SAN JUAN 18

1Lawi yalni Comam Jesús hunk'aan tzetet ti', xto b'oj heb'ya' ẍcuywi yin̈ sk'axepal ha' ni'an Cedrón, b'ay ay hune' tz'unub'. Hat x'octoj Comam b'oj heb'ya'. 2Naj Judas lan̈an yanicoj Comam yul sk'ab' camical, yohtaj naj tzet ye b'etu', haxca tx'ihal el xb'ey Comam b'oj heb'ya' ẍcuywi yin̈ b'etu'. 3Yuxin hat xto naj saya' Comam, ib'il hune' tenan heb'naj soldado yu naj. Ay pax heb'naj stan̈eomal yatut Comam Dios xatoj heb'naj fariseo b'oj heb'naj swi'al yin̈ heb'naj sacerdote. Yetb'i heb'naj scandil b'oj stzejtah b'oj sch'en ab'al howal x'apni heb'naj. 4Haxca yohtaj Comam tzet lan̈an yul yin̈, x'elnatoj chawal yin̈ heb'naj, sk'amb'eni: —¿Mac che saya? ẍi. 5—Naj Jesús ah Nazaret ẍco sayan, ẍi heb'naj. —Hayinan. Lin̈ancoj naj Judas tu' xol heb'naj. 6Yin̈n̈e xalna Comam hune' tu', xpax pac'na heb'naj yin̈taj. 7Lawitu' sk'amb'en pax Comam: —¿Mac che saya? ẍi pax Comam. —Naj Jesús ah Nazaret ẍco sayan. 8—Xax wal teyetan to hayinan. Ta hayin chin he sayan, awejcan heb'naj ti'., ẍi Comam tet heb'naj 9Hactu' xu yijni sb'a tzet halb'il yu Comam Jesús yin̈ yoración: Yin̈ mactaj xawa' wetan mach hunuj xin c'aytojan. 10Lemb'il xinaatij ya' Simón Pedro yespada yul yatut, smasniltoj ya' xtxiquin naj Malco, schejab' naj swi'al yin̈ heb'naj sacerdote. Xtxiquin naj yin̈ swatx' xiltoj ya'. 11Xalni Comam tet ya': —Aytoj hawespada tu' yul yatut. ¿Tox mat yetoj ay wa'ni hin b'a yul sk'ab' sya'tajil nab'il win̈ yu hin Maman?. ẍi Comam tet ya' 12Lawitu' stzab'otay Comam yu heb'naj soldado, b'oj naj swi'al yin̈ heb'naj, b'oj heb'naj policío xatoj heb'naj ah Judea, sc'alniayoj heb'naj Comam. 13B'ab'el xitoj heb'naj Comam yatut naj Anás, smam ix yixal naj Caifás. Naj Caifás tu' swi'al naj yin̈ heb'naj sacerdote yet hune' hab'il tu'. 14Naj Caifás tu' haln̈e xol heb'naj ah Judea tu' to yilal scam Comam seleloj sunil anma israel. 15Yet x'iottoj Comam Jesús, nahat tzujan ye ya' Pedro, b'oj hunxa ya' ẍcuywi yin̈ Comam. Hune'xa ya' ti', yohtaj sb'a ya' b'oj naj swi'al yin̈ heb'naj sacerdote, yuxin x'octoj ya' yamak' yatut naj Anás tu' yin̈ Comam. 16Wal ya' Pedro xcan lin̈noj ya' sti pulta. Hune'xa ya' tu', x'eltij ya' yawtectoj ya', sk'anni ya' tet ix tan̈eom sti' pulta ta ch'octoj ya' Pedro tu'. 17Xalni ix tet ya' Pedro: —¿Tita hach hun chach cuywi yin̈ naj ti'? ẍi ix tet ya'. —Machoj, mat tzujanoj hin yin̈ najan. 18Haxca caw chew, yuxin xacoj heb'naj chejab' b'oj heb'naj policío sk'a', x'oc heb'naj k'aẍnoj. Sunil heb'naj lin̈ancoj yin̈ k'a'. Ha'hun ya' Pedro, x'oc k'aẍnoj xol heb'naj. 19Wal Comam aycoj yin̈ k'amb'eb'al yu naj swi'al yin̈ heb'naj sacerdote, yin̈ mactaj ẍcuywi yin̈ b'oj tzet cha' Comam scuyu' heb'naj. 20Xta'wi Comam: —Yet xquin cuywaan, sajsajil xquin tzotel tet sunil anmaan. Xtic'a hin cuywa yulaj hej capiyaan, b'oj yamak' yatut Comam Dios b'ay syamb'a sb'a jetcon̈ob'. Matzet xwal yin̈ ewantajan. 