SAN JUAN 1

1Yet maẍto tzetet watx'inaj, ayxatic'a hune' mac Tzoti' sb'ih. Hune' mac tu' hun ye b'oj Comam Dios, caw Dios paxoj. 2Yet yichob'anil ayxatic'a Comam Tzoti' sb'ih tu' b'oj Comam Dios. 3Xacoj Comam Dios Comam Tzoti' sb'ih tu' yu swatx'encan sunil hej tzetet. Mach hunuj tzetet watx'inaj ta mataj xwatx'eni. 4Yin̈ Comam Tzoti' sb'ih tu' aycoj co k'inal. Ha' Comam ch'a'ni co k'inal tu', ha' ch'a'ni sajilk'inal tet janma. 5Hune' sajilk'inal tu', ha' ẍmujli xol k'ejholo, k'ejholo tu' mach ẍc'oji sb'ut'nitan̈oj sk'ak'al. 6Ay hune' ya' ab'iltij yu Comam Dios, Juan sb'ih. 7Xhul ya' ya'a sb'a yin̈ Comam ch'a'ni sajilk'inal tu' yun̈e sunil mac ch'a'ni yuluj sc'ul yin̈ Comam. 8Ya' Juan tu', mataj ya' sajilk'inal, to ton̈e xhul ya' ya'a sb'a yin̈. 9Ha' Comam xhul satyib'an̈k'inal ti', ha' caw yeli sajilk'inal, ẍmujli yin̈ yanma sunil anma. 10X'ehc'oj Comam satyib'an̈k'inal ti'. Waxan̈ca xacoj Comam Dios Comam Tzoti' sb'ih tu' swatx'enoj satyib'an̈k'inal ti', yaja' yet x'ehc'oj Comam b'eti', mach xtxum anma mac anmail. 11Xhul Comam xol tzet watx'eb'il yu, yaja' mach xchaot yu yet con̈ob'. 12Wal mactaj xchani, x'a' yuluj sc'ul yin̈, sani Comam Dios sc'ulch'anil tet x'occan yuninaloj Comam. 13X'occan yuninaloj Comam, matoj haca' chu co pitzc'a yin̈ co mam co mi', matca hacaoj chal sc'ul hunuj naj winaj. Hunk'aan tu' ch'occanoj yuninaloj Comam Dios haca' chal sc'ul Comam. 14Comam Tzoti' sb'ih tu', xacoj sb'a anmail, x'ehc'oj co xol. Xjil smayan. Hune' smay tu', yetwanojn̈e yiptzil Sc'ahol Comam Dios yeyi. Caw st'in̈anil chala. Ha' sc'ulal sc'ul Comam Dios ayc'oj yin̈, ha' sye jet. 15Hactu' xute ya' Juan yalni yin̈ ip yin̈ Comam Tzoti' sb'ih tu': —Mac tzujantij win̈an, ha' k'a' ay yelapnoj yeyi, haca' xu walni teyetan, k'a' caw ec'b'alto tin satajan haxca ayxatic'a yet maẍto chin pitzc'aan. 16Co hunilon̈ ẍco cha sc'ulal sc'ul Comam Tzoti' sb'ih tu', mat hunelojn̈e xco cha, to stohb'alk'inaln̈etic'a. 17Yul sk'ab' ya' Moisés xac'oj Comam Dios sley; yin̈xa Comam Jesucristo, xa' Comam sc'ulch'anil sc'ul jet b'oj st'in̈anil. 18Mach hunuj mac xax ilni Comam Dios, to han̈c'a Sc'ahol Comam, Diostic'a paxoj, ayn̈etic'acoj sc'atan̈, ha' xhul yenoj jet tzet ye Comam. 19Yet hunec, xatoj heb'naj ah Judea ay yul con̈ob' Jerusalén hunk'aan heb'naj sacerdote b'oj heb'naj levita, sk'amb'e' tet ya' Juan: —¿Mac anmail hach? . 20Xalni ya' st'in̈anil, mach xeb'a ya': —Mat hayinoj Cristo hinan. 21Sk'amb'en heb'naj yin̈ scayel: —¿Mac anmail hach chaltu'? ¿Tom hachti' ya' Elías? ẍi heb'naj. —Machoj, mat hayinojan, ẍi ya'. —¿Mato hachti' schejab'lom Comam Dios chul yeyi? ẍi heb'naj. —Machoj. 22Sk'amb'en heb'naj hunecxa: —¿Mac anmail hach chaltu'? Hal jetan, ha' jinitoj spaj ha tzoti' tet heb'naj xcon̈ anitijan. ¿Tzet chawute hawalni? . 23Xta'wi ya': —Hayin ti' chin yal ya' Isaías schejab'lom Comam Dios yet stz'ib'n̈encan ya': Ay hune' naj ch'awi b'et yul tajin̈ witz ac'al, chalni naj: Watx'ewejc'oj heyanma haxca chul Comam Jahaw, ẍi naj. 24Fariseo heb'naj x'alaxtoj k'amb'enoj tet ya' Juan tu', xalni heb'naj: 25—¿Tzet yuxin chawa' ha' yi'a' anma ta mat hachoj Cristo hach, matca hachoj ya' Elías, matca hachoj hune' schejab'lom Comam Dios chul yeyi? . 26Xalni ya' Juan tu' tet heb'naj: —Hayin ti'an ha'n̈e ha' ẍwa' yi'a' anmaan, yaja' co xol ti' aycoj hune' ya' matto heyohtajoj. 27Ha' ya' ti' tzujantij win̈an, hasta hin puhniloj xtx'an̈al xan̈ab' ya'an, matzet ẍwaliloj ẍwab'ean,. 28Scawilal con̈ob' Betania, sk'axepalic'toj ha' niman Jordán, b'ay cha' ya' Juan ha' yi'a' anma, hat xb'ey heb'naj tu' sk'amb'e' tet ya'. 