SAN JUAN 12

1Wajeb'to tz'ayic b'ay ch'ichi k'in̈ snab'aniltij scolb'anil heb'ya' israel, x'apni Comam Jesús Betania, swayan̈b'al ya' Lázaro, ya' xpitzc'aotcan̈ yu Comam. 2Yet x'apni Comam xk'in̈n̈elaxi, x'oc hune' niman wa'oj. Ha'hun ya' Lázaro x'oc yin̈ meẍa b'oj Comam. Ya' Marta ch'anicoj ita sat meẍa. 3Wal ya' María, ay mi yictajoj litro an̈ xuk'sam caw ay stohol, nardo sb'ih, shamicoj ya' yin̈ yoj Comam. Lawitu' sunitajoj ya' yu xil swi'. Sunil yul n̈ah xpujnatoj xuk'al sam. 4Ha' xilni naj Judas ah Queriot, ẍcuywi yin̈ Comam, naj ch'anojcoj Comam yul sk'ab' camical, xalni naj: 5—Hune' an̈ xuk'sam ti' oxeb' mi ciento denario stohol. K'a' c'ultomi xtxon̈laxtoj, x'itxk'alaxtoj stohol yin̈ anma meb'a'. 6Xal naj hune' tu' matoj haxca stz'a' sc'ul naj yin̈ anma meb'a', to haxca ha' naj i'n̈e xtx'uyal ch'en melyu, caw k'aynaj naj yelk'aniloj stz'aj ch'en haxca elk'om naj. 7Xalni Comam Jesús tet naj: —Macha cach xo'. Yan̈eb'il hune' an̈ xuk'sam ti' yu xo' yu yoc yin̈ hin nimanil yalan̈to maẍto chin mujlaxan. 8Anma meb'a' ayn̈etic'acoj te xol. Walinan, mat stohb'alojk'inal ayin te xolan., ẍi Comam tet naj 9Tx'ihal anma israel x'ab'eni ta ayc'oj Comam Jesús Betania, yuxin x'apni yila' Comam, b'oj haxca choche yila' ya' Lázaro xpitzc'aotcan̈ yu Comam. 10- 11Yu ya', tx'ihal anma xa' yuluj sc'ul yin̈ Comam, matxa syijye' tzet chal heb'naj swi'al yin̈ heb'naj sacerdote. Yuxin sk'umla sb'a heb'naj yoc spotx'noj pax ya' Lázaro yalni. 12Ewi shamnicoj ya' María an̈ xuk'sam tu' yin̈ yoj Comam Jesús, xto Comam yul con̈ob' Jerusalén. Ha' xab'en anma yamanc'oj ilo' k'in̈ to lan̈an yapni Comam, 13tx'ihal mac x'iniloj sk'ab' te' palma, xto schanoj Comam. Ch'awi yin̈ ip chalni heb'jetb'i: —Yuch'antioẍ tet Comam Dios, jala'wej tzoti' c'ul yin̈ mac ab'iltij yu Comam Jahaw. Jala'wej tzoti' c'ul yin̈ co Rey, hayon̈ israelon̈ ti'. 14Ẍchalo hune' no' ni'an burro yu Comam, x'ahtoj yib'an̈ no'. Ch'ec' yi'a' tzet tz'ib'n̈eb'ilcan yul Yum Comam Dios chalni yin̈ hacti': 15Hex ah Sión hexti', machex xiwi. Ilwejc'anab'i to chul he Rey. Ahatoj yib'an̈ yunin hune' no' aẍna. 16Hune' xu tu' mach xtxumna heb'ya' ẍcuywi yin̈ Comam. To hato yet x'ilaxtoj Comam satcan̈, hato tu' xtitcan̈ yin̈ sc'ul heb'ya' to tz'ib'n̈eb'ilcan hunk'aan ti' yin̈ Comam, yuxin hactu' x'elicoj. 17Ha' anma ayc'oj sc'atan̈ Comam yet spitzc'ancan̈ Comam ya' Lázaro, xawteniltij b'ay mujb'il ya', ha' xalnic'oj tzet xu Comam tu'. 