SAN JUAN 11

1- 2Yul wayan̈b'al Betania ay hune' ya' xtx'ojb'ican̈ sc'ul, Lázaro sb'ih, snoh ya' María b'oj ya' Marta ye ya'. Ah Betania heb'ya'. Ya' María tu' x'anicoj an̈ xuk' sam yin̈ yoj Comam Jesús, stajtzen ya' yu xil swi'. 3Heb'ya' cawan̈ yanab' ya' Lázaro tu', xatoj heb'ya' schejab' tet Comam, xalni naj chejab' tu': —Mamin, caw tx'oj ye sc'ul ya' hawamigo xahan ay hawu. 4Ha' xab'en Comam Jesús, xalni Comam: —Hune' yab'il tu' mat camicaloj yeyi. To yu syelax scan̈il ye smay Comam Dios b'oj scan̈il ye hin may hayin Sc'ahol Comam ti'an, yuxin chu hune' tu'. 5Caw xahan ay ya' Marta, ya' María b'oj ya' Lázaro yu Comam. 6Yuxin yet xhalot tet Comam ta tx'oj ye sc'ul ya' Lázaro, mach xto Comam yila ya', xto can Comam cab'xa tz'ayic b'ay ay tu'. 7Lawi yec'toj cab' tz'ayic tu', xalni Comam tet heb'ya' ẍcuywi yin̈: —Ton̈wej Judea hunecxa. 8Xalni heb'ya': —Mam Cuywaom, yaja' toto xal heb'naj ah Judea hach sc'ojo'camoj, tox chach tojna paxoj, . 9Xalni Comam: —Johtaj to cab'lan̈eb' ora yetb'i tz'ayic; ta tz'ayical chon̈ b'elwi, mat jichanoj chon̈ txak'moyi haxca ay sajilk'inal. 10Yaja' ta xol k'ejholo chon̈ eq'ui, jichan chon̈ txak'moyi, haxca mach sajilk'inal. 11Lawitu' xalni Comam: —Xax wayc'oj ya' jamigo Lázaro, yaja' chin to hin pitzc'acan̈ ya'an. 12Xalni heb'ya': —Mamin, yaja' ta wayoj chu ya' chim watx'ojiloj sc'ul ya' chaltu'. 13Ha' ch'elicoj tzet chal Comam yin̈ sway ya' Lázaro tu', to xcam ya'. Wal yalni heb'ya' ta ton̈e wayoj chu ya'. 14Yuxin stihiloj Comam tet heb'ya', xalni Comam: —Ya' Lázaro tu', xcam ya'. 15Caw chin tzalaan haxca machinc'oj b'etu'an yet xcam ya', yaja' yu sc'ulaloj heyet, yun̈e heya'ni yuluj he c'ul win̈an, yuxin hactu' chute sb'a. Ton̈wej jila' ya' tinan̈. 16Xta'wi ya' Tomás ẍhal-lax Tioẍ uninal, xalni ya' tet heb'ya' yetb'i: —Ton̈wej yin̈ Comam, yun̈e hayon̈ hun chon̈ cami. 17Ha' x'apni Comam Jesús b'oj heb'ya' b'etu', xab'eni to scan̈xa tz'ayic smuji ya' Lázaro. 18Betania tu', yictajn̈em legua yeloj yin̈ Jerusalén. 19Yuxin tx'ihal anma ay Jerusalén tu' x'apni ya'a' snimanil sc'ul ya' Marta b'oj ya' María. 20Ha' xab'en ya' Marta to lan̈an yapni Comam, x'eltij ya' chawal yin̈, wal ya' María, xcan tz'on̈noj ya' yul n̈ah. 21Xalni ya' Marta tu' tet Comam: —Mamin, ta ayach b'eti' yet tx'oj ye sc'ul hin nohan, machmi xcami. 22Waxan̈ca xcam hin nohan, wohtajan to sunil tzet cha k'an tet Comam Dios cha' Comam tawet, ẍi ya'. 23—Ha noh tu', ẍpitzc'aojcan̈. ẍi Comam tet ya'. 24—Ho' Mamin, wohtajan to ẍpitzc'aojcan̈ hin nohan yet ẍpitzc'aojcan̈ hej camom yin̈ slahub'al tz'ayic. ẍi ya'. 25—Hayin chin pitzc'acan̈ camoman, hayin ẍwa' sk'inal anmaan. Mac cha' yuluj sc'ul win̈an, waxan̈ca ẍcam snimanil, ẍtic'a ehojc'oj. 26Hantaj mac itzitzto cha' yuluj sc'ul win̈an, maẍtic'a ẍcamoj. ¿Chim hawa' yuluj ha c'ul yin̈ tzet ẍwal ti'an? ẍi Comam tet ya'. 27—Ho', Mamin. Ẍwa' yuluj hin c'ulan to hachti' Cristo hach, hachti' Sc'ahol Comam Dios halb'ilcanoj ta chul satyib'an̈k'inal ti'. 28Lawi yalni ya' Marta hune' tu' xmeltzo ya'. Xalni ya' tet snoh yin̈ sahwil: —Ayxac'oj ya' Cuywaom b'eti', chach yawte ya'. 29Man̈e yab'e ya' María tzet xal snoh tu', x'ahna lemna ya' xto ya' yilnoj Comam. 30Maẍto ch'apni Comam Jesús yul con̈ob', aytoayoj b'ay xchaot yu ya' Marta. 31Hantaj anma ayc'oj sc'atan̈ ya' María yu ya'ni snimanil sc'ul, ha' xilni yah lemna ya', x'oc tzujnuj yin̈ ya', ham yalni ta ẍto ya' ok'oj sat b'ay mujb'il snoh. 32Ha' x'apni ya' b'ay ay Comam, x'ay jahnoj ya' yin̈ sat, xalni ya': —Mamin, ta ayach b'eti' yet tx'oj ye sc'ul hin nohan machmi xcami. 