21¿Tzet yuxin wet cha k'amb'ean? K'amb'e tet anma x'ab'en tzet xwalan. Yohtaj heb'jetb'i tzet xin cuy tet heb'jetb'ian. 22Yet xalni Comam hune' tu', hune' naj stan̈eomal yatut Comam Dios lin̈ancan̈ b'etu', x'a'ni pak'laoj yin̈ sat Comam, xalni naj: —¿Tzet yuxin hactu' chu ha pajtzen sti' naj swi'al yin̈ heb'naj sacerdote ti'?. 23Xta'wi Comam: —Ta ay tzetet tx'oj xwalan, hala. Taca st'in̈anil ye tzet xwal ti'an, ¿tzet yuxin chin ha mak'an? . 24Lawitu' c'alb'il Comam xanitoj naj Anás Comam tet naj Caifás swi'al yin̈ heb'naj sacerdote. 25Yet maẍto ẍto Comam, lin̈antocoj ya' Pedro k'aẍnoj xol heb'naj policío, x'oc heb'naj yalnoj tet ya': —Hachti', hawetb'i ha b'a b'oj naj Jesús ti'. Yaja' xeb'a ya', xalni ya': —Machoj, mat wetb'ioj hin b'a b'oj najan. 26Hunepxa tu' xalni pax hune' naj schejab' naj swi'al yin̈ heb'naj sacerdote, ayto yu sb'a naj b'oj naj xiltoj ya' Pedro xtxiquin, xalni naj: —¿Tox mach cach wil xol tz'unub' b'oj naj Jesús ti'an?. 27Xeb'an pax ya' ta mat yohtajoj ya' Comam. Lan̈antic'a tu' x'ok' no' chiyo. 28Yet sajb'iloj, x'iotiltij Comam Jesús yul yatut naj Caifás, x'iottoj Comam yin̈ sat naj gobernador Poncio Pilato. Yaja' mach x'octoj heb'naj yul capiltu haxca txahuln̈eb'il sb'a heb'naj yu ẍyijyen k'in̈ nab'aniltij scolb'anil eb' israel, haxca ta machoj, machu slonoj heb'naj ita slolax yin̈ k'in̈ tu'. 29Yuxin sti' spultail despacho x'eltij naj Pilato tu' tzoteloj tet heb'naj. Sk'amb'en naj tet heb'naj: —¿Tzet smul hune' naj ti' heyalni? ẍi naj. 30—Ta mach xiquiltajoj smul naj, mach mi xjitij naj tawetan. 31Yuxin xal pax naj: —Iwejtoj naj cat heyilni tzet cheyute naj haca' yalni he ley. Xta'wi heb'naj: —Hayon̈ ti'an machu ja'ni camoj hunoj anmaan 32Hactu' xu yijni sb'a tzet halb'il yu Comam, tzet ch'i'noj scamoj. 33X'octoj naj Pilato yul sdespacho hunecxa, xawtenictoj naj Comam. Sk'amb'en naj: —¿Tom sreyal Israel haweyi? 34—¿Yuln̈em ha wi' chawitij chawalni hune' tu', mato ay mac xhalni tawet tzet wean? ẍi Comam. 35—¿Tom israel hin chawilan? Heb'naj hawetcon̈ob' b'oj heb'naj swi'al yin̈ heb'naj sacerdote xcach anicoj yul hin k'ab'an, ¿tzet tx'oj xawu? 36—Hayin ti'an machincoj yahawoj satyib'an̈k'inal ti'an. K'inaloj ta hactu' yeyi, sunil mi heb'naj aycoj win̈ syamb'a sb'a yu ya'ni howal hin scolnian, yun̈e mach hin ay yul sk'ab' heb'naj ah Judea ti'an. Yaja' mataj satyib'an̈k'inal ti' hayincoj yahawojan, 37—¡Rey hachmi chaltu'! —Hachtic'a' lan̈an hawalni. Yuxin xquin pitzc'aan, xquin hul satyib'an̈k'inal ti'an yu walni st'in̈anilan. Mactic'a ẍyijyen st'in̈anil, chab'e tzet ẍwalan. 38Sk'amb'en naj: —¿Tzet ye hune' st'in̈anil chawal tu'? Lawi sk'amb'eniloj naj Pilato hune' tu', x'elpaxtij naj yalnoj tet heb'naj ah Judea tu': —Hayin ti'an mach hunuj smul naj ti' ẍchalo wuan. 39Hununtic'a hab'il shajlaxiltij hunuj naj presuwom teyet yin̈ hune' k'in̈ ti'. ¿Chim sje he c'ul sb'ejtzolax naj he reyal ti' yin̈ hune' hab'il ti'?. 40Ha' xab'en heb'naj hune' tu', x'ah xayna heb'naj: —Machoj, mataj naj cha b'ejtzo, ha' naj Barrabás chawaltij jetan. Naj Barrabás tu', stzab'lo naj haxca cha' naj howal yin̈ naj yahaw con̈ob'


Copyright
Learn More

will be added

X\