SANTIAGO 5

1Hex k'alom hexti', ab'ewej. ¡Ok'an̈wej teyin̈, haxca lan̈an yul tz'ayical b'ay ch'ec'oj ya' heyanma! 2Ay he k'alomal k'a'ilxa. Ay xil he k'ap c'uan heyu holquiẍtajxan̈e yu no' ub'ul. 3Ay he melyu k'uxewxa. Ha' sk'uxewal tu' ha' ẍn̈uswaoj teyin̈ yul sat Comam Dios, chex stan̈tzenojiloj haca' stz'atoj hunuj tzetet yu k'a' k'a'. Hatic'a he k'alomal che tenb'a, ha' ẍmak'waoj teyin̈ yin̈ slahob'al tz'ayic. 4Hantaj stohol heb'naj xmunla teyin̈ mat tz'ajanoj xeya'a, ha' ẍtij scatab'il teyib'an̈, haxca chab'e Comam Yahaw sunil tzetet yok'b'alc'uleal heb'naj tu'. 5Hexti' caw cheya' tet heyanma satyib'an̈k'inal ti', sunil cheyoche. Chex b'ak'ichb'i haca' no' wacax toxa ẍpotx'laxoj. 6Anma stoholaln̈e chu che cawxecoj smul yib'an̈, machu scolni sb'a yet che potx'ni. 7Walex wuẍtaj hex wanab', niman ẍjute co c'ul jechmanc'oj yulb'al Comam Jahaw. Haca' ye naj munlawom, niman sc'ul naj yechmanc'oj yoc ha' n̈ab', nimanpax sc'ul naj yechmanc'oj yeliloj sat stz'unub' cha'a tx'otx'otx' tet. 8Hactu' je hayon̈ ti', niman ẍjute co c'ul ẍco lin̈b'an co b'a, haxca toxa chuluj Comam Jahaw. 9Hex wuẍtaj hex wanab', machon̈ a'wic'ule yin̈ jetb'i, haxin̈wal machi'atij Comam scuenta jin̈, haxca cawilxa yetij b'ay chul Comam yi'atij cuenta yin̈ anma. 10Ha' sya'tajil xhul yila'c'oj heb'ya' schejab'lom Comam Dios, b'oj snimanil sc'ul heb'ya', ha' chon̈ ec' ji'a'. 11Mac niman sc'ul ẍtecha sya'tajil yu, tzet sak'al yet. Hayon̈ti' xjab'e yalot tzet xu stecha sya'tajil yu ya' Job, b'oj tzet xu scolwa Comam Jahaw yin̈ ya' yet tzujanxa, haxca ẍtic'a stz'a' sc'ul Comam yin̈ anma. 12Wal xin hex wuẍtaj hex wanab', ay hune' tzetet k'a yilal yeyi. Ta ay tzet cheyoche heyala' macheya' b'inaoj satcan̈ maca tx'otx'otx', ni hunujxa tzetet cha' sb'a yin̈ tzet cheyal tu'. Ha' yet cheyalni: Yeli hactu' yeyi, ta quex chi, yelojab' tzet cheyal tu'. Ha' yet cheyalni: Machoj, mat hacojtu' yeyi, ta quex chi, majab' hacojtu' ye chaltu', haxin̈wal machex ya'acoj Comam yin̈ sya'tajil. 13Ta ay hunuj mac co xol b'isc'ulal yeyi, ya'ab' yoración. Taca ay mac tzalalal yeyi, sb'itn̈eab'toj smay Comam Jahaw. 14Ta ay mac tx'oj ye sc'ul co xol, yawteab' tij heb'ya' yancianoal iglesia cat ya'ni heb'ya' yoración yin̈ yawub' tu' yin̈ sb'ih Comam Jahaw, cat smasnicoj heb'ya' aceite yin̈ yawub' tu'. 15Yet caw sunil sc'ul heb'ya' anciano cha'ni heb'ya' yoración, ẍwatx'i yawub' tu', cha'ni Comam Jahaw scawil. Ta ay smul yawub' tu', sb'ut'cantan̈oj Comam smul tu'. 16Ta c'uxan ay hunujon̈ tx'oj ye co c'ul, jala'atij co mul jet hununon̈ cat ja'ni joración jin̈ yun̈e jan̈chacanoj. Ta c'ul on̈ yul sat Comam yet ẍja'ni joración, caw ay scan̈il ye joración tu'. 17Ya' Elías schejab'lom Comam, anma ya' haca'on̈ ti', yaja' sunil sc'ul ya' xa'ni ya' yoración tet Comam, sk'anni ya' ta macha' ha' n̈ab'. Yictaj scan̈ hab'il mach xa' ha'. 18Haxa xa'ni ya' yoración hunecxa, xa'ni paxcan̈ ha', xa'ni tx'otx'otx' tzet slo anma. 19Hex wuẍtaj hex wanab', ta ay hunuj mac co xol ti' chiloj snab'al yin̈ cuywab'al st'in̈anil yeyi, yaja' ẍco meltzocoj yin̈ Comam, 20yin̈ hactu' lan̈an jiniloj hune' mac tu' yin̈ xtx'ojal b'ay aycoj, ẍcolchacanoj tet camical, sunil smul ẍtan̈can yul sat Comam.


Copyright
Learn More

will be added

X\