SAN JUAN 2

1Cab'fi tu', xuni hune' mohilal b'et Caná. Hune' con̈ob' tu' yet Galilea. Ha' hun smi' Comam Jesús yin̈ mohilal tu'. 2X'awteot pax Comam b'oj heb'ya' ẍcuywi yin̈. 3C'uxan xlahwiloj vino ch'ocnicoj yin̈ mohilal, yuxin xal smi' Comam tet: —Xlahwiloj vino. 4Xalni Comam: —Miyay, ¿tzet yuxin wet chawal hune' ti'an? To maẍto ch'apni stz'ayical b'ay ẍyelaxoj scan̈il we tet anmaan. 5Xalni smi' Comam tet heb'naj chejab': —Yijyewej tzet chal ho' teyet. 6C'uxan ahayoj wajeb' ch'en tz'ahab' ch'en, chim yi'toj howeb' mato wajeb'oj chok'al ha' hunun ch'en. Hat ch'aytoj ha' ha' ch'ocnicoj yin̈ tzet xu xtx'ahni sb'a heb'jetb'i israel haca' ye scuyb'anil. 7Xalni Comam tet heb'naj chejab': —Nohtzewej hunk'aan tz'ahab' ti'. Lawitu' snohtzen heb'naj ch'en masanto ch'el malmoni. 8Yet xax nohiloj, xalni Comam: —Iwejiltij ha' tinan̈, cat heyinitoj tet naj ch'ilni yoc sat meẍa. 9Ha' xab'len naj ch'ilni yoc sat meẍa ha' ha' xpaq'ui vinoal tu', xtxumtxun sc'ul naj b'ay xtiticoj, han̈c'a heb'naj chejab' ohtajn̈e. Yuxin xawte naj naj xmohyi tu'. 10Xalni naj: —Ha' chute anma to b'ab'el ch'alaxcoj vino c'ul, lawi yuc'niloj anma awteb'il vino c'ul tu', cat to yalaxcoj comon vino. Yaja' hachti', tzujanxa xawaltij vino k'a' c'ul. 11Xu Comam hune' b'ab'el c'ayb'alc'ule ti' yul con̈ob' Caná. Hactu' xu syeni Comam scan̈il yeyi. Yuxin heb'ya' ẍcuywi yin̈ Comam xa' heb'ya' yuluj sc'ul yin̈. 12Lawitu' x'aytoj Comam yul con̈ob' Capernaum. Xto smi' Comam yin̈ b'oj heb'ya' yuẍtaj b'oj heb'ya' ẍcuywi yin̈. Hat x'eh Comam b'oj heb'ya' hayeb' tz'ayic. 13Lan̈anxa yayiloj k'in̈ snab'aniltij yet scolcha anma israel b'et Egipto, yuxin xto Comam Jesús yul con̈ob' Jerusalén. 14Ha' x'ocapnoj Comam yamak' yatut Comam Dios, xilni ayictoj heb'naj txon̈om wacax, heb'naj txon̈om canelu, heb'naj txon̈om palamuẍ, b'oj ay heb'naj helom melyu tz'on̈anayoj yin̈ meẍa. 15Swatx'en Comam hune' chicote yin̈ hunk'aan niẍtej lasu, x'oc stennojiltij heb'naj txon̈om tu'. Stiẍnitoj Comam smelyu heb'naj helom melyu, stennic'oj pac'na Comam smeẍa heb'naj. 16Xalni tet heb'naj txon̈om palamuẍ: —Iwejiloj no' ch'ic ti' b'eti', macheyacoj yatut hin Mam ti' txon̈b'alilan. 17Hactu' xu stit yin̈ sc'ul heb'ya' ẍcuywi yin̈ Comam tzet tz'ib'n̈eb'il yul Yum Comam Dios, chalni yin̈ hacti': Ch'oc tx'innoj yin̈ wanma wilni tzet chu yul hawatutan. 18Sk'amb'en heb'naj ah Judea tet Comam: —¿Tzet hunuj ẍyeni chawa' jila'an, ta caw yeli ay scan̈il hawe hawuni hunk'aan tzetet ti'?. 19Xta'wi Comam: —Huchawejayoj yatut Comam Dios ti', hayinxa ẍwa'a'can̈ selel yin̈ oxeb' tz'ayican. 20Xalni heb'naj tet Comam: —Cuarenta y seis hab'il xi'toj yet x'ah yatut Comam Dios ti', ¿tom yin̈n̈e oxeb' tz'ayic chawacan̈ selel hawalni? . 21Yaja' mach xtxum heb'naj tzet n̈ahil chal Comam, to snimanil Comam chala. 22Yuxin yet xpitzc'acan̈ Comam yin̈ camical, xtit yin̈ sc'ul heb'ya' ẍcuywi yin̈ to halb'ilcan hune' ti' yu Comam. Yuxin xa' heb'ya' yuluj sc'ul yin̈ tzet tz'ib'n̈eb'ilcan yul Yum Comam Dios, b'oj yin̈ tzet halb'ilcan tet heb'ya' yu Comam Jesús. 23Yet ay Comam Jesús yul con̈ob' Jerusalén yin̈ k'in̈ tu', tx'ihal anma xa' yuluj sc'ul yin̈ Comam yu tzet sye b'etu', 24yaja' mach xcawxi sc'ul Comam yin̈ heb'jetb'i haxca yohtaj Comam tzet ib'il yu sc'ul hunun maca. 25Mat yilaloj ay mac ẍhalni tet Comam tzet nab'il yu anma, to yohtaj tzet ib'il yu sc'ul hunun.


Copyright
Learn More

will be added

X\