33Ha' xab'en Comam yok'can̈ ya' María b'oj anma tzujan yin̈, x'oc b'isc'ulal yu Comam, xtz'a'can̈ sc'ul yilni. 34Xalni Comam: —¿B'ay xe muj he noh tu'? ẍi Comam. —Ton̈ jila' Mamin, ẍi heb'ya'. 35Lawitu' x'ok'paxcan̈ Comam. 36Ha' xilni anma hune' tu', xalni heb'jetb'i: —Caw yeli, xahan ay naj camom tu' yu ya' ti'. 37Ay mac xhalni paxoj: —Ta xhajlo sb'ak' sat naj machu yilni yu ya' ¿tox mach xu yan̈ten ya' naj Lázaro ti' yun̈e mach ẍcam naj? . 38Yuxin xcam oc b'isc'ulal yu Comam. X'apni b'ay mujb'il ya' Lázaro tu'. Yul hune' n̈ahch'en, hat mujb'il ya'. Quetxancoj hune' ch'en smajiloj. 39—Iwejiloj ch'en smajil ti'. ẍi Comam.Xalni ya' Marta: —Mamin, scan̈xa tz'ayic scam hin noh ti'an, ayxam sam. 40—¿Tox mach xwal tawetan, ta chawa' yuluj ha c'ul win̈an chawila' scan̈il ye smay Comam Dios? ẍi Comam tet ya'. 41Lawi yilaxiloj smajil ch'en, xt'an̈xican̈ Comam satcan̈, xalni Comam: —Mam, ẍwa' yuch'antioẍ tawetan haxca chawab'e tzet ẍwalan. 42Wohtajan to ẍtic'a ha wab'etoj tzet ẍwalan. Ẍwal hune' ti' tawetan yu hantaj anma yamanc'oj ti', yun̈e ya'ni yuluj sc'ul to hach xquin hawatijan. 43Lawi yalni Comam hune' tu' x'awi yin̈ ip, xalni: —Lázaro, ahan̈lin̈noj cat haweltij. 44X'eliloj ya' Lázaro tu', chulb'ilcoj k'ape yin̈ sk'ab' ya' b'oj yoj, pichb'il pax sat ya'. Xalni Comam: —Holwejiloj k'ape tu' yin̈ ya', tijab' ya'. 45Anma yamanc'oj sc'atan̈ ya' María tu', xil tzet xu spitzc'acan̈ ya' Lázaro, yuxin tx'ihal heb'jetb'i xa' yuluj sc'ul yin̈ Comam. 46Yaja' ay hunk'aan heb'naj xb'ey halnoj tet heb'naj fariseo tzet xu Comam b'etu'. 47Yuxin sk'umla sb'a heb'naj fariseo tu' b'oj heb'naj swi'al yin̈ heb'naj sacerdote b'oj hunk'aanxa heb'naj swi'con̈ob', chalni heb'naj: —¿Tzet wal juten naj Jesús ti'? K'a' tx'ihalxa c'ayb'alc'ule chu naj. 48Ta ton̈e ẍjila', sunil jetcon̈ob' cha'a' yuluj sc'ul yin̈ naj, tajca yu hune' tu' cat yul heb'naj ah Roma shucha'ayoj yatut Comam Dios, cat sc'ayniloj heb'naj co con̈ob'. 49Xalni naj Caifás, naj swi'al yin̈ heb'naj sacerdote yin̈ hune' hab'il tu': —Hexti' caw matzet heyohtaj. 50Mache txumu to k'a' c'ul ta ẍcam naj ti' seleloj sunil anma, yun̈e mach ẍc'ayiloj co con̈ob'. 51Yaja' mat yuluj swi' naj xitij hune' tzet xal naj tu', to iptzeb'il yala' naj. Haxca ha' naj swi'al ye yin̈ heb'naj sacerdote yet hune' hab'il tu', yuxin xa' Comam Dios yala' naj to ẍcamoj Comam Jesús seleloj con̈ob' israel. 52Yaja' mat han̈c'aoj yu con̈ob' israel xcam Comam, xcam pax Comam yu shunb'ancoj sunil yuninal Comam Dios pujantoj satyib'an̈k'inal ti'. 53Yuxin hatax tu' ichi sk'umlan sb'a heb'naj tzet chu spotx'ni heb'naj Comam Jesús. 54Yuxin matxa ch'ec' Comam yin̈ sajsajil xol heb'naj ah Judea, to shec'toj sb'a Comam yul hune' con̈ob' Efraín sb'ih, cawilal hune' tajin̈ witz ac'al, hat x'eh Comam b'etu' b'oj heb'ya' ẍcuywi yin̈. 55Lan̈anxa yayiloj k'in̈ snab'aniltij scolb'anil heb'ya' israel, chec'tze anma israel yul con̈ob' Jerusalén. Yet maẍto ch'ichicoj k'in̈ tu' tx'ihal anma nahat speto ch'apni Jerusalén yu syijyen sajn̈en sb'a. 56Ch'ec' sat anma b'ay ay Comam. Yet yamanc'oj heb'jetb'i yamak' yatut Comam Dios, chalni tet hunun: —¿Matxam chuluj naj Jesús tu' yin̈ k'in̈ ti'?. 57Haxca xal heb'naj fariseo b'oj heb'naj swi'al yin̈ heb'naj sacerdote ta b'ayn̈etic'a ch'ilot Comam, cat sto hal-laxoj tet heb'naj, cat stzab'lax Comam.


Copyright
Learn More

will be added

X\