SAN JUAN 13

1Yet hecalojxan̈e k'in̈ ẍnanitij tzet xu scolcha heb'ya' israel, yohtajxa Comam Jesús to x'apni stz'ayical b'ay cha'acan hune' satyib'an̈k'inal ti' cat smeltzo sc'atan̈ Comam Dios. Caw xahan chil Comam mactaj yet-xa ay satyib'an̈k'inal ti'. Tinan̈ xto cam sye Comam hantaj yecoj yanma yin̈ heb'ya'. 2- 4Yaja' naj matzwalil xax yacoj naj yin̈ yanma naj Judas ah Queriot, sc'ahol naj Simón, yanojcoj Comam yul sk'ab' heb'naj swi'con̈ob'. Yohtaj Comam to sc'atan̈ Comam Dios xtita, sc'atan̈ Comam ch'apnojpaxoj. Yohtaj paxoj to yul sk'ab' xacoj Comam Dios sunil tzetet.Yet lan̈an swa' Comam Jesús b'oj heb'ya' ẍcuywi yin̈, x'ahlin̈noj, xiniloj yet yib'an̈ xil sk'ap, sc'alnicoj hune' toalla yictaj. 5Xaniaytoj ha' ha' yul hune' netb'al, x'oc tx'ahnoj yoj heb'ya' ẍcuywi yin̈, stajtzen yu toalla tu'. 6Lan̈an yoc Comam xtx'ahnoj yoj ya' Simón Pedro, xalni ya': —Mamin, ¿tom cha tx'ah woj ti' hawalnian? 7Xta'wi Comam: —Tinan̈ maẍto cha txum tzet ẍwu tawin̈ ti'an, stzujanto cha txumuluj, ẍi Comam. 8—Matta ninoj Mamin. Mat yetoj aya cha tx'ah woj ti'an, —Ta mach sje ha c'ul chin tx'ah hawojan, matxa hawoc win̈ chal tu'an, ẍi Comam tet ya'. 9—Ta hactu' Mamin, mat han̈c'aoj woj ti' cha tx'ahan, to cha tx'ah pax hin k'ab' b'oj hin wi'an. 10Xalni Comam: —K'inaloj ta ay hunuj mac lan̈anto yaẍniloj, mat yilaloj xtx'ahni sunil snimanil, to han̈c'a yoj, haxca saj ye snimanil. Lahanex b'oj mac lan̈anto yaẍniloj, haxca saj ye heyanma, yaja' mat te huniloj. 11Haxca yohtaj Comam mac ch'anojcoj yul sk'ab' camical, yuxin xala: Mat te huniloj saj ye heyanma. 12Lawi xtx'ahni Comam yoj heb'ya', xanipaxcoj xil sk'ap, x'ay tz'on̈noj sc'atan̈ heb'ya', xalni Comam: —¿Chim he txum tzet ẍwu teyin̈ ti'an? 13Hexti' chin heyal he Cuywaomojan, b'oj Heyahawojan. T'in̈an heyecoj, yeli hactu' yeyi. 14Cuywaom hin te xolan, b'oj Yahaw hin te xolan, yaja' chin tx'ah heyojan, yuxin yet aya hactu' cheyute' pax hununex. 15Chin ye hune' ti' teyetan yun̈e hactu' cheyute paxoj. 16Yin̈ caw yeli ẍwal teyetan, naj chejab' mat ec'b'aloj naj sataj naj yahaw munil, matca ec'b'aloj naj c'amte' sataj naj ẍchejni. 17Ta che txum hunk'aan ti' cat heyijyeni, sak'al heyet. 18Mataj heyu te hunil yuxin ẍwal hune' ti'an, haxca hex sic'leb'il hexa wu ti'an wohtajan tzet nab'il heyu hununex. Yaja' yilal yijni sb'a tzet tz'ib'n̈eb'ilcan yul Yum Comam Dios, chalni yin̈ hacti': Ha' hune' mac hun chin wa' b'ojan, ha' ẍpac'ojcoj win̈an, ẍiayoj. 