SAN JUAN 13

1Yet hecalxan̈e chiichico k'in̈ Pascua, caw yohtaxa Comam Jesús tato apni istiempohal bay chiyacano Comam hune' yul sat yiban̈k'inal ti', cat isto Comam isc'atan̈ Comam Dios. Caw xahan yil Comam macta yaco isba yul isk'ab yul sat yiban̈k'inal ti'. Wal tinan̈ xin caw chisyecanilo Comam tato caw xahan ay sunil anma tu' yu. 2- 4Wal naj matzwalil xin, xa'aynato naj yul yanma naj Judas Iscariote, isc'ahol icham Simón, yin̈ yanico naj Comam yul isk'ab camical. Wal Comam Jesús caw yohtaj tato isc'atan̈ Comam Dios titna Comam, yuxinto isc'atan̈ Comam Dios tu' chitopaxo hunelxa. Caw yohtapaxo Comam tato yul isk'ab yacanico Comam Dios sunil tzettaj ye tu'. Yet lan̈an iswa' Comam yeb ebnaj chicuywi yinta tu', yahwano Comam yinilo Comam hune' xil isk'ap hucanico yiban̈ iscamiẍ, isc'alnico Comam hune' pixe yin̈ yictaj. 5Yanayto Comam ha ha' yul pech'an, istzabnico Comam istx'ahni yoj ebnaj chicuywi yinta tu', issuni tajo Comam yu hune' pixe ayco yin̈ yicta tu'. 6Yet lan̈an istzabnico Comam istx'ahni yoj naj Simón Pedro, yalni naj tet Comam: —Mamin, ¿tom chachoc hatx'aha' wojti'an hawalni? ẍi naj tet Comam. 7Istak'wi Comam tet naj: —Tinan̈ caw mach chitxumchalo hawu tzet chinwatx'eti'an, yaj yet tzujanxa cat istxumchalo hawu, ẍi Comam. 8Yalni naj tet Comam: —¡Machoj Mamin! Caw maẍtic'a chu hatx'ahnilo wojti'an, ẍi naj. Yalni Comam: —Wal xin tato mach chisje hac'ul chintx'ahan hawoj ti', caw mach ayachoco yetbiho ebnaj ayxaco yul ink'aban, ẍi Comam tet naj. 9Yalni naj Pedro tet Comam: —Ta hac tu' chal tu' Mamin, maẍn̈eojabtaj wojti'an chatx'aha, wal xin yilal hatx'ahnipaxo ink'aban yebpaxo xin inwi'an, ẍi naj tet Comam. 10Istak'wi Comam tet naj: —K'inalo tato ay hunu mac lan̈anto yaẍniloj, matxa yilalo istx'ahlax sunil isnimanil, han̈c'an̈e yoj, yuto caw sajto ye isnimanil tu'. Yuxinto caw lahan hex ti' yeb anma lan̈anto yaẍniloj; caw saj ye heyanma, yaj mach hesuniloj, ẍi Comam. 11Wal xin, caw yohtaxa Comam mac chianico yul isk'ab camical, yuxinto yal haca' ti': “Yaj mach hesunilo saj ye heyanma,” ẍi Comam. 12Yet lahwi istx'ahni Comam yoj ebnaj xin, yanipaxico Comam hune' xil isk'ap hucan ye tu'. Yaypaxo tz'on̈no Comam isc'atan̈ ebnaj, yalni haca' ti': —¿Chimtxumchalo heyu tzet manwatx'eti'an? ẍi Comam tet ebnaj. 13Yalnipaxo Comam: —Walex hex ti', chinheyalan hecuywawomal yeb xin heyahawiloj. Wal xin caw yel cheyala, ist'in̈anil ton hune' tu'. 14Haninti'an hecuywawom wehan, Heyahawil wepaxojan, yaj mantx'ahan heyoj, yuxin hex ti' hac tu' wal heyuni teyin̈ hununex. 15Wal xin manwatx'ehan hune' ti' yun̈e inyenicanojan tato hac tu' wal heyuteni. 16Yin̈ caw isyelal chiwalan teyet, haca' hunu naj c'amte', mach ec'balo naj sata naj bay chimunla tu', hactic'apax tu' naj chejab, mach ec'balo naj sat naj chichejni. 17Tato chitxumchalo huntek'an ti' heyu, cat xin heyijeni, caw sak'al heyet. 18Maẍtaj teyin̈ hesunil chiwalan hune' ti', wal xin wohtajan macta sic'bililo wuhan, yaja' xin yilal yijni isba yin̈ tzet tz'ibn̈ebilcanayo yin̈ Istzoti' Comam Dios bay chala: “Ha' hune' mac caw hun chinwa'an yebi, ha' chipaq'uico win̈an,” ẍiayoj. 