18Yuxin tx'ihal mac xto chawal yin̈ Comam, haxca xab'e sk'umal hune' c'ayb'alc'ule xu Comam tu'. 19Xal heb'naj fariseo tet hunun: —¿Chim heyila? Matzet ẍco tz'aj jute'. Sunil anma ẍto yin̈ naj. 20Xol anma x'apni hak'enoj Comam Dios yin̈ k'in̈, aycoj hunk'aan heb'naj ah Grecia. 21X'apni heb'naj yalnoj tet ya' Felipe ah Betsaida, hune' con̈ob' yet Galilea: —Mamin, ẍjoche chon̈ tzotel b'oj ya' Jesúsan. 22Yuxin xto ya' Felipe yala' tet ya' Andrés. Xto heb'ya' scawan̈il yalnoj tet Comam. 23Xalni Comam tet heb'ya': —Hayin Ab'ilintij yu Comam Dios xol jet-anmail ti'an, lan̈an yapni stz'ayicalil syelaxoj hin mayan. 24Yin̈ caw yeli ẍwal teyetan, k'inaloj ta ch'ay hunuj sat ixim trigo sat tx'otx', yaja' ta mach'etaxtoj ixim, yin̈ hactu' mach ẍpitzc'a yawalil ixim, hune'n̈etic'am chucan ixim. Wal ta ch'etaxtoj ixim sat tu' cat ẍpitzc'a yawalil ixim, waltu' ẍch'ib' ixim, tx'ihal sat ixim cha'a'. 25Mac mach shin sb'a scam win̈an, sc'aya'toj sk'inal. Wal mac shin sb'a scam win̈ satyib'an̈k'inal ti'an, ẍchalooj sk'inal mach stan̈b'al yu. 26Ta ay mac choche ch'oc hin chejab'ojan, ocojab' tzujnuj win̈an. B'aytic'a ayinan, hat ay hin chejab' tu'an, haxa Comam Dios ch'a'noj smay spajoj tet. 27Lawitu' xalni Comam Jesús: —Tinan̈ b'isc'ulal ye wanmaan. Yaja', ¿tzet ẍwute walnian? ¿Tom ẍwala'an: Mam, coliniloj yul sk'ab' hune' sya'tajil lan̈an yul win̈ ti'an? To yuxin xquin hulan. 28Mam, yeloj ha may. Lawitu' x'ab'elax hune' tzoti' x'ayiloj satcan̈, chalni yin̈ hacti': —Xax hin yelojan, yaja' ẍto hin yeb' pax hunecxaan. 29Hantaj anma yaman b'etu', ha' x'ab'eni, yuxin xala: —Ẍk'an̈i. . Ay mac xhalnipaxoj: —Hune' ángel stzotel tet ya'. 30Yuxin xal Comam: —Mat wuojan yuxin x'ayiloj hune' tzoti' ti', to heyu. 31Tinan̈, ẍtij scuenta Comam Dios yin̈ anma cat yinojiltoj Comam naj yahaw chejwa satyib'an̈k'inal ti'. 32Yet chin ilaxojcan̈ sat tx'otx'otx' ti'an, sunil anma ẍwi'a'tij win̈an. 33Xal Comam hune' ti' yu syeniltoj tzet camical ch'i'noj camoj. 34Xta'wi anma tet Comam xalni heb' jetb'i: —Chalayoj yul ley aycanoj jet ta ya' Cristo ch'ehojc'oj ya' stohb'alk'inal. ¿Tzet yuxin chawala: Hayin Ab'ilintij yu Comam Dios xol jet-anmail ti'an, chin ilaxojcan̈ sat tx'otx'otx' ti'an, cachi? Ta hactu', mat lahanoj ch'elcoj naj Cristo b'oj mac ab'iltij yu Comam Dios co xol, chaltu'. 35Xalni Comam: —Yulb'al ayintoc'oj hanic'xa ti'an, ẍwa' sajilk'inal tet heyanmaan. Yuxin watx'ewejcoj he b'a yin̈ st'in̈anil, yak'n̈en sb'a ayintoc'oj te xolan. Haxca taj somk'atoj yul he wi', cat heyec'oj tzab'tzon haca' mac ch'ec' xol k'ejholo, machil b'ay ẍca stoyi. 