SAN JUAN 14

1Xalni Comam Jesús tet heb'ya' ẍcuywi yin̈: —Mach ẍtac he c'ul. Ta ẍcawxi he c'ul yin̈ Comam Dios, cawxojab' pax he c'ul win̈an. 2Yatut hin Maman caw ay b'ay chon̈ ehi. K'inaloj ta matzet, xam wal teyetan. Yaja' aya, yuxin chin to hin watx'e' hune' b'ay chex apnojan. 3Lawi hin watx'en b'ay chex apnoj tu'an, cat wuluj hunecxaan. Chin huluj ex wi'a'toj win̈an, yun̈e b'ay chin ehojan, hat chex ehojpaxoj. 4Heyohtaj b'ay chin to tu'an, heyohtaj sb'elal. 5Xalni ya' Tomás: —Mamin, mat johtajojan b'ay chach toyi, ¿tzet chu johtajn̈en sb'elalan? . 6Xta'wi Comam: —Hayin hune' b'eh ẍwal tu'an. Hayinn̈e chu hex winitoj b'ay ay hin Maman, hin Mam tuan he Mam ye paxoj, st'in̈anil ẍwalan, hayin ẍwa' k'inalean. 7Haxca hin heyohtajxaan, heyohtaj pax hin Maman. Tinan̈, heyohtajxa hin Maman haxca xax heyila. 8Xalni ya' Felipe: —Mamin, ye ha Mam tu' jila'an, cat yak'lo co c'ulan. 9Xalni Comam: —Felipe, ayxana ayinc'oj te xolan, ¿tom matto hin hawohtajojan? Mactic'a chin ilnian chil pax hin Maman, ¿tzet yuxin ẍto hawala: Ye ha Mam tu' jila'an, cachi? 10¿Tom maẍto chawa' yuluj ha c'ul ta hayin ti'an b'oj hin Maman hune'xan̈e jean? Yuxin sunil tzet ẍwal teyet ti'an, mat yuluj hin wi' ẍwitijan, to ha' hin Mam tu'an hune'xan̈e je b'ojan, ha' xin lan̈an swatx'en smunil. 11A'wej yuluj he c'ul ta hune'xan̈e we b'oj hin Maman. Ta macheya' yuluj he c'ul win̈ yu tzet ẍwal ti'an, a'wej yuluj he c'ul yu hej tzetet ẍwuan. 12Yin̈ caw yeli ẍwal teyetan, mac cha' yuluj sc'ul win̈an, chub' pax tzet ẍwu ti'an, hasta k'a' ec'b'alto chub' haxca chin paxtoj sc'atan̈ hin Maman. 13Tzantzet che k'ana' tet Comam Dios yin̈ hin b'ihan, ẍwa'apaxan. Hactu' ẍwute' hayin hin Sc'ahol Comam Dios ti'an, yun̈e hin yeni smay hin Maman. 14Tzantic'a tzet ẍwub'an ta yin̈ hin b'ih che k'ana'an. 15Ta che yijye hej hin chejb'anilan, chin heyoche chaltu'an. 16- 17Chin k'ana' tet hin Maman ta cha'atij hune'xa mac ẍcolwaoj teyin̈, ha' Espíritu yet st'in̈anil, yun̈e ẍcanojcan texol stohb'alk'inal. Anma maxto wetojan machu schani Espíritu, haxca mat ohtajb'iloj yu anma tu', machca b'ay chila. Wal hex heyohtajxa haxca ayxacoj texol, cat yehojc'oj teyin̈ 18Machex hin tin̈chacanan, to chin huluj pax hex wila'an. 19Hanic'xan̈e b'ay matxa chin yila' anma maxtocoj win̈an, walex chin heyila' hunecxaan. Haxca itzitz hinn̈etic'aan, yuxin chex ehojpaxc'oj yin̈ stohb'alk'inal. 20Yet chin huluj paxan, che txumu' ta hune'xan̈e we b'oj hin Maman, b'oj hunxan̈e ẍjub'paxcanoj. 21Mactaj ch'ab'en tzet ẍwalan cat syijyeni, ha' hunk'aan tu' chin ochenan. Mactaj chin ochenan, xahan ay yu hin Maman, xahan ay pax wuan, ẍwala'paxiloj hin b'a tetan. 22Xalni ya' Judas, mataj naj Judas ah Queriot: —Mamin, ¿tzet yuxin jetn̈e chawalaloj ha b'aan, wal yak'b'il anma machawalaloj ha b'a tet?. 23Xalni Comam: —Mactaj chin ochenan syijyen tzet ẍwalan, xahan ch'ila' yu hin Maman, cat juluj b'oj hin Mam ehoj yin̈an. 24Mactaj machin ochenan mach syijye tzet ẍwalan. Hune' chejb'anil lan̈an heyab'en ti' mat wetojan, to yet hin Mam xquin anitijan. 25Ẍwal hune' ti' teyetan yak'n̈en sb'a ayintoc'oj te c'atan̈an. 26Cha'a'tij hin Mam Espíritu Santo tin helelojan, ha' ẍcolwaoj teyin̈ cat hex scuynuj yin̈ sunil hej tzetet, cat snanojtij teyet hantaj tzet xax hin cuy teyetan. 27Tinan̈, ẍwa'can ak'anc'ulal teyetan. Hune' ak'anc'ulal ẍwa' ti'an, mat haca'oj hune' ak'anc'ulal cha' anma, yuxin mach ẍtac he c'ul, machca chex xiwi. 28Xax wal teyetan, ta chin toan yaja' chin huluj pax te c'atan̈an. Ta caw yeli chin heyochean, chim hex tzalayi ta chin to sc'atan̈ hin Maman, haxca k'a' ec'b'al hin Mam tin satajan. 29Yalan̈to ẍwalnican hune' ti' teyetan, yun̈e yet chijnoj sb'a cheya'a' yuluj he c'ul win̈an. 30Matxa tx'ihaloj tzet ẍwal teyetan, haxca lan̈anxa yuluj naj matzwalil yahaw satyib'an̈k'inal ti'. Yaja' matoj haxca ay yoc naj win̈an. 31Yaja' hactu' chute sb'a yun̈e yohtajn̈en sunil anma ta ẍwoche hin Mam tu'an, cat wuni b'aytet schej wub'an. Tinan̈ ahan̈wej lin̈noj, elojon̈wej b'eti'.


Copyright
Learn More

will be added

X\