SAN JUAN 20

1Ayto sajb'iloj yin̈ domingo xto ya' María ah Magdala b'ay mujinaj Comam Jesús. Xilni ya' to elnajxa ch'en ch'en aycoj smajiloj sti' b'ay xmuji Comam. 2Yuxin xmeltzo ya' yin̈ an̈e yala' tet ya' Simón Pedro, b'oj tet hune'xa ya' ẍcuwyi yin̈ Comam caw xahan ay yu. Xalni ya' tet heb'ya': —Xax iotiltij Comam b'aytic'a aya, b'ami xb'eycanoj. 3Ha' xab'en ya' Pedro b'oj hune'xa ya' tu', xto heb'ya' yilnoj b'ay ẍmuji Comam. 4An̈e cha' heb'ya' scawan̈il, yaja' b'ab'el x'apni hune'xa ya' tu' sataj ya' Pedro, 5yaja' mach x'octoj ya', ton̈e x'ayc'on̈noj ya', xt'an̈xictoj ya' b'ay ayictoj Comam. Xilni ya' to haxan̈c'a k'ap k'ape pok'anayoj. 6Tzujan xu yapni ya' Simón Pedro yin̈ ya', b'ehtic'a xu yoctoj ya' yilnoj. Xilni ya' to han̈c'a k'ap k'ape b'ak'b'ilcoj yin̈ snimanil Comam pok'anayoj, 7wal k'ap payu' c'aln̈e swi' Comam, chulb'ilayoj k'ap, nanta b'ay wot'anayoj k'ap. 8Lawitu' x'octoj ya' b'ab'el x'apni tu', xilni ya' tzet caw yeyi. Yuxin xa' ya' yuluj sc'ul. 9Maẍto xtxum heb'ya' tzet tz'ib'n̈eb'ilcan yul Yum Comam Dios, to ẍpitzc'aojcan̈ Comam xol hej camom. 10Lawitu' xmeltzo heb'ya' b'ay aya. 11Wal ya' María ah Magdala, xcan lin̈noj ya' ok'oj sataj tu'. Haxa xt'an̈xictoj ya' b'ay x'ec'le Comam 12xilni ya' cawan̈ ángel yul tu', caw saj xil sk'ap, tz'on̈anay b'ay x'ec'le snimanil Comam. Hune' ángel yin̈ swi'taj, hune'xa yin̈ yojtaj. 13Sk'amb'en ángel tu' tet ya': —¿Tzet yuxin chach ok'i? —Haxca x'iotiltoj snimanil Wahaw b'eti'an. B'ami xb'ey a'laxoj. 14Lan̈anto b'in yalni ya' hune' tu', xt'an̈xi ya' yin̈taj, xilni ya' lin̈ancan̈ Comam sc'atan̈ ya'. Yaja' mach xtxum ya' ta ha' Comam. 15Sk'amb'en Comam tet ya': —¿Tzet yuxin chach ok'i? ¿Mac cha saya?. Yaja' ham yalni ya' ta naj ẍtan̈en hune' tz'unub' tu' stzotel tet ya', yuxin xal ya': —Mamin, ta hach xawitoj snimanil Wahawan, hal wetan b'ay xawa'a, k'a' t'in̈an ẍwitojan, ẍi ya'. 16—¡María! . Xmeltzo t'an̈na ya' María, xalni ya' yin̈ ab'xub'al hebreo: —Raboni. Ha' chaliloj hune' tu', hin Cuywaoman. 17Xalni Comam tet ya': —B'ejtzo hinan haxca maẍto chin ahapnoj sc'atan̈ hin Maman. Tinan̈ as hal tet heb'ya' wuẍtajan b'oj heb'ya' wanab'an, to chin meltzo sc'atan̈ hin Maman, he Mam paxoj, hin Diosan, he Dios paxoj. 18Yuxin xto ya' yala' tet heb'ya' ẍcuywi yin̈ Comam: —Xwil Comam Jahawan. Xalni ya' tzet xute Comam yalni. 19Hatic'a yin̈ domingo tu' yet lan̈an yoc ak'b'al, syamb'an sb'a heb'ya' ẍcuywi yin̈ Comam. Pehan te' pulta yin̈ c'ul, haxca xiw heb'ya' tet heb'naj ah Judea tu'. Haxa xilni heb'ya', ayxactoj Comam Jesús xol heb'ya', xalni Comam: —Ocojab' ak'anc'ulal te xol. 20Lawi yalni hune' tu', syeni yul sk'ab' tet heb'ya', b'oj b'ay ẍok'otcoj ch'en lanza yin̈ sti' smotx. Ha' xilni heb'ya' to ha' Comam Jahaw, caw nimej tzalalal x'oc yin̈ yanma heb'ya'. 21Xalni pax Comam: —Ocojab' ak'anc'ulal te xol. Haca' xu hin yanitij hin Maman, hactu' chu hex wanipaxtojan. 22Lawitu' xunitoj Comam xob'sti' yib'an̈ heb'ya', xalni tet heb'ya': —Chawejcan Espíritu Santo. 23Ta ay mac ẍtan̈can smul yib'an̈ heyu, ẍtan̈can smul chaltu'. Yaja' mac mach ẍtan̈can smul yib'an̈ heyu, mach ẍtan̈can smul chaltu'. 24Yaja' c'uxan mach ya' Tomás ẍhal-lax Tioẍ uninal xol heb'ya' yetb'i ẍcuywi yin̈ Comam yet syeni sb'a Comam tu'. 25Yuxin xal heb'ya' tet ya': —Xjil Comam Jahawan, ẍi heb'ya'. —Ta mach ẍwil b'ay xto ch'en lawuẍ yul sk'ab' Comaman cat hin tzab'tzen b'ay xto ch'en tu'an, cat hin tzab'tzen sti' smotx Comam b'ay ẍok'otictoj ch'en lanzaan, mach ẍwa'a' yuluj hin c'ulan. 26Shujk'in̈ tu', yet yaman heb'ya' yul te' n̈ah hunecxa, ayxac'oj ya' Tomás xol heb'ya', pehan te' pulta yin̈ c'ul. Ha' xilni heb'ya', ayxactoj Comam xol heb'ya', xalni Comam: —Ocojab' ak'anc'ulal te xol. 27Lawitu' xalni tet ya' Tomás: —Tomás, tzab'tze yul hin k'ab' ti'an cat hawilni, cat ha tzab'tzen sti' hin motx ti'an. Machach cab'coni, to chawa' yuluj ha c'ul win̈an. 28Xalnican̈ ya': —Hach Wahawan b'oj hin Diosan. 29Xalni Comam: —Chawa' yuluj ha c'ul haxca chin hawilan. Sak'al yet mac mat yeẍtooj chin yilan yaja' cha' yuluj sc'ul win̈an. 30Tx'ihal to hej c'ayb'alc'ule sye Comam Jesús yin̈ sat heb'ya' ẍcuywi yin̈ mat tz'ib'n̈eb'iloj ay yul te' hum ti'. 31Stz'ib'n̈elax hunk'aan ti' yun̈e heya'ni yuluj he c'ul to ha' Comam Jesús ha' Cristo, Sc'ahol Comam Dios yeyi, haxin̈wal yet cheya'ni yuluj he c'ul, che chab' he k'inal mach stan̈b'al yu Comam.


Copyright
Learn More

will be added

X\