19Yalan̈to ẍwalni hune' ti' teyetan, haxin̈wal yet chijnoj sb'a, cheya'a' yuluj he c'ul to hayinn̈e Dios hinan. 20Yin̈ caw yeli ẍwal teyetan mac ẍchani hunuj hin chejab'an, hayin chin schaan, mac chin chanian, scha pax mac xquin anitijan. 21Lawi yalni Comam Jesús hune' tu', caw x'occan b'isc'ulal yu, xalniloj yin̈ hab'an: —Yin̈ caw yeli ẍwal teyetan, te xol aycoj hune' mac chin anojcoj yul sk'ab' camicalan. 22Heb'ya' ẍcuwyi yin̈ Comam, st'an̈t'e heb'ya' sat, xtxumtxun sc'ul heb'ya' mac chal Comam. 23Ya' ẍcuywi yin̈ Comam caw xahan ay yu, k'a' cawil yecoj sc'atan̈ Comam yet ẍwa'i. 24Ch'ec' sk'ab' ya' Simón Pedro tet ya', yun̈e sk'amb'en ya' mac chal Comam. 25K'ean ya' scawilal Comam, xcam hitzicoj ya', sk'amb'en ya' tet ya': —Mamin, ¿mac chawaltu'? . 26Xalni Comam: —Ha' mac b'ay ẍwa'a' ni'an sti' pan chin lab'ah ti'an, ha' hune' tu', Lawitu' slab'an Comam sti' pan xol ita, xanic'oj tet naj Judas, sc'ahol naj Simón ah Queriot. 27Man̈e schac'oj naj ixim pan tu', x'ocna naj matzwalil yin̈ yanma naj. Xalni Comam tet naj: —Ha' tzet chawub', as yijyena yin̈ lemb'il, ẍi Comam tet naj. 28Mach hunuj heb'ya' aycoj yin̈ meẍa b'oj Comam xtxumni tzet yuxin xal Comam hune' tu'. 29Ay heb'ya' xhalni haxca ha' naj Judas i'n̈e xtx'uyal ch'en melyu, yuxin xal Comam ta xto naj lok'o' tzet ch'ocnicoj yin̈ k'in̈, mato yu sto naj yitxk'anojtoj hanic'oj ch'en yin̈ anma meb'a'. 30Lawi swani naj ixim pan tu', x'eltoj naj yin̈ lemb'il yet xax ay numnayi. 31Lawi sto naj Judas, xalni Comam Jesús: —Tinan̈ syeloj sb'a hin may hayin Ab'ilintij yu Comam Dios xol jet-anmail ti'an, syenipaxiloj sb'a smay Comam win̈an. 32Ta sye sb'a smay Comam Dios win̈an, lemb'il syeb' pax Comam hin mayan. 33Hex xahan ay wu ti'an, hanic'ojxan̈e ayin te xolan, chin he saya'an yaja' machu he toj b'ay chin toan. Haca' xwute walni tet heb'naj ah Judeaan, hactu' walni pax teyetan. 34Ha' chejb'anil ac' ẍwa' teyetan, to xahan cheyil he b'a hununex haca' hex hin xahann̈enan. 35Ta xahan cheyil he b'a hununex, xtxumu'luj anma ta yeli quex cuywi win̈an. 36Xalni ya' Simón Pedro tet Comam: —Mamin, ¿b'ay chach toyi? Xalni Comam: —B'ay chin to tu'an, machu ha to win̈an. Chach toj, yaja' maẍto tinan̈. 37Xalni pax ya': —Mamin, ¿tzet yuxin machu hin to tawin̈ tinan̈an? To hinan hin cam tawin̈an, 38—¿Yel mi chawala cha hin ha b'a ha cam win̈an? Yaja' yin̈ caw yeli ẍwal tawetan, yalan̈to maẍto ch'ok'oj no' chiyo, oxel chawala' ta mat hin hawohtajojan.


Copyright
Learn More

will be added

X\