SAN JUAN 19

1Lawitu' schejni naj Pilato hatelaxoj Comam. 2Shalniay heb'naj soldado hune' corona nab'a' tx'ix, xanicoj heb'naj yin̈ swi' Comam. Xanicoj heb'naj hune' xil k'ape cajwuk'wun̈e yin̈ Comam. 3Lawitu' xhitzicoj heb'naj sc'atan̈ Comam, chalni heb'naj: —¡Caw sak'al tet ich sreyal israel ti'!. Chetantoj heb'naj Comam, spak'nicoj heb'naj sat. 4Lawitu' x'eltij naj Pilato sti' sdespacho hunecxa. Xalni naj tet heb'naj: —Ẍwiltij naj ti' heyila'an yu heyab'encanoj to mach hunuj smul naj ẍchalo wuan. 5Lawitu' x'eliloj Comam sti' capiltu. Aycoj corona tx'ix yin̈ swi' Comam b'oj hune' xil k'ape cajwuk'wun̈e jilni yin̈. Xalni naj tet heb'naj: —Ay naj la. 6Ha' xilnitoj heb'naj swi'al sacerdote Comam, b'oj heb'naj stan̈eomal yatut Comam Dios, x'ah xayna heb'naj xalni heb'naj yin̈ ip: —¡Ahojab' naj yin̈ culus! ¡Ahojab' naj yin̈ culus! . Yuxin xal naj Pilato tet heb'naj: —Ta hactu', iwejtoj naj heya'a'can̈ yin̈ culus, mach woc yin̈an haxca mach hunuj smul naj ẍchalo wuan. 7Xalni heb'naj: —Yaja' chal co leyan ta yet ay scam naj, haxca chal sb'a naj sc'aholoj Comam Dios. 8Yet xab'en naj Pilato hune' tu', k'a' xto cam xiwcan̈ naj. 9Yuxin x'octoj naj yul sdespacho hunecxa, sk'amb'en naj tet Comam: —¿B'ay elnaj hachcoj? . Yaja' mach xta'wi Comam tet naj. 10Yuxin xal naj: —¿Tzet yuxin machach ta'wi wetan? ¿Tom mat hawohtajoj ta wetwanoj hach hin b'ejtzonan, mato hach wanican̈ yin̈ culusan?. 11Xta'wi Comam: —Ta mataj Comam Dios x'a'ni hawub', mach mi yocb'al ha k'ab' win̈an. Yuxin naj xquin anicoj yul ha k'ab'an, ha' naj k'a' tx'ihal to smul ta sataj. 12Ha' xab'en naj tzet xal Comam, sayni naj tzet chu scolni naj Comam, yaja' xcam ahcan̈ yul snuk' heb'naj, xalni heb'naj: —Ta cha b'ejtzo naj ti', chach paq'uicoj yin̈ naj jahaw ay Roma chaltu', haxca mac chal sb'a reyal, ẍpaq'uicoj yin̈ naj yahaw. 13Ha' xab'en naj Pilato hune' tu', schejni naj ilaxojiltij Comam Jesús. Lawitu' x'ay tz'on̈noj naj b'ay chi' cuenta yin̈ smul anma. Hune' lugar tu' Gabata sb'ih yin̈ ab'xub'al hebreo, ha' chaliloj latz'b'ilay ch'en ch'en. 14Hecalojxan̈e k'in̈ snab'aniltij tzet xu scolcha heb'ya' israel, lan̈an xam ya'noj chuman. Xalni naj tet heb'naj ah Judea tu': —Ilwej naj he rey ti'. 15X'ah pax xayna heb'naj, xalni yin̈ caw ip: —¡Camojab' naj! ¡Camojab' naj! ¡Ahojab' naj yin̈ culus! ẍi heb'naj. —¿Tom ẍwa'can̈ naj he rey ti' yin̈ culusan? . Xta'wi heb'naj swi'al yin̈ heb'naj sacerdote: —Hayon̈ ti'an, han̈c'a naj yahaw b'et Roma, ha' naj co reyan. 16Yuxin xac'oj naj Comam yul sk'ab' heb'naj, yu yalaxcan̈ yin̈ culus.Lawitu' xinitoj heb'naj Comam. 17Swi'xic'n̈entoj sculus x'el yul con̈ob', xto b'et Gólgota. Sb'ajil wi'e chaliloj yin̈ hebreo. 18Hatu' x'alaxcan̈ Comam yin̈ culus. Ay pax cawan̈xa heb'naj x'alaxcan̈ yin̈ culus, hune' naj yin̈ swatx' Comam, hune'xa naj yin̈ smec, yictajb'al x'alaxcan̈ Comam. 19Xa'ni tz'ib'n̈e naj Pilato tu' yin̈ hune' ak'in, xa'ni ocoj naj yin̈ swi' sculus Comam, chalni yin̈ hacti': Naj Jesús ah Nazaret sreyal Israel, ẍicoj yin̈. 20Tx'ihal heb'naj ah Judea x'ilnicoj hunk'aan tz'ib' tu', haxca xtxamcon̈ob' Jerusalén x'aotcan̈ Comam yin̈ culus. Hunk'aan tzoti' tu' tz'ib'n̈eb'ilcoj yin̈ ab'xub'al hebreo, yin̈ latín b'oj yin̈ griego. 21Yuxin xal heb'naj swi'al yin̈ heb'naj sacerdote tet naj Pilato: —Malc'anab' Naj chal sb'a Sreyal Israel xawutecoj, toca Naj Sreyal Israel xawutecoj. 