SAN JUAN 10

1Xalni pax Comam tet heb'naj: —Yin̈ caw yeli ẍwal teyetan, ta ton̈c'a ch'octoj hunuj naj yul speyab' no' canelu, mat yuluj spultail ẍca yoctoj naj, yin̈ caw yeli elk'om hune' naj tu'. 2Yaja' wal naj ch'octoj yul spultail peyab', ha' naj tu' caw yeli stan̈eomal no' canelu tu'. 3Ẍhajlax te' pulta tet naj yu naj ẍwayn̈en no' cat yoctoj naj. No' yet naj tu' k'aynaj no' yin̈ yul snuk' naj; hununtajil yawten naj no' yet haxca ay sb'ih hunun no' yu naj. Lawitu' shajniltij naj no', 4ẍb'ab'i naj sataj no', cat yoc tzujnuj no' yin̈ naj, haxca k'aynajxa no' yin̈ yul snuk' naj. 5K'inaloj ta ay hunuj naj comon ch'apni, ton̈em xiwiloj no' tet naj haxca mat k'aynajoj no' yin̈ naj, mat helanoj no' yin̈ yul snuk' naj. 6Xal Comam hune' cuywab'al ti' tet heb'naj, yaja' maẍtic'a xtxum heb'naj tzet chaliloj. 7Xalni Comam Jesús hunecxa tet heb'naj: —Yin̈ caw yeli ẍwal teyetan, haca' ye spultail speyab' no' canelu hactu' wean. 8Yet maẍto chin hulan, ay heb'naj xhul haca' scolomaloj heyet. Haca' hunuj elk'om ch'octoj yul speyab' no' canelu, hactu' ye heb'naj sunil. Yaja' mactaj yet Comam Dios mach xab'etoj tzet xal heb'naj. 9Hayin ti'an lahanin b'oj spultail speyab' no' canelu tu'an. Mactaj ch'octoj yul spultail peyab' tu', ẍcolchaoj, haca' hunuj no' canelu chul ec' yul speyab' cat yeltij lowoj, hactu' chub' hunk'aan tu'. 10Ay heb'naj haca' elk'om chu yuli, ton̈e chul elek' b'oj potx'wal. Yaja' walinan xquin hul wa'a' k'inal mach stan̈b'al tet anmaan, yun̈e caw tx'ihal sc'ulal sc'ul Comam Dios schab'canoj. 11Hayin ti'an lahanin b'oj naj tan̈eom canelu caw c'ulan. Naj tan̈eom canelu c'ul shin sb'a naj scam yin̈ scanelu. 12Yet ton̈e ẍtohlalax hunuj naj ẍtan̈en no', mataj naj caw yahaw, yet chilni naj yapni no' oj, stin̈chancan naj no' canelu cat yelcan̈ naj. Ch'elcan̈ naj haxca mat yetoj naj no', ha' chul no' oj, cat stzab'niay no' hunuj no', cat spaxtiẍna no' yak'b'il. 13Ch'elcan̈ naj haxca ton̈e tohlab'il naj, mach ẍcam sc'ul naj yin̈ no', haxca mat yetoj naj no'. 14- 15Hayin ti'an lahanin b'oj naj tan̈eom canelu c'ul tu'an. Mactaj wet-xaan, lahan b'oj no' canelu. Caw wohtaj hin b'a b'oj hin Maman. Haca' we b'oj hin Mam tu'an, johtaj co b'aan, hactu' we pax b'oj mactaj wet-xaan, johtaj co b'aan, ẍwa' camoj hin b'a yin̈ mactaj wet-xa tu'an. 16Ayto pax hunk'aanxa mac ch'ocoj wetojan, nantic'a yeyi. Yilal winojpaxtijan, cat syijyenoj tzet ẍwalan. Hune'xan̈e chub'can̈oj syamanil wetojan, hayinn̈e chin ocoj stan̈eomaloj yetan. 17Xahan ayin yu hin Maman, haxca ẍwa' camoj hin b'aan, yaja' lemb'il chin chab' pax hin k'inal hunecxaan. 18Ẍwa'a' camoj hin b'aan haxca caw ch'el yin̈ hin c'ulan. Mach mac chu yiniloj hin k'inalan ta mach sje hin c'ulan. Ta ch'el yin̈ hin c'ulan chu wa'ni camoj hin b'aan, yet chalnoj pax hin c'ulan cat hin chanoj hin k'inal tu' hunecxaan, haxca ha' ti' schej hin Mam wub'an. 19Yu tzet xal Comam tu', spohtoj sb'a heb'naj ah Judea hunecxa. 20Ay heb'naj xhalni: —¿Tzet yuxin cheyab'etoj tzet chal naj ti'? To loco naj, aycoj hune' yespíritu naj matzwalil yin̈ naj. 21Hunmajanxa heb'naj xhalni: —K'inaloj aycoj hune' yespíritu naj matzwalil yin̈ naj, ¿tom hacti' stzotel naj? Haca' yeyi, ¿tom xin chu shajni naj matzwalil sb'ak' sat hunuj naj maẍtic'a chu yilni? . 22Yet hunec tu', ch'ec'tzelax sk'in̈ yatut Comam Dios yul con̈ob' Jerusalén; c'uxan ha tu' ch'ay chew. 23Lan̈an yec' Comam Jesús stin̈ahil yatut Comam Dios, hune' aycoj sb'ih ya' rey Salomón yin̈. 24X'oc hoynoj heb'naj ijb'alom ah Judea tu' yin̈ Comam, chalni heb'naj: —Yehn̈e scab'con co c'ul tawin̈an. Yin̈ caw yeli ta hachti' Cristo hach, mak'b'il hawalniloj jetan. 25Xta'wi Comam: —Xax wal teyetan, yaja' macheya' yuluj he c'ul. Hej tzetet cheyil wuni yu scan̈il ye hin Maman, ha' ẍyeniloj ta ay yelapnoj wean, 26yaja' macheya' yuluj he c'ul win̈an haxca matex wetojan. 27Mactaj wetan, chab'e tzet ẍwalan, wohtajpaxan mactaj. Haca' yoc tzujnuj no' canelu yin̈ stan̈eomal yet, hactu' yoc tzujnuj hunk'aan tu' win̈an. 28Hayin ẍwa' k'inal mach stan̈b'al tet hunk'aan tu'an, mach b'ak'in̈ ẍc'ayotoj, machca mac chu yiniloj yul hin k'ab'an. 29Hin Mam x'a'ni hunk'aan tu' wetan, k'a' ay scan̈il ye sataj hunujxa maca, mach mac chu yiniloj hunk'aan tu' yul sk'ab' hin Mam tu'an. 30Hayin b'oj hin Maman, hunen̈e jean. 31Xinipaxcan̈ heb'naj sch'en, sc'ojnicamoj heb'naj Comam yalni. 32Xalni Comam tet heb'naj: —Tx'ihal tzet c'ul ẍwu te xol yu scan̈il ye hin Maman, ¿yu mi hune' tu' yuxin chin he c'ojcamoj heyalnian? ẍi Comam. 33—Mat yuuj tzetet c'ul xawu, yuxin chach co c'ojcamojan, to haxca tx'oj chawal yin̈ Comam Dios yet chawalni ha b'a Diosal, c'ajam to comon anman̈e hach, ẍi heb'naj. 34—Yum Comam Dios b'ay ẍcawxi he c'ul heyalni chalayoj: Hayin ẍwalan to diosex, ẍiayoj. 35Machu co hec'ni tzet tz'ib'n̈eb'ilcanoj. Ta Comam Dios haln̈e dios yin̈ mac ẍchani stzoti', 36hajinxaman, to ha' Comam Dios xquin sic'lenan xquin yanitij satyib'an̈k'inal ti'an, ¿tzet yuxin cheyala ta tx'oj ẍwal yin̈ Comam Diosan, yet ẍwalnian ta hin Sc'ahol Comaman? 37Ta mach ẍwu b'aytet chu hin Maman, majab' cheya' yuluj he c'ul win̈an. 38Yaja' ta lan̈an wuni b'aytet chu hin Maman, waxan̈ca macheya' yuluj he c'ul yin̈ tzet ẍwalan, yet ay heya'ni yuluj he c'ul win̈ yu tzet ẍwuan. Hactu' chu he txumnuj to hayin b'oj hin Maman, hunen̈e jean. 39Ha' xab'en heb'naj tzet xal Comam xmeltzo snab'al heb'naj, stzab'ni heb'naj Comam yalni, yaja' xcolpaloj Comam yul sk'ab' heb'naj. 40Lawitu' xto Comam sk'axepal ha' niman Jordán. Hat x'eh Comam b'ay xi' ha' anma yu ya' Juan yet x'ichitij. 41Tx'ihal anma x'apni ilnoj Comam b'etu', xalni heb'jetb'i: Mach hunuj c'ayb'alc'ule sye ya' Juan jet, yaja' st'in̈anil xal ya' yin̈ sunil tzet ye ya' Jesús ti'. 42Yuxin tx'ihal anma xa' yuluj sc'ul yin̈ Comam b'etu'.


Copyright
Learn More

will be added

X\