36Hayin ti'an haca' sajilk'inal wean, yuxin a'wej yuluj he c'ul win̈an, yak'n̈en sb'a ayintoc'oj te xolan yun̈e wa'ni sajilk'inal tet heyanma yin̈ huneln̈ean. .Lawitu' shec'niloj sb'a Comam xol anma, xeb'antoj sb'a. 37Tx'ihal c'ayb'alc'ule xu Comam syeb'aniloj tet anma, yaja' maẍtic'a mac xa' yuluj sc'ul yin̈ Comam. 38Hactu' xu yijni sb'a tzet tz'ib'n̈eb'ilcan yu ya' Isaías schejab'lom Comam Dios, yet xalni ya': Mam Wahaw, ¿tox ay mac cha' yuluj sc'ul yin̈ tzet ẍjalan? Waxan̈ca xa ye scan̈il hawe tet heb'jetb'i, yaja' mach mac cha' yuluj sc'ul tawin̈. 39Machu ya'ni heb'jetb'i yuluj sc'ul haxca halb'il pax hune'xa yu ya' Isaías tu', chalni ya': 40Haca'tic'a Comam Dios x'anicoj smajil sat heb'jetb'i, xa'ni Comam cawb'oj yanma, yun̈e haca'tic'a machu yilni, machu xtxumni, machca chacan xtx'ojal. Yuxin mach stan̈tzecan Comam smul heb'jetb'i. 41Yalnaj ya' hune' tu' haxca yilnaj ya' smay Comam Jesús. 42Hactu' yalniayoj, yaja' tx'ihal heb'naj ah Judea xa' yuluj sc'ul yin̈ Comam. Ay hunk'aan heb'naj swi'al xa' yuluj sc'ul, ton̈e mach syeloj sb'a heb'naj, haxca xiw heb'naj tet heb'naj fariseo, taj matxa ẍchalaxictoj heb'naj yul capiya. 43Hactu' xute heb'naj haxca k'a' choche heb'naj canoj c'ulal tet anma, sataj scan c'ulal tet Comam Dios. 44Yalan̈to maẍto cheb'a'toj sb'a Comam, xalni yin̈ ip tet anma: —Ta ayex cheya' yuluj he c'ul win̈an, matn̈etaj win̈ cheya' yuluj he c'ulan, to cheya' pax yuluj he c'ul yin̈ hin Mam xquin anitijan. 45Mac chin ilnian, lan̈an yilni pax hin Mam xquin anitijan. 46Hayin ti'an, xquin hul wa'a' sajilk'inal tet yanma anmaan yun̈e ya'ni yuluj sc'ul win̈an, matxa k'ejholo ẍcan yin̈ yanma. 47Mac ch'ab'en tzet ẍwalan, yaja' mach syijye, mat hayinoj chin cawxe'coj smul yib'an̈an, haxca mat yuoj hin cawxencoj smul anma yib'an̈an yuxin xquin hul satyib'an̈k'inal ti'an, to yu hin colnian. 48Mactaj chin pahnitojan, machca syijye tzet xwalan, ay tzet ẍcawxenojcoj smul yib'an̈. Hin tzoti' xax walan, ha' ẍcawxenojcoj smul yib'an̈ yin̈ slahub'al tz'ayic. 49Haxca mat wetoj hin chuquil tzet chin tzotean, to hin Mam xquin anitijan ha' x'a'ni hin chejb'anilan, ha' chin hul wala'c'ojan. 50Wohtajan to yu schejb'anil hin Mam tu'an, chu schani anma k'inal mach stan̈b'al, yuxin haca' xute yalni wetan, hactu' ẍwute walnipaxan.


Copyright
Learn More

will be added

X\