22Xta'wi naj Pilato: —¡B'aytet xwa' tz'ib'n̈e'an, ha' chij sb'a!. 23Lawi yanican̈ heb'naj soldado Comam yin̈ culus, xinican̈ heb'naj xil sk'ap Comam xitxk'antoj heb'naj yin̈, can̈eb' x'elicoj, hunun pelan yet hunun heb'naj. Wal hune' yet yul xil sk'ap Comam, mach stz'isb'anil, to hune'n̈e ye schemb'anil. 24Yuxin xal heb'naj soldado tu' tet hunun: —Mach ẍco tziltoj, jila' mac ch'i'nojcanoj. Hactu' xu yijnican sb'a tzet tz'ib'n̈eb'ilcan yul Yum Comam Dios chalni yin̈ hacti': Spohayoj heb'naj xil hin k'ap yin̈an, xa'ni heb'naj tul yin̈, Yeli hactu' xute heb'naj soldado. 25Scawilal b'ay aycan̈ Comam yin̈ culus tu', lin̈ancan̈ smi' Comam b'oj snoh, b'oj ya' María yixal ya' Cleofas, b'oj ya' María ah Magdala. 26Lin̈an paxcan̈ ya' ẍcuywi yin̈ Comam caw xahan ay yu sc'atan̈ smi' Comam. Ha' xilnicoj Comam heb'ya', xalni tet smi': —Mi', naj lin̈ancan̈ ta c'atan̈ tu', hawunin chucanicoj naj. 27Xalni pax Comam tet ya' xahan ay yu tu': —Hin mi' ti'an, ha mi' chucancoj,. Hatic'a tu' xinitoj ya' smi' Comam tu' yatut. 28Yohtajxa Comam Jesús to xax yijcan sb'a tzet xhul yub'c'uj, yuxin xala: —Caw ẍtaj hin ti'an. Xal Comam hune' ti' yun̈e yijnicanoj sb'a tzet tz'ib'n̈eb'ilcan yib'an̈ yu Stzoti' Comam Dios. 29Ahayoj hune' ẍalu comon vino b'etu'. Slab'an heb'naj hune' esponja xol, sc'alnicoj heb'naj yin̈ swi' hune' te' hisopo, xaniatoj heb'naj yin̈ sti' Comam. 30Lawi yab'len Comam vino pah tu', xalni Comam: —Sunil xijcan sb'a tinan̈. Lawitu' xtit xulna swi' Comam, xcamiloj. 31Hecalojxan̈e k'in̈ ẍnanitij tzet xu scolcha heb'ya' israel, b'oj tz'ayic xewb'al. Haxca hune' k'in̈ tu' b'oj tz'ayic xewb'al caw ay yelapnoj ye yul sat heb'naj ah Judea tu', yuxin mach sje sc'ul heb'naj ẍcan nimanile yin̈ culus. Yuxin xb'ey heb'naj yala' tet naj Pilato ta ẍk'ahlaxnatoj sb'ajil sb'ul heb'naj aycan̈ yin̈ culus, haxin̈wal ch'ilaxnaaytij snimanil heb'naj. 32Ha' xto heb'naj soldado sk'aha'toj sb'ajil sb'ul naj b'ab'el b'oj hune'xa naj scab'. 33Ha' x'apni heb'naj sc'atan̈ Comam Jesús, xilni heb'naj to xax camiloj, yuxin matxa sk'ahtoj heb'naj sb'ajil sb'ul. 34Toxan̈e xb'ey hune' naj soldado ẍok'o'coj ch'en lanza yin̈ sti' smotx Comam. Yin̈n̈ena tu' x'elnaloj chic' b'oj ha' ha'. 35Hayin caw xwil hune' tu'an, yuxin ẍwalan, yun̈e heya'ni yuluj he c'ul to hactu' xu. Hej tzetet chin tz'ib'n̈e ti'an caw st'in̈anil yeyi. Wohtajan ta caw st'in̈anil ye tzet ẍwal ti'an. 36Yun̈e yijni sb'a tzet tz'ib'n̈eb'ilcan yul Yum Comam Dios, chalni: Mach hunuj sb'ajil ẍk'ahlaxojtoj. 37Chal paxayoj yin̈ hune'xa: Chila' anma mac ẍok'b'ilcoj ch'en lanza yin̈. 38Lawitu' xto ya' José ah Arimatea sk'ana tet naj Pilato ta chiytij ya' snimanil Comam Jesús yin̈ culus. Cha' ya' yuluj sc'ul yin̈ Comam, yaja' ewantaj yeyi haxca xiw ya' tet heb'naj yetcon̈ob' ah Judea. Yuxin xb'ey ya' yi'a'aytij snimanil Comam. 39Ha'hun ya' Nicodemo, ya' xb'ey ilnoj Comam yet ak'b'alil, ib'il oxeb' arroba an̈ caw xuk'sam yu ya', mirra sb'ih, calb'il b'oj an̈ áloe. 40Lawitu' xinitoj heb'ya' snimanil Comam, xanicoj heb'ya' an̈ xuk'sam yin̈, sb'ac'nicoj heb'ya' k'ape yin̈, haxca hactu' chute anma israel sb'ac'ni snimanil scamom yet ẍmujni. 41Scawilal b'ay x'alaxcan̈ Comam yin̈ culus tu', ay hune' tz'unub', hat ay hune' ch'en ch'en tz'ujb'il sc'ul b'ay ch'alaxictoj camom. Ac'to swatx'i, maẍto hunuj camom ch'ec' yul. 42Hat-xan̈e xactoj heb'ya' snimanil Comam haxca lan̈anxa yichojcoj tz'ayic xewb'al, b'oj cawil yecoj.


Copyright
Learn More

will be added

X\