SANTIAGO 4

1¿B'ay ẍtitcoj hej howal b'oj ch'ach'eb'ail ch'ichican̈ te xol? ¿B'ac'anab' ẍtita? To yin̈tic'a heyanma ch'ichican̈, hat ch'ec'aytoj b'ak'o hej tzetet chal he c'ul. 2Cheyochetoj tzetet, ay heyala ch'oc sunil heyetoj, yaja' mach ch'a'lax teyet, yuxin chex potx'wayi. Ẍn̈ijn̈oncoj heyanma yin̈ mac ay tzet aya, haxca machu yoc tzetet tu' heyetoj, yuxin cheyichecan̈ howal te xol hasta che tzab'tzecan̈ he b'a. Mach heyi' b'aytet chal he c'ul haxca mache k'an tet Comam Dios. 3Taca che k'ana, macha'a Comam teyet haxca mataj chu he k'anni, yu mi heyetantoj yin̈ hej tzetet tx'oj cheyoche, yuxin che k'ana. 4Hexti' k'a' cheyochetoj hej tzetet yet satyib'an̈k'inal ti' sataj heyochen Comam Dios. Txumwejc'anab'i to mac ch'ochentoj hej tzetet chal sc'ul anma ay satyib'an̈k'inal ti', xpaq'uicoj tx'ojal yin̈ Comam. 5Mat nab'aoj chal Yum Comam to caw choche Comam ta yetn̈e Comam hune' espíritu xa' jet. 6Caw b'itzantaj ẍcolwa Comam jin̈ yu sc'ulch'anil sc'ul. Chal pax Yum Comam: Ẍpaq'uicoj Comam yin̈ anma can̈tajn̈e ye chute, wal mac huncuentan̈e sc'ul, c'ulch'an chute Comam sc'ul yin̈. 7Yuxin jawejcoj co b'a yul sk'ab' Comam. Co pahwejtoj naj matzwalil, yin̈ hactu' ch'elojcan̈ naj jet. 8Hitzojon̈wejcoj yin̈ Comam, waltu' ẍhitzojpaxcoj Comam jin̈. Awejxacan xtx'ojal xeyu. Hex cab' yetoj heyanma, yin̈xan̈e Comam chex oc t'an̈noj. 9Tacojab' he c'ul, ok'an̈wej, b'isc'uln̈ewej he b'a. ¡C'ojb'ilxa he tzeb'i! ¡Ok'an̈wej! ¡Hantaj he tzalalal pac'ojab' b'isc'ulalil! 10Ayan̈wej nianb'ail yin̈ sat Comam Jahaw wal tu' chex yi'acan̈ Comam. 11Hex wuẍtaj hex wanab', mach ẍjal sk'umal heb'ya' jetb'i. Mac ẍhalni sk'umal yetb'i cat yi'nicoj yetoj yin̈ yetb'i tu', lan̈an sman̈c'on schejb'anil Comam chaltu'. Ta ẍco man̈c'o schejb'anil Comam tu', lan̈an co palc'on yib'an̈. Ha' jet co yijye' tzet chal Comam. 12Hune'n̈e Comam Dios x'a'ni chejb'anile, hatic'a Comam juez chu ya'ni co colb'anil, mato chu scawxencoj co mul jib'an̈. Walon̈, ¿mac anmail on̈ cat co cawxencoj smul anma yib'an̈? 13Hex nahat aytoj he nab'al, cam cheyab'ecanoj, hexti' cheyala: Yet hecal cab'e chon̈ toj yul hunuj k'alom con̈ob' munlaoj hunuj hab'ilal, ẍco saya' munil c'ul, yun̈e tx'ihal co melyu ẍco cutxb'a', quex chi. 14Yaja' mat johtajoj tzet jecoj hecal cab'e. Sak'al jalni, yaja' co k'inal hayon̈ ti', lahan b'oj xob' tx'otx'otx', tinan̈ ixtan̈ jilni, hunipojxa xax c'aynacan̈. 15Yuxin ha' yet ay jalni: Ta chal sc'ul Comam Jahaw ay co cawil, ẍjub' hune' ti', mato hune' tu', con̈ chi. 16Yaja' hexti', chilann̈etic'aloj heyu, can̈tajn̈e ye cheyute he b'a cheyalni hunuj tzetet, yaja' lolo'al hune' tu', mat c'uluj. 17Yuxin ta johtaj juni b'aytet c'ul, yaja' mach ẍju, ẍjacoj co mul.


Copyright
Learn More

will be added

X\