17Xalni pax Comam yin̈ syoxel: —Simón, sc'ahol ya' Juan, ¿tom yeli chin hawochean? X'oc b'isc'ulal yu ya' Pedro haxca yin̈xa syoxel sk'amb'e Comam tet ya', ¿tom chin hawochean? ẍi Comam, yuxin xal ya': —Mamin, hachti' sunil hawohtaj. Hawohtaj to chach wochean, —Ta hactu', haca' chu slotzen naj stan̈en scanelu, hactu' chu ha cuyni mac ayxacoj win̈an. 18Yin̈ caw yeli, ẍwal tawetan, yet tzeh hach, hach caw xa c'al hawictaj, xa cawxencan̈ ha b'a xcach to b'ay chal ha c'ul. Haxa yet chach ichamb'oj, toxan̈e cha toholb'an̈e'iltoj ha k'ab', nanxa mac chach c'alnoj cat hawilaxojtoj b'ay mach chal ha c'ul. 19Hactu' xute Comam yalni tet ya' Pedro yun̈e syeni tzet camical ch'i'noj ya', cat yanojcoj ya' smay Comam Dios. Lawitu' xalni Comam: —Ocan̈ tzujnuj win̈an. 20Lawitu' xmeltzo t'an̈na ya' Pedro yin̈taj. Xilni ya' to tzujan hune' ya' caw xahan ay yu Comam. (Ha' ya' tu' k'ean scawilal Comam yet xwa' heb'ya', yet sk'amb'en ya': ¿Mamin, mac chach anojcoj yul sk'ab' camical?.) 21Ha' xilni ya' Pedro to tzujan ya', sk'amb'en ya' tet Comam: —Mamin, naj tzujan jin̈ ti', ¿tzet chu scamoj naj? 22—Ta ẍwochean yehn̈e yec'oj naj yet chin hulujan, hune' tu' machawoc yin̈. Hachti' ocan̈ tzujnuj win̈an. 23Yuxin x'el sk'umal xol heb'ya' ayxacoj yin̈ Comam ta mach ẍcamoj hune' ya' tu'. Yaja' mach xal Comam ta mach ẍcamoj ya', ha' xute Comam yalni: Ta ẍwochean yehn̈e yec'oj naj yet chin hulujan, hune' tu' machawoc yin̈. 24Ha' hune' mac ẍcuywi yin̈ Comam tu', ha' cha' sb'a yin̈ hunk'aan tzetet ti', b'oj stz'ib'n̈ecanoj. Johtaj to caw yel hune' stz'ib'n̈ecan ti'. 25Tx'ihalto hej tzetet xu Comam Jesús. K'inaloj ta stz'ib'n̈elax yin̈ hununtajil, mach mi xc'uxanni satyib'an̈k'inal ti' b'ay ch'eh te' hum.


Copyright
Learn More

will be added

X\