SAN JUAN 16

1Ẍwal sunil ti' teyetan yun̈e mach ẍcab'con he c'ul. 2Haxca chex tzumb'elaxojiltij yulaj capiya yu heb'naj jetcon̈ob', hasta ch'apnoj stz'ayical b'ay chex spotx'o' heb'naj, chalnoj heb'naj ta lan̈an syijyen tzet choche Comam Dios. 3Chub' heb'naj hunk'aan tzetet tu' haxca mat yohtajoj heb'naj hin Maman, matca hin yohtajoj heb'najan. 4Ẍwalcanoj hune' ti' teyetan, haxin̈wal yet chijnoj sb'a hune' tu', ẍtij yin̈ he c'ul to halb'ilxatic'a teyet wuan.Mach xwal hune' ti' teyetan yet xcon̈ ichitij, haxca ayintoc'oj te xolan. 5Yaja' tinan̈ chin meltzo sc'atan̈ mac xquin anitijan, yaja' mach hunujex che k'amb'e b'ay chin toan. 6Ha' heyet to ch'oc b'isc'ulal heyu haxca ẍwal hunk'aan ti' teyetan. 7Yaja' st'in̈anil ẍwal teyetan, sc'ulaloj heyet yeyi ta chin toan, haxca ta machin toan, mach chuluj mac ẍcolwa teyin̈, yaja' ta chin toan, ẍwa'a'tij hune' mac tu'an. 8- 11Yet chuluj, ha' ẍyenoj yin̈ caw sajsajil to ay smul mac mat tzujanoj win̈an haxca mach xa' yuluj sc'ul win̈an. Ha' ẍyenoj yin̈ caw sajsajil to t'in̈an wecojan haxca chin to sc'atan̈ hin Maman, matxa chin heyila'an. Ha' ẍyenoj pax yin̈ caw sajsajil to ẍtij scuenta Comam Dios yin̈ anma sunil, haxca naj yahaw satyib'an̈k'inal ti' cawxinajxacoj smul naj yib'an̈. 12Caw tx'ihalto tzet ẍwal wala' teyetan, yaja' maẍto ẍtecha heyu heyab'eni. 13Hato yet chuluj Espíritu ẍhalni st'in̈anil, ha' chex cuynuj yin̈ sunil st'in̈anil, haxca mat yetoj tzet scuyu' teyet. Hantaj tzet ẍhalot tet, ha' chala' paxoj, hasta hej tzetet ẍto huuj, cha'a' heyohtajn̈e'. 14Ha' ẍyenoj hin mayan haxca tzet ẍwal tetan, ha' chala' pax teyet. 15Sunil tzetet yet hin Maman, wet paxan, yuxin ẍwal teyetan ta tzet ẍwal tetan chalaloj teyet. 16Hanic'ojxan̈e b'ay matxa chin heyila'an. Yaja' yet hanic'ojxa, xa hin heyila'paxan. 17Lawi yalni Comam hune' tu' ichi sk'amb'en heb'ya' ẍcuywi yin̈ tet hunun chalni heb'ya': —¿Tzet ch'elicoj hune' chal ya' ti'? Hanic'ojxan̈e, matxa chin heyila'an, lawitu', hanic'ojxa, xa hin heyila'paxan, haxca chin to sc'atan̈ hin Maman. 18¿Tzet ch'elicoj hune' chal ya' ti': Hanic'xan̈e? ẍi ya'. Mach ẍco txumu tzet chal ya'. 19Xtxumni Comam to chal heb'ya' sk'amb'e tet, yuxin xala: —Xax wal teyetan: Hanic'ojxan̈e, matxa chin heyila'an, lawitu', hanic'ojxa, xa hin heyila' paxan, quin chian. ¿Tom ha' hune' tu' b'in che tzote? 20Yin̈ caw yeli ẍwal teyetan, ch'ocoj b'isc'ulal heyu cat heyok'ojcan̈, wal anma chin cajnian stzalaoj. Cheyila' b'isc'ulal, yaja' ẍpac'oj he b'isc'ulal tu' tzalalal. 21K'inaloj yet toxa ch'apnoj yorail swatx'oj sc'ul hunuj ix ix, caw b'isc'ulal ye ix yu sya'tajil tzet ye tu', yaja' yet xax pitzc'a nian stz'ul ix, caw tzalalal chucan ix, hasta sya'il ay ix yalan̈to, matxa ẍtit yin̈ sc'ul ix haxca xpitzc'a hune' anma satyib'an̈k'inal ti'. 22Haca' cha'le ix tu' hactu' cheya'le'. B'isc'ulal cheyub'canoj, yaja' yet chin heyilnoj paxan, hune' niman tzalalal ch'ocoj yin̈ heyanma. Mach mac chu yinojiloj hune' tzalalal tu' teyet. 23Yet tu', matxa yeẍtooj ay tzet che k'amb'e' wetan. Yin̈ caw yeli ẍwal teyetan, tzantzet che k'ana' tet hin Mam yin̈ hin b'ian, cha'a' teyet. 24Tinan̈ maẍto hunuj tzetet che k'an yin̈ hin b'ian. K'anwej, haxin̈wal tz'ajan chub'can tzalalal yin̈ heyanma. 25Ewantaj xu wa'ni hin cuywab'al teyetan. Yaja' tinan̈ lan̈an yapni yorail b'ay matxa ewanoj hin cuywaoj teyetan, to hab'anxa walnojan tzet caw ye hin Maman. 26Yet tu' che k'ana' tzet che k'an tet Comam yin̈ hin b'ian. Yaja' matxa yeẍtooj chin tzoteloj teyin̈ tet Comaman, 27to ha'hun Comam chex ocheni, haxca xquin heyochean b'oj cheya' yuluj he c'ul ta sc'atan̈ Comam xquin titan. 28Sc'atan̈ Comam xquin titan xquin hul satyib'an̈k'inal ti'an. Tinan̈ chin el b'eti'an, chin meltzo sc'atan̈ Comaman. 29Xalni heb'ya': —Tinan̈ caw hab'anxa ha tzoteli, matxa ewanoj ha tzotel jetan. 30Tinan̈ ẍco txuman to sunil hawohtaj, matxa yeẍtooj ay tzet ẍco k'amb'e tawetan. Yuxin ẍja' yuluj co c'ulan ta sc'atan̈ Comam Dios xcach tita. 31Xta'wi Comam: —¿Taxca yeli cheya' yuluj he c'ul tinan̈? 32Yaja' xax hul stz'ayical, b'ay chex paxoj tiẍnayi, chin he tin̈chanojcanan cat he tojcan b'ay ayex. Yaja' machin can hin chuquilan, haxca aycoj hin Mam wetb'iojan. 33Ẍwal hunk'aan ti' teyetan, yun̈e yoc ak'anc'ulal yin̈ heyanma wuan. Cheyila' sya'tajil satyib'an̈k'inal ti', yaja' cawxojab' he c'ul win̈an, haxca mac chon̈ cajni b'eti', xax ay wuan.


Copyright
Learn More

will be added

X\