19Yalan̈to chiwalnicanojan hune' ti' teyet haxinwal yet chiyijno isba, caw cheyayto yul heyanma tato haninan Cristo hinan. 20Yin̈ caw isyelal chiwalan teyet, macn̈etic'a chichahni hunu inchejaban, haninan chinischahpaxojan. Hacpax tu' xin macn̈etic'a chinchahnihan, chischahpaxo Mac chejn̈eintijan, ẍi Comam. 21Yet lahwi yalnicano Comam huntek'an ti' xin, yoc hune' niman bisc'ulal yin̈ isc'ul Comam, yalni Comam yin̈ caw haban: —Yin̈ caw isyelal chiwalan teyet, texol ti' ayco hune' mac chinanocojan yul isk'ab camical, ẍi Comam. 22Yet yaben ebnaj iscuywom Comam tu' xin, toxan̈e chi-la-t'an̈xico ebnaj yin̈ sat hunun, yuto mach yohtajo ebnaj mac yin̈ yal Comam. 23Ay xin hune' naj iscuywom Comam caw xahan ay yu, iscawilal xin Comam ayco naj yet chiwa'i. 24Yak'ni naj Simón Pedro yechel tet naj, yun̈e isk'ambenilo naj mac hune' chal Comam tu'. 25K'ehan xin naj iscawilal istxam isc'ul Comam Jesús, isk'amben naj tet Comam: —Mamin, ¿mac najil hune' chawal ti'? ẍi naj. 26Istak'wi Comam tet naj: —Ha' mac bay chiwak'atojan ixim pan chinlabahan, ha' hune' tu', ẍi Comam tet naj. Lahwi tu' xin islaban Comam ixim pan tu', yak'ni Comam ixim tet naj Judas Iscariote, isc'ahol icham Simón. 27Yet ischahni naj ixim pan tu', yaynato naj matzwalil yul yanma naj, yalni Comam tet naj: —Ha' tzet nabil hawu hawatx'eni, watx'e yin̈ an̈e, ẍi Comam tet naj. 28Wal ebnaj chiwa' sat meẍa yeb Comam tu' xin, caw machi hunu ebnaj txumchalo yu tzet yin̈ yuxinto yal Comam haca' tu'. 29Naj Judas tu' xin ha' naj ik'n̈e istx'uyal ch'en melyu, yuxin ay ebnaj txumni ta chischejto Comam naj islok'o tzet chiocnico yin̈ k'in̈ tu', maca yu ispohnito naj hanic'o ch'en melyu tu' yin̈ anma meba'. 30Yet lahwi iswahni naj Judas ixim pan tu', yelti naj bey tu', caw xin xa'ay numnahi. 31Lahwi istocano naj Judas tu', yalni Comam Jesús haca' ti': —Wal tinan̈ chisyelo isba wipan Hanin Ak'bilintijan texol yu Comam Dios, cat xin isyenipaxilo isba yip Comam Dios win̈an. 32Tato chinyelojan yip Comam Dios, chisyepaxilo Comam wipan, caw xin lan̈anxa isyeniloj. 33Hex caw xahan ayex wuti'an, caw hanic'xan̈e tiempo ayinic'ojan texol. Chinhesaya'c'ojan, yaj caw mach chiyu heto bay chintotu'an. Haca'tic'a wute walnihan tet anma Israel, hac tu' chiwute walnipaxojan teyet. 34Chiwak'canojan hune' ac' chejbanile ti' teyet, xahan cheyil heba hununex. Haca' isxahanil ayex wuhan, hac tu' cheyutepaxo heba. 35Tato caw xahancano cheyil heba hununex, hac tu' chiyu yohtan̈enilo anma tato quexincuywoman, ẍi Comam tet ebnaj. 36Isk'amben naj Simón Pedro tet Comam: —Mamin, ¿baytu'wal xin chaẍtohi? ẍi naj. Istak'wi Comam: —Bay chintotu'an mach chu hato wintajan. Chaẍoco tzujno wintajan, yaj maẍto tinan̈, ẍi Comam. 37Yalnipaxo naj Pedro tu' tet Comam: —Mamin, ¿tzet yin̈ yuxin mach chu woc tzujnojan tawintaj? Caw hinaninan wak'ni camo inbahan tawin̈, ẍi naj tet Comam. 38Istak'wi Comam: —¿Caw yelmi chawala? ¿Caw hinan hachmi hawak'ni camo haba win̈an? Wal xin yin̈ isyelal chiwalan tawet, caw oxelxa chawala tato mach quinhawohtajojan yalan̈to maẍto chiok'can̈ no' icham chiyo, ẍi Comam tet naj.

will be added

X\