SAN JUAN 15

1Xalni Comam Jesús tet heb'ya' ẍcuywi yin̈: —Hayinti' chin sye yoj te' uva caw c'ulan. Mac ẍmunla xol te' xin, ha' hin Mam sye hune' tu'an. 2Haca' smunla naj xtx'ahtx'en te', hactu' xtx'ahtx'enoj hin Mam mactaj aycoj win̈an. Ta ay te' sk'ab' mach satni, stzoq'uiloj naj te'. Wal te' sk'ab' c'ul satni, c'ul chute naj xtx'ahtx'en te' yun̈e k'a' tx'ihal sat te' cha'a'. 3Hexti' tx'ahb'ilxa heyanma yu cuywab'al ẍwa' teyetan. 4Ehan̈wejc'oj win̈an, haxca hayin ti'an ayinn̈etic'acoj teyin̈an. Haca' hunuj sk'ab' te te', mach satni te' ta elnaj te' yin̈ te' yoj, hactu' heye paxoj ta machexc'oj win̈an. 5Hayin ti'an haca' yoj te' uva wean, hexti', haca' te' sk'ab' heyeyi. Ta chex ehc'oj win̈an, cat wehc'oj teyin̈an, haca' hunuj sk'ab' te' uva c'ul satni hactu' cheyub' paxoj, haxca ta machex ehc'oj win̈an, mach hunuj c'ul chu heyuni he chuquil. 6Mac mach'ehc'oj win̈an, lahan b'oj te' sk'ab' elnaj yin̈ te' snimanil, ẍtajiloj te', ẍb'ejlaxiloj te', lawitu' syamb'alax te' cat sn̈uslaxtoj te'. 7Ta chex ehc'oj win̈an cheyanicoj tzet chin tzote yin̈ he c'ulan, k'anwej b'aytet chal he c'ul cat ya'laxoj teyet. 8Ta haca' ye te' satnom te' caw tx'ihal sat cha'a, ta hactu' cheyute, waltu' che yeb'iloj ta yeli quex cuywi win̈an, cat yocoj smay hin Mam heyuan. 9Haca' hin yochen hin Maman, hactu' hex wochenan, yuxin ab'ewej yin̈ heyanma hantaj chex wochean. 10Ta cheyijye chejb'anil ẍwa' teyetan, cheyab'e' pax hantaj chex wochean, haxca hactu' we b'oj hin Maman. Chin yijye schejb'anilan, yuxin ẍwab'e hantaj chin yochean. 11Ẍwal hunk'aan ti' teyetan yun̈e haca' wab'en tzalalalan hactu' heyab'en paxoj, haxin̈wal stz'ajnacoj tzalalal yin̈ heyanma. 12Ha' chejb'anil ẍwa' teyetan, to xahan cheyil he b'a hunun hex, haca' chu hex wochenan. 13Ta ay mac shin sb'a scam yu hej yamigo, k'a aycoj yanma yin̈, chaltu'. 14Ta cheyijye tzet ẍwalan, hex wamigo chaltu'an. 15Hex ti' matxa chex wal hin chejab'ojan, haxca naj chejab' mat yohtajoj naj tzet nab'il yu naj yahaw. Chex wal wamigoojan haxca xin tihiloj teyetan hantaj tzet xal hin Mam wetan. 16Mat hexoj xquin he sic'lean, to hayin quex hin sic'lean, yun̈e lahan chex elojcoj haca' ye te' satnom te' caw tx'ihal sat cha'a, yun̈e hunk'aan tzet cheyub' tu' ch'ehojc'oj stohb'alk'inal. Waltu' tzantzet che k'an tet hin Mam yin̈ hin b'ihan, ch'a'lax teyet. 17Ha' ti' hune' chin chej heyub'an, to caw xahan cheyil he b'a hununex. 18Ta chex cajlaxoj yu anma mat tzujanoj win̈an, tijab' yin̈ he c'ul to hayin b'ab'el xquin cajlaxan. 19K'inaloj ta heyetb'i he b'a b'oj hunk'aan anma tu', xahan mi chex ilot yu. Yaja' machoj, matxa heyetb'ioj he b'a b'oj, to hayin quex hin sic'leloj xolan, yuxin chex scaja. 20Tijab' yin̈ he c'ul tzet xwal teyetan: Naj chejab' mat ec'b'aloj naj sataj yahaw, quin chi teyetan. Ta chin cajlaxoj yu anmaan, haquex chex cajlaxoj pax yu. Ta syijye anma hin tzoti' xwal tetan, syijye' pax tzoti' cheyala' tet. 21Chex ec'oj ya' yu anma tu' haxca cheya' yuluj he c'ul win̈an, haxca mat yohtajoj mac xquin anitijan. 22K'inaloj ta mach xquin hul tzoteloj tet anmaan, mat mi smuluj sb'a. Yaja' tinan̈, matxa b'ay ẍca stocoj scolo' sb'a. 23Mac chin cajnian, ha'hun hin Mam scajot pax yuan. 24Hej tzetet xin ye xol heb'jetb'ian, maẍto hunuj mac ẍyeni. K'inaloj ta mach tzet xwu xol heb'jetb'ian, mach mi smul. Waxan̈ca sunil hunk'aan tu' xila, xtic'a quin scaj heb'jetb'ian, scajni pax heb'jetb'i hin Maman. 25Hactu' chu yijni sb'a tzet tz'ib'n̈eb'ilcan yul Yum Comam Dios b'ay ẍcawxi sc'ul heb'naj yalni: Machin mul tet heb'najan, yaja' xacoj heb'naj showal win̈an, ẍiayoj. 26Ha' chuluj Espíritu ẍhalni st'in̈anil, ẍtij yin̈ co Dios co Mamwej yeyi, ha' ẍcolwaoj teyin̈. Hayin ẍwa'a'tijan. Yet chuluj, cha'a' sb'a win̈an. 27Haquex, cheya'a' pax he b'a win̈an haxca yettax x'ichitij hin munlaan tzujan ex win̈an.


Copyright
Learn More

will be added

X\