29Yet hunxa tz'ayic, ha' xilni ya' Juan to lan̈an yapni Comam Jesús sc'atan̈ ya', xalni ya': —Ilwejc'anab'i, hune' ya' chul ti', ha' ya' xa' Comam Dios ocnojcoj ju xahanb'alil haca' no' canelu ch'a'lax xahanb'alil, hactu' chu yul ya' yinojiloj co mul co hunilon̈ ayon̈ satyib'an̈k'inal ti'. 30Ha' ya' ti' xwal teyetan: Hune' ya' tzujantij win̈an, k'a' ayto yelapnoj ye ya' tin satajan, haxca ayxatic'a ya' yet maẍto chin pitzc'aan, quin chi teyetan. 31Yet yalan̈to mat wohtajoj ya'an, yaja' xquin hul wa'a' ha' yi'a' anmaan, yun̈e yohtajn̈en jet con̈ob' israel ya'. 32Xalni pax ya': —Xwil stit Comam Espíritu Santo yul satcan̈an haca' hune' no' palamuẍ, xcan yin̈ ya'. 33Yalan̈to tu' mat wohtajojan mac anmail ya', yaja' ha' mac xquin anitij wa'a' ha' yi'a' anmaan, ha' xalni wetan: Mac chawila' yayojiloj Espíritu Santo yib'an̈ cat scan yin̈, ha' ch'a'noj Espíritu Santo yib'aloj ha' anma, ẍi Comam Dios wetan. 34Hayin caw xwilan, yuxin ẍwalan ta ya' ti' Sc'ahol Comam Dios yeyi. 35Yet hunxa tz'ayic hat ay ya' Juan b'etu' b'oj cawan̈ heb'ya' ẍcuywi yin̈. 36Ha' xilni ya' yec'toj Comam Jesús, xalni ya': —Ilwejc'anab'i, ha' ya' ti', xa' Comam Dios ocnojcoj ju xahanb'alil haca' no' canelu. 37Ha' xab'en heb'ya' cawan̈ tzet xal ya', x'oc tzujnuj heb'ya' yin̈ Comam. 38Yet xmeltzo t'an̈na Comam, xilni to tzujan heb'ya' yin̈, xalni Comam: —¿Tzet che saya? ẍi. —Rabí, ¿b'ay ayach? . (Rabí tu' Cuywaom chaliloj.) 39—Ton̈wej jila', A las cuatroxami.Xto heb'ya' yilnoj b'ay ay Comam. Hat xcan heb'ya' sc'atan̈ Comam. 40Yin̈ heb'ya' cawan̈ x'ab'en tzet xal ya' Juan tu', ha' heb'ya' xto yin̈ Comam, Andrés sb'ih hune' ya', yuẍtaj ya' Simón Pedro ye ya'. 41Lawi stzotel ya' Andrés b'oj Comam, xto ya' saynoj ya' yuẍtaj, xalni ya' tet ya': —Xchalo ya' Mesías juan, (Mesías, Cristo chaliloj, hune' mac Sic'leb'il yu Comam Dios.) 42Xijb'atoj ya' Andrés yuẍtaj tu' b'ay ay Comam Jesús. X'oc t'an̈noj Comam yin̈ ya' Simón tu', xalni Comam: —Simón, sc'ahol ya' Juan, tinan̈ Cefas ch'ocojcan ha b'ihoj. (Cefas tu', Pedro chaliloj. Pedro tu', ch'en chalpaxiloj.) 43Yet hunxa tz'ayic, x'oc yin̈ sc'ul Comam Jesús sto yul scuenta Galilea. Schaniayoj Comam ya' Felipe, xalni tet ya': —Ocan̈ tzujnuj win̈an. 44Yetcon̈ob' sb'a ya' Felipe, ya' Andrés b'oj ya' Simón Pedro. Ah Betsaida heb'ya'. 45Lawitu' xto ya' Felipe saywal yin̈ ya' Natanael, xalni ya' tet ya': —Xchalo ya' b'ay tz'ib'n̈eb'il yu ya' Moisés yul te' libro yet ley, b'oj b'ay tz'ib'n̈eb'il pax yu heb'ya' schejab'lom Comam Dios wuan, ha' ya' Jesús ah Nazaret, sc'ahol ya' José. 46Xalni ya' Natanael: —¿Tox ay hunuj mac c'ul ch'eltoj Nazaret tu'?. Xta'wi ya' Felipe: —Ton̈c'anab' jila' Xto heb'ya'. 47Ha' xilni Comam yapni ya' Natanael sc'atan̈, xalni Comam: —Hune' naj chul ti', caw Israel naj yul sat Comam Dios, mach etal nab'il yu naj. 48Xk'amb'en ya' Natanael tet Comam: —¿Tzet xu hin hawohtajn̈enan? ẍi ya'. —Yet maẍto chach yawte ya' Felipe, xcach wil yich te' higoan. 49Xta'wi ya': —Mamin Cuywaom, caw yeli hachti' hach Sc'ahol Comam Dios, hach Yahaw Israel, . 50Xalni Comam: —Chawa' yuluj ha c'ul win̈an yun̈e ẍwal tawetan to cach wil yich te' higoan, yaja' caw ayto hej tzetet k'a' c'ayb'alc'ule ẍto hawila'. 51Xalni pax Comam tet heb'ya': —Yin̈ caw yeli, ẍwal teyetan, cheyila' shajnoj sb'a satcan̈, cheyilnoj yaojtoj b'oj yayojiloj hej yángel Comam Dios tin c'atan̈ hayin Ab'ilintij yu Comam Dios xol jet-anmail ti'an.


Copyright
Learn